RATAPAN 4:5 - Allah Wene Fano Wene Hupla Inane

⁵ It andoma inetokhogo nunggungge enduk fano mene nek nenggarek mene omanogo re, inebe inom inangge yi mene ti mene mondok ebe mene nek were'ma werek mene omanogo, yogondak he lobo-lobonggerik ologoilong engge hugisagarek oba omanogo nunggungge herakhilik nugunem, inebe re ebekhe kwe omanogo wa'lari'lagwi.

RATAPAN 4:5 ပူးပေါင်းရင်းမြစ်များ

2 SAMUEL 1:24

Hit hemi Israel mene yi, at Saul enggi inukhisikhi logouwageluk, Su eil mep mene onggo hokho mene wokhisasikhe o. Hinalilingge emas permata fano mene wokhisasikhe andi nen, Hinoe kain raja Saul ebe ouwak le a'ni o.

2 RAJA-RAJA 18:27

A'nogo yagatukwama, aren he, ”Nit afuni Asyur mene ninoe raja nen he hit hinoe raja faget enek yagasuageluk laknobagai waga anggikhi lageba? Lego, we hit inom, afuni leget eisiale bene werek oma hinomat, hinonggwarek hinal, hinamise nogoin mene andi faget, hinebe mondogat yagahisoageluk laknobagai wagama yagahisikhi lagi o,” iluk yagaisasikhe.

AYUB 24:8

O tom oba nen he at ebe meiso kulu lagalogo watunem meiso nen tom a'ma lombo i kuluk werek.

AMSAL 31:21

At agun inom, eagwi inom, mondogat inasu sogoi su ikhigik liaferek andi nen he, o aigengge hokhorogo agu halok he, endawinggen fiterek lek.

RATAPAN 1:11

O andiba afuni werek mene re, inane yabul watu logolik nunggu mene herakhili'lagwi; Nit wa'lago hanogo iluk ineluk logogun mene faget he, it inangge onggo hokho meneba palharek mene omanogo re iren we roti inom awari'lagwi. Yerusalem en humeti logolik, ”Tuhan neisena, an heilenggen nean o, an enggin-fenggin hikhi lagi mene yi kwela'nean,” ili'lago.

LUKAS 15:16

Lakfesikhemo andoma logolik he, endawimo nen he, nalabut ning uagen he, sumburu asing ibilik wam ninggerek mene andi ninggi logoile o, iluk anggasikhe meneat he, wogeti lagaukwa le'ma,

LUKAS 16:19

A'nogo yagaisasikhesik he, hobuk at Yesus nen wene ekhe mel yagaisasikhe: ”Ap ekhe kain angge mondok hokhorogo logolik he, asu onggo hokho fano mene nek laberaluk, yi mene ti mene fano mene anggele'ma heakhogo logolik, hundik-handik endawimo agaiyekhogo nek welagaikhe.

LUKAS 7:25

I a, athe, nena mene hineilenggen houwogeluk laga lagep. Ap ekhe asu fano mondok mene laberek were'ma houwogeluk laga lageba? Yethani! Ap kaindek inaiba logolik halogat inasu fano mene labetik, inagarek yi mene ti mene hokhorogo fisogo welagik, agarek anggigi!

1 TIMOTIUS 5:6

Mene re, it hemi sogwe mene ekhe it inamolo mene hesanggeat hilingiri'lagwi mene andi re inebe ineluk werek meneat he, warek hangge werego.