WAHYU 20:2 - Allah Wene Fano Wene Hupla Inane

^2-3 A'nogo waluk pi wagasik, at kisu hangge hokho o endam en welagaikhe mene enu Iblis igik, Satan igik, agarek mene a'nogo, ebe fakfuluk, yi afuni ti afuni lalinaferek andi hak lalinafi'lek 1.000 tahun enggi hele warek kweang a'ma ma'lima logouwageluk pelafesik, kwe kolok yagarogo kwelakfisagarek andi hak, kwe kunci yagarogo fugunem higi. Andoma logombigen, fikhalogo liakfei wesugun obaat we endebat faget fikhalek logouwageluk fikhalogo liakfei wesigin.

WAHYU 20:2 ပူးပေါင်းရင်းမြစ်များ

KEJADIAN 3:1

At nineisena Allah nen, yi mene ti mene enggi lek mene inom, werek mene inom elalhikhe mene andi mondogat he, we inobabut endebat lioksek meneat he, at kisu andi nek he, obabut mondok weak mene welagaikhe. Obabut a'nogo lagokse'ma re, he andi mel yagatikhe: ”He yi, Allah nen he, hit yabumo e enggen awi yagokwe yoma mondogat enggen ninggi logou fuk, iluk, eberogoat yagahisikhe a?” iluk heinok wokhasikhe.

KEJADIAN 3:15

Hat inom, he yi inom, hemberek mondok weak logolik, aren tagongge mene inom, haren tagongge mene inom, hinom weim palek mondok logogun o. A'nogo logolik aren tagongge mene nen he, hat hungguloak sagalogo hoatunem, hat haigen it ineisok onggut libilinafi logogin o,” iluk yagatikhe.

AYUB 1:7

A'nogo were'ma, Tuhan nen heinok wokhikhi logolik he, mel yagatikhe: ”Hat hebe o koma nen wagen?” iluk heinok wokhasikhemo, aren he, ”An hamingmingenggere, o kweangma yi awi ti awi neil kogolik yi kwe, ti kwe, nikhi lagarik wagi o,” iluk yagatikhe.

YESAYA 24:22

It inebe misi'mo andogorogo fisambik he hele warogo oumo kwelakfisagarek hak, hele warogo fisaluk kwelakfisagarek oba andoma werek kwelek enek he unggum inoba fagain oba a'nogo arat horok asi wesigin.

YESAYA 27:1

Andi sambul he Tuhan nen enggarok omame mene enggat mondok merengsek mene andi waganogo re no Lewiatan kisu ambolebene pololangerik nikherek mene, mase masengge liaferek mene andi inom, kisu menawe i laut oba werek mene andi inom unggum wogisagain.

YEHEZKIEL 47:5

Andi nen hobuk ekhe inomat 500 meter en hakhogoat ilirengget hikhemo nen he aren ilirengge walhikheba andem he, i mondogat elonggoma asi pikhi logolik ineisogen sebelu re mondok elo'lek hilinglaga. Ma re ap i palogo wulibi logoin anggikhi logolik halok he, i kume wulibi la nek he higit welaga.

MATIUS 19:29

Halok he, an nenu hokho asuageluk sa nen awi wurik inom, oe agot inom, erugwi inom, eisena agaisa inom, againafuri inom, eabu siok inom, herakfisaluk waga halok he, obali'mo Allah nen onggo ebe mene mondok hokhorogo wogetik, nabulal-habulal wogetik, igin o.

MATIUS 8:29

inane hokhorogoat mel yagatukwa: ”Allah amlogo yi. Haren he, nit ninggi'nogo hilingninabigeluk wagen. Nit ninoasigin oba oan werek kwelegat he, hat tak ninoasigiluk wagen yoma ri!” iluk yagatukwa.

MARKUS 4:15

Nen, awi feik ekhe ebekhalem lakfesikhe andi ebe re, it afuni ekhe nen Allah ane inesanggo holharesi'mo nen, Iblis fageat wagaresik he, wene inendawinggenma yago mene andi henegeisogo waluk lagarego.

MARKUS 5:7

”Yesus Allah Enupogot amlogo yi, ninggi'nogo hilingnabigeluk wagen,” iluk yagatikhemo, at Yesus nen he, ”Munggwarengge hobabut weak mene yi, ap yi endawimo nen henegeisogo wulibi lan o,” iluk yagatunem, at a'nogo ane hokhorogo ikhi logolik, ”Eige. Nabire. Allah oage. Weagetnafun,” iluk ane hokhorogo isikhe.

YOHANES 12:31

Yogondak Allah nen, afuni kweangma mene wene inoba figik, kotik, ikhi logolik, ap enupogot kweangma mene a'nogo mugusogo wulakfisigik, igin oba arat horogasi waga o.

YOHANES 16:11

Nen, ekhe re, Allah nen afuni kweangma mene inoe kain a'nogo wene oba fikhesik mabenet fikhemo werek andi nen, at lebethisikhi logogin mene andi wesimbik he, Allah nen wene inoba figik, kotik, ikherek mene andi faget fakhogo yagahisa wesigin aro.

ROMA 16:20

At Allah afuni inendawinggen hambuget fikherek mene a'nogo nen, at Iblis andi hineisogen alperelogo herakfisoageluk weak-weagat hinawe a'ma fei wesigin werego. Ninoe Enupogot Yesus Kristus obabut fano a'nogo nen kwelakhinarek logouwago.

