YOHANES 10:14 - Allah Wene Fano Wene Hupla Inane

^14-15 Domba kwalogo welagirek mene nobabut fano re, nebe Anaro. Neisena nen An elu, An nen at nelu welagorek andi hak, An nen nanggo domba nelu, nen iren an inelu welagorego. A'nogo logolik, An nanggo domba elelerogo wa'lasigiluk welagi.

YOHANES 10:14 ပူးပေါင်းရင်းမြစ်များ

MAZMUR 1:6

Andi re, At Tuhan he afuni at ane hologo hilingitarek mene andi, at awe a'ma fisaluk ferinarek welagarek. A'nogo meneat he it inobabut weak hilingitarek mene andi, alomat lasugun oba andoma louwogeluk hilingitarego.

YESAYA 40:11

Ap domba halherek mene nen hilingiterek hak, Aren halinaferek mene andoma re a'nogo halinafu werek. At onggaregenat andoget fisaluk he domba eagwi omanogo agaumo felikhogo woginaferek, obabut sakhorek oba re Aren domba isa omanogo inelokhe palogo woginapluk lagarek.

YESAYA 53:11

Andi faget he Tuhan nen ikhi logolik, ”Enggin-fenggin andoma mondogat heinet warogo hilingfembik, at agaiyekhogo oba liok igin o isikhe. An namingmingengge andi re An nendawimo anggigirek mene higithogo hilingite, afuni hokhorogo unggum hela mene re at amu nen wanhe. Nen at alisikhogo An nen it inaweak sebelogo leget fisikhi logogin.

NAHUM 1:7

Tuhan andi re mondok fano, At againafuri enggin inoba were'ma awe a'ma ferinarek welagarek. Afuni At oba lombokhogo werek mene re Aren halinafu mondok werek.

YOHANES 10:11

Domba eisewerek logolik kwalogo welagirek mene, nobabut fano re, An nebe aro. Domba eisewerek fano mene andi re, anggo domba elelerogo wa'lasigin iluk endawimo anggikherek.

YOHANES 10:13

At andi onggo wogosuageluk domba kwalogo welagarek andi nen he, domba omanogo endawi legengge herakfisaluk heise lagarek andi o.

YOHANES 10:27

Hit hinendawimo a'nogo anggikhi lagep meneat he, it ekhe an nanggo domba mene halok, nane inesanggo holharesik, iren an nebe inelu a'nogo nen he, nombo'ne wagaikharego.

YOHANES 17:3

It afuni nen he, Allah ami amuat eberogo fogerasu mene werek iluk, hebe inelu agik, nen an Yesus Kristus laknobagai wagenma wagi mene yi nebe inelu agik, ili'lagwi andi re, ineluk mondok welagaikharek ero andi aro.

YOHANES 17:8

Wene haren yaganetigin mene omanogo it arat yagaisigimo, arat wanhasik, an faget ikhi logolik he, Allah nen lakfei wagama, at were'ma andoma nen eberogoat waga, iluk inelu agaikhasik he, nebe futnobagaga o.

2 KORINTUS 4:6

At Allah nen ikhi logolik he: ”O mum andi anggele'ma nen selek asuak,” iluk isikhe andi hak, arenat nit ninendawimo mum mene andi selegetninafikhemo welago. A'nogo logolik, at Kristus elokhonggen mo hangge amulit yatunem nineilenggen yethaluk he, at Allah fogeratarek mene a'nogo ebe ariginik iluk futfikhi logouwageluk a'nogo selegetninafikhe andi.

EFESUS 1:17

Hit faget he, Tuhan Yesus Kristus eisena Allah fogeratu mondok welagaikharek mene a'nogo nen, hinendawimo mondok kagalek mene wokhisigik, at ebe furogo futfobagaigen iluk yagahisigik, ikhi logouwagen iluk, Areagun wokhisoageluk ayonggo fikhi lagi.

FILIPI 3:8

A'nogo futfikhi lagi andi nek fuk. Noe Enupogot Yesus Kristus nelu agagi andi fano mondogaro. Yi mene ti mene hunogo mene hilingiti lagi andi, nong asigin mene hilingiti lagagimo iluk, futfikhi lagi aro. At ebe helambik he, ninom hundik mondok logouwogeluk, yabu alengge palogo wulak fisagarek hak, yi mene ti mene attak hilingiti lagagi mene andi: ”We meneat,” iluk herakfisasigi andi. Wene Allah nen komotninafikhe wene andiba, nonggwaregen higit hilingiti lagi fuk. It afuni ekhe inendawinggen Kristus oba himbiret fugunem, wene inoba mene korogo wokhaluk hobuk Allah inom hunogo fisikherek hak, an a'nogoat nendawinggen at oba himbiret fesigimo, wene noba welagaikhe mene korogo wokhasikhe andi.

