MAZMUR 1:1 - Allah Wene Fano Wene Hupla Inane

^1-2 Afuni ekhe inobabut he, it ekhe weak hilingitarek mene nen, komorinafunem inane holhi'lek, weak hilingitarek mene inobabut wanhi'lek, Allah inendawimo serametfisagarek mene inom huniti'lek herakfisaluk Tuhan nen ”Yi'nogo hilingiti logoino ti'nogo hilingiti logoino,” iluk komorinafikhe wene andi inendawimo inagaiyekhogo hilingiti logolik hup hundik lingge hundik, wene andi enu salogo oba ebetu mondok welagaikharek mene andi, hobuk Allah nen fanorinafunem inendawimo inagaiyek asugun o.

MAZMUR 1:1 ပူးပေါင်းရင်းမြစ်များ

KEJADIAN 49:6

Hina'mageba wene palogo afuni inoatik, Wam sapi ai mene hinendawirati'lek ineisok palhik, ikhi lagep andi nen, hit hemberek wene ane ugunem an ninom ure nabiro. Andogotunem an ninom logoure, nabiraro.

KEJADIAN 5:24

At Henokh Allah inom horokhogo hundik werek aple nen Allah nen wanhikhemo ebe hobuk hasukwa mondok lek.

1RAJA-RAJA 16:31

A'nogo hilingiti logolik, endawimo nen raja Yerobeam en weak hilingiti laga mene andoma re we sebelek hangge anggasikhesik he, agwe ap raja Etbaal aiba Sidon mene a'logo enu Izebel andi helasikhesik he tugwi kembu Baal oba fogerati lagaikhe.

AYUB 10:3

Haren ebeti logolik he, An nonggwarek nenggi nen elalhi mene ari re enggin-fenggin oba fou higit obaat fikhi lagi iluk anggikhi logolik hilingiti lagen a? Nen it ap weak hilingiri'lagwi mene inoba re Haren fanot fisikhi logolik meneat.

AYUB 21:16

Niren hilingitunem ampisangma ari'lago mene andoma re, ninonggwarek ninomameba re lek nogo? Nit ninonggwarek ninomameba nego,” iluk ikhi lagaukwa. Oba nen he iren ikhi lagaikha mene inom, wenggelhi lagaikha mene inom andoma re, an nen he mondok nabit anggikhi lagagi.

AYUB 31:5

Nen, an nen afuni neranen wene lalinafik, weak inoba hilingisogo figik, igirek mondok legaro, iluk hombuk palogo igi o.

MAZMUR 1:6

Andi re, At Tuhan he afuni at ane hologo hilingitarek mene andi, at awe a'ma fisaluk ferinarek welagarek. A'nogo meneat he it inobabut weak hilingitarek mene andi, alomat lasugun oba andoma louwogeluk hilingitarego.

MAZMUR 106:3

It afuni At awene melalek hologo nek hilingitarek mene andoma inom, nen it inobabut oba eberogo mene nek hilingiri'lagwi mene andoma inom en he, inagaiyek hikhi logouwak.

MAZMUR 112:1

It afuni wene melalek futfuluk hilingitik, Tuhan awene melalek inamolorogo hilingitik, hilingitarek mene andoma re inagaiyek hikhi logouwak.

MAZMUR 119:115

Yago, hit ap hinobabut mondok weak mene andoma re, an were'ma yoma herakfuluk yatma hela lani! An he neisena Allah ane andi nek hologo hilingiti logogin.

MAZMUR 144:15

It afuni inunggulenu ariginik mene andoma re mondogat inagaiyek hikhi logouwak, it afuni ineisena re Tuhan Allah hilingik mene andoma, inagaiyegeti logouwak.

MAZMUR 146:5

It afuni ineisena Tuhan Allah oba inendawinggen himbitfuluk hilingiri'lagwi mene andoma re inagaiyek hikhi logouwak, it leberinafu mene re at Yakub eisena Allah andi hilingfuluk werek mene andoma re inagaiyek anggikhi logouwagat.

MAZMUR 146:9

Afuni pok mene re At awea'ma fisaluk ferinarek welagik, it hemi sogwe mene inom yenggerugwi suarek mene inom Aren leberisigik ikherek oba nen he, afuni kwanirogo hilingitarek mene nen hilingisugun iluk wene oak palogo fagarek mene omanogo re Aren legetfisikherek.

