WAHYU 5:8 - Allah Wene Fano Wene Hupla Inane

⁸ A'nogo enggimo wanhunem he, it Allah nen elalinafikhemo ineluk welagaikharek mene ekhe inebe 4 en omanogo inom, ap inaluendek inebe 24 en omanogo inom, Domba Eak a'nogo awe a'ma kuluk ineindep awi yagaisogo fogerati lagaikha. A'nogo fogerati logolik, it ap inaluendek omanogo inebe lombok gitar hangge mene inom, kemenyan amusu iwak emas mene hilingik meneba hinago mene inom, inenggimo fisogo logolik endawi wati lagaikha. Kemenyan andi ebe re, Allah againafuri samban agarek andi aro.

WAHYU 5:8 ပူးပေါင်းရင်းမြစ်များ

MAZMUR 141:2

An nen samban ikhi lagi mene andi re amben fanongge dupa Hat hobaget wokhetu mene hakhogo wanino, nen nenggi earogo liabek welagi mene andi re hubanggo Hat hobaget warogo nolhu mene hakhogo hilingi'no.

MAZMUR 150:3

Pinggong hokho mene anet hikhi logolik, At Allah fogerati logouwok. Gitar hokho meneba inom, mage meneba inom anethaluk, Arenek fogerati logouwok.

MAZMUR 33:2

Hinambinggong kecapi aneba hineisena Tuhan hai watik, fogeratik, ikhi logoino o.

MAZMUR 43:4

An nebe Hat faget mezbah wam yi mene ti mene warogo nolhetarek oba andoma nen an nendawimo nagaiyek higirek mene re, Hat hebeat welagen andi nen he nendawimo hokhorogo nagaiyek hikhi lagi mene andi, pinggong aneba fogethafi logogin o. A'nogo hilingiti logolik, neisena Allah, neisena Allah, iluk hai wathafik, fogethafik, ikhi logoigeluk yagaheti lagi o.

MAZMUR 81:2

At Allah nit ninomame wo'nisikherek mene andi obaget awuni wa'ni, At Yakub eisena Allah andi faget hinagaiyegeti logolik fogera'ni.

YOHANES 1:29

Wene a'nogo isukwasik, nogo iluk, ohealekwe, at Yesus Yohanes oba wagunem eilenggen yet hasikhesik he, wene mel yagaisasikhe: ”Allah anggo domba mene nit afuni kweangma weak hilingitorek mene korogo herakfisagain mene a'nogo waga a'li hineilenggen yethani.

IBRANI 1:6

Andi nen he, Allah nen amlogo misigat tago kweangma yoma pelakfei wagaikhe andi sambul he, it malaikat yi'nogo yagaisasikhe: ”Hit An nagoromi malaikat mondogat he, at enek oba himbirik logolik fogerati logoino o,” iluk yagaisasikhe.

WAHYU 13:8

At Allah nen pogot kweang oan elalhi'lek logolik, ”It andem ineluk mondok logouwageluk hilinginabigin,” iluk, inenu lisu palogo at Andomba Eak, it faget watukwa mene a'nogo Ambuku ba fesikhe. It inenu a'nogo lisu palogo fesikhe mene halok, mene olomene hangge hokho a'nogo fogerati'lek werek kwelek, afuni kweangma welagaikharek mene ekhe mondogat inendawinggen mene olomene hangge hokho a'nogoba himbiret fuluk fogerati lagaikha isigi.

WAHYU 15:2

A'nogo higiri'mo nen, ombo'ne re, i laut elokhonggen muli inafumak hangge mene endu inom nanggelek-hanggelek yenggelek mene yethigi. A'nogo higirik yethigi hak he, afuni ekhe inendawinggen mene olo mene hangge a'nogo inom, ilirengge at ebe hangge hilingitarek a'nogo inom, inoba himbiret fuluk fogerinafi'legat, nen enu inenggi wenagaisogo lisu palek mene a'nogo wanhi'legat, hilingiti lagaikhaba inomame agaikhasik, pinggong gitar hangge Allah nen wogisikhemo inenggimo waluk, i laut yenggelek andi esanggokwe mendek were'ma yerisigi o.

WAHYU 15:7

A'nogo wulibi wagaikhama re, it Allah nen elalinafikhemo ineluk welagaikharek mene inebe enggaminogo omanogo ekhe iwak ebe 7 nen emas oba hilingik meneba Allah eluk mondok welagarek mene a'mage i hak hinago a'nogo, Allah nen it malaikat inebe 7 mene omanogo wogisikhi laga yethigi.

