ZEFANYA 3:17 - Allah Wene Fano Wene Hupla Inane

¹⁷ Hit he, hineisena Tuhan Allah Omame Mondok Hokho mene a'nogo nen awe a'ma hinobagaluk fethinarek werek. Hit he At omameba hinomame aga lagep. Hit hinobaget he Tuhan endawimo agaiyege'luk hai hili'lago, At endawi hundik oba re, hit hineluk ket mene logouwageluk hiling-hinobagali'logo.

ZEFANYA 3:17 ပူးပေါင်းရင်းမြစ်များ

KEJADIAN 1:31

At Allah nen yi mene ti mene andi mondogat elalik waga lagaikhesik, eilenggen hasikhesikhe he, ”Yoma fano mondok elalogo fisigi higi,” iluk isikhe. A'nogo isikhesik he, o inenggi falfalik oba hubagaikhesik, wei isikhe re andi.

KEJADIAN 17:1

At Abram ebe umur 99 tahun oba, Tuhan elokhoma menlagaikhesik he, mel yagatikhe: ”An Allah nen yi mene ti mene elok hilingisigin enek a'nogo An aro. An nane hologo hilingiti logolik, nendawimo namolo anggigirek mene andiat hilingitu mondok logoino o.

KEJADIAN 18:14

An hineisena Tuhan nen elalin mene hilingisu re elo'lek nogo? Hilingisigin enego. Tugi 9 logombigen hobuk hinoba wesigin, iluk attagat yagahisigi andi hak, wesigin aro. Wagunem, Sara eak abengge takhagain o,” iluk yagatikhe.

KEJADIAN 2:2

A'nogo mondogat elalik waga lagaikhesik elugun warogo enggi sabit oba fei wagaikhesik set walogo weat welagaikhe.

MAZMUR 147:11

We At Tuhan he it afuni At oba inailorogo logolik hilingitarek mene andi inom, nen afuni Aren endawi hundik hilingninabuageluk oba eberek werek mene andi inom, inoba nek he agaiyek mondok werek.

MAZMUR 149:4

At Tuhan nen he againafuri faget endawimo agaiyek anggili'lago, Aren he afuni inendawinggen sebelfakhagarek mene inoba re inenu werek mene hilingfisikherek.

MAZMUR 78:65

Andiba re At Tuhan ebe afuni nogokhi la'luk feisakhogo menlagaikharek a'nogo higit menlagaikhe, nen ap i anggur agai hinago naluk inomame agunem hilingitarek higit hilingitikhe.

YESAYA 12:2

Eberogo nen Allah andi re an nagap telnaferek mene werek, andi nen he an nen At oba' nendawinggen eberogo himbiret welagi. Aren an nendawinggen hambuget nobagagunem he, an nailo legengge welagi. An nagap telnaferek mene re Allah andiat, At obaget an nen wuni wati logogin.”

YESAYA 12:6

Hit afuni o Sion oba welagep mene yoma sani, hinagaiyegeti logoni. Wuni hinagaiyek oba wati logoni. Israel mene ineisena Allah Mondok Horek mene andi re, Ombak-bak mondok werek, At ebe re hinanggele'ma werego, iluk wuni wati logogun.

YESAYA 18:4

Tuhan nen an noba ikhi logolik he, ”Lilengge o hup aganhan lagaikherek sambul yi mene ti mene enggen palhu sambul lilsi'norogo abolo'lek welagarek hak, nen o linggene mo eil ombak-bak fano mene hilingiterek hak, An nebe welagiba po'lima nen noba heanerogo alokhogo logolik pelakhisa waga logogin o.

YESAYA 63:1

Ap ekhe kagalek welagaikhe mene ane re yi'nogo isikhe ”Ap ekhe asu eil mep mene laberogore, ebene asungge lik loukhogo liagaisogo oba mondok along palonghogo o Edom fikhiren o Bosra wesigiluk weri'logo andi re sa nogo?” iluk heinok ugunem he, Tuhan nen onggo ikhi logolik, ”An he hineisena Tuhan, hinebe telhinabigin mene a'nogo nen, Wene fano wene waluk wagi o,” iluk ikhe. A'nogo ugunem hobuk ap kagalek welagaikhe mene a'nogo nen heinok wokhikhi logolik,

YESAYA 63:12

Nen At Tuhan Musa inom hundik logolik, enggi omame hokho meneba At enu mondok-mondok andoma lego logouwageluk, it inelokhoma i tekhogo maminget fesikhe mene a'nogo koma werek?

YESAYA 65:19

An nonggwaregen ogore Yerusalem andi faget nagaiyegesiginat, nen afuni andoma logogun mene faget he nawonogesigin. Kota andiba le iluk ogo aga logogun lek, nen lebetnisani iluk ogo kino ikhi logogun mondok legat.

