NAHUM 1:7 - Allah Wene Fano Wene Hupla Inane

⁷ Tuhan andi re mondok fano, At againafuri enggin inoba were'ma awe a'ma ferinarek welagarek. Afuni At oba lombokhogo werek mene re Aren halinafu mondok werek.

NAHUM 1:7 ပူးပေါင်းရင်းမြစ်များ

1 TAWARIKH 16:34

Tuhan andi re mondok fani-fanore'ma re hai wati logoni o, Aren endawi hundik hilinginaferek mene andi re mondok-mondok logogin mene o.

1 TAWARIKH 5:20

It ap weim yafu aple inelu mondok welagaikhe inap andoma nen he, ”Allah nineisena, Haren lebetnisan o,” iluk kino yagatukwama, Allah nen he iren yagatukwa mene a'nogo higithogo esanggo holhikhesik he, it ap Hagri inap inom, it fena inebe misik sebe iluk inebikhit weim yabi kwi waga lagaukwa mene omanogo inom, inoba inomame leget fisasikhesik he, inalonget fisasikhe.

2 TAWARIKH 13:18

It Yehuda inaben he it inambu-inomba lak ineisena Tuhan Allah a'nogo omameba inendawinggen himbirik logolik hilingitukwaba it inebikhit inomame agaukwa andi.

2 TAWARIKH 32:11

Hit welagep oma re at Hizkia nen yagahisikhi logolik, ”Nit inenggi omameba nen, hit nineisena Tuhan Allah nen lologo wulak hinobagagin iluk welageba? Aren he hit hinamburu inom, hinagai inom, nele nen wa'lasuageluk hesanggema linet hisageluk hilingiri'lago o. Andi nen he, at oba tibet fugu lek.

2 TAWARIKH 32:21

A'nogo samban isukwama re linggene misik sambul he, Tuhan nen it afuni Asyur mene inogogwi perwira omanogo inoasuageluk malaikat misik ekhe lakfei wagaikhemo re, mondagat inoasi wagaikhe. It a'nogo inoarik lagunem he hun raja a'nogo enggali mondok hokho mene agaikhesik he, aiba o Asyur omanogo ambotkwe lagaikhe. Oba nen he linggene misik sambul ekhe re at alegenek anggembu aiba omanogo kwisikhesik were'ma nen he, at onggwarek againafuri inebe fenakwe ekhe wagaukwasik he at ebe karok oba pinggi watukwa.

2 TAWARIKH 32:8

At ebikhit omame werek andi re afuni inomameba hilingik werek, oba nen he, nit lebetninabuageluk inom, nen ninobaget weim yabuageluk inom he, Nineisena Tuhan Allah werego,” iluk yagaisasikhe. It ineisena raja ane isikhe mene a'nogo inesanggo holhukwasik he, it afuni a'nogo mondogat inambong se agaukwa.

EZRA 3:11

A'nogo fogeratu kwelek, it afuni mondogat omanogo nen ineisena Tuhan fogeratu logolik wuni elugun warogo hobugalep agap sagalogo watu logolik, yi'nogo ikhi lagaukwa: ”Nineisena Tuhan andi re fano mondok logolik, nit afuni Israel mene ninoba endawi hundik ninafu mondok welagarego,” iluk wuni watunem, o Tuhan awi a'nogo wusuogeluk, o tik arat watukwa. A'nogo watukwa andi nen he, afuni omanogo mondogaren inendawimo inagaiyegen he a'mit sup igik, wuni watik, ikhi logolik, ineisena Tuhan fogeratukwa.

MAZMUR 1:6

Andi re, At Tuhan he afuni at ane hologo hilingitarek mene andi, at awe a'ma fisaluk ferinarek welagarek. A'nogo meneat he it inobabut weak hilingitarek mene andi, alomat lasugun oba andoma louwogeluk hilingitarego.

MAZMUR 100:5

Tuhan andi re mondok fano, nen Aren endawi hundik hilinginaferek mene andi re mondok-mondok logogin mene. Nen ninebe ta'larik lagu kwelek, At he ninoba lombokhogo logolik higithogo mondok hilingiterek, iluk wuni watukwa.

MAZMUR 20:1

Afuni nen wuni wulak fuluk inebe seberogo ugu kwelek melalinafu mene faget, Daud awuni a'nogo.

MAZMUR 25:8

At Tuhan andi obabut he fano logolik higithogo nek hilingiterek mene hilingi'mo re, afuni inendawinggen nonghong ugunem, kwe logoinkwe yagaisikherek.

MAZMUR 27:5

An noba yi enggin ti enggin hugu were'ma re, we At Tuhan nenat nalong palogo fetnarek werek. Aren he At Awi wuri'mo andoma hinaknobagai kwikheresik he, at Andom eil silipnorek meneba omanogo hambokhogo liak nobagaikherek.

