ZAKHARIA 7:12 - Allah Wene Fano Wene Hupla Inane

¹² It he inendawinggen mondok omamerek logolik were'ma nen enek he inendawinggen mondogat helep aga lagaukwa. Nen an nawene melalek it ap nabi attak welagaukwa mene omanogo inebene nen wogisasigiba nen he hologo hilingiti lagaukwa lek andi nen he An na'mage lagaikhi lagaikhe andi.

ZAKHARIA 7:12 ပူးပေါင်းရင်းမြစ်များ

2 TAWARIKH 36:13

At raja Nebukadnezar en Zedekia ba limiti logolik he, ”Hat hoba tiphogo hilingiti logogin, iluk Allah enuba hombuk palin o,” iluk yagatikhe. Oba nen he at Zedekia nen he Nebukadnezar ane oak sagal fuluk hilingiti lagaikhe. At Zedekia nen ogore aweak omanogo herakfuluk ambotkwe sugulogo Tuhan ambit wagi'lek enggere, aren afuni Israel mene ineisena Tuhan Allah a'nogoba wesu re mondok elo'legat welagaikhe.

2 TAWARIKH 36:16

Oba nen he At Tuhan ane ugu mene omanogo puliabet fuluk he it nabi omanogo endo yaginafik, it Allah nen lakfisa wagu mene omanogo lalfalhogo hilinginafik ikhi lagaukwa. A'nogo hilingiti lagaukwa andiba re, At Tuhan anini inoba fikhe mene andiba nen lologo wulibi la re mondok elo'lek welagaikhe.

AYUB 9:4

At Allah andi re hebelek mondok logolik along werek agun hilingi'mo re, ap sa hagen, At ane sagalogo fulugen eluk mondok logou hak nogo?

MAZMUR 50:17

Hit he An nen komo wene yagahisikhi lagi mene a'nogo wanhi'legengge logolik, An Nawene Melalek a'nogo ninabit iluk herakfuluk hilingiti lagep.

KELUARAN 7:13

A'nogo hilinglagaikhe meneat he, At Tuhan nen he: ”Hit a'nogo hilingisugun meneat he, at raja endawinggen mondok haro asimbik, hit hinane esanggo holhi'lek herakfisikhi logogin o,” iluk yagaisasikhe higithogoat hilinglagaikhe andi.

YESAYA 46:12

Ap winik-wonok ikhi lagep mene yoma sani, hiren anggikhi logolik inomame agaikharek mene re yatma werek iluk anggikhi lagep mene andi re An nane hinesanggo holini o.

YESAYA 48:4

Hat hendawinggen seramsek logolik, hungguloak haro helep higit welagen andi re An nelu o.

YESAYA 6:10

A'nogo yaganetesik ekhe ikhi logolik he, ”A'nogo hilingitunem it ineilenggen higik, inesanggo holhik, futfigik, uluk it inobabut hebella'luk he An noba inambotkwe wagunem, An nen it inebe fano hilinginafi hanogore, inendawinggen helep hak harot fisigik, inesanggo tagumet fisigik, ineilenggen humun fisigik ino o,” iluk yaganete.

YESAYA 65:12

Hit mondogat hina'mage lagakhi lagep mene andi ambisangma re hinebe wa'lasugun o. Andi re An nen wolhinafigi sambul he hiren onggo isigip lek, nen An nane ugu kwelek hiren holek welagagip legat andiba hogoin. Hit he An nane sagalogo fuluk wene weak mene omanogo hilingisuogeluk enek he hinagaiyekhogo hilingiti lagep.

YEREMIA 17:1

Tuhan nen ikhi logolik, ”Hinunggulenu Yehuda mene yi sani, hit hinaweak he hinonggwarek hinendawinggenma lisu palek werek, nen mezbah unggutmo ambisang morokse'ma andoma re lisu enggat wurikweak mene helebenggen pilibuk hangge enu intan mondok werelek meneba palek werek.

YEREMIA 17:23

A'nogo isigi oba nen hit hinombawi nen An nane holfigik, futnobagagik, ikhi lagaukwa lek. It inebere inendawinggen peterek logolik nane hologo hilingiti'lek welagik, inane fa'niugu aple ogo inabirat welagik, hilingiti lagaukwa.

YEREMIA 26:19

Oba nen he raja Hizkia inom afuni Yehuda mene inomen he Mikha ebe watukwa lek. Athe Hizkia ailo agasik he Tuhan nen endawit nabuageluk kinotikhe. Andiba re Tuhan nen inoasigin iluk wenggelogo welaga mene a'nogo lisogo wanhe. Nen, yogondak he niren ninonggwarek ninoba weak hokho mene fakhouwogeluk hilingiti lago andire higira?” iluk aga.

