MATIUS 15:14 - Allah Wene Fano Wene Hupla Inane

¹⁴ Ineilenggen mum logoligat he, kwe lit haluk laga halok herakfisani o. At ekhe eilenggen mum mene nen, at ekhe a'nogo eilenggen mumat mene yagati logolik he, Kwe yi kwe lou o, iluk enggi fagaisogo waluk lagain halok he, emberegat foluksek i kalok wagane'ma pile hela pugun o,” iluk yagaisasikhe.

MATIUS 15:14 ပူးပေါင်းရင်းမြစ်များ

YESAYA 31:3

Afuni Mesir mene andi re Allah re fuk afuni mene werego, kuda iren fisogo mene andoma re ekhe hunik mene re, fuk welagarek mene nek werek. Arigini'mo re Tuhan nen enggin mene inoba fagain iluk hilingitunem andi re inunggulenu omame logogin mene inom inunggulenu lebelek mene omame mene nen leberisagarek mene omanogo inom pule pumo re it inebe pirenerat legasugun andi.

YESAYA 42:19

Hit afuni An namingmingengge Israel mene hineilenggen mum welagep andi hak, it ekhe ineilenggen mondogat mum mene re sani nogo? Nen, hit ap an nen hinayonggo fuluk lakhinobagagirek mene hinesanggo mondok tagum welagep andi hak, it ekhe andi hangge werek nogo?

YESAYA 56:10

Tuhan nen ikhi logolik, ”An nunggulenu mene inogogwi kaindek ferinarek mene andoma re, ap ineilenggen humunik mene werek! It he, yi'nogo ti'nogo mondogat inonggot. Iren he mene ane hobul warek mene nen helaik eti'legengge nogoba nek hilingiti logolik abi wokhugu welagarek a'nogo hangge werek. It he nogo nek ikhi logolik werek mene andi nek inagaiyek mondok werek.

YESAYA 9:16

Ma re it inunggulenu andi mene re, mondogat Tuhan herakfuluk lagik, nonghong igik, hiling lagaikha, nen it inane ugu mene andoma mondogat he kwanirogo nek ili'lagwi. Andiba re, it ap souge mene inanggele'ma nen he, Tuhan en misik iluk ogo ekhe tindel fisagain mondok lek. Nen, aren he it hemi sogwe inom yenggerugwi suarek mene inom endawirinabigin legat. It he, At Tuhan a'mage lagagunem he eberogo nenat unggum inoba fagain aro.

YEREMIA 5:31

Andi re it ap nabi nen he ineranhogo wene igik, nen it imam en he inendawimo nen anggaluk hilingisugun mene nek hilingitik ugunem, hit An nagainafuri nen ogore ariginik mene andoma faget hinagaiyekhogo nek hilingiti lagep. Oba nen he hobuk wurep kobok i wesigin oba re hiren ninggi'nogo mene ekhe hilingisugun nogo?” iluk ikhe o,

YEREMIA 6:15

Ebe eberogo mene re iren ina'meilo mene andoma hilingitunem he inenggali asu mene o, oba nen it he inoba ambumhogo logolik inenggali mondogat lek. Andiba re it ogo ap amu mene hakhogo talorogo warogoin. Ma re An nen unggum wogisagain andiba re it inanini welagaikharek mene a'nogo ogore mondogat kobok igin. Iluk An hineisena Tuhan nen nane mondogat igi o,” isikhe.

YEREMIA 8:12

Yago, hit An nagainafuri mene yi re, hiren mondok hinali'no mene omanogo nek hilingiti lagepma re hinenggali hikhi logou mene o! Oba nen he hiren nit weak hilingiti lago lek iluk hinenggali legat welagep andi. A'nogo welagep andiba re ap amu mene warogo hulamberi'lagwi andi hak hirogo a'nogoat warogo hulambesuogeluk welagebo, nen An nen unggum wokhisamo re hit hineluk welagep mene andi mondogat legasi lagainat.

HOSEA 4:17

It afuni Israel mene re tugwi kembu nen inendawinggen ninggemo re, it he herakfisani.

