AMOS 4:10 - Alkitab Singog In Mongondow Masa In Tanaa

¹⁰ Akuoi in mopotabá mangoi in yampoi in takit kon inimu naonda bo inta pinoangoi-Ku kon Mesir. Intau mita inta nongoguodpa in yopúon-Ku kon poparangan, bo kabaḷomu mita in agowon. Akuoi in momonu kon ḷoḷaiganmu in mayat mita inta bónea in mokonakit kon ngiung. Umpaka natua, moiko in doí doman mobui mangoi kon i-Nakó.

AMOS 4:10 ပူးပေါင်းရင်းမြစ်များ

DATU MITA 2 10:32

Kon tungkuḷ intua ki Tuhan momangkoidon mogin intok kon butá kawasa in Israel. Ki Hazael datu in Siria in nogagow kon bayongan in butá in Israel

DATU MITA 2 13:3

Tuamai in sinumorú in ki Tuhan kon Israel dá pinomayá-Neadon mako in ki Hazael datu in Siria bo ki Benhadad ki adínea in nopobui-buimai nonaḷow kon Israel.

DATU MITA 2 13:7

Tontara mita in Israel aindon iyopú i datu in Siria dá ki Datu Yoahas in dongkadon kotontara 50 inta tumotakoi kon kabaḷo, 10 in kereta in parang, bo 10.000 in tontara.

DATU MITA 2 8:12

“Nongonu sin ki Tuang in mongombaḷbí?” iḻibó i Hazael. “Kinotaauanku in moraat inta pomiaanmu kon intau in Israel,” guman i Elisa. “Turubonmu in kotá mita inta oyúon in poḷoḷukadan, moḻimod kon tayow mobiag mita inta totok in mongopia, bo monagang kon adí mita mointok bo momotak kon sian in bobay mita inta nonogusian.”

IḶUAIAN 10:27

Pinopotontogatpa doman i Tuhan gina i datu sahingga diá doman inogoinea minayá in bangusa Israel.

IḶUAIAN 10:3

Dá ki Musa bo ki Harun minayá nokipodungkuḷ kon i datu bo noguman kon inia, “Ki Tuhan, Allah in bangusa Ibrani, noguman, ‘Dapot in toonu iko doí tumungkud kon i-Nakó? Pomayádon mako in umat-Ku mayá, sinbá mosia in motaau mayá moibada kon i-Nakó.

IḶUAIAN 14:4

Baḻíon-Ku in sia motogat in gina sinbá aḷowanneadon in moiko. Táe poontong-Kudon in kawasa-Ku kon i datu in Mesir bo tontaranea mita, bá kotaauandon monia kon Akuoi naa in ki Tuhan.” Bo inaidandon intau in Israel onu inta ain pinarenta i Tuhan kon i monia.

IḶUAIAN 15:26

Guman i Tuhan, “Totu-totuudon dudui kon i-Nakó, bo aidaidon in onu inta ontongon-Ku mopia; duduiaidon in bayongan parenta-Ku. Aka aidan monimu intua, yo moiko in diábí hukumon-Ku poumáan in takit ná inta pinouma-Ku kon intau mita in Mesir. Akuoibí in ki Tuhan inta nonompia kon i monimu.”

IḶUAIAN 8:19

dapot in mososihir mita tatua noguman kon i datu, “Naa in aidbí i Allah.” Táe ki datu tatua nokopotogatpa doman bui kon gina, bo ná inta ain muna pinoguman i Tuhan, ki datu tatua doí mopandungmai kon tosingogon i Musa bo i Harun.

IḶUAIAN 9:12

Táe ki Tuhan nopotontogat doman in gina i datu, bo ná doman inta ain pinoguman i Tuhan, datu in doíbí mopandungmai kon tosingogon i Musa bo i Harun.

IḶUAIAN 9:17

Umpaka natua, iko umuranpabí doman mosiḷantud bo diápa doman ogoimu mayá in umat-Ku.

YESAYA 34:3

Mayat mita monia in diá bidon ḷobongon, táe pomayádon mako moburuk bo mobó. Buḷud mita mobaḻídon mopura popisí in koiḻigan in dugú monia.

YESAYA 50:11

Ei moiko inta moibog mopobodito kon intau ibanea, moiko in yopúonbí in tomayámu tontaní. Ki Tuhanbí in mopobaḻí intua. Moiko in rorigaanbí totok.

YESAYA 9:12

Bangusa in Israel diápa doman nomanasaḷ, umpakabí ain ihukum i Tuhan Inta Totok in mokawasa; mosia in diápa doman in tobat kon i-Nia.

YESAYA 9:13

Tuamai in tongá tosinggai in ki Tuhan in nohukum kon i itoi mita in Israel bo rayatnea. Pinongkó bo iḷumbú-Nea in uḷu bo iputnea.

YESAYA 9:17

Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong.

YEREMIA 11:22

Tuamai, ki Tuhan Inta Totok in mokawasa in noguman, “Akuoi in mohukumbí kon i monia! Intau mita moguod monia in matoibí kon parang, adí mita monia in matoibí in gogoy.

YEREMIA 15:3

Akuoi, ki Tuhan, ain nonantú kon hukuman opat norupa inta mokoondok in mobaḻíbí kon i monia: mosia in matoi kon poparangan, mayat monia in uguton in ungkú, kaanon in ḷagapan, bo indaitan in mahaḷuk turá.

