MAZMUR 97:10 - Allah Wene Fano Wene Hupla Inane

¹⁰ At Tuhan nen he it afuni At againafuri mene omanogo At awea'ma ferinarek logolik werek, nen Aren he it andi afuni wene melalek sagalogo fuluk hilingitarek mene inenggimo nen lologo wulak fisikherek. Ariginik enggere, hit afuni Tuhan hinendawirogo welagep mene nen he, weak hilingitarek mene andi faget hinabiret fisikhi logoni o.

MAZMUR 97:10 ပူးပေါင်းရင်းမြစ်များ

MAZMUR 101:3

Weak hilingitarek mene andi re ekhe logouwageluk herakfagain mondok lek, wene weak mene inoba fuluk hilingitarek mene andi re an he mondogat nabit, Wene ariginik mene andi re an noba ekhe logogin mondok lek.

MAZMUR 119:104

Hat hawene melalek andi nen he an mondogat nendawimo hebelek mene hilingnobagagunem he, inobabut mondok hena-hena hilingitarek mene andi re an nen mondogat nabit anggikhi lagi.

MAZMUR 119:163

Ineranhogo wene lalinafarek mene andoma mondogat he an nen nabit isigirek, oba nen he Hat hawene melalek enek he nendawirogo hilingiti lagi.

MAZMUR 121:7

Hat hebe weaget habinogoluk, At Tuhan awe a'ma hobagaluk were'ma, heluk fano logoinogoluk setharek mondok logogin.

MAZMUR 125:3

Afuni higithogo hilingiri'lagwi mene inanggweang oba andoma re, it kwanirogo hilingiri'lagwi mene inobabut waganogo hilingisinogoluk he andoma it mene ekhe inenuwerek logogun mondok lek.

MAZMUR 145:20

It afuni At oba inendawi hundik werek mene re, Aren kagalinarek werek. Oba nen he, afuni inobabut weak mene re inebe leget fisikherek.

MAZMUR 31:23

An nendawi nonghong ugunem logolik he, An he Tuhan elokhoma nen hukniikhe hea, iluk anggikhi lagi. Oba nen he, an nen At enu hombuk palogo yagatu sambul he, Aren an nane ugu mene a'nogo esanggo holi'lago.

MAZMUR 34:14

hiren wene weak mene ekhe igik, Hit hinambeba nen it ekhe lalinafik, ikhi logogubo.

MAZMUR 36:4

Aren he fano mene inom inendawinggen wenggelogo agarek mene inom he hilingiterek lek, at ane materek mene andoma re mondok haferogo nek ikhi logolik he eranhogo wene nek ikherek.

MAZMUR 91:14

Nineisena Tuhan nen ikhi logolik he, ”Ap ekhe an noba endawinggen himbirik logolik logogun mene re, hobuk An nen telinabigin o. Nen, ap ekhe ambeba nen Neisena Tuhan he At andi aro, iluk fakhogo ugun mene re, An nen nawe a'ma fisambik ferinarek logogin o.

AMSAL 2:8

Tuhan nen he afuni higithogo hilingitarek mene ferinarek welagik, nen At oba inendawi hundik welagaikharek mene awe a'ma ferinarek welagik, ikherek.

AMSAL 3:7

Hat hebeba hilingik welagen mene andoma werek kwelek oba nen, an enek he nelu mondok welagi iluk anggikhi logou fuk. Tuhan ane hologo hilingiti logolik, weak mene re herakfikhi logoino.

AMSAL 8:13

Tuhan ebe inailorogo welagaikharek andi re, weak hilingitarek mene inabit welagaikharek andi aro. Inonggwaregen fogerakhagarek andi inom, ”It ekhe elo'lek, an enek he, esin,” iluk anggagarek andi inom, inobabut weak hilingitarek andi inom, ineranhogo wene lalinafarek andi inom, an mondok nabit isigirego.

YESAYA 45:17

Meneat he it Israel mene andi re Tuhan nen telinabigin. It inagap telasigin mene andi re mondok-mondok logogin mene. Hit hinenggi mondok-mondok logogun oba andoma re hinenggali agik, li'nothinafik, ikhi logogun mondok lego,” iluk ikhe isikhe.

YEREMIA 15:21

An nen he ap inanini mondok weak mene andi inomameba sebelharek were'ma nen fikhalogo hobagagin o. Iluk An heisena Tuhan nen nane mondogat igi,” iluk yaganete.

DANIEL 3:28

A'nogo isasukwasik, at raja nen mel isikhe: ”Allah Enupogot Sadrakh inom, Mesakh inom, Abednego inomen fogeratarek mene andiat fogerati logouwogo. It he afuni nen, Nineisena ebe yi aro, iluk fogeratarek mene andi fogerasu inabit logolik, we it ineisena Allah it fogeratarek mene andi nek fogerasugun iluk inendawinggen at oba himbiret fuluk logolik, Ninebe ninoasugun halok fano aro, iluk an nen wene ero wulafi mene herakfisagama, wene inoba figi meneat he, At Allah nen amingmingengge inebe henagan aremnogo faget agoromi malaikat mene ekhe inoba lakfei wagasik it inebe telinafe andi.

DANIEL 6:22

Heinok a'nogo wokhasikhemo, at Daniel en he, mel yagatikhe: ”Henupogot mene noe. Hebe heluk mondok logoino o.

