YEREMIA 4:4 - Allah Wene Fano Wene Hupla Inane

⁴ Hit An hineisena Tuhan ninom wene wat-wat agagu mene a'nogo pukhogo fisogo logoni o, nen hit afuni Yehuda mene inom Yerusalem mene inom he hinebe An nobaget enogo fakhaluk logoni o. A'nogo hilingiti logogun lek halok he An nanini endu wabunak ninggerek higit hilingi'mo, ap sa nen ogo nagulu mondok elo'lek a'nogo higit hinoba lakfei wesigin o. Mondogat andoma re hiren hina'mageba nek hilingiti logolik weak mondok hilingiti lagep andiba re enggin mene hinoba asi wesigin andi,” iluk ikhe isikhe.

YEREMIA 4:4 ပူးပေါင်းရင်းမြစ်များ

YESAYA 10:17

Allah tegelek mondok welagarek mene a'nogo nen it Israel mene selegerinafunem he, endu amulok linggene misik sambul yi mene ti mene lei laga logolik libunghogo ninggik, nen engga alok-alogengge mene ogo lilibukhogo ninggik, ikherek hak hilingisigin.

YESAYA 30:33

O attagenat raja Asyur mene ebe noligin oba re foukhogo fesikhemo werek. Obalik andi re eil uanhogo ma'limaba hilingi'mo elonggo wogole'ma re noligin mene eilem warogo liagaisogo fikhemo werek. Tuhan nen At onggwarek set meneba futhamo re i eil mep mene enu belerang meneba fisagaisogo kwelakfoumo re amulok kulunghogo uan-horok lagagin.

YESAYA 51:17

Yerusalem yei, helugame o! Helugame o! Tuhan anini nen unggum hokho mene hoba pelabi wagama hikhi logolik welagen mene a'nogo mondogat lek aga o.

YEREMIA 15:14

Nen o kweang it inonggotma andoma re An nen it inebe ap inaselei mene amingmingengge asuageluk hilingfisagain. A'nogo hilingisigin andi re An nanini inoba figi mene a'nogo re endu amulok wabunak lagagunem nagulu elo'lek andi hak lingitunem hilingisigin o,” iluk ikhe.

YEREMIA 21:5

A'nogo kaboget fembik An nebe ninomat hit ninom weim yabugun o. Nenggi pisat hambik nomamerogoat, naniniba, na'mage het-pethogo, hit ninom weim yabugun o.

YEREMIA 23:19

Tuhan anini andi re sogoi sielu nen abologet hikhi logolik weaget fikherek andi hakhogo afuni inobaharo weak mene andi re a'nogoat hilinginabigin.

YEREMIA 36:7

Haren a'nogo igin andiba re iren Tuhan oba samban igik, it ina'mageba hilingiri'lagwi mene omanogoba nen inendawinggen hebelhik, ugun logou hagaro. Tuhan nen he it inoba a'mage lagaikhesik he it unggum inoba fagain iluk inanggomo kagalhe o,” iluk yagati.

YEREMIA 44:22

Hiren tugwi kembu obaget yi mene ti mene fuluk wogoti lagep mene andoma re Tuhan nen kwelakhinarek logou re abit mondok hisili'lago, hiren hilingiti lagep mene andoma re, mondok hineloukhogo hinali'norek mene nek hilingiti lagep. Hiren he, Aren yi'nogo hilingi'no ti'nogo hilingi'no iluk yagahisikhe mene omanogo hologo hilingitep lek andiba re Tuhan oba weak hilingiti lagep. Ma re, yogondak ari hit hinanggweang mondogat weaget fisikhemo re afuni ekhe logou re elo'lek ari o, nen aben homan fisouwogeluk he o andi enu igisogo agarek. Nen, ap ineilenggen hagarek mene nen he, inamelmel inaferek,” iluk yagaisigi.

YEREMIA 9:25

Yethani! Afuni weagerinabigin oba arat horogasi waga o. Tuhan nen ikhi logolik, ”Yi afuni ti afuni mondogat inagap inenggalimo mene palek lek mene inom, nen afuni Israel mene inagap inenggalimo mene palu hak inendawinggen oba nen eberogo anggili'lagwi lek mene inom inebe mondogat wene inoba fagain oba arat asi waga andi nen he:

YEREMIA 9:26

Inunggulenu Mesir mene inom, Yahudi mene inom, Edom mene inom, Amon eisok erokwe mene inom, Moab mene inom, it afuni inesi inunggul hogologo palharek mene inom, afuni o leimo esi lekwe welagaikharek mene inom he wene inoba feigiluk waga lagi o,” iluk ikhe.

RATAPAN 4:11

Tuhan a'mage endu amulok higit lagaikherek mene a'nogo o kota Sion oba fikhemo re o andi kweang inom luphogo ningge.

YEHEZKIEL 16:38

Haren babi hilingitik, ap inoatik, hilingiti lagen andiba re An nen unggum wokhesigin. An na'mage heren nanini lagakhi logombik unggum he hat hebe pinggi hoasigin.

YEHEZKIEL 18:31

Hiren weak hilingiti lagep mene andoma mondogat palfeni o, palfuluk he hinendawinggen wenggelhu mene inom, menenei ebetu mene inom he ket mene asuak. Nenahalok hinaweak onggo hinebe wa'lasugun nogo?

YEHEZKIEL 20:33

An Allah neluk welagi mene Tuhan Lego Mondok welagirek mene nenuba hilingi'mo re, hit hinendawinggen wenggelogo iluk An na'mage lagali'lago mene yagahisak, hit he An nen nobabut haferogo nane omameba yagahisugu were'ma re, An nomame welagirek mene a'nogo hiren ogo hogoin aro. Hit An nen ekhema-ekhema telfol hisagain kwe omanogo nen andogorogo wokhinabimbik hinobagai wesigin o.