WAHYU 19:4

A'nogo ugu kwelek, it ap inaluendek inebe 24 en omanogo inom, it Allah nen elalinafikhemo ineluk welagaikharek mene inebe enggaminogo nen omanogo inom, inomen at Allah ebe kain welagarek obuluk oba were'ma awe a'ma kuluk, ineindep awi yagaisogo fogerati logolik mel ikhi lagaikha: ”Ebe asuak,” u hak, ”Amin,” igik, ”Fogethafi lago,” u hak, ”Haleluya,” igik, ikhi lagaikha.

WAHYU 4:10

it ap inaluendek inebe 24 omanogo nen, at kain eluk mondok welagarek mene a'nogo ineindep awi yagaisogo fogerati logolik, kware-kware inunggulmo ugu mene kirik-korokhogo, at kain welagarek obulu'mo a'nogo elokhoma yethikhi logolik he, yi'nogo ikhi lagaikha:

WAHYU 4:4

At kain welagarek oba obuluk tulem werek kwelek, it ekhe kain welagaikharek mene inobuluk 24 en were'ma, ap inaluendek inebe 24 enat inasu kut mene laberogo, nen, kware-kware emas meneba mindago mene pugethigik inobuluk ebene hurek welagaikha.

WAHYU 4:6

Nen, at kain welagarek obuluk a'nogo elokhoma re, ekhe inafumak i laut yenggelek eil hangge habul-habalenggeti laga. A'nogo were'ma, at kain welagarek oba obuluk tulem were'ma, abel fena-fena re, it Allah nen elalinafikhemo ineluk welagaikharek mene ekhe inebe enggaminogo mene ineilenggen inelokhe kwe inambotkwe werek mene nek welagaikha.

WAHYU 4:8

It andi inebe enggaminogo mene re, inebe lombok inogolabi falfaligen were'ma re, inomak abel endakwe inom, a'makwe inom, ineilenggen mondok hokhorogo welaga, were'ma re, inane kamo igi'lek, lingge hundik, hup hundik, Allah apne wanhi logolik he, ”Nineisena Tuhan Allah omame hokho mene, Attak tegelek welaga, Yogondak tegelek werek, Hobuk tegelegat logogin,” iluk fogeratu mondok welagaikha.

WAHYU 5:11

Endawi a'nogo watasik oba nen, hobuk ekhe yi'nogo yethigiat. At Allah kain welagarek oba obuluk a'nogo inom, it Allah nen elalinafikhemo ineluk welagaikharek mene omanogo inom, ap inaluendek omanogo inom, inom tulem werek kwelek, inera'lukwe yiling-waling he, it malaikat esa yi teng ti teng inenggi wenasu mondok elo'lek mene logolik inane hokhorogoat mel ikhi lagaikha:

WAHYU 5:12

”Domba Eak watukwa mene andi nek he, yi mene ti mene awe a'ma fisigik, eilmo werek welagik, wene endawimo kagalek enek welagik, omame hokho welagik, ikherego. Halok, at enek he, elok agaugweratik, fogeratik, hai watik, ikhi logogun o,” iluk fogerati lagaikha.

WAHYU 5:14

It a'nogo ugunem he, it Allah nen elalinafikhemo ineluk welagaikharek mene ekhe inebe enggaminogo mene omanogo nen mel ikhi lagaikha: ”Ebe asuak,” u hak, ”Amin,” ikhi lagaikha. Nen, it inaluendek inebe 24 omanogo nen ogo re, at awe a'ma kwagasik ineindep awi yagaisogo fogeratunem isigi aro.

WAHYU 5:6

A'nogo iluk yaganetesik oba nen, ombo'ne re, it Allah nen elalinafikhemo ineluk welagaikharek mene ekhe inebe enggaminogo omanogo inom, ap inaluendek inebe 24 en omanogo inom, at kain welagarek obuluk era'lukwe werek kwelek, inanggele'ma tulem he, Domba Eak arat watukwa mene ungguloa'ma aik 7 nen wulibik, nen, eilenggen 7 nenat mene mendek welaga. Eilenggen 7 nen andi ebe re, Allah nen Areagun o yi awi ti awi lakfisikherek mene omanogo aro.

WAHYU 6:1

A'nogo higirik oba nen, hobuk silo fagarek andi hak, suesingga uan mene amusu ebe 7 ba te'merogo fesukwa mene a'nogo, Domba Eak a'nogo nen, ekhe omanggum fikhalhunem he, it Allah nen elalinafikhemo ineluk welagaikharek mene inebe enggaminogo mene ekhe nen omanogo mene ekhe nen he, ”Eme o,” iluk ane unggunggu ane hangge ugunem nesanggo holhi.