KISAH PARA RASUL 3:25 - Allah Wene Fano Wene Hupla Inane

²⁵ Allah nen wene wa'nisasikhe mene it ap attak at ane yagaisikhi lagaukwa mene omanogo nen yagaisikhi lagaukwa andi, hit fageraro. Nen, Allah nen nit ninombalak wene warogo woginafikhe andi, hit fageraro. At Allah nen Abraham yagati logolik he, Haren tagongge mene andiba afuni kweangma mene yoma yi afuni ti afuni inunggulenu lombok fanorinabigin o, iluk wene waretikhe.

KISAH PARA RASUL 3:25 ပူးပေါင်းရင်းမြစ်များ

KEJADIAN 22:18

An nen, yi'nogo hilingi'no, iluk yagaheti mene nane hologoat hilingiten andi nen he, afuni kweangma mene inunggulenu lombok mondogat, An nen haren tagongge mene fanorinafi logogin andi hak, iren ogo An nen fanorinabuageluk, kino yaganesugun, iluk ikhe o,” iluk malaikat a'nogo nen yagatikhe.

KISAH PARA RASUL 2:39

At Allah nen, Nareagun wokhisagain, iluk wene watnisasikhe andi re, hit hinebe inom, hinagainafuri inom, it ekhe inaiba yatma mene andoma inom, hinebe nineisena Tuhan Allah nen, we'ni o, iluk wolhisili'logo mene halok, mondogat faget wene hirat wathisasikhe o,” iluk yagaisasikhe.

GALATIA 3:8

Attagat wene ebe a'nogo oan hilinglagi'lek werek kwelegat, it afuni endakwe mene inendawinggen Allah oba himbiret fugunem, aren he, ”Wene hinoba mene korogo wokhaluk ninom hobuk hinambotkwe hunogo hinobagagin o,” iluk, wene fano wene oan yagaisigi'lek logolik, Abraham tak wene abok mel iluk yagatikhe: ”Yi afuni ti afuni mondogat an nen fanorinabigin andi, ero hararo,” iluk isikhemo, lisu palogo fesukwa.

1 TAWARIKH 16:17

Andi nen wene andiba at Yakub inomat omamet fesikhe, e hu Wene warisasikhe mene andi re it afuni Israel mene faget mondok-mondok logogin iluk isikhe, e hu

KEJADIAN 12:3

Afuni ekhe nen nauk inoba louget fagarek hak hat fanot hafa halok, An nen it andi fanorinafik, it ekhe nen homan hobagagun halok, An nen homan fisigik, ikhi logogin o. Nen, hat hoba halisikhogo afuni kweangma mene inunggulenu lombok, An nen fanorinabigin o,” iluk yagatikhe.

WAHYU 7:9

A'nogo higiri'mo nen, ombo'ne neilenggen isigi re, yi afuni ti afuni inunggulenu lombok, inagap lombok, inawi lombok, inane lombok, su kut uandek laberek mene, afuni nen wuni wati logolik, feigengga sombologo inenggim wanharek andi hak, e engga mene inenggim waluk, Allah kain welagarek obuluk oba andoma Domba Eak emberek were'ma ineilhanem andogorek inebe huli yiba iluk, inenggi wenasu mondok elo'lek logolik, inane hokhorogo mel ikhi lagaikha:

GALATIA 3:16

Wene andi hak he, at Allah nen Abraham yagati logolik he, ”Hat yi'nogo wokhetik, nen, haren tagongge mene ekhe yi'nogo wogisigik, igin o,” iluk, abok yagatikhe andi. Inebe hokhorogo faget u hak he, ”Haren tagongge mene ekhe yi'nogo wogisagain,” iluk, igi'lek. We, ap ebe misigat mene faget, ”Haren tagongge mene ekhe yi'nogo wogosigin,” iluk, abok yagatikhe andi ebe re, Kristus ebe faget isikhe.

ROMA 4:13

At Allah nen he, Abraham mel yagatikhe: ”Kweangma o yi awi ti awi mondogat he, hat inom, haren tagongge mene inom, hinom eisewerek asugun o,” iluk abok yagaisasikhe. A'nogo yagaisasikhe andi re, wene aren komotninafikhe wene a'nogo hologo higithogo hilingiti lagaukwaba yagaisasikhe fuk. Lego. We, at endawinggen Allah oba himbiret fesikhemo, at Allah nen he, ”Wene hoba mene korogo wokhigirik, hambotkwe nemberek hunogo hobagagi,” iluk yagatikhe andiba kweang abok yagaisasikhe andi.

GALATIA 3:29

Hit hinebe Kristus mene halok he, hinebe Abraham en tagongge mene welagep. Halok, Allah nen Abraham abok yagatikhe mene a'nogo, hit wokhisagain higiraro.

MAZMUR 22:27

A'nogo nolhetunem, it afuni inelagaik mene re eberogo nen inalabut ninghogo nogoin aro. It afuni At Tuhan oba waga logogun mene re, At enek fogerati logogun. It andi yagaisikhi logolik he, ”Hinendawimo hinagaiyek hugu mondok logoino,” iluk yagaisikhi logogunat.

