MAZMUR 23:3 - Allah Wene Fano Wene Hupla Inane

³ At awene melalek ikhe mene higithogo re, Aren an ekhe inomat nomamet figik, kwe eberogo meneba wo'narek lagik, ikherek.

MAZMUR 23:3 ပူးပေါင်းရင်းမြစ်များ

AYUB 33:30

At Allah nen he hundik-hundik a'nogo nek hilingiterek andi.

MAZMUR 106:8

Oba nen he At Tuhan onggwarek endawi wenggelhaluk, At omame hokho mene a'nogo weinam asuageluk he, Aren inagap telinafikhe.

MAZMUR 109:21

Oba nen he Tuhan Allah neisena, an enek he Haren wene isigin hakhogo lebetnabin, Hat hendawi fano mene a'nogoba inom nen hendawi hundik hilingnafi lagen a'nogoba inom nagap telnabin.

MAZMUR 119:176

An he domba longgo ikherek hak longgo igirik logolik, Hat hawene melalek a'nogo taganet figi'lek welagi andi nen he, Hat hebe we'luk an hamingmingengge yi herak nabime o.

MAZMUR 19:7

Pogot eroma nen yarik-yarik pogot elugunmo lagarek. yi mene ti mene mo oba kwikherek lek mene ekhe werek lek, mondogat oba kwikherek enek, iluk wuni watikhe.

MAZMUR 31:3

an nane hesanggo hol haluk he, weak-weakhogo nek fikhalogo nobagain o. Hat hebe re an nagap telogo hina'laguba, tom helep eil silipnorek mene hak hilingnarek welagen.

MAZMUR 31:4

Eberogo nenat Hat he an nobaget tom helep eil silipnorek mene hak hilingik welagen, nen ero mondok ningsek mene higit welagen! Haren wene watnetigin mene higithogo re, nawene palnobagaluk wo'narek laga logoin.

MAZMUR 34:3

Tuhan nen, fano hilinginaferek andi nen, nendawimo nagaiyeti lagi. Hit yi enggin ti enggin hikhi lagep mene andi, Allah abok hinesanggo hol fuluk he, hinendawimo hai hikhi logoino.

MAZMUR 5:8

Oba nen he Hat hendawi hundik mondok hokho mene hilingnafi lagen andiba re an Hat hawi wuri'mo elok kwi waga lagi. Hat Hawi Mondok Horek mene a'nogo fikhit neilenggen lourek logolik he neindep awi yagaisogo fogethafi lagi. Nen an nen nendawinggen mondok sebe uluk hapne wanhi lagi.

MAZMUR 51:10

Haren nendawimo weak hilingisogo fegen mene andi, hobuk fanotnafunem nendawimo nagaiyek asimbik, fano wene andi nesanggo holigen he Harenat yagane'no o.

MAZMUR 51:12

Neisena Allah, Haren an nendawinggenma fano horek mene hilingisogo nobagain o. Hoba lomborogo mondok logouwageluk, hareagun nendawimo peterogo fembik, nobabut ket mene hilingisogo nobagain o.

MAZMUR 79:9

Nineisena Allah, Hat he ninagap telogo ninobagagu mene welagenma re nit lebetninabin o, Hat honggwarek halong logolik lego welagen andi hak nit ninaweak honggoret fuluk nit ninebe fikhalogo ninobagain o.

MAZMUR 85:13

At Tuhan obabut fano nen hilingninobagagu halok he, andiba nit ninanggweang oba nen enggen ugu fano mene wo'nisikherek.

AMSAL 4:11

An nen afuni wene inendawinggen kagalek mene inom, inebe ineluk fano welagaikharek mene inom he, yi'nogo hilingitarek iluk arat yagaheti andi o.

AMSAL 8:20

An he, kwe higithogo lagaikharek andi hak, nobabut higithogo hilingitik, pikhithogo lagik, igirek andi.

YESAYA 42:16

An nagainafuri ineilenggen mum mene andoma re, kwe it inonggot kwe iren lagaikharek lekwe woginarek lagain, O mum mene andi inelokhoma liaratik, kwe sirek harek mene andi enagaisogo higirabetik, igin o. An nen it faget hilingisigin igi mene andi re, eberogo hilingisigilugat igi o,” isikhe.

YEREMIA 31:25

It inoba lebelekhogo werek mene re An nen inoba fisokhogo hilingfisikhi logogin, nen sumburu nele nen inomame lega'luk werek mene re An nen inoba homot fisikhi logogin.

YEREMIA 31:8

An nen it inebe nekhengge utara fikhiren woginarek wesigin, it inebe kweang wurep-wurep andoma nen waganogo andogerinabi wesigin. Afuni ineilenggen humunik mene inom, ap ineisok hambelek mene inom he it inom seberogo wesugun, andi nen hemi ineagwi ket takhogoin mene inom, inomalik inalabutmo mondogat wurik asigin mene inom ogore, inom wesugunat. It inebe re esa hokhorogo o kweang yiba wesugun.

YEHEZKIEL 20:14

Oba nen he An nen nonggwarek nenu nalong palogo re, it ap inunggulenu lombogen An nen ap Israel mene o Mesir en woginarek wulibi wagunem neasukwa mene omanogo nen sebelogo nobagainogo iluk a'nogo hilingitigi lek.

EFESUS 1:6

At obabut fano nen amlogo endawinggen tulem mene endawi agi'legat wo'nisasikhe andi faget, niren he, ”Egi. Nailo e,” iluk, fogerati logouwogo.

WAHYU 3:19

A'nogo komothinafi andi re, it afuni an nendawinggen hundik mene halok, inebe lombok komorogo lambisogengge yei inoatirek enek andi nen he, weak hilingiti lagep mene andi herakfisaluk, hinobabut hebela'luk he, anggilukhogo hilingiti logoino o.