IBRANI 2:14

Aren he, ”Afuni andi an nagainafuri,” iluk isikhe andi re, nit afuni wa'lagorek mene faget isikhe andi nen he, at ebe wa'laga logolik, nit afuni wa'lagorek mene ero at Iblis enggiba welagarek mene andi, at Yesus nen at Iblis ebe mabenet fisigik,

1 PETRUS 5:8

At Iblis, hinom weak mene a'nogo nen, mene singa aik anini mene nen yi mene ti mene haumhogo nageluk ane kwe agan herarik nikherek andi hak, ”Sa hak weagetfagain,” iluk herakhinabik nikho andi, hinebe hebelogo hineilenggen fanorogo logoino o.

2 PETRUS 2:4

It malaikat Allah nen yonggo pelakfisa wagarek mene ekhe weak hilingitukwama Allah nen herakfisigi'lek, we, wene hobuk inoba feigeluk he, o mum wea'ma inenggi hele warek logouwageluk pelakfisasikhe andi.

YUDAS 1:6

Nen, at Allah nen it malaikat yonggo pelakfisa wagarek mene hilingisu mene sumburogo wogisasikhe meneat he, it ekhe nen inagaila'lak hilingisugun mene inafane hilingi'luk he, inonggwarek inaiba herakfisasukwama, Allah nen hele mondok logogin meneba inenggi hele warogo o mondok mum wea'ma kweang abel manggwe fisasikhemo werek andi. A'nogo mondok logombigen, hobuk afuni wene hokhorogo inoba fagain andi sambul, it inomat inoba feigeluk he, inenggi hele fikhalinabigin andi hinendawimo ebe'ni.

WAHYU 12:13

A'nogo pelabi wagaikhemo logolik, ”An yi'nogo kweangma pelaknobagai wagama welagi,” iluk futfikhesik andi nen he, he eak ap takhikhe mene a'nogo wasigeluk murok nikho.

WAHYU 12:15

A'nogo were'ma, at kisu a'nogo nen, at he a'nogo i fu nen waluk loageluk, i ambelema nen elesi hokho mene wulagaisogo, he a'nogo ebe werekwe higithogo lakfikhi laga.

WAHYU 12:17

A'nogo pelafunem he, kisu a'nogo a'mage he a'nogo oba fesikhesik, afuni he a'nogo nen tagongge mene fena Allah nen wene komotninafikhe wene hologo higithogo hilingitik, Yesus nen hilingitikhe wene fakhogo yagaisigik, agarek mene inoasigeluk inaweim kabelhesik,

WAHYU 12:3

A'nogo heinet watu kwelek, afuni nen futfouwageluk pogoroba elalinat hilingisu lek mene hokhorogo hilingitunem ekhe yethigiat. Kisu agap mep mene ebe hokho mene were'ma unggul he, 7 nen hilingik welaga, ungguloa'ma andimuk 10 nen wilibi'mo, nen, kware-kware ap kaindek ikfisagarek andi mene 7 nenat inunggulkwe inebe lombok ugu welagaikha.

WAHYU 12:4

A'nogo logolik, agenggum oba hesagal pogoroba mene henagan minggilogo fisikhesik, pire herakfisaluk, ekhe lisogo kweangma pelakfisa wagasik, he a'nogo eak takhugunem haumhogo nageluk elokhoma kagalek welaga.

WAHYU 13:2

At mene olomene hokho mene wulibi wagunem higi andi ebe re, mene hak enu harimau hangge. Nen, eisok he, paik inum hangge hokho mene enu beruang andi eisok hangge. Nen, ambe re, mene olomene hangge enu singa ambe hangge mene a'nogo weinam agasi'mo re, at kisu hokho a'nogo nen, mene olo mene hangge andi yagati logolik, ”An kain nomame hokho logolik, yi mene ti mene eisewerek welagirek a'nogo hak, hat an nobali'mo kain logoinogeluk menhobagagi o,” iluk yagatunem holhi.

WAHYU 13:4

At kisu a'nogo nen, at mene olo mene hangge hokho a'nogo yagati logolik, ”Hat kain homame werek logoinok,” iluk menfikhe andi nen, it afuni inendawinggen kisu a'nogo inom, mene olo mene hangge hokho a'nogo inom, inoba himbiret fuluk fogerinafi logolik mel ikhi lagaikha: ”Kisu hokho yi emberek higit he, sa anggegep, Emberek higit ekhe lek. Sa hagen at emberek weim yabugun anggegep, Elo'lego,” iluk ikhi lagaikha isigi.

WAHYU 20:10

A'nogo nunggu kwelek, at mene olomene hangge a'nogo inom, at ekhe nen, ”An Allah ane yagaisikhi lagi,” iluk eranen lalinaferek mene a'nogo inom, i laut endu mene yenggele'ma hendali al hangge amben weak mene enu belerang inom endu amulok nunggu mondok welagare'ma andoma hambokhogo pelakfisasikhe mene a'nogo andoma were'ma, Iblis a'nogo hobuk inoba hambokhogo pelakfisikhemo inom andoma logolik, linggene hubanggo heinet wato mondok-mondok logogun isigi.

WAHYU 20:7

A'nogo isigiri'mo nen, ombo'ne re, o mo lagagik, pigik, ugu kwelek, 1.000 tahun arat logombigen, wurep kobokhogo re, Iblis enggi hele warek a'nogo hele fikhalogo liabi wesigin.

WAHYU 9:11

Nen, it andi inoe kain enupogot ferinarek welagarek mene malaikat kweang a'ma welagarek mene a'nogo, at enu re, nit ninaneba, weagerinaferek u hak, it afuni Ibrani mene inaneba re, enu Abadon igik, nen, it afuni Yunani mene inaneba re, Apolion igik, agarek mene a'nogo yethigi.