YEREMIA 16:4

Mosia in matoi kotugatan in yampoi in takit inta mokopatoi, bo mosia in matoi kon poparangan andeka matoi in gogoy. Diábí tobatúmai in intau in mongombaḷ andeka moḷobong kon i monia. Mayat monia in moirarit magí mako naonda bo pupuk kon butá, bo kaanon in ḷagapan bo mahaḷuk inta mokokaan kon tapú.

YEREMIA 18:21

Táe tanaa, Tuhan, biódon mako in adí mita monia matoi in gogoy andeka matoi kon poparangan. Biódon mako in bobay mita monia kobuḻian in buḷoi ḷoḷaki bo adí; biódon mako in ḷoḷaki mita matoi popisí in yampoi in takit bo intau moguod in matoi kon poparangan.

YEREMIA 48:15

Moab bo kotánea mita in irimumudon, bo intau mita moguodnea inta mongopia ain iḻimod. Akuoi in nosingogdon. Akuoi in datu, Tuhan Inta Totok in mokawasa.

YEREMIA 49:26

Kon singgai tatua tayowmobiagnea mita in matoidon kon daḷan mita in kotánea, bo bayongan in tontaranea rimumudon.

YEREMIA 5:3

Inta sinuntut i Tuhan in kososatiabí. Ki Tuhan in noḷubok kon i monimu, táe diá in pandung monimu. Sia in nomutuk kon i monimu, táe moiko in doí sambokon. Moiko in pamandot, bo doí mogogai in mogaid kon dosamu mita.

YEREMIA 6:11

Torú-Mu kon i monia doman in modidí kon dodobku, Tuhan! Mobogat totok in momondam.” Bo ki Tuhan in noguman, “Popoaidon in torú tatua kon mongoadí mita kon daḷan mita moḷoben bo kon tayow mobiag mita inta noyosipun. Ḷoḷaki bo bobay in domokonbí, bo intau inta nogoguyangdon in diábí kotaḻiban.

YEREMIA 9:22

Mayat in noiukatdon magí-mako naonda bo apat kon tudu in butá; naonda bo gandum inta ain iratab bodongka sinaḷáan bo diádon sinipun bui. Tuata in koyow i Tuhan inta musti potaauku.”

HOSEA 11:5

Intau mita in Israel tatua in doí mobui mangoi kon i-Nakó, tuamai in mosia musti mobui mayá in Mesir, bo bangusa in Asyur in momarentadon kon i monia.

YOËL 2:20

Tontara in pangkoḷá nongkon utuan in untunon-Kubí, tongosilai in buntunon-Ku pobayá in rawang in bungaion. Bo inta kon pipidan dotá in muna in undudon-Ku pobayá ná Laut Mati, inta kon pipidan kon tumi in undudon-Ku pobayá in Dagat Toyuak. Awaknea mita in mobondotdon. Mosia in putúan-Ku sin nopororigadon kon i monimu.

IMAMAT 26:16

yo hukumon-Ku in moiko. Popoangoi-Ku in bodito kon i monimu, mogobu bo mopatú inta diá koundaman, modapot in matamu mobilogdon bo kobobiag monimu in diádon mosanangmai. Moiko in monompinomuḷabí táe diábí moikaan kon bungainea, sin musungmu mita in momangoi bo monaḷow kon i monimu bo mogagow komintan kon onu inta pinomuḷa monimu.

IMAMAT 26:25

Popomuká-Ku in parang kon sigad monimu sin mohukum kon i monimu popisí in moiko ain iḻimimpat kon dodandian-Ku takin monimu. Bo aka moiko moyosipun kon kotámu sin motayak kon motototuḷung, yo popoangoi-Kudon in takit inta diábí kotompiaan, dapot in moiko pakisadon tumungkud kon musungmu.

AMOS 4:6

Akuoibí inta nopouma in bodito malarat in gogoy kon sinangkub in kotámu, táe moiko in diábí nobui mangoi kon i-Nakó.

AMOS 8:3

Kon singgai tatua dondong mita kon komaḻig in mobaḻídon ombaḷ. Kon bayongan in tampat moyotapatdon in mayat inta ain iḷumbú inumuni-uni mako.”

HAGAI 2:17

Akuoi in nopoonagdon in tompot mopatú bo uyan batu sin morimumud kon bayongan in bungai in pinomuḷa kon gobámu, táe moiko in doí doman mobui kon i-Nakó.

ULANGAN 28:21

Bayongan in takit moiuma kon i monimu, modapot in buitnea diádon tobatúmai in intau nongkon i monimu in mogutunpa kon butá inta iḻitúan monimu tatua.

ULANGAN 28:22

Ki Tuhan in mohukum kon i monimu pongin takit mita inta dumodakit, bobagá mita bo patú. Sia in mopoangoi doman in patú inta mokoingkag kon butá bo tompot inta mokopokak dá bungai in boyómu mogoguyaat. Bodito mita tatua in tantú moiuma kon i monimu modapot in moiko moyopú.

ULANGAN 28:60

Takit mita inta mokoondok inta inontong monimu kon Mesir moiuma kon i monimu, bo moiko in diábí koundaman.

ULANGAN 7:15

Moiko in ḷukadanbí i Tuhan nongkon bayongan in takit bo poyayúon nongkon bayongan in bodito inta inontong monimu kon Mesir, táe bodito mita tatua in popouma-Neabí kon musungmu mita.