YOHANES 5:17 - Allah Wene Fano Wene Hupla Inane

¹⁷ A'nogo isukwa meneat he, at Yesus nen wene mel yagaisasikhe: ”An neisena enggi ekhe kamo igi'lek, o yogondak yi inomat hilingnafu mondok welagarek hak, an a'nogoat higirinafu welagi o,” iluk yagaisasikhemo,

YOHANES 5:17 ပူးပေါင်းရင်းမြစ်များ

MAZMUR 65:6

Ninane hesanggo holuk, ninomame asuageluk, elalin mene hilingisogo, ninebe telninafendek andi. Afuni inunggulenu lombok, i laut yenggelek esanggo-esanggo mondogat hoba fanggoksek logolik werek.

YESAYA 40:26

Sa nen hesagalenggen poroma elalhikhe iluk he, heilenggen pogoroba liago logolik furati logoin o! Aren he ap tentara esa eratarek hakhogo halogo fisikherek, Aren hit hinebe abirengge re ti nen werek iluk elu welagaregat, Arenat it inenu lombok wolinaferek. At Tuhan Omame Mondok Hokho hilingi'mo re we misik iluk ogo ekhe longgo ikherek lek.

MATIUS 10:29

Sue wulue andi onggo miren palharek nogo. Ebe pire mene onggo uang sen mondok endebat mene misigat oba wanharek anggigi. A'nogo meneat he, hineisena Allah pogoroba mene nen, sue andi pokhogo puago, iluk oan igi'lek werek kwelek, ekhe kweangma pokhogo pikherek lego.

YOHANES 10:36

An nen he, Nebe Allah amlogo, igi andi nen, Allah enu weagete, iluk nenahalok ikhi lagep? Allah nenat nayonggo fuluk eberogoat nebe wenagaisogo kweangma yoma laknobagai wagaikhe meneat he, nenahalok ikhi lagep.

YOHANES 14:10

An nen neisena nemberek hundik, nen, neisena nen an nemberek hundik, welagorek andi, hat futfikhi lagen lega?” iluk yagatikhesik he, it mondogat yagaisikhi logolik, ”An nen wene yagahisigirek andi, an nendawimo nen kagalogo yagahisigirek fuk. Lego. We an neisena nemberek hundik logolik, an naneba nen igik, nenggiba nen hilingitik, igirek mene andi, at onggwaregenat hilingiri'logo o.

YOHANES 5:16

A'nogo yagaisasikhemo re, it afuni Yahudi mene inenggi sabit oba Allah faget weat werek kwelek, Yesus nen ap a'nogo ou fano higitikhe andi nen, at Yesus ebe weaget fouwogeluk isukwa.

YOHANES 5:18

it ap kaindek Yahudi mene omanogo nen inenggi sabit oba Allah faget weat logolik, Yesus nen ou higisu lek mene higitikhe andiba nek ebe wasuogeluk isukwa fuk. Athe, aren, ”An nebe Allah nemberek higit,” u hak he, ”An neisena ebe Allah aro,” iluk isikhe andi nen ebe wasuogeluk ebenagai'mo weim abok isukwa.

YOHANES 9:4

ekhe mel yagaisasikhe: ”Hobuk o mum asigin o. A'nogo mum agunem, afuni ekhe nen yi mene ti mene hilingisu lek hak asigin andi nen he, At laknobagai wagaikhe mene hilingiterek mene andi, o yogondak o selek werek kwelek yagaat hilingiti logouwogo.

KISAH PARA RASUL 14:17

A'nogo meneat he, it afuni nen at ebe futfouwageluk, yi mene ti mene ekhe elalhi'lek onggot agaikhemo welagarek fuk. We, at fano nek hilingiti logolik, ninamburu ninalabut ninghogo ninggik, ninendawimo agaiyek agik, ikhi logouwageluk, aren meiso pogoroba nen pelakfei wagik, nonggorek mene andi nogoin higit asi wagunem hokhorogoat wo'nisigik, ikherek andi,” iluk komorinafikhe.

KISAH PARA RASUL 17:28

It ekhe nen a'nogoat iluk mel isukwa: At Allah omameba ebe ninom hundik nineluk logolik, kwe lagik, yi mene ti mene hilingitik, ugu mondok welago, iluk isukwa. A'nogoat wuni ap hit mene nen mel iluk felalhukwaat: Nit mondogat he, at againafuri welago, iluk isukwa andi.

1 KORINTUS 12:6

A'nogo eabu hilingfisikhi logolik, ninenggi hunogo tomok hilingitorek mene andi, ebe mondogat hilingisuageluk he, nineisena Allah misigat mene nenat ninebe lombok omame wo'nisikherego.

1 TESALONIKA 2:13

Niren wene Allah ane a'nogo yagahisasugumo, hiren he, ”Wene andi afuni inane mene lego. We, Allah ane aro,” iluk wanhigip andi re, eberogoat Allah aneat wanhigibo. Andi nen nit kamo igi'lek Allah hai wato mondok welago. At Allah nen hit hinendawinggen Kristus oba himbiret fesigip mene halok hinendawimo kagalhu mondok welagarego.

IBRANI 1:3

Mo eil tilelek-walelek lakfei wagarek andi hak, Allah ebe fogeratarek mene a'nogo nen, Yesus ebe lakfei wagaikhemo kweangma selekhogo logolik, eisena obali'mo at ebeat welagarek. A'nogo logolik, yi mene ti mene mondogat welagarek andi, at ane omameba welagarek. Were'ma, nit weak hilingiti lagagu mene korogo legetfisasikhesik he, Allah Enupogot esin mene a'nogo oba lagasikhesik era'lu kainat welagarek andi.