MAZMUR 37:32 - Allah Wene Fano Wene Hupla Inane

³² Afuni inobabut weak hilingitarek mene andi nen it afuni higithogo hilingitarek mene andi inoasuogoluk ineil woginabik nikharek.

MAZMUR 37:32 ပူးပေါင်းရင်းမြစ်များ

KISAH PARA RASUL 9:24

A'nogo isukwa meneat he, it afuni ekhe nen Saulus husumbi yagatukwama at elu agaikhe. A'nogo elu werek kwelek, ap omanogo nen at ebe ebekwe leget pa'leget ambe pale'ma wulafunem he, wasuogeluk hubanggo linggene kagalek mondok welagaukwa.

LUKAS 20:20

Kamo isukwasik hobuk, aren ane igin oba ebe enggin oba fouwogeluk, at gubernur afuni ferinarek logolik wene inoba figik, kotik, ikherek mene eisewerek mene nen wene oba fouwageluk, ap ekhe inobabut fano hangge Yesus ineil wani loageluk lakfisa wagaukwa.

LUKAS 14:1

A'nogo yagaisasikhesik he, inenggi sabit oba ekhe, Allah faget weat logolik he, Yesus ap Farisi mene inogogwi kaindek misigat ekhe aiba sumburu emberek nouwogeluk lagaikhesik were'ma, afuni nen, at Yesus ineil furogo futfikhi lagaukwa.

LUKAS 6:7

Were'ma re, it ap Allah ane lisu palek eisewerek mene inom, Farisi mene inom, inendawimo nen he, ”Yogondak ninenggi sabit oba Allah faget weat werek kwelek, aren ap ari higisigin a? Lega. Higite halok he, hat weak hilingiten, iluk wene oba fouwogo,” iluk, ineil wanhi lagaukwa.

YEREMIA 20:10

It afuni ekhekwe-ekhekwe mondogat inane nguluk habuk ikhi logolik, ”Yikwe tikwe mondogat youk kwelaklagama inailo nek agasik inoak leigeri'lagwi o! Niren at ari faget ap inalong werek inap inoba yagaisa louwogo!” iluk ili'lagwi. Nen, it an ninom fano hundik welago mene nen ogore, at ki sambul weak hilingisigin iluk nenangot nafu weregat. Iren ikhi logolik, ”Niren nina'mage lagagunem sebelhikhi lago mene oma faget ambisangma at oba ogo hilingfogoin o, oba nen he niren at endawinggen wanimbik hilingisugun oba nek he, elok mabenet fogoin o,” iluk ili'lagwi.

MAZMUR 37:12

Afuni inobabut weak hilingitarek mene andi nen, wene weak mene afuni fano hilingitarek mene inoba fuluk, ineilenggen inabit oba kumurisagarek.

KEJADIAN 39:16

A'nogo yagaisasikhesik, Yusuf asu nonggolek a'nogo agun wagunem inukhageluk fesikhe.

1 SAMUEL 19:10

A'nogo watu ebe o hobat oba higit were'ma, at Saul en sige a'nogoba tunghogo wasigiluk tungethasikhe meneat he, Daud ebe ale'ma pokhogo lagaikhemo re, sige o hobat oba hun fesikhe. A'nogo hilingitikhemo, at Daud onggwarek agap telogo heise lagaikhe.

1 SAMUEL 23:14

A'nogo lagaikhesik at Daud a'nogore Tom oba o Sif leimo helep elema andoma welagaikhe. At ebe Saul en sirok-murok nikhi lagaikheba nen he Allah nen raja andi enggiba fikhi lagaikhe lek.

2 RAJA-RAJA 6:13

A'nogo yagatikhemo, at raja nen heinok wanhi logolik he, ”At Elisa ebe koma werek. An nen at ebe hele wasigen he, herasi lani o,” iluk yagaisasikhe. A'nogo yagaisikhi lagaikhemo, afuni nen he, ”At Elisa ebe o Dotan werego,” iluk yagatukwa.

MAZMUR 56:7

It inebe hinagokwe omanogo nek linglong lagaikharesik he, an nen hilingiti lagi mene omanogo ineil wo'nabi laluk, ebe ka nen wasugun iluk ineilenggen wo'nabik nikho.

AMSAL 24:15

Ap weak mene nen ap higithogo hilingiterek mene inangge teligik nen inailokwe hinasi kuogeluk inane misik matarek mene andi hinom kam wasu fuk.

YEREMIA 11:19

An he domba ebe watarek oba nen wasuogeluk waluk lagunem endawi menenei agi'lek lagarek a'nogo higit welagi. Iren hilingisugun mene iluk wene palogo fagarek mene andi re an nobaget ugu kwelek meneat he an nobakhe palegat welagi. Iren ikhi logolik, ”Niren e ari enggen oan itu kwelek aremat musuogen he we'ni o. Niren leget fogoin halok he afuni nen at enu ekhe ebethikhi logogun lego,” iluk ikhi lagaikha.

YEREMIA 18:23

Oba nen he Tuhan neisena, iren an neiloak legabesuogeluk wene melali'lagwi mene andoma Hat mondogat helu welagen. Andiba re, Haren it inaweak sagalogo legetfisigik, honggoret fisigik, u fugo. It yei warogo hilingfisano o. Hat haniniba it inoba a'nogo hilingfisano,” iluk samban isigi.

DANIEL 6:5

A'nogo anggasikhemo, it gubernur omanogo inom, ap it ferinarek welagaukwa mene aremnogo inomen he, Daniel andi yabu pemerintah faget hilingiti logolik, weak nena mene hilingitunem wene oba fogoin he, iluk ineil wanhi lagaukwa, meneat he at Daniel pemerintah faget hilingiti logolik he, weak ekhe hilingiti'lek, higithogo nek hilingitik, yabu ekhe hilingi'no agarek mene herakfigi'lek mondogat hilingitik, ugunem, afuni nen he, At elok, iluk ikhi lagaukwa andi nen he it ineil wanhi lagaukwa mene re ebe agaikhe mondok lek.