KELUARAN 10:9 - Allah Wene Fano Wene Hupla Inane

⁹ Yagaisasikhemo, at Musa nen he, ”Noe, nit ninebe mondogat, alageet, inaluendeget, logoin o. Nit nineisena Tuhan Allah hokhoba fogerasi logoin andi nen he laga logolik, ninagainafuri mondogat inom, ninanggo sapi inom, domba inom, kambing inom, woginarek logoin o,” iluk yagatikhe.

KELUARAN 10:9 ပူးပေါင်းရင်းမြစ်များ

KEJADIAN 50:8

Nen, at Yusuf againafuri inom, ogogwi agoromi inom, oe agot inebe fenakwe inomat wagaukwasik lagaukwaat. We, yenggerugwi magendek inom, wam it mene inom, andem enek he, o Gosyen herakfisaluk wagaukwasik lagaukwa andi.

KELUARAN 10:10

A'nogo yagatikhemo, at raja nen he, ”An nen, haren hinagagwi inom, hinagainafuri inom, woginarek lano, iluk yagahesu elo'lego. Haren ti'nogo hilingisugun, iluk kino yaganeten andi re, an nen, hit hineisena Tuhan fanothinafi logouwageluk yaganiselebe, iluk u hagat egen o. Hane egen andiba nen, hit weak hilingisuogeluk egep higi.

KELUARAN 10:26

Wam nit mene ekhe herakfigi'lek mondogat waluk logoin o. Niren wam andoma mene penageisogo fembik he, nineisena Tuhan Allah faget fisogoin he, ya, iluk penetunggere, waluk logoin enego. Waluk lambik he, andoma nen Allah faget fisogoin mene andem aga, iluk ninendawi wenggelasigin o,” iluk yagatikhe.

KELUARAN 12:32

A'nogo laga logolik, hinanggo mondogat sapi inom, domba inom, kambing inom, waluk lambik, hineisena Allah nen an fanotnabuageluk ayonggo feino aro,” iluk yagaisasikhe.

KELUARAN 12:37

It afuni Israel mene andi a'nogo wulibi wagaukwasik, inebe hemi inom, yenggerugwi inom, inenggi wenati'lek, we, abenek huli 600.000 nen o kota Raameses nen o kota Sukot ineisok oba mondok wagaukwa.

KELUARAN 12:38

A'nogo waga logolik, inanggo hokhorogo sapi inom, domba inom, kambing inom waluk wagunem, inanggele'ma afuni pok mene inomat inebe hokhorogoat inom wagaukwa.

KELUARAN 13:6

Linggene sabiren hunugisogo andi re, hiren roti fiterek lek mene nek ninggi lagoino, nen hinenggi sabiren andi halok enek he Tuhan faget fogerati logolik wene kabogeti logogun.

KELUARAN 3:18

A'nogo yagaisamo, it nagainafuri nen hat hane inesanggo holugun o. Holugunmo re, hat afuni Israel mene inogogwi hinom at raja Firaun a'nogo oba lambik he, yi'nogo yaga'no: Nit afuni Ibrani mene nineisena Enupogot Allah ninelokhoma menlaga. Ma re, o leimo afuni le'ma kwe we inenggi henagan laga lagaikharesik arat kwi lagaikharek oba andoma lambik nineisena Tuhan Allah faget yi mene ti mene warogo nolesi louwogeluk haren, lani, iluk yaganisanogeluk wago o, iluk yagasi lano,” iluk yagatikhe.

KELUARAN 5:1

Hobuk he, it Musa Harun emberek at raja Firaun o Mesir mene a'nogo oba lagaukwasik he, mel yagatukwa: ”Afuni Israel mene Ineisena Tuhan Allah nen he, ’An nagainafuri Israel mene o leimo afuni le'ma andoma lambik An fogetnabuageluk lakfisoagen yagasi lani’, iluk yaganisikhemo nen yagahesi wago o,” iluk yagatukwa.

KELUARAN 5:3

A'nogo yagaisasikhemo, it Musa Harun emberegen mel yagatukwa: ”Allah afuni Ibrani mene nineisena nit ninelokhoma menlagama o. Halok nit o leimo afuni le'ma andoma kweba ninenggi hup henagan nogoluk lagaikharesik arat kwi lagaikhare'ma andoma lambik, Nineisena Tuhan obaget, warogo nolesi logoin enggere, lani, iluk yaganisan o. Niren a'nogo hilingiti'lek halok, Allah nen he, nit ninebe wa'lasuageluk ou ninoba figik, athe, weim yafi logolik ninoasuageluk selei mene inenggiba ninobagagik, igin o,” iluk yagatukwa.

AMSAL 3:9

Tuhan agaugwerati logolik he, hangge yi mene ti mene fano mene wogetik, nen hanggweang oba nen enggen ugu attak palhu mene wogetik ikhi logoino.

PENGKHOTBAH 12:1

A'nogo isikhesik he hobuk ekhe mel isikhe: ”Hit hinebe logombigen hobuk arat yaman asimbik yi tahun ti tahun logolik, hinendawimo hinagaiyek higi'lek weak enek hikhi logogun andi nen he, hineisena Elalhinafikhe mene oba ebeti logoino o.

BILANGAN 29:12

Tanggal lima belas tugi sabit meneba re hit wene kabogesuogen iluk hinebe seberogo kabogeti logogun. Nen hiren yabu enggin mene iluk ekhe hilingisu fuk. Linggene sabiren andem hundik-hundik he hiren An Tuhan legeisogo nobagakhi logolik kabogeti logogun.

EFESUS 6:4

Nen, hit inesugwi nen ogo re, yi mene ti mene faget hinagainafuri ina'mage lagainogo iluk hilingitubo. Athe, Tuhan nen komotninafik, ninendawinggen sebelhik, ikherek andi hak, hiren hinagainafuri a'nogoat hilingisogo inebe kulinafi logoino o.

YOSUA 24:15

Hiren nineisena Tuhan amunek amingmingengge logogun hinabit halok, o yogondagat, Nit ti mene amingmingengge hilinglasugun, iluk tekhogo ugun o. Hiren he, o attagat ninombalak o Mesopotamia logolik, hunogo mene faget, Nineisena ebe andiat, iluk oba himbirik logolik amingmingengge welagaukwa andi mene amingmingengge logogun ugun a? At he, hit yogondak afuni inunggulenu Amori mene inaiba logolik, iren, Nineisena ebe andiat, iluk oba himbirik logolik amingmingengge welagaikharek andi mene amingmingengge logogun ugun a. Hirenat senggerogo ini o. An enek he, nebe inom, nagainafuri inom, nineisena Tuhan amuat amingmingengge logogun o,” iluk yagaisasikhe.