PENGKHOTBAH 3:11 - Allah Wene Fano Wene Hupla Inane

¹¹ At Allah nenat, yi mene ti mene mondogat, O ti sambul ti'nogo hilinglasuwak anggigik, Nen Aren nit hobuk mondok-mondok logogun mene andi nelu logoile, iluk anggikhi logouwageluk hilingninafikhe meneat he, ero ba nen elugun oba Allah hilingiterek mene andoma niren fut fou re mondok elo'legat welagorek andi.

PENGKHOTBAH 3:11 ပူးပေါင်းရင်းမြစ်များ

KEJADIAN 1:31

At Allah nen yi mene ti mene andi mondogat elalik waga lagaikhesik, eilenggen hasikhesikhe he, ”Yoma fano mondok elalogo fisigi higi,” iluk isikhe. A'nogo isikhesik he, o inenggi falfalik oba hubagaikhesik, wei isikhe re andi.

AYUB 11:7

Haren he At Allah endawimo hinago mene inom, Aren wenggelherek mene inom andoma re hendawimo wanumo re eloga? Athe, At Allah omame mondok hokho werek mene a'nogo haren fut foumo re eloga?

AYUB 37:23

Nit nineisena Allah andi re eberogo omame hokho mene were'ma re, niren At horokhogo asi la re elo'lek. Aren he higithogo nek hilingitik, katokhogo nek hilingitik, hilingiterek. Aren afuni enggin-fenggin inoba fuluk sebelinarek welagarek mondok lek.

AYUB 5:9

At Allah nen, elalin mene mondok hokhorogo hilingiri'lago mene andi, niren futfigik, ninenggi wenatik, u re mondok elo'lek. At Omame hokho meneba hilingiri'lago mene andoma re mondok hokho-pokhorogo hilingi'mo re legasu lek hak.

MAZMUR 104:24

Neisena Tuhan, Haren yi mene ti mene elalhigin mene andoma re Hat hendawinggen wenggelek oba nek elalhigin o, Haren yi mene ti mene elalhigin mene omanogo O kweangma mondogat peterek werek.

AMSAL 16:4

Yi aple ti aple Tuhan nen hilingiterek andi re arogo endawimo anggikherek mene weregen hilingiterek, nen, ap weak mene inendawimo anggagarek mene andoma re leget fisikherek mene nek wenggelharek.

PENGKHOTBAH 1:13

A'nogo logolik an nen nendawinggen wenggelek meneba futfuluk o kweangma yoma hilinglagarek mene mondogat ero pilingisogo fanorogo yangguligin anggasigi. Allah nen nit hobuk hilinglasugun mene faget fougeratikhe mene andoma re inendawimo mondok weak asu hak mene nek hilingik.

PENGKHOTBAH 11:5

Hiren sogoi ninggi'nogo wagarek hinonggorat, nen, hemi inalabutmo nen omalik inalue agaikharek andi hinonggorat andi hak, Allah nen yi mene ti mene hilingiterek andi hinonggoraro.

PENGKHOTBAH 7:13

Allah eabu hilingitu mene fanorogo futfikhi logoni. Allah nen afe kwanit fugu mene re ap sa hagen higirabesu hak nogo?

PENGKHOTBAH 7:23

Mondogat andi re an nendawinggen kagalek andiba obabut mondogat palhi, oba nen he an nen inendawinggen kagalek mene andi herasigin iluk ninghogo heratunem he yatmaat asi lagunem hikhi lagi.

PENGKHOTBAH 7:29

We yi nek an nelu agi: Allah nen he nit afuni we serogo welagaikharek mene hilingisogo ninobagaikhe, oba nen he, nit ninonggwaregen set kwil-kwalhogo hilingfakhikhi lago.

PENGKHOTBAH 8:17

Allah nen hilingiterek mene andi re niren ninelu asu lek hak. Niren ninamurururogo herasugun meneba nen ogore futfoumo re elo'lek. Ap hebelek mene nen an nelu iluk fogerakhikherek oba nen he, at ogore onggorengge nen ikherek.

MATIUS 11:27

A'nogo yagatikhesik, it afuni omanogo mel yagaisasikhe: ”An neisena nen yi mene ti mene mondogat eisewerek logouwageluk wo'netikhe. Nen, an Allah amlogo yi afuni mondogat inonggot meneat he, neisena Allah amuat enek elu welagarek. Andi hak he, an neisena Allah andi, afuni mondogat inonggot meneat he, amlogo an namuat enek nelu welagirego. Nen, Allah amlogo anenat nendawimo anggaluk neisena ebe afuni ekhe inelu asuageluk fakhogo yagaisugunemat inelu agaikharego.

MATIUS 13:22

Nen, awi feik ekhe panggi hokhorogo were'ma lakfesikhe andi ebe re, it afuni ekhe Allah ane andi inesanggo holharesigenat he, inendawimo nen, ”Yogondak ya faget ninggi'nogo hilingisigin he,” iluk menenei ebetik, ”Nangge hokhorogo logoilebe,” iluk inendawimo ebetik, inonggwaregen laligik, agarek andi nen he, wene andi ero kanggil agaresik he, enggen iterek lek andi aro.

MARKUS 7:37

A'nogo yagaisugunem he, iren hokhorogo fogerati logolik he, mel ikhi lagaukwa: ”Aren, yi mene ti mene fano nek hilingiti logolik, afuni higirinafunem he, inesanggo tagum mene hutik, inesanggo holhik, inane lek mene inane fano agik, ili'lagwi andi nailo e!” iluk hokhorogo fogeratukwa.

ROMA 1:28

Iren he: ”Allah ebe ninelu logogun he, ninabiro,” iluk at ebe it inendawimo sebelfesukwama re, aren he: ”It inendawimo anggili'lagwi andi weago. Nabit. Iren he weak meneat he fano, iluk anggagarek andi, a'nogo inoba lombok anggikhi logolik hilingisu lek mene hilingirikhi logonik,” iluk inebe herakfisikherek.

ROMA 11:33

At Allah oba mene hokhorogo welagik, endawimo mondok kagalek welagik, wene mondok elu welagik, ikherek andi nailo e. Aren wene elugun waterek mene, nit afuni ninelu asugun nogo? Aren yi mene ti mene hilingiterek mene niren futfogoin nogo?

ULANGAN 32:4

Nineisena Tuhan, omamerogo hinebikhit agarek mene, Aren yi mene ti mene, katokhogo nek hilingiterek, mondok higithogo nek hilingiterek, Nineisena Allah obabut he, obokhogo herakninobagaikherek lek, weak ekhe hilingiterek legat, at fano nek hilingiterek, eberogo mene nek hilingiterek.