MAZMUR 2:12

At Tuhan a'mage endu amulok weak-weak ibilagarek andi hak, a'mage het-periluk hit weagethinabinogo nen he, At elokhoma hinailorogo hineindep awi yagaisogo nen, fanorogo fogerati logoino o. Afuni nineisena Tuhan en inebe ferinarek logouwagaluk awe a'ma kwagarek mene nek, Aren fanorinafunem inendawimo inagaiyek hikhi logouwago, iluk isikhe.

MAZMUR 26:12

A'nogo nobagagin oba re yi mene ti mene andomaba nen an nailo legengge nambong serogo welagik, nen it afuni Hat hagainafuri mene inebe hokhorogo kabok se'ma andoma nen an nen Tuhan fogethafik, ikhi logogin o.

MAZMUR 34:8

It afuni Tuhan ebe inailorogo logolik ane hologo hilingitarek mene re, At agoromi malaikat en kwelaginarek werek, nen it andi weagerinabigiluk ugunem telinaferek.

MAZMUR 36:4

Aren he fano mene inom inendawinggen wenggelogo agarek mene inom he hilingiterek lek, at ane materek mene andoma re mondok haferogo nek ikhi logolik he eranhogo wene nek ikherek.

MAZMUR 64:2

Neisena Allah, an nebeba engginhogo logolik samban ikhi lagi mene yi hesanggo holin o, it naselei mene mondok nailo mene andoma inenggimo nen nagap telogo nobagain o.

MAZMUR 81:12

Oba nen he, it An nagainafuri omanogo nen he An nane holhu aple inabit welagaukwa. It afuni Israel mene nen he An nane hologo hilingitu aple mondok inabit welagaukwa.

AMSAL 1:15

A'nogo yagahisogoin enggere nagainafuri e! Afuni a'nogo yagahisogoin mene andi hinom he inane hologo hilingiti'lek, inagaiserati logoino o.

AMSAL 1:22

”Afuni hinobabut mondok kembu mene yi sani! O mera nen hinobabut weak a'nogo mondok hilingitu logogun nogo? O mera nen afuni inendawinggen kagalek mene inoba hinane asegen wogisikhi lagep mene andi palfogoin nogo? Mera huli nen wene yanggulugun ninabit iluk ikhi lagep mene andi, herakfisogoin nogo?

AMSAL 13:15

Afuni inungguloak kagalek mene andi re, it ekhe nen agaugwerinafi logogun. Nen, afuni inoba eberogo anggagarek lek mene andi re ineluk elo'lekhogo logogun.

AMSAL 13:20

Afuni ekhe inobabut hebelek mene inom sebetu halok he inobabut hebelek meneat agaikharek. Nen, it ekhe inobabut kembu mene andi inom sebetu halok he, it andi inebe alomat lagaikharek.

AMSAL 19:29

Ap kembu mene nen legeisogo fakhikherek mene andi re yei warogo wene oba fogoin mene foukhogo werek.

AMSAL 2:12

a'nogo fetharek logolik he, afuni weak mondok hilingitarek mene andoma hinom sebetep hanogoluk ogalhobagagik, inambeba weak mene nek agarek mene andomaba nen eil uanhogo hilinghobagagik, ikhi logogin.

AMSAL 3:34

At Tuhan he ap leget fakhagarek mene inoba re abit isikherek oba nen he ap sebelfakhagarek mene inoba re fanot fisikherek.

AMSAL 9:12

Endawinggen kagalek mene andi haren fetaluk logogin halok he ambisangma hat fano aga logogin oba nen, endawinggen kagalek mene andi habiren filikhogo lakfisegen halok he wene honggwarek hoba aga logogin.

YEREMIA 15:17

An nebe Hat henggi ninghogo fetnarek logolik, homame a'ma fetnarek welagenma re an he ap inunggulenu yi mene nen andoget fuluk seni isagaisogo inagaiyegetik, fogerakhigik agarekwe andoma lagirek mondok lego. An ogo namuat tegelogo welagi o.

YEREMIA 17:7

Oba nen he ap An noba endawinggen himbirik logolik noba ebetfuluk werek mene re An nen fanotfugu mondok logogin!

