LUKAS 13:35 - Allah Wene Fano Wene Hupla Inane

³⁵ Andi nen he, Allah nen hit hinebe herakhinobagaumo, hinawi wurik andi folugat logogin o. Huli yogondagen he, hiren, an nebe hineilenggen niigi'lek logombigen, hobuk hiren he, Nineisena Tuhan Allah nen lakhobagai wagama wagen yi, arenat fanothabuago, iluk yaganesugun andi huli hineilenggen neogoin o,” iluk yagaisasikhe.

LUKAS 13:35 ပူးပေါင်းရင်းမြစ်များ

MAZMUR 118:26

Nineisena Tuhan enuba waga mene yi, fanoabet feino o, Niren o Tuhan Awi wuri'mo andoma nen hat hebe fanothafi logogun.

MAZMUR 69:25

Hat ha'mage it inoba feino o. Ha'mage endu amulok hangge andi, it inoba mondok fikhi logoino.

YESAYA 52:7

Ap yonggo lakfisugu mene wagunem ineilenggen eberogo nenat hambik he inagaiyek asugun, at wesigin he tom unggulkwe andoma yaning-haning wesigin. Aren he wene fano lioksek awene waluk wesigin, wene o Sion agap teligin mene faget waluk wesimbik yi'nogo igin, ”Hit hineisena Allah andi re Raja werego!” iluk yagaisagain.

YEREMIA 22:5

Oba nen hiren An nawene melalek yagahisasigi mene andi hologo hilingiti legengge logogun halok he, ap raja were'ma o sili andi re wolelenggenhogo fagain o. Iluk An Tuhan nen nane mondogat igi.

YEREMIA 35:17

Andiba re An Tuhan Nomame Mondok Hokho mene, Allah Israel mene ineisena nen he, hit ap Yehuda mene inom, Yerusalem mene inom yi enggin ti enggin hinoba fagain iluk fouget figi mene An nen nane yagahisigi higithogo hinoba fagain o. An nen a'nogo hilingisigin mene andi re An nane hit hinoba ugu kwelek hinesanggo holhi lagep lek, hiren nane wurep wanhi'lagep legat andiba hilingisigin o,” ikhe.

MIKHA 3:12

Nen, hiren weak mondok hilingiti lagep andiba, o Sion oba yoma re, yabu wanharek andi hak hilingitik, nen o Yerusalem oba mondok meisak langgukhogo figik, nen punu o Tuhan awi wuri'mo yoma re, e alok-alok agayo ogoi hilingisogo figik, igin o.

ZAKHARIA 12:10

Andi nen it Daud ambisangma mene inom, afuni Yerusalem mene inom inoba An nen it inendawinggen hundik welagaikharek mene inom, samban ugu welagaikharek mene inom hilingisogo fisagain. Iren he, at talogo warek logogin mene a'nogo ineilenggen yerogo logolik, afuni inomalik manggusa tago wa'lagunem le agu welagaikharek hak hilingiti logogun, nen, ap inomalik misigenek engge legagunem inendawimo mondok heiselogo le agu welagaikharek hak hilingisugun.

ZAKHARIA 14:2

Tuhan nen yi afuni ti afuni inunggulenu lombok andoget fisambik o Yerusalem inom weim yabi kuageluk yagaisagain. Ma re kota andi telambik o wurik andoma mondogat sebelogo fakhigik, nen hemi o andi mene pailak hilinginafik, nen it afuni o andi mene inebe fena minggilogo re hele warinarek laluk inamingmingengge hilingisogo fisigik, nen fena minggilik logogun mene re o kota logouwageluk fisigik ugun.

MATIUS 21:9

A'nogo fesukwasik laga logolik he, at Yesus ebe tulemet fesukwasik, it ekhe attak agik, it ekhe ombo'ne agik, laga logolik he, inane hokhorogo mel ilik lagaukwa: Daud en tagongge mene, noe wa! noe wa! noe wa!” iluk u hak,” Hosana Nineisena Enupogot Allah nen lakhobagai wagama wagen yi, arenat fanothabuago. Allah Lego mondok welagendek mene neisena wa!” u hak, ”Hosana” iluk a'mit suphogo ilik-ilik, o Yerusalem kwisukwa.

MATIUS 23:37

At Yesus nen a'nogo yagaisasikhesik he, ekhe mel yagaisasikhe: ”Eigo! Hit afuni o Yerusalem mene yi nendawilage! Hirenat ap Allah ane yagaisagarek mene inebe inoatik, ap Allah nen inayonggo fuluk lakfisa wagarek mene heleben tamuk-tamakhogo inoatik, ikhi lagep andi nendawilage. Sue ayam eagwi ogolabi a'ma andogorogo fisikherek andi hak, an nen hundik-handigat hit o yoma welagep mene mondogat a'nogoat andogorogo hinobagagin iluk anggikhi lagi meneat he, hiren, ”Ninabit,” ikhi lagep andi, nendawilage.

LUKAS 19:41

A'nogo yagaisasikhesik horokhogo asi pisukwasik, at Yesus eilenggen o kota Yerusalem a'nogo yethasikhesik he, obaget le agaikhe.

LUKAS 21:24

Afuni fena re, karok oba inoatik, fena re, hele warogo o yi awi ti awi fisa lagik, ugun o. Nen, o kota Yerusalem ari, afuni endakwe mene ineisogen alperelogo fembik, o sebeli kwi wesimbik logogun meneat he, mondok sebelek logogun lego. We, Allah nen, It afuni endakwe mene, o Yerusalem huli andi hulibaat sebelek logogun, iluk anggasikhe higithogoat logogun o,” iluk Yesus nen yagaisasikhe.

YOHANES 12:13

Erale engga hangge mene engga palhigik waluk he, Yesus elokhoma a'mit-mit suphogo wulibi wagaukwasik he, mel isukwa; ”Noe wa! Noe wa!” iluk u hak, ”Hosana! Nineisena Allah Enupogoren nit afuni Israel mene ninoe kain lak hobagai wagama wagen yi, arenat fanothabuago,” iluk wuni warik-warik kwisukwa.