NEHEMIA 9:8

A'nogo salogo fesiginmo, at ebe hat hoba lombokhogo logolik, hane hologo mondok hilingitunem hasigin andi. A'nogo hasigindik, haren at wene eberogoat mene wareti logolik he, o afuni Kanaan mene inaiba inom, Het mene inaiba inom, Amori mene inaiba inom, Feris mene inaiba inom, Yebus mene inaiba inom, Girgasi mene inaiba inom, mondogat andi, haren tagomangge mene inebe mondogat eise asimbik logouwagaluk wokhesigin o, iluk wene waretigin andi. Hat hebe inoba lombokhogo logolik, higithogo nek hilingitendek andi nen he, hat wokhesigin, iluk wene waretigin mene andi, ebe mondogat arat wogotigin andi, neisena.

KEJADIAN 28:14

Haren tagongge re, wul al kweangma hokhorogo welagarek andi hangge hilinglasugun. A'nogo hilinglasimbik, o unggut poikwe-maikwe elikwe yikwe it mondok wialarik laga logogun. Wialarik laga logolik, hat hebe inom, haren tagongge mene inom, hit hinoba nen afuni inunggulenu lombok mondogat An nen fanorinafi logogin.

KEJADIAN 26:4

Hat hamlogomi inom, hombawi inom he pogoroba hesagalenggen hokhorogo werek andi hakhogo wokhetik, nen haren tagomangge mene inoba kweang yi abirengge it wogisigik, igin. Nen at Abraham An nane holfuluk nawene melalek inom, yi'nogo hilingi'no ti nogo hilingi'no iluk melalhu mene inom, tiphogo hilingiti lagaikhemo at alisikhogo re hat fanot hobagagin. A'nogo hilinghafunem neambik, it yi afuni ti afuni inunggulenu lombogen yaganeti logolik he, Abraham Ishak inombawi fanot fisikhi lagagin hak, nirogo higithogoat fanotninabin iluk yaganesugun,” iluk yagatikhe.

KEJADIAN 20:7

Andi nen, he ari agun he Nawene yagaisili'logo mene hilingi'mo hat hebe wa'lagen hanogoluk aren samban hobaget igin enggere, yogondak he ari onggwarek wogom o. Hat hendawinggen wenggelhan! Haren, he ari agun onggwarek wogosigin lek halok he, hat hebe inom, hat hamlogomi tegelhabi'lagwi mene inom mondogat wa'lasugun,” iluk yagatikhe.

KEJADIAN 17:19

A'nogo yagatikhe meneat he, at Allah nen he: ”Lego. Hagwe Sara nen eak ap takhagain a'naga haren enu Ishak salino o. Yenggerek andi ebe inom, aren tagongge mene inom, inom An nen wene warogo wokhinafi lagi mene andi, hinoba nonggot agi'lek eberek mondok logogin o.

WAHYU 14:6

A'nogo higiri'mo nen, ombo'ne re, at malaikat ekhe wene fano wene mondok logogin mene afuni kweangma mene inunggulenu lombok, inane lombok, inagap lombok, inaiba lombok, yagaisilik pogot ebene tarogo nugunem yethigi

WAHYU 5:9

A'nogo wuni ket mene felalogo wati logolik: Oi ye oi ye hu, oae oae oae hu: ”Hat enek he, arat hoatukwama wa'lagagindik, Afuni mondogat inunggulenu lombok, inane lombok, Inagap lombok, inawi lombok, Hat hamep oba Allah faget onggo palogo fisaluk, Eisewerek agagindik, Suesingga uan meneba lisu palek yinggilik andi, Waluk he, silo fagarek andi hak, Amusu te'merogo fesukwa mene andi, Elok fikhaligin.

ROMA 15:8

Wene andi faget ekhe yagahisak. At Kristus wagaikhesik he, it inagap inenggalimo mene palek Yahudi mene omanogo inawe a'ma kwisikhe andi. A'nogo kwisikhe andi re, Allah nen he: ”An nen yi'nogo hilinginabigin o,” iluk ninambulak abok yagaisikhi lagaikhe a'nogo eberogoat ebe agik,

KISAH PARA RASUL 13:26

Halok he, hit afuni Abraham en tagongge mene inom, endakwe mene Allah ane hologo hilingiti lagep mene yoma inom, nerugwi nagaila'lak. Wene telninabigin wene andi Allah nen nirat ninoba lakfei wagama yi.

LUKAS 1:72

Aren ninambulak andi endawi nen fanorinabigin iluk abok isikhe a'nogo ebe hilinginafik, Yi'nogo hilinghinabigin iluk, wene onggwaregen abok yagaisasikhe a'nogo ebe hilingitik igin o, iluk he, nendawimo eberek logogin o, iluk yagaisasikhe. Yi'nogo hilingisigin o, iluk hombuk palogo nineisena Abraham yagatikhe hak hilingisi waga yi.

MAZMUR 96:7

Yago, hit afuni mondogaren he At Tuhan enek fogerati logoni, At omame werek mene faget inom, andungdang werek mene faget inom fogerati logoni!

KEJADIAN 18:18

Aren tagongge mene inunggulenu hokhorogo asimbik, inomame hokhorogo logogun lek nogo? Nen, at alisikhogo re, afuni kweangma mene mondogat inunggulenu lombok an nen fanorinabigin lek nogo?

1 TAWARIKH 16:16

Wene wa'nisikhe mene andi re Abraham inom watikhe, e hu Hobuk he Ishak inom watikhe, e hu