MATIUS 22:16 - Allah Wene Fano Wene Hupla Inane

¹⁶ Abok palhi lagaukwasik he, ap it inagoromi inane wanhi lagaukwa mene inom, it ap Herodes werekwe mene inom, Yesus oba wene heinok wanuageluk lakfisa wagaukwama it andi wagaukwasik he, mel yagatukwa: ”Yesus noe. Hat hobabut he, wene eberogoat enek ikhi logolik, Allah endawimo nen, Afuni yi'nogo hilingiti logouwak, iluk anggikherek mene eberogoat yaganisikhi lagen andi nit ninelu o. Afuni inebe hailo legat logolik inelokhonggen oba nek isaluk he, ekhe helokhoma fisigik, ekhe hambotma fisigik, hilingisu lek hak hiikhi lago o.

MATIUS 22:16 ပူးပေါင်းရင်းမြစ်များ

1RAJA-RAJA 22:14

A'nogo yagatikhe meneat he, at Mikha nen he, ”Neisena Tuhan eluk mondok welagarek mene oak. An nendawimo nen kagalogo ekhe yagasigin lek, we, neisena Tuhan nen yaganesigin meneat yagasigin o,” iluk isikhesik, inom wagaukwa.

MAZMUR 12:2

Ap hat hoba tiphogo hilingitarek mene mondogat lek agaikhama re, ap fano hilingitarek mene ekhe werek lek enggere, Tuhan nineisena Haren lebetninabin o.

MAZMUR 5:9

Tuhan neisena, afuni an naselei mene re mondok hokho pokhorogo hilingi'mo re. An nen Hat hendawimo anggikhi lagen mene nek hilingiti logouwageluk melalnobagagik, nen kwe yiba lan iluk yaganetik, ikhi logoino o, neisena.

MAZMUR 55:21

Attak an nagailak ekhe ninom fano welago mene nen he, at agaila'lak ekhe inoba labok igik, nen aren wene waterek mene a'nogo taganhogo hilingitik, hilingiti laga.

AMSAL 29:5

Ap ekhe nen agaila'lak ekhe legeisogo fisagain iluk agaugwerasigin, oba nen he, at onggwaregen yebet fakhagain.

MALEAKHI 2:6

Iren he, wene weak mene yagaisigi'legengge eberogo mene nek yagaisikhi lagaukwa. It inebe re An ninom mondok horoksek logolik, henarogo hilingiti'legengge An nendawimo anggigirek mene nek hilingiti lagaukwa. Irenat he afuni hokhorogo nen weak hilingisinogo iluk komorinafi lagaukwa.

MALEAKHI 2:9

Hiren An nane hologo hilingiti'legengge hilingitik, afuni An nagainafuri wene yagaisikhi logolik, ap inelokhe peninafi lagepma re An nen ogo hit afuni An nagainafuri Israel mene nen hit hinebe sebelhinobagaluk seramet hinobagakhi logouwageluk hilingisogo hinobagagi o,” iluk yagaisasikhe.

MATIUS 22:24

”Noe. At Musa nen mel iluk yaganisasikhe: Ap ekhe againafuri oan taginafi'le'ma ebe wa'laga halok he, obali'mo omalik ekhe taginabuageluk he, he sogwe andi ap andi agorat wanigin o,” iluk yaganisasikhe.

MATIUS 22:26

Wanhikhe meneat he, at andi againafuri taginafi'le'ma wa'lagaikheat. Hobuk he sogwe mene a'nogo inagot inombo'ne mene andi nen wanhikhe mene re, a'nogoat againafuri taginafi'le'ma wa'lagaikheat. Inebe 7 nen omanogo inagainafuri taginafi'le'ma mondogat wa'lagaukwa andi.

