MAZMUR 20:7 - Allah Wene Fano Wene Hupla Inane

⁷ At Tuhan nen ap raja wenagaisogo fikhe mene a'nogoba alonget fili'lago mene andi re yogondak an arat nelu ari'lago. At Tuhan ebe pogoroba mondok fanoma omanogo logolik onggo yagaterek, nen At Tuhan nen at raja a'nogo omamet fugunem mondogat along ari'logo.

MAZMUR 20:7 ပူးပေါင်းရင်းမြစ်များ

2 SAMUEL 10:18

Oba nen it Israel mene nen he it Siria inap omanogo inoarik-inoarik wulaginabi lagaukwa. At Daud agoromi tentara omanogo nen he, kereta ba lisogo laga logolik weim yabi lagaukwa mene omanogo re inebe 700 nen inoatukwa, nen it wam kuda amboloba lagaluk weim yabi lagaukwa mene re inebe 40.000 nen inoatukwa. Nen ekhe alek mene re at Sobakh it sikhe fisogo mene inoe panglima a'nogo re ebene tok watukwa mene nen enggin tunghogo hilinglagaikhesik he weim yafukwaba omanogo nen ebe pinggi wa'lagaikhe.

2 SAMUEL 8:4

At Daud en he ap sikhe fisogo mene wam kuda amboloba lagaluk weim yabi lagaikharek mene re inebe 1.700 nen inom, nen it ap sikhe fisogo mene ineisok oba kweangwe lagu mene inebe 20.000 nen sen fisasikhesik hele warinafikhe. Aren he inanggo kuda againanggen tegisilik lagaikheba nen he, we kereta kuda nen li'luk lagunem weim yabik lagaikharek mene ebe 100 nen omanogo nek he herakfisasikhe.

2 TAWARIKH 13:16

It inailo nen heise wulifukwa, nen Allah nen he it Yehuda mene inebikhit inomamet fikhi logolik he, it Israel mene omanogo inomame leget fisasikhe.

2 TAWARIKH 14:11

A'nogo folhukwasik he at Asa nen eisena Tuhan Allahba samban ikhi logolik he yi'nogo isikhe, ”Tuhan Allah neisena, afuni inomame werek mene inoba re, it inomame lek mene re we Haren enek leberinafi lagenma re, yogondak Harenat nit lebetninabin o, nineisena. Nit he Hat hoba nek lomborogo logolik, Hat henuba, it ap inasikhe werek inap esa mondok hokho mene yi ninom weim yabuogeluk wulifi lago yi. Tuhan, nit nineisena Allah we Hat hamu welagenma re, Hat hebe afuni nen mabenet hobagagun lego, neisena,” iluk samban isikhe.

2 TAWARIKH 32:8

At ebikhit omame werek andi re afuni inomameba hilingik werek, oba nen he, nit lebetninabuageluk inom, nen ninobaget weim yabuageluk inom he, Nineisena Tuhan Allah werego,” iluk yagaisasikhe. It ineisena raja ane isikhe mene a'nogo inesanggo holhukwasik he, it afuni a'nogo mondogat inambong se agaukwa.

AYUB 39:11

Haren he, At omame mondok hokho, iluk anggaluk, heabu enggin weak mene aren hilinghobagauwageluk enggiba fou hak nogo?

MAZMUR 28:8

At Tuhan nen he it afuni At againafuri mene inoba inomame wogisigik, Aren raja wenago mene a'nogo ebikhit a'luk agap telhik, hilingiterek.

MAZMUR 45:17

Hat he, an noe raja welagen, it hambu hombalak kain mendek logolik hurek welagaukwa mene takhta a'nogoba hurek logouwageluk haren hamlogomi ap hokhorogo taginabigin, it inebe re afuni o kweangma yoma mondogat faget inenu werek mene logouwageluk haren menfisagain o.

AMSAL 21:31

Aben weim yabuogeluk sige sikhe fougetfuluk inangge kuda hokhorogo fougerasugun meneba nen ogore, inomame agarek mene andi re we At Tuhan nen enek omamet fisikherek.

YESAYA 30:16

Hit he selei mene inenggimo nen hinangge kuda ba heise weak-weak longgo ugun mene a'nogo faget enek yi'nogo hilingisugun-ti'nogo hilingisugun iluk lenggalhu mondok welagep. Andi re fano! Eberogo nen hit hobuk uwaregat logoin! Hiren wenggel hikhi logolik he hit hinangge kuda andi re eisok a'ne weak lili'logo anggikhi lagep oba nen he, it ekhe nen mukhinarek logoin mene andi re ineisok a'ne mondok weak mene nen mukhinarek logoin o.

YESAYA 31:1

Ap o Mesir mene nen lebetninabuageluk kinosi lagaikharek mene andi re alomat laga logouwak! It he Mesir mene inomame hokho mene inangge kuda hokhorogo werek andiba inom, ap tentara esa logalek meneba inom, kuda iren mene omame hokhore'ma inangge kereta ogo hokhorogo werek andi faget inom inendawinggen himbiret fagasik hilingiri'lagwi. Oba nen he Iren Tuhan Allah Israel mene Mondok amu tegelek welagarek mene a'nogoba tibet figi'legengge logolik lebetninabin iluk kino ili'lagwi lek.

YEREMIA 17:5

Tuhan nen yagaisikhi logolik, ”Ap ekhe An eisena Tuhan a'nogo oboget nealuk, endawinggen afuni mene inoba himbirik welagik, onggwarek omameba tipsek welagik, hilingitu werek halok he ap andi re homan ugu logouwak.

1 SAMUEL 13:5

A'nogo yagaisilik lagaukwama, ap inebe andogosi lagu kwelek, it ap Filistin mene ogo re, ap Israel mene inom weim yabuogoluk, inebe andogotukwaat. A'nogo andogotukwa andi, kereta kuda nen lisogo waluk weim yafarek mene 30.000 nen inom, it ap kuda amboloba hurek logolik weim yafarek mene inebe 6.000 nen inom, ap tentara ineisok oba laluk weim yafarek mene inebe ial i laut yenggelek esanggokwe welagarek andi hangge mondok hokhorogo andogotukwa. A'nogo andogotukwasik, o Bet-Awen nen abel elikwe mo liabi wagarek higit o Mikhmas andoma inawi tenda ba wusi wagaukwa.

1 SAMUEL 2:10

Neisena Tuhan, hane pogoroba nen unggunggu aneba pak ugunem haselei mene inailo a'luk oak yaleik-taleik ugunem inebe mondok wolelenggen tagalogo inosigin o. Hat neisena Tuhan nen afuni kweangma mene mondogat wene inoba figik, kotik, igin mene, at ebe kain enupogot asuageluk wendeberogo menfesigin mene andi, omame wogetunem ungguloak uan asigin o,” iluk Allah fogeratikhe.