KISAH PARA RASUL 15:2 - Allah Wene Fano Wene Hupla Inane

² Wene a'nogo yagaisasukwama, at Paulus Barnabas emberegen it ap andi mel yagaisasukwa: ”Hiren egep andi mondok weak egebo,” iluk, inom wene palhik, wene hokhorogoat palhukwa. Wene a'nogo hokhorogo palhukwama re, it andoma mene nen he, Paulus Barnabas emberek, it ekhe inomat o Yerusalem lagaukwasik he, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri ferinarek welagaukwa mene inom, inomen wene andi faget haluageluk lakfisuogeluk isukwa.

KISAH PARA RASUL 15:2 ပူးပေါင်းရင်းမြစ်များ

KELUARAN 18:23

Haren a'nogo hilingisigin halok he, wene ariginik mene andoma At Allah nen hilingisuageluk melalhobagagunem he, haren yabu mondok higithogo nek hilingitik, afuni inawene ogo weak-weakhogo nek pilingisogo leget fisigik ugunem it inailokwe wulifi logolik inoba homorogo wulifi logogun o,” iluk yagatikhe.

KISAH PARA RASUL 10:23

A'nogo yagatukwama, aren he, ”Halok he, an ninom nogo uogen, kwi we'ni o,” iluk yagaisasikhe. Yagaisasikhemo re, nogo isukwasigen, ohealekwe ineluk a'luk he, it Allah againafuri o Yope andoma mene inomat wagaukwa.

KISAH PARA RASUL 11:12

Wagaikhama re, Allah Areagun nen an mel yaganete: Ninom logoin elo'lek, iluk hendawimo menenei ebeti'legat, hinom lano o, iluk yaganete. A'nogo yaganetemo re, it Allah againafuri o Yope mene inebe 6 en wagaikhasik yoma werek yi ninomat o Kaisarea lago. Lagosik, nit mondogat ap Kornelius aiba kogo.

KISAH PARA RASUL 11:30

A'nogo andogotukwasik he, Barnabas Saulus emberegen, inenggim waluk lagaukwasik, it ap Allah againafuri kwelaginarek welagaukwa mene inenggiba fei loageluk lakfisasukwa andi.

KISAH PARA RASUL 15:25

Ninesanggo holhosik he, ninebe andogorogo nen wene palho. Wene a'nogo palhosik, Barnabas Paulus emberek inebe ninendawi mene, ninebe Tuhan Yesus Kristus faget fisaluk, inoasuogeluk ugu kwelegat he, at faget hilingiri'lagwi mene inom hinoba wesuageluk ap ekhe Yudas Silas emberek inayonggo fogoma wesugun andi. It wesimbik he, wene lisu palogo fogo andi inambeba nen pilingisogo yagahisoak.

KISAH PARA RASUL 15:4

It a'nogo o Yerusalem lagaukwama re, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri ferinarek welagaukwa mene inom, it Allah againafuri ekhe andoma inebe andogoti lagaukwa mene inom, inomen, hai warogo woginafukwa. Woginafukwama, iren he, ”Nit Allah ninomen yi'nogo hilingito, ti'nogo hilingito,” iluk wene pilingisogo yagaisasukwa.

KISAH PARA RASUL 16:4

Agap enggalimo mene a'nogo palhikhesik, ebe emberegat o yi awi ti awi waga logolik he, wene it ap Yesus nen inebe wenagaisogo inayonggo fuluk lakfisasikhe mene inom, Allah againafuri kwelaginarek welagaukwa mene inom, inomen o Yerusalem logolik wene palhukwa mene a'nogo, Allah againafuri nen fisogo logolik higithogo hilingiti logouwageluk yagaisilik wagaukwa.

KISAH PARA RASUL 21:18

A'nogo wo'ninafukwama, ohealekwe at Paulus ninomat, at Yakobus houwogeluk kwisugu hak he, it ap Allah againafuri kwelaginarek welagaukwa mene inebe mondogat inom were'ma kwisugu.

1 KORINTUS 1:1

Hit Allah againafuri o Korintus andogoti lagep mene, nerugwi nagaila'lak. An Paulus Allah endawimo anggasikheba, Kristus Yesus nen nayonggo fesikhesik laknobagai wagaikhe mene a'nogo, ninagailak Sostenes nemberegen, wene yi lisu palogo hinoba lakfei wago andi. Hit o Korintus mene Allah nen hinayonggo fesikhemo ninoe Kristus Yesus hinom hundik were'ma, Allah nen, ”It yi an nagainafuri o,” iluk hinebe at onggwarek faget tegelogo fakhasikhemo welagep. A'nogo logolik, afuni o yi awi ti awi andoma nen, it inom, nit inom, ninoe Enupogot Yesus Kristus enu hombuk pali'lagwi mene hinom mondogat wene yi lisu palogo hinoba lakfei wago andi o.

2 KORINTUS 11:5

It ekhe andi, Yesus nen inayonggo fuluk lakfisa wagaikhe mene hak hilingisogo wagunem, hiren he, ”It andi esin hak,” iluk woginafu kwelegat he, an nendawimo nen he, ”It esin, nen, an elo'lek,” iluk anggikhi lagi mondok lego.

GALATIA 2:5

Mene re, wene fano wene andi hit faget fanorogo elele palogo fethinarek logouwageluk, iren a'nogo ugunem, niren it inane hologo ninenggi misigat oba ekhe, ”I o,” iluk, igi'legat.

YUDAS 1:3

Nerugwi nagaila'lak. Hinebe nendawi e. Wene Allah nen hit ninomat telninafikhe a'nogo faget wene lisu palogo hinoba lakfei wesigeluk nendawinggen eberek mondok welagirik he, hobuk nendawinggen sebelu elo'lek agama re, wene mel faget lakfei wagi andi. Andi re, it afuni ekhe Allah ebe inabit mene nit ninonggot werek kwelek ninanggele'ma kwi wesimbik he, Allah obabut fano nen wo'ninaferek mene andi, iren lagakhogo wene hunogo mene yagahisikhi logolik he, ”Weak mene hesanggeat hilingiti logogun,” iluk, ninoe Enupogot Yesus Kristus omame hokho a'nogo ebe herakfisaluk, hilingiri'lagwi andi. A'nogo hilingiri'lagwi andi nen, Allah nen he, ”Wene yi'nogo inoba fagain,” iluk isikhemo fagearen lisu palogo fesukwama werek. Wene Allah nen misigam faget nit againafuri wo'nisasikhemo ninendawinggen oba himbirik welago andi mene, it andi nen legetfouwogeluk ugunem, hiren elele waganogo hinomamerogo fisogo logobagaigeluk hinendawimo kagalogo lakfei wagi andi.

1 SAMUEL 8:7

A'nogo yagatikhemo, Tuhan nen onggo yagati logolik he, ”Iren hat inoe raja logogin inabiren ili'lagwi fuk. We, Anat inoe raja logogin inabiren ili'lagwi o. Ma re, iren kino yagaheta mene andi mondogat inane hesanggo holino o.