DANIEL 6:27

”Hit afuni an nen fethinarek welagirek oba welagep mene mondogaren he, Daniel eisena Allah fogeraterek mene andiat hinailorogo welagik, fogeratik, ikhi logoino o. At andi re, hundik-hundik Allah eluk mondok welagarek mene, o wurep kobokhogo andoma afuni arenat ferinarek mondok logogin. Aren ferinarek welagarek mene andi re lek agi'lek, At enggiba mondok-mondok logogun.

AMOS 5:14

Hineluk fano logobagaigen he, weak hilingitarek mene andi murok lagi'lek, higithogo hilingitarek mene andi nek murok laga logoino o. Hinobabut a'nogo hilingiti logogun halok, hineisena Tuhan yi wene ti wene hilingisu hagenek mene andi re, hit hinane ikhi lagep mene andi higithogoat hinanggele'ma mondok logogin o.

AMOS 5:15

Inobabut weak hilingitarek mene andi hinabit logolik, fano hilingitarek mene andiat hinendawirogo logoino. A'nogo hilingiti logolik, wene higithogo hilingitarek mene andiat omamerati logoino. A'nogo hilingisugun andiba re, Tuhan nen, afuni Israel mene fena ineluk logogun mene omanogo endawi hundik hilinginafi logogin logou hak.

ROMA 12:9

Hit hinendawinggen oba nenat afuni ekhe hinendawirogo logoino o. Weak mene hinabit mondok logolik he, fano mene hinenggi ninghogo fisogo logoino o.

ROMA 7:15

Andi nen he, nendawimo nen: ”Yi mene ti mene fano mene hilingi'le,” iluk namolo anggigirek mene andi, ebe hilingitirek lek. Meneat he, nabit anggigirek mene andiat hilingitirek andi nen he, an hilingiti lagi mene andi futfigi'lek welagi o.

ROMA 7:24

An nonggwarek nendawimo re, wene Allah nen komotninafikhe wene andi hologo logogin anggigirek meneat he, nobabut afuni inobabut inetogat logolik hilingitarek mene andi nen yaganetunem ane hologo welagirek andi. A'nogo welagirek andi nen, nebe mondok noasigin andi, eigo. Sa nen telnabigin? Ninoe Enupogot Yesus Kristus hilingitikhe andiba telnabigin andi nen he, ”Neisena Allah,” iluk hai wati lagi o.

1 KORINTUS 8:3

A'nogo meneat he, at ekhe nen, Allah ebe endawinggen hundik halok he, Allah nen at andi ebe elu o.

2 TESALONIKA 3:2

It afuni mondogaren: ”Wene andi eberogoat,” iluk wanha mene nek werek fuk. We, it ekhe wanhi'lek mene inobabut kwanirogo hilingitik inobabut weak hilingitik, ili'lagwi mene nen, weaget ninabuogeluk ugunem Allah nen telninafi logouwagen he, nit faget samban ikhi logoino aro.

YAKOBUS 1:12

Hit ekhe Iblis nen hinendawimo kagaligeluk yi enggin ti enggin hinoba fugu kwelek, hinafe morogo logogun halok, hinendawimo hinagaiyekhogo logoguno. A'nogo hinafe morogo logogun halok, Allah nen he, ”An nebe hinendawi mene halok hineluk mondok logogun mene wokhisagain o,” iluk, abok yaganisasikhe a'nogo hit hinobabut palogo nenat wokhisagain o.

YAKOBUS 2:5

Nerugwi nagaila'lak. Hinebe nendawi e. An wene igin yi hinesanggo holino. It afuni kweangma inenggi lek mene andi, Allah nenat wenaginafi logolik he, ”Inenggi werek logou hak, inendawinggen an noba eberogoat himbirik logouwak. Nen, it an nebe inendawi mene halok, o an nen nawe a'ma fisugunem logogun oba andoma eisewerek asugun iluk wene warisasigi mene andi, irat eisewerek asuak,” iluk wenaginafikhe.

1 PETRUS 1:5

Hinendawinggen at Allah oba eberogoat himbirik welagep andi nen, at omameba fethinarek logombik he, hobuk hinebe fanothinabigin mene wurep oba weinamet fagain andi.

1 PETRUS 1:8

Hiren attagat, at ebe hineilenggen higi'lek meneat he, ebe hinendawi welagep andi. A'nogo logolik, yogondak ya hineilenggen higi'lek meneat he, hinendawimo nen, ”Hobuk fano mondok hilingninabigin,” iluk hinaneba ninggi'nogo pilingisogo u heat logolik, hinendawimo hinagaiyek hokhorogo hikhi lagep andi.

1 YOHANES 4:19

Attak Allah nen tak endawitninafikhe andi nen he, nit ogo re, nit-nit nendawi-hendawirogo logouwogo.

1 YOHANES 5:18

Nit Allah againafuri ta'ninafe mene at amlogo manggusa tatikhe mene a'nogo nen kwelakninarek were'ma, at obabut weak mene a'nogo nen enggi fa'nisagain lego. Halok he, nit weak hundik mondok hilingiti logogun lek, iluk nineluo.

WAHYU 13:8

At Allah nen pogot kweang oan elalhi'lek logolik, ”It andem ineluk mondok logouwageluk hilinginabigin,” iluk, inenu lisu palogo at Andomba Eak, it faget watukwa mene a'nogo Ambuku ba fesikhe. It inenu a'nogo lisu palogo fesikhe mene halok, mene olomene hangge hokho a'nogo fogerati'lek werek kwelek, afuni kweangma welagaikharek mene ekhe mondogat inendawinggen mene olomene hangge hokho a'nogoba himbiret fuluk fogerati lagaikha isigi.