YESAYA 9:6

At ebe re Daud en tagomangge mene ebe raja logolik ferinarek logogin. At omame mondok hokho logogin. Aren ferinarek logogin kwe andoma mondogat he liok-layokhogo nek were'ma mondok fanorogo logogun. O Aren ferinarek logogin oba andi re wene higithogo tegetu awene inom, wene melalek werek meneba inom higithogo hilingitu logolik yogondak huli nen hobuk huli andoma mondok-mondok logogin. Nineisena Tuhan Omame Mondok Hokho mene a'nogo nen andoma mondogat eberogo nek hilingisigin o,” isikhe.

YEREMIA 32:41

An nen it inoba fanorogo hilingfisugu mene faget nagaiyek welagi hilingi'mo re, it o kweang yiba mondok-mondok logouwageluk An nendawinggen eberogo meneba inom, Nobabut higit oba inom, Nagaiyek welagi meneba inom o yi fanorogo hilingisogo fisagain.

HOSEA 14:4

Ap Asyur mene nen telninabugun he lego. Nen wam kuda weim yabi lagaikharek mene andi nen telninabugun he legaro. Niren tugwi kembu ninonggwarek ninenggi nen agauwak hilingiti lago meneba yagati logolik, allah nineisena, iluk yagatorek andi hak, ikhi logogun legaro, neisena. Tuhan, Hat he afuni suarek mene hendawirinafendek mene o, neisena, iluk ayonggo fikhi logoino,” iluk yagaisasigi.

YOEL 2:21

Hat kweang yi hailo agi'lek hendawimo hai hikhi logoin o. Hat hobaget Tuhan nen alonghogo hilingite mene andoma ebethikhi logoin.

ZEFANYA 3:15

Tuhan nen he, hit hinaselei mene felelenghogo mugisogo wulakfisikhi logolik, hit hinoba unggum wokhisagain iluk mene a'nogo herakfisikhe o. Hit inebe re afuni Israel mene hineisena Raja a'nogo awe a'ma fethinarek werek, At Tuhan onggwaregen hilinghinobagaikhemo re, Yogondak hiren hinailoti lagep mene a'nogo hinailoti logou fugo.

ZEFANYA 3:5

Oba nen he At Tuhan ebe o kota andiba werek. Aren he mondok fano mene nek hilingiri'lago, nen, weak mene ekhe hilingiri'lago lek. O hubet hundik-handik he Aren againafuri inoba higithogo nek hilingfisili'lago. Oba nen he, it afuni o kota andiba higithogo hilingitu aple inonggot mene re inenggali higi'lek weak mene nek hilingitu welagaikharek andi.

BILANGAN 14:8

Ma re, nineisena Tuhan nit ninoba liok ikhe halok he, Aren o andoma wo'ninarek lambik, kweang mondok muli fanoma yi mene ti mene hokhorogo were'ma andoma re nit wo'nisagain o.

LUKAS 15:32

Meneat he, hat hagot yi re, wa'laga anggogo mene re, eluk agasik waga o. Longgo ikhe mene herato o, andi nen he, ninendawimo ninagaiyek hikhi logolik hilingisu meneat hilingiti lago, iluk yagatikhe,” iluk Yesus nen yagaisasikhe.

YOHANES 13:1

Nen, ohealekwe seni enu Paskah a'nogo mene nouwogeluk, at Yesus nen ”An afuni o kweangma yoma fisaluk neisena oba nambotkwe lagagin a'nogo, arat horogasi waga,” iluk, at elu welagaikhe, nen at onggwarek agoromi kweangma mene endawinggen hundik welagaikhesik, hobuk inebe abit agi'lek endawinggen hundik mondogat welagaikhe.

YOHANES 15:11

Nen, an nendawimo nagaiyek anggigirek hak, hit hinendawimo hinagaiyek hikhi logolik, hobuk hinendawimo hinagaiyek hokhorogo ikhi logobagaigen iluk, wene andi mondogat yagahisigi o.

ULANGAN 23:15

A'nogo yagaisasikhesik ekhe inom yagaisikhi logolik, ”Ap inamingmingengge misik ekhe eisena aiba nen wulibi laluk, hit hinambit hina'nobagani iluk wagu halok he, at oba haiba lan, iluk yagasu fuk.

ULANGAN 30:9

A'nogo hilingitunem, nineisena Tuhan Allah nen he, hit yi mene ti mene mondogat hilingisugun mene andi wurep oba re, hokhorogo sabuthisikhi logogin o. A'nogo sabuthisugu kwelek he, hinagainafuri hokhorogo taginafik, hinanggo hokhorogoat hilinglagik, ugun o. A'nogo wokhisikhi logolik hineabukwe yi mene ti mene awi yasugun mene ebe mondok hokhorogo oba heilarogo wokhisikhi logogin. A'nogo wokhisikhi logolik, At Tuhan endawimo agaiyek oba, hinombalak fano logouwagaluk hilinginafikhe andi hak, hit fano logouwagaluk hilinghinabigin aro.

IBRANI 7:25

A'nogo eluk mondok logolik, nit afuni faget Allah kino yagatu mondok welagarek andi nen he, nit Allah were'ma kuogeluk At oba fa'larik kugunem elok telninabimbik katokhogo fano hilingninabigin andi.