MATIUS 26:18

at Yesus nen he, ”O kota a'nogo lambik he, ap ekhe a'nogo wene mel yaga'no. At ninoe wene yaganisikherek mene a'nogo nen he, ”An hilingisigin mene arat horogasi wagama re, an nagoromi nane wili'lagwi mene ninom, at aiba andoma seni Paskah werago nouwogen he, yagasi lani o, iluk yaganisikhemo yagahesi wago, iluk yaga'no,” iluk yagaisasikhemo re,

MATIUS 26:49

at tak Yesus oba wagaikhesik he, ”Noe halabok,” iluk, hai ambe saluk watunem he,

MARKUS 10:17

Wene a'nogo yagaisaluk he, at Yesus o andoma nen kwe pikhit lageluk lagunem, ap ekhe fungusegat oba wagaikhe. Wagaikhesik eindep awi yagaisogo awe a'ma hu'lasi wagaikhesik he, mel yagatikhe: ”Guru noe. Wene yaganisikhi lagen andi, hat fano o. An nabulal-habulal hilingnabuagen he, an nobabut ninggi'nogo hilingiti logogin,” iluk yagatikhemo,

MARKUS 12:13

Hobuk he, it ap kaindek omanogo nen he, Yesus eil warogo ane igin mene wene oba fouwogeluk, iren it ap Faresi mene ekhe inom, it ap Herodes werekwe mene ekhe inom, inomen he Yesus anema wanuageluk oba lakfisa wagaukwa.

MARKUS 12:14

Lakfisa wagaukwama wagaukwasik he, mel yagatukwa: ”Noe. Hat hobabut he, wene eberogo mene nek ikhi logolik, afuni inelokheba nek isaluk, ekhe helokhoma fisigik, ekhe hambotma fisigik egendek lek. We inebe hailo legat logolik he, ”Allah endawimo nen afuni yi'nogo hilingiti logouwak, iluk anggikherek mene nek eberogoat mene yagaisikhi lagen andi re nit ninelu o. Halok he, nit Yahudi mene hilingitorek higithogo, uang pemerintah faget, kain Kaisar wogosugun eloga? Elo'lega,” iluk heinok wanhukwama,

MARKUS 3:6

Enggi a'nogo higiret fesikhemo re, it ap Farisi mene omanogo wulifukwasik weak-weagat Herodes agoromi inoba lagaukwasik he: ”Yesus ninggi'nogo wasuok,” iluk inom weim abok isukwa.

MARKUS 8:15

Wulifukwasik he, Yesus nen komorinafi logolik mel yagaisasikhe: ”It ap Farisi mene inom, at Herodes inom, enggen sumburu roti fisuageluk elonggoma pelafarek a'nogo hangge werek andiba weagethinabinogo iluk, hinebe hebelogo logoino,” iluk komorinafikhe.

LUKAS 20:21

Lakfisa wagaukwama, Yesus oba wagaukwasik he, heinok wokhikhi logolik, mel yagatukwa: ”Noe! Hat he, wene yagaisikhi logolik afuni ekhe helokhoma fisigik, ekhe hambotma fisigik, egendek lek. We, hane higithogoat ikhi logolik, Allah endawimo nen he, afuni yi'nogo hilingiti logouwak, iluk endawimo anggikherek mene eberogoat yaganisikhi lagen andi, nit ninelu o.

LUKAS 7:40

at Yesus nen he, mel yagatikhe: ”Simon. An wene ekhe yagahesik,” iluk yagatikhemo aren he, ”Noe. Yaganom o,” iluk yagatikhemo,

YOHANES 14:6

at Yesus nen he, mel yagatikhe: ”Kwe inom, ebe wene inom, afuni inelugerinafirek andi inom, An nebe aro. At sa nen an noba wagi'lek halok, neisena were'ma pikhit kwigin mondok lego,” iluk yagatikhesik,

YOHANES 18:37

at Pilatus nen he, ”Halok he, hat eberogoat kain Henupogot he a,” iluk ikhi lagaikhemo, at Yesus nen he, mel yagatikhe: ”An nebe kain Nenupogot hat egen andi aro. Andi fagerat an nen ebe wene abok fakhogo yagaisikhi logoigeluk nebe kweangma yoma pi wagagisik ta'lagagi o. Afuni wene ebe wene andi werekwe asi lagaikha mene nek inebe lombok an nane inesanggo holi'lagwi o,” iluk yagati lagaikhemo,

YOHANES 7:18

Halok he, ap sa nen wene onggwarek endawimo nen kagalogo ikherek mene andi re afuni fogerasuageluk ikherego. Meneat he ap sa nen at lakfei wagaikhe mene fogerasuageluk ikherek halok he, eranen ikherek mondok lego. We, eberogoat ikherek.