MAZMUR 37:39

Tuhan nen it afuni higithogo hilingitarek mene andi inebe telinabimbik, yi enggein ti enggin inoba agunem awe a'ma fisaluk ferinarek logogin.

MAZMUR 37:40

It afuni inobabut fano hilingitarek mene andi re, inebe Allah awe a'ma kuluk welagaikharek andi nen he, it afuni weak hilingitarek mene andi nen inoasuogoluk ugunem, At Allah nen leberisaluk telinaferego.

MAZMUR 46:2

At Allah andi re, nit ninebe At awe a'ma ninobagaluk, fetninarek mondok logolik omame wo'nisikherek. Yi enggin ti enggin hugu were'ma, Aren higithogonek lebetnisikherek.

MAZMUR 50:15

Hit hinoba enggin-fenggin hikhi logolik he An nenu hombuk palhi logoino, Nen An nen hit hinoba fikhalogo hinobagagunem, hiren An fogetnafi logogun.

MAZMUR 59:16

It inebe re nunggungge herarik yi kwe ti kwe omanogo leil warik nikhi la'luk he, inoba homot lagu legen he inane kouwati logolik werek.

MAZMUR 71:3

Nen an nebe werek oba re, Hat hebe tom eil silipnorek mene hak hilingik welagen o, an nebe telnabigiluk kagalnarek welagen menere Hat hebeat welagen o. Hat hebe andi re, tom helep mene andi higit ha'ma sebelogo fetnarek logolik kagalnarek welagen mene o.

MAZMUR 86:7

Haren an onggo yaganeti lagen andiba re, an nebe mondok wiik-weakhogo logolik Hat hoba nek samban ugu lagi.

MAZMUR 9:10

At Tuhan andi re afuni nen enggin-fenggin inoba fugunem awe a'ma kuluk welagaikharek oba faget werek. it enggin fenggin hugu logolik awe a'ma kwi lagu mene faget werek.

MAZMUR 91:15

Aren ane hokhorogo An nayonggo fugu halok he, An nen at ane igin mene onggo yagasigin aro. At weak logolik, ninggi'nogo hilingisu he were'ma, An nen lebetikhi logogin o. An nen at ebe telimbik he, enu werek hilingisogo fagain o.

AMSAL 18:10

Tuhan andi re o anduli uanhogo pelabe'ma omamerogo welagarek higit werek, andoma ap eberogo hilingitarek mene lagunem inili waganogo fanorogo logogun.

YESAYA 25:4

Andi re Hat hebe afuni inomame lek mene hoba wagik, inenggi lek mene inom, inelagaikhogo welagaikharek mene inom, inailo legengge hoba wagik, ikhi logouwageluk hilinglagagin andiba. Hat he sogoi sielu wagunem hina'laguba faget inom, nen mo aigen kuna'ma kuguba faget inom higit welagen. Andi re ap inobaharo weak mene nen he o salim oba sielu nen hilingiterek hak inoasi wagik,

YESAYA 32:2

It inebe lombok he sogoi en inom, sielu nen inom funhugunem hina'laguba hangge agik, athe i liarekwe lagarek agai hakhogo agik, athe o kweang esi le'ma helep hokho mene werekwe andoma nen hinaklagaikharek hak agik, ugun.

YESAYA 50:10

Yago, hit Tuhan legeisogo fikhi lagep mene yoma inom, nen At amingmingengge ane ugunem hologo hilingiti lagep mene inom yoma sani, ebekwe hit logoinkwe hokhorek logolik, hit hinobaget ombak-bak seleget hinafu mene ekhe werek oba nen ogore, hinendawinggen Tuhan oba tibetfuluk hineisena Allah ba himbirik logogun halok he fano o.

YEREMIA 16:19

Tuhan neisena, ”Harenat an hawe a'ma fe'narek logolik an nomame wo'neti lagen, An nelokhoma lek were'ma Harenat lebetniikhi lagen. Yi afuni ti afuni o kweang unggut-unggut welagaikharek mene andoma nen Hat hambit we'luk iren ikhi logolik, ”Nit ninombawi re tugwi kembu we eberogo lek mene fetaluk welagaukwa.

YEREMIA 17:17

Hat hebere an enggin mene noba agunem hawe a'ma nobagaguba welagen, Hat he an nendawimo nailothafu mene asu fuk.

YEREMIA 24:5

”Afuni o Babel hele warogo woginarek loageluk herakfisigi mene andoma re e ara enggen fano mene oma higit werego. A'nogo were'ma re An Tuhan Allah Israel mene ineisena nen he it fanorogo logouwageluk hilinginabigin.