YEHEZKIEL 20:18

Hebekhogo re, ap souge it inanggele'ma welagaukwa mene andoma inoba An nen yi'nogo komorinafigi, ”Hit wene melalek hinambu hinomba lagen melalhukwa mene andoma murok laga logou fugo. It inobabut waganogo hilingiti logolik, tugwi kembu fogerasugun oba hit hinonggwaregen hinebe emerogo fakha fugo iluk komorinafigi.

MATIUS 16:17

A'nogo yagatikhemo, at Yesus nen he, ”Simon Yona amlogo nagore. Afuni nen yagahetama egen lego. We, an neisena pogoroba mene nen yagahetemo egen higi o. Halok he, hendawimo hagaiyek hikhi logoino.

LUKAS 11:28

at Yesus nen he, mel isikhe: ”At andi nek lego. It ekhe Allah ane andi inesanggo holiluk higithogo hilingiti logogun halok he, inendawimo agaiyek hokhorogo hikhi logouwagaro,” iluk yagatikhe.

YOHANES 13:17

An nen wene yagahisigi andi hinelu asimbik hilingiti logogun halok he, hinendwimo hinagaiyek hikhi logogun o.

YOHANES 20:29

at Yesus nen he, yi'nogo yagatikhe: ”Hat he, heilenggen arat neegendigen eberogoat iluk hendawinggen noba himbiret fegen. A'nogo meneat he, it afuni ekhe ineilenggen niigi'lek meneat he, inendawinggen noba eberogoat himbiret fogoin halok he, inendawimo inagaiyek hogoin o, iluk eberogoat yagaheti,” iluk yagatikhe.

ROMA 5:2

Nit ninendawinggen Yesus oba himbiret fesugu andibaat, at Allah obabut fano nen fanotninaferek mene andi awe a'ma ninobagaikhe andiba himbiret fuluk welago. Logolik, Allah fogeratu mondok welagaikharek andi hak, nit a'nogoat fogetninabigin o, iluk ninendawimo ninagaiyegeti lago.

EFESUS 6:13

Halok he, weak mene nen weagethinabi wagunem weim hinoba harorogo mendegat logolik yabuogeluk, sing itarek andi hak Allah nen ekhe mene-ekhe mene wo'nisikherek andi mene i'no o.

ULANGAN 14:6

yi wam ti wam eisok a'lip pelangsek mene inom, nunggu mene engga mene luk hemelogo ninggerek mene inom andi nek he ninggi logogun.

ULANGAN 33:29

Hit afuni Israel mene yi, hinendawimo hinagaiyeti logoino o! Nit nineisena Tuhan nen hit telhinafikhe andi hak, it afuni inunggulenu lombok ekhe telinafi'lego. Nit nineisena Tuhan a'nogo, ebe hit werekwe a'luk, hinaselei mene mabenetfisaluk, hinomame asuagaluk hilinghinafik, ikhi logolik, At ebe re, karok weim yafarek mene hakhogo inom, afuni nen inoasinogo iluk sing labetarek hakhogo inom, asimbik logouwago. Afuni hinaselei mene andi nen, Hinendawit ninabini o, iluk yagahisa wagunem, hiren he, it inebe hineisogen al perelogo fisikhi logogun o,” iluk yagaisasikhe.

1 PETRUS 4:3

Hit attak he, hinobabut it afuni Allah ane inonggot mene nen inendawimo anggaluk hilingitarek andi hak, arat hilingiti logolik he, weak hinenggali legat hilingitik, hinendawinggen en nunggunem pailak fakfisigik, pailak fakhinobagauwageluk hilingitik, enggen amusu weak mene naluk hinendawinggen lek hilingitik, seni naluk hesangge-pesangge hilingitik, amusu weak mene andi hinoba lagolegat ninggik, tugwi kembu endawimo weak asinogo iluk, fogerasu lek mene fogeratik, ikhi lagagip andi.

WAHYU 22:14

Nen, it ekhe inasu fanorogo sobalogo fakhaluk logogun mene halok enek he, Allah nen fanorinafunem inendawimo inagaiyek a'luk, e enggen nunggunem inelugerinaferek mene a'nogo enggen ninggik, nen o kota andoma kwe ambe palekwe nen wulifik-kwigik, ikhi logouwogeluk eisewerek asimbik logogun.