2 KORINTUS 2:17

It afuni ekhe inebe hokhorogoaren he, yi mene ti mene onggo ha awarik lagaikharek hak, Allah ane a'nogoat waluk lagaikharek. Meneat he, nit enek he, a'nogo lek. We, Allah nen, at ane waluk loageluk ninayonggo fesikhe andi nen, at eilhanemat ninendawinggen misigat Kristus ninom hundigat logolik, yagaisilik laga lago o.

2 KORINTUS 4:2

Nit he, afuni nen yi mene ti mene hinagaisogo weak hilingitaresik inenggali agarek andi mene herakfisasugu. A'nogo herakfisaluk, afuni lalinafik, Allah ane wene ekhe mene oba mangorogo yagaisigik, ogorek lek. Afuni yoma inendawimo lombogen futninobagauwageluk he, wene ebe wene Allah eilhanem fakhogoat yagaisilik nikhi lago.

2 KORINTUS 5:16

Andi nen he, niren huli yogondak ya huli nen he, afuni nen inobabut palharek hak, it afuni ekhe inobabut a'nogo palhi lago lego. Nen, attak he, Kristus obabut a'nogo palhugu hak, hobuk a'nogo palhi lago legaro.

GALATIA 1:10

An nane igi andi re, afuni nen, ”Hat fano egen,” iluk yaganesuageluk ikhi lagi a? Athe, Allah nen, ”Hat fano egen,” iluk, yaganesuageluk ikhi lagi a. Afuni inendawimo fanorogo ikhi lagi halok he, an nebe Kristus amingmingengge igin legaro. Mene re, an Allah endawimo fanorogo ikhi lagi o.

GALATIA 2:6

It ekhe inendawimo nen he, ”Inenuwerek he, it andem,” agarek mene andi nen wene an yagaisilik nigirek mene a'nogo hobuk hunogoat yagaisilik nikhi logouwagen iluk yaganeti'legat. Allah nen afuni inagap endakwe nek eilenggen isilik he, ”Yi weak. Yi fano,” iluk ikherek lek andi nen, an it andi faget attagat inenuwerek welagaikha mene he a? Lek mene he a, iluk, menenei ebeti lagagi lek andi.

ULANGAN 33:9

inobabut Hat hoba lomborogo logolik, inesugwi inagaisawi faget inom, inogogwi, ina'logomi faget inom, inagainafuri faget inom, abelmatfisaluk, Hat hobaget enek he, esinetfesukwa andi. Haren, yi'nogo hilingiti logoino, ti'nogo hilingiti logoino, iluk yaganisasigin wene andi, iren hologo higithogo hilingitik, nen, haren he, An nen wene warogo wokhinafi, iluk isiginmo, iren, Nit At againafuri, iluk isukwa andi.

1 TESALONIKA 2:4

Athe, we, at Allah nenat ninobabut palogo nen he: ”Fano wene andi, hirat waluk nikhi logobagaik,” iluk, ninayonggo fesikhe higithogo yagahisikhi logolik, afuni inendawimo fanorogo yagaisogorek fuk. Lego. We, Allah ninobabut pali'logo mene a'nogo endawimo fanorogo yagaisogorego.

YAKOBUS 3:17

A'nogo meneat he, afuni Allah nen inendawinggen kagalhunem inobabut esin hilingitarek he, weak ekhe hilingiti'lek ineil lomborogo welagaikharek andi. A'nogo logolik, afuni ekhe inom liokhogo welagik, inobabut enago welagik, inane hologo hilingitik, e enggen fano mene iterek andi hak, fanorogo hilingitik, afuni inendawirogo mondok welagik, afuni ekhe inelokhoma fisigik, ekhe inambotma fisigik, igi'legat, inendawinggen pire welagi'legat, fanorogo hilingitarek andi o.

1 YOHANES 5:20

At Allah amlogo ninoba pi wagaikhesik, Allah ebe mene ninelu asuageluk ninendawinggen kagalogo yaganisasikhe. A'nogo yaganisasikhemo, nit he, Allah ebe mene amlogo Yesus Kristus emberek ninom hundik mondok welago. Nen, at Yesus re, ebe Allah ebe mene logolik nabulal-habulal ero arat welagarego.