YEREMIA 42:21

Nen yogondak he an nen nit nineisena Tuhan Allah a'nogo ane ikhe mene mondogat yagahisigi, oba nen hit he wene yagahisigi mene a'nogo higithogo hilingiti logou hinabit mondok welagep.

YEREMIA 5:3

Ibi eberogo nen he Tuhan neisena, Haren it higithogo hilingiti logouwageluk yagaisugu le'ma hangge hilingiri'lagwi. Haren it fut fouwageluk inoati lagen oba nen he iren inobakhe nene hilingiri'lagwi. Haren it lombukhogo hilingiti logouwageluk sebelogo fisikhi lagen, oba nen he iren yanggulninabuak anggili'lagwi lek. It he inendawinggen mondok omamerek logolik inaweak oba nen agam esure inabit mondok werek.

YEREMIA 7:20

An Tuhan Lego Mondok welagirek mene a'nogo nen o wene kabogetu awi yi inom, afuni inoba inom, wam, mene, paik inom, e wilibik meneba inom, kweang oba nen enggen ugu andoma inom, nanini hokho mene a'nogore andoma oba fagain o. An na'mage lagali'lago mene andi re endu wabunak nunggunem nagulu elo'lek agarek andi hak hilingiri'lago o,” iluk ikhe.

YEHEZKIEL 11:19

It he an nen inendawinggen ket mene inom, inobabut ket mene inom hilingfisambik, inungguloak helep hangge werek mene andi re, An nen waganogo wanimbik obali'mo An nane hologo hilingitarek mene wogisagain.

YEHEZKIEL 14:5

Tugwi kembu andoma mondogat oba re An nagainafuri inebe mondogat omanogo ninom eil uanhogo hilingninobagaga, oba nen he An nen onggo igin mene andiba re An nagainafuri andoma nekhengge sugulogo nambit wesugun logouwak,’ iluk ikhe o.

YEHEZKIEL 2:4

It inungguloak helep hangge logolik, An legeisogo nobagali'lagwi lek. An nen hat hebe it inoba lakhobagakhi lagi yi re, An Tuhan Lego Mondok welagirek mene a'nogo nen wene it yagaisoagaluk yagahesigin mene yi, yagaisa lanogen inoba lakhobagagin o.

YEHEZKIEL 36:26

A'nogo sobalhinabimbik An nen hinendawinggen ket mene wokhisigik, wenggelhu mene ket mene woghisigik, igin. Nen hinendwinggen helep hak omamerek welagep mene andoma re An nen agamhogo hinendawinggen fano sakhorek mene wokhisagain.

ZAKHARIA 1:2

Tuhan nen he at againafuri inoba wene yi'nogo ino iluk mimingnafe, ”O attagen enggere An nebe Tuhan Nomame Mondok Hokho welagirek mene a'nogo nen it hinambu-hinombalak inoba wenagisikhi lagagi.

ZAKHARIA 7:7

Andi re Tuhan nen ap nabi bene nen o fem attak-attak andoma o Yerusalem oba afuni inebe inangge sik-pikhogo were'ma welagaukwaba andoma a'nogo yagaisikhi lagaukwa. Andem oba afuni re o kota nen esanggo-esanggo andoma re welagaukwa lek, we abel selatan fikhit inom, barat fikhit inom he, tom alemkwe andoma nek welagaukwa.

MATIUS 13:15

It afuni yi ineilenggen higik, inesanggo holhik, inendawimo ebetik, ilugen he, inobabut hebelumo hobuk an nen fanorinabinogo iluk he, iren inendawimo pugagik, inesanggo tagum agik, ineilenggen mum agik, ineranenat ineilenggen pugetfigik, hilingitukwa o, iluk Allah nen isikhemo Yesaya nen lisu palogo fesikhe andi higit asuageluk yagaisikhi lagi o.

LUKAS 8:12

Kwe ebekhalem pisikhe andi ebe re, it afuni ekhe Allah ane inesanggo holharesik, eberogoat iluk wanhunem, Allah nen inebe telinabinogo iluk, Iblis wagaresik he, wene inendawimo nen henogo waluk lagarek andi aro.

KISAH PARA RASUL 28:27

It afuni yi, ineilenggen higik, inesanggo holhik, inendawimo ebetik, imbigen, inobabut hebelumo hobuk an nen fanorinabinogo iluk he, iren inendawimo puk agik, inesanggo tagum-tagum hilingitik, ineilenggen mum asuageluk ineranenat mumeratik, hilingitukwa o, iluk Allah Areagun en isikhemo, Yesaya nen lisu palhikhe andi,” iluk yagaisasikhe.