MALEAKHI 2:8

Oba nen yogondak he, hit imam Lewi hinap a'nogo re, eberogo wene a'nogoba nen taganhogo wulibi lagep. Hiren wene yagaisikhi lagep mene andiba nen he, afuni hokhorogo weak hilingitarek meneba lisogo fisa laga lagep. Hiren An ninom wene watugu mene a'nogo weaget fikhi lagep andi.

LUKAS 6:39

A'nogo yagaisasikhesik he, wene ekhe oba lirogo yagaisikhi logolik he, mel yagaisasikhe: ”At ekhe eilenggen mum mene nen, ekhe eilenggen mumat mene yagati logolik, kwe yi kwe lou, iluk enggi fagaisogo waluk logoin anggegep? A'nogo logoin halok he, emberegat foluksek i kalok wagane'ma pile hela'pugun lek nogo? Pugun aro.

YOHANES 9:39

A'nogo fogeratikhemo, at Yesus nen he mel yagatikhe: ”An nen afuni ekhe ineilenggen mum mene halok fanorinafik, it ekhe ineilenggen fano mene halok mumet fisigik, ikhi logolik ayo wurinabigiluk nebe kweangma yoma pi wagagi o,” iluk ugunem,

2 PETRUS 2:1

Attagat andoma re, ap ekhe it Allah ane yagaisikhi lagaukwa mene inebe higit we'luk ineranen wene ikhi lagaukwa mene, Allah againafuri inanggelekwe menlarik wagaukwa. Andi higit he, hobuk ap ebe wene yagaisagarek mene hangge wesimbik, ineranen ikhi logogun mene hinanggelekwe ekhe weinam arik wesugun aro. Weinam asimbik he, wene afuni inebe weagerinafarek wene yagahisa kwi wesugun. Kwi wesimbik he, ninoe Enupogoren it ninomat telninabigeluk ninonggo palhikhe meneat he, iren he, ”Athe, nit ninoe lego. Ninonggot,” iluk labelhi logogun andi. Labelumo re, inonggwaregen wene weak-weagat inoba fakhaluk weak akhogoin o.

2 PETRUS 2:17

It ap ineran nen agarek mene andi inobabut he, o hibiba i elesi firok ikherek andi hak, firok igik, ohena sogoien waluk lagarek andi hak, hesanggeat woginarek lagik, ikhi logogun o. Allah nen it andi o mum hikhakse'ma andoma logouwageluk inobuluk halogo fisasikhemo werego.

WAHYU 19:20

A'nogo were'ma, at ekhe attagat wagaikhesik, ”An Allah ane yagahisikhi lagi,” iluk eranenat mene olomene hangge a'nogo eilhanem elalin mene hilingiti lagaikhe a'nogo nen, lalinafunem eberogoat hangge, it afuni ekhe nen he, ”Nit at mene olomene hokho mene a'nogo agoromi,” iluk enegengge inoba wanhik, mene olomene hokho a'nogo ebe ilirengge hilingik a'nogoba inendawinggen himbiret figik, ikhi lagaikha meneat he, yogondak mene olomene a'nogo ebe inom, eranenat lalinafi laga mene a'nogo inom, emberek fakfisaluk, hele warogo i laut endu mene yenggele'ma hendali al hangge amben weak mene enu belerang inom amulok palfigi''lek nunggu mondok welagare'ma andoma inebe inelugengge pelakfisikhemo were'ma yerisigi.

WAHYU 22:15

A'nogo meneat he, it afuni ekhe weak inabit mene hilingitarek mene inom, it wesagun anggwelek inoatarek mene inom, it pailak hilingitik, fakfisoageluk hilingitik, agarek mene inom, it afuni inoatarek mene inom, it inendawinggen tugwi kembu oba himbirik logolik fogeratarek mene inom, it inambeba nen lalinafik, yi mene ti mene hilingiti logolik, lalinafik, agarek mene inebe lombok inom, mondogat o kota andi abel endakwe logogun o,” iluk yaganete.