YEREMIA 33:11

Oba nen he o andoma bene re inane inagaiyekhogo agarek mene inom, inamolorogo agarek mene inom, afuni iginafi logolik inane agarek mene inom, holhi logogun. Nen afuni nen An nobaget hai warogo noba waluk lagu mene iluk inangge fugu mene waluk laga logolik wuni ugu mene ogore inesanggo holhi logogunat. Iren ikhi logolik, ”Tuhan Omame Mondok Hokho mene andi oba hai wasuok, At mondok fano logolik endawi hundik oba nek hilinginaferek mene andi re etok mondok logogin mene hilingi'mo re oba hai wasuogo ikhi logogun. O kweang yiba re An nen attak hilingik welaga hak sik-pikhogo hilingfagain o. Iluk An Tuhan nen nane mondogat igi,” ikhe.

RATAPAN 3:25

Tuhan he afuni At oba eberek welagik, At ebe heratik, agarek mene andi re inom fano.

DANIEL 3:28

A'nogo isasukwasik, at raja nen mel isikhe: ”Allah Enupogot Sadrakh inom, Mesakh inom, Abednego inomen fogeratarek mene andiat fogerati logouwogo. It he afuni nen, Nineisena ebe yi aro, iluk fogeratarek mene andi fogerasu inabit logolik, we it ineisena Allah it fogeratarek mene andi nek fogerasugun iluk inendawinggen at oba himbiret fuluk logolik, Ninebe ninoasugun halok fano aro, iluk an nen wene ero wulafi mene herakfisagama, wene inoba figi meneat he, At Allah nen amingmingengge inebe henagan aremnogo faget agoromi malaikat mene ekhe inoba lakfei wagasik it inebe telinafe andi.

DANIEL 6:23

An hamingmingengge neisena Allah andi re, an nen hat hoba ekhe weak hilingisogo figik, At oba ogo weak hilingitik, igi'lek mene andi re, at elu andi nen he, agoromi malaikat mene ekhe ayonggo fikhesik pelakfisa wagama singa ambe te'met fikhemo yi'nogo ti'nogo ekhe hilingnafi'lego, noe,” iluk yagatikhe.

YOEL 3:16

Tuhan ebe andom Sion oba logolik, ane kwe igik, o Yerusalem logolik, ane unggunggu ane hangge pak igik, igin o. At ebe nen hilingitunem pogot kweang abolok igin. A'nogo abolok igin meneat he, nineisena Tuhan ebere At againafuri Israel mene inebikhit agik, awe a'ma fisaluk ferinarek welagik, igin.

ZEFANYA 3:12

O andoma re, afuni inunggulenu ekhe inedawimo sebelfakhaluk An nen lebetninabuageluk hilingitarek mene nek he o andoma femhogo logouwageluk herakfisagain. It enek he o andoma higit logogun.

MATIUS 27:43

Endawinggen Allah oba himbirik logolik, ”An Allah amlogo o, iluk ikhi laga a'nogo re, at Allah nenat teligin anggikhe halok he, telinik he,” iluk isukwa.

MATIUS 7:23

an nen fakhogo yi'nogo yagaisagain: Hit hinebe an nonggoro. Weak mondok hilingirik nikhi lagep mene andi nera'lu ya logogubo. Pugulakhani, iluk yagaisagain o,” iluk yagaisasikhe.

YOHANES 10:14

Domba kwalogo welagirek mene nobabut fano re, nebe Anaro. Neisena nen An elu, An nen at nelu welagorek andi hak, An nen nanggo domba nelu, nen iren an inelu welagorego. A'nogo logolik, An nanggo domba elelerogo wa'lasigiluk welagi.

YOHANES 10:27

Hit hinendawimo a'nogo anggikhi lagep meneat he, it ekhe an nanggo domba mene halok, nane inesanggo holharesik, iren an nebe inelu a'nogo nen he, nombo'ne wagaikharego.

ROMA 11:22

Allah obabut he, fano inom, weak inom, welagarek andi hani! It alomat lagaukwa mene faget he, obabut weak andi. Nen, hit at obabut fano mene hinom hundik logogun halok he, obabut fano andi. Mene re, a'nogo hundik logogun lek halok he, hit a'nogoat palogo lakhinobagagin o.

GALATIA 4:9

Mene re, an nen he, ”At Allah hinebe elu welagarek,” iluk uwem, ”Hit yogondagen Allah ebe hinelu agep,” iluk igi andi. Halok he, hit hinonggwaregen munggwarengge obabut weak omame lek mene, eilmo lek mene, andi oba hobuk hinambotkwe awe a'ma kuogeluk ikhi lagep andi, nenahalok.

2 TIMOTIUS 2:19

Mene re, Allah nen o tik hak watikhe mene ningsek mondogat logogin andiba lisu mel iluk palek werek andi: ”Ninoe Enupogot onggwarek againafuri wenaginafikhe mene andi inebe elu o,” iluk isikhe. Nen, wene ekhe re, ”It ekhe nen he, An nebe ninoe Enupogot amlogo aro, iluk, ili'lagwi mene halok, Weak hilingisugun ninabiro, iluk herakfisaluk kwanirogo helalaga logouwago,” iluk, isikhemo lisu palek werek andi.