2 TIMOTIUS 1:12

A'nogo laknobagai wagaikhemo nikhi lagi andi nen, afuni nen yi enggin ti enggin hilingnafu kwelegat he, nendawinggen sa oba himbirik welagi, iluk nelu andi nen nenggali agi'lek, nendawimo hambukhogo welagi. Aren he, ”An mene yi fetnarek logoino. Fetnarek were'ma, huli an nebeat wesigin o,” iluk, noba fesikhesik nayonggo fesikhe mene andi, onggwarek omameba elok fetnarek logogin o, iluk nendawimo futfikhi lagi.

2 TIMOTIUS 2:19

Mene re, Allah nen o tik hak watikhe mene ningsek mondogat logogin andiba lisu mel iluk palek werek andi: ”Ninoe Enupogot onggwarek againafuri wenaginafikhe mene andi inebe elu o,” iluk isikhe. Nen, wene ekhe re, ”It ekhe nen he, An nebe ninoe Enupogot amlogo aro, iluk, ili'lagwi mene halok, Weak hilingisugun ninabiro, iluk herakfisaluk kwanirogo helalaga logouwago,” iluk, isikhemo lisu palek werek andi.

1 YOHANES 5:20

At Allah amlogo ninoba pi wagaikhesik, Allah ebe mene ninelu asuageluk ninendawinggen kagalogo yaganisasikhe. A'nogo yaganisasikhemo, nit he, Allah ebe mene amlogo Yesus Kristus emberek ninom hundik mondok welago. Nen, at Yesus re, ebe Allah ebe mene logolik nabulal-habulal ero arat welagarego.

WAHYU 2:13

Hit he, Iblis ebe kain logolik afuni ekhe awe a'ma ferinarek welagarek oba welagep andi an nelu o. A'nogo Iblis awibaat logolik, an namlogo Antipas nen nabok aberali agi'lek, obabut humbunhogo yagaisilik nugunem, it ekhe nen ebe hinendawimo nen watunem, hiren he, nit ninendawinggen Yesus oba eberogoat himbirik welagorek andi lek, ninabit, iluk kobokhogo heraknobagagi'lek, ninom hundigat mondok welagep andi, hinobabut an nelu o.

WAHYU 2:19

Hit hinobabut hilingiti lagep mene andi an nelu o. It afuni ekhe hinendawirogo welagep andi inom, hinaberali agi'lek hinobabut humbunhogo welagep andi inom, it ekhe leberisikhi lagep andi inom, it ekhe nen yi enggin ti enggin hinoba fugu kwelek, hinafe morogo welagep andi inom, mondogat an nelu o. Nen, attak endebat hak hilingiti lagagip meneat he, yogondak mondok hokhorogo hilingiti lagep andi, an nelu aro.

WAHYU 2:2

Hiren an faget hinafe morogo hinomamerogoat hilingiti logolik, it ekhe weak hilingitunem he, inoba lombok, iluk, komorinafi'lek herakfisikhi lagep lek. Nen, it ekhe Yesus nen lakfisa wagunem hak hilingisogo we'luk ugunem, hiren he, ineranen ili'lagwi, iluk inobabut enegat palhi lagebat. Hinobabut a'nogo hilingiti lagep andi, an nelu o.

WAHYU 2:9

Hit ebe mene faget hinebe kain hineilmo werek meneat he, it afuni Iblis againafuri meneat he, ineranenat, nit ninebe Yahudi mene, iluk ikhi logolik, hit hinenu weak hilingisogo weak hilinghinafunem, hinebe hinelagaik weak welagep andi, an neluaro.

WAHYU 3:1

A'nogo yaganetesik hobuk yaganeti logolik: ”Allah Areagun ebe katoksek mondok iluk, 7 nen a'nogo eise welagik, hesagal ebe 7 nenat a'nogo nenggim fisogo welagik, igirek mene a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Sardis andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yi'nogo palin: Hit o Sardis mene afuni nen hinabok ikhi logolik, it ineluk werek, iluk, ili'lagwi meneat he, hinebe warek hangge logolik hinobabut hilingiti lagep mene andi an nelu o.

WAHYU 3:15

Hit hinobabut hilingiti lagep mene andi, mondogat an nelu o. Hit hinobabut minhogo logolik, hinobakhe nene hilingiti lagep legat, nen, aganhanhogo logolik, anggilukhogo hilingiti lagep legat, we, hinobabut minat logolik hinobakhe nene logogun halok, andiat logogun, nen, aganhan logolik anggilukhogo hilingiti logogun halok, andiat logogun o.

WAHYU 3:8

Yethani! Hit hinobabut hilingiti lagep he, hinomame mondok endebat meneat he, an nane hologo higithogo hilingitik, nabok labelhi'lek fakhogo yagaisigik, ikhi lagep andi an nelumo re, hit faget he, kwe afuni ekhe nen yagasugun mondok elo'lek mene hurogo hinobagagi o.