YEHEZKIEL 21:17

An ogo nenggi tabeti logoginat, An na'mage lagali'logo mene a'nogo ogore sebelasigin. Iluk An Tuhan nen nane mondogat igi o, ikhe.

YEHEZKIEL 24:13

Yerusalem yei, haren mun weak ina'meilo mene hilingiti lagagin mene andomaba hat hebe emetfakhasigin o. Ma re An nen horogo hobagagin iluk walhikhi lagiba nen, hat mondogat emetlagaginmo a'luk he hilingisu re elo'lek aple ari'logo. Hat hebe oan horogo hilingfakhigi'lek werek kwelek enek he An nanini a'nogo hat hoba fagain huli asigin.

YEHEZKIEL 24:8

Inamep andi An nen helep oba andem herakfikhi lagi andi re inamep andi kwelakhaluk unggulmo fouwageluk hilingiti lagi o,” ikhe.

YEHEZKIEL 44:7

Iren An nawi wuri'mo emerogo faga, andi re it ap enda'ma mene inagap inenggalimo palek lek mene andoma nen An nawene melalek higithogo hilingiri'lagwi lek mene andoma kuageluk yagaisugunem, amusu inom An nobaget warogo nolhu mene amep inom, waluk kugu mene andiba emerogo faga. Iren ina'meilo mene hilingiri'lagwi andiba re An ninom wene warek welago mene a'nogo taganet fili'lagwi andi.

YEHEZKIEL 6:12

It inebe mondogaren An nanini hambu-hamba hilingiti lagi mene andi inelu asugun. Afuni yatkwe huginabi logoin mene re ou inoba aga logolik inebe wa'larik logoin, nen horokhogo logogun mene re sikhe ambisangma nen wa'lasugun, nen fena tindel asimbik logogun mene re sumburu ouwagen wa'lasugun.

YEHEZKIEL 8:18

Hit he An na'mage mondok elalinhogo hilingitunem hogoin! An nen hobuk nendawirinafik, inaweak sagalogo legetfisigik igin mene ekhe werek lek. Iren samban oba nenu hombuk palogo ugun oba nen he, hilingik kwelek An nesanggo holigin legaro!” iluk ikhe.

IMAMAT 26:28

An nen naniniba yei hinoasigin. Nen enggin mene hinoba fagain mene andi re attak hasigip mene we endebengge hak oba nen he hobuk mene nenggi wenagaisogo 7 nen oba hinoba fagain.

IMAMAT 26:41

Andiba An nen nomameba mugusogo it afuni hinaselei mene inanggweangma hukhisa lagagi. Ariginhigi andiba re, hiren tagomangge mene nen inaweak hilingitik, nane sagalhik hilingita mene An nobaget inendawinggen sebel fakhaluk hilingisugun halok he,

AMOS 5:6

Ma re, hit hinebe hinambotkwe nineisena Tuhan oba we'ni o. Wagep halok, hineluk logogun. A'nogo meneat he, wesugun lek halok, At ebe endu amulok melanghogo ninggerek hak waga logolik, afuni Israel mene inebe felelenghogo hinoasigin o. A'nogo inoatunem, afuni o Betel welagaikharek mene ekhe nen ogo endu andi nagulu re mondok elo'lek asigin.

ZEFANYA 2:2

hit hinebe owil-owilengge higit oan sawet agik, puk agik, igi'lek logolik he hinobabut hebelini o. O linggene Tuhan nen anini lagali'lago mene andi oan asi wagi'lek werek kwelek inom, nen Tuhan a'mage lagagu werek mene andi hinoba fei wagi'lek werek kwelek inom, wenggel hikhi logoni o.

ROMA 2:25

Hit he, wene Allah nen komotninafikhe wene a'nogo hologo hilingiti lagep halok he, hinagap hinenggalimo mene palhi lagep andi re, fano mondok ugun. Meneat he, wene andi hologo hilingiti'lek halok he, hinagap hinenggalimo mene palhi lagep andi alemarogo palhi lagep andi nen he, palek lek mene hak welagebo.

ULANGAN 10:16

Andi nen he, huli yogondagen, At ane hologo hilingiti'lek hinungguloak helep hangge hilingitubo. We, hinagainafuri ap halok inagap inenggalimo mene palinafi lagep andi hak, hinonggwarek hinendawinggen tegelogo At ane hologo hilingiti logoino o.

ULANGAN 30:6

A'nogo hilinghinabimbik, hit hinebe inom, hiren tagongge mene inom, hinagap hinenggalimo mene palhinabu hak, hinendawinggen tegelogo hinobagaumo, hinendawinggen inom, inobabut inom misik asimbik, nineisena Tuhan Allah hinendawinggen hundik logolik, hinebe hineluk hinaiba andoma logogun o.

ULANGAN 32:22

Endu amulok melang-melang, ninggerek hak, it ina'makwe het-perimbik, nilik huli fem a'ma ma'limaat pigin, yago mene mondogat nagain. Tom ebe ninggi logolik, ero inom mondok tamukhogo nagain.

KOLOSE 2:11

Hit at hinom a'nogo hundik welagep andi nen, afuni inenggi nen inagap inenggalimo mene palinafarek hak palhinafukwama palek welagep fuk. Lego, we at Kristus nenat hinobabut hinetogat logolik weak hilingiti lagagip mene andi korogo wokhasikhemo, hinagap hinenggalimo mene palek logou hak welagep andi.