IBRANI 5:12 - Allah Wene Fano Wene Hupla Inane

¹² Hit he, Allah ane attagat wanhigipmo re, hiren it afuni ekhe yagaisa elok meneat he, elo'lek andi nen, wene attak yagaisagarek mene andi, it afuni ekhe nen inoba yagahisogoin o. It yenggerugwi sumburu haro mene nogoin elo'legen, inagaisa ineilak enek nunggu welagaikharek andi hak, hit he, wene wurik mene yagaisogoin elo'legen he, wene attak yagaisagarek andi mene nek yagaisikhi logogun hinobabut hisikhi lagi o.

IBRANI 5:12 ပူးပေါင်းရင်းမြစ်များ

2 SAMUEL 16:23

Andem sambul he, Ahitofel en, ”Yi'nogo hilingi'no,” iluk komorinafunem, wene Allah ebe nen ugu mene hanggeat hologo hilingiti lagaukwa. Andi re, at Daud en hologo hilingiti lagaikhe hak, at Absalom en a'nogoat hilingiti lagaikhe.

EZRA 7:10

At Ezra a'nogo re Tuhan Allah awene melalek a'nogoba fi-furogo kumuthigik, wene melalek a'nogo ebe hilingitik, yi'nogo ti'nogo hilingi'no iluk werek mene omanogo afuni inunggulenu Israel mene a'nogo yagaisigik ikhi logogin iluk endawinggen ma nen we misik tukumet fuluk furogo hilingiti lagaikhe.

MAZMUR 34:11

Mene singa ebe oan mene amburu legen nele welagarek, meneat he, afuni Tuhan murok nikharek mene re, yi mene ti mene fano mene inelagaikhogo ekhe logogun mondok lego.

YESAYA 28:13

Andiba re Tuhan nen hit hinoba ero misik-misik ane misik-misik, asiok misik-misik yagaisili'lago andi o. Nen, hit logoin iluk lagunem he hineisok peikhogo hinagambut palogo hinoatunem he, hinenggi hele warogo helewarek fisugunem hakhogo welagep.

YESAYA 55:1

Tuhan nen ikhi logolik, ”Hit hinebe mondogat i nelethinabi'lago mene andoma re, i foukhogo werek enggere na we'ni o. Hit hinauang lek mene re we'ni o, gandum we onggolek hela wesimbik na we'ni! Anggur inom amusu inom foukhogo werek enggere, weat hela we'ni o!

MATIUS 17:17

A'nogo yagatikhemo, at Yesus nen he, mel yagatikhe: ”Hit afuni o yogondak welagep mene yi re, hinendawinggen an noba eberogoat iluk himbiret figi'lek logolik nong akhikhi lagep yoma ri! An hit ninom nenggi miren oba logogun nogo. Hit yi'nogo hilingitu kwelek nafe morogo nenggi miren logogin,” iluk yagaisasikhesik he, ”Yenggerek ari an noba waluk we'ni o,” iluk yagaisasikhemo.

MARKUS 9:19

Yagatikhemo re, aren it afuni omanogo mel yagaisasikhe: ”Hit afuni o yogondak welagep mene yi re, hinendawinggen noba himbiret figi'lek welagep yi ri! An nafe morogo nenggi miren oba ninom logogun nogo. Yenggerek ari an noba waluk we'ni o,” iluk yagaisasikhemo oba waluk wagaukwa.

KISAH PARA RASUL 7:38

Nen, ninombalak inom o leimo afuni le'ma andoma andogorek were'ma, tom Sinai andi a'ma malaikat Allah nen yonggo pelakfisa wagarek mene omanogo ekhe oba pi wagaikhesik he, emberek wene ane isukwa andi, at Musa aro. Ninombalak omanogo inomat were'ma, at Allah nen, wene nineluk logogun wene andi, nit yaganisoageluk yagatikhe andi, at Musa aro.

ROMA 3:2

Andi re, yi mene ti mene faget mondogat fano nek. Wene andi ebe furogo yagahisak. Ekhe re, Allah nen he, ”An nane it elok fisogo logogun,” iluk, irat yagaisikhi lagaikhe.

1 KORINTUS 14:19

Mene re, an Allah againafuri ninom andogorek logolik wene yagaisageluk he, inane nonggot mene elalinat hokhorogo igi'lek, we, futfogoin mene nane endebat 5 ba nek umo fano iluk yagaisigirek.

1 KORINTUS 14:20

Nerugwi nagaila'lak. Wene hinendawimo ebeti lagep andi re, yenggerugwi inendawimo ebetarek hak ebeti logogup. We, omalik ket tago mene nen weak hilingitu inonggot welagaikharek hak logolik, hinendawinggen inalue inendawinggen hangge wurikhogo logoino.

GALATIA 4:3

Andi hak he, nit ninendawinggen oan were'ma, munggwarengge obabut weak mene kweangma yoma enggiba welagarek mene nen awe a'ma ninobagaluk welagaikhe andi.

FILIPI 3:1

Nerugwi nagaila'lak. Wene andi yagahisagen he, ninoe Enupogot hinom hundik logolik, hinendawimo hinagaiyek anggikhi logoino, igi andi. It ekhe nen weaget hinafi'lek hinebe fano logobagaigeluk, wene attak lisu palogo lakfei wagagi meneat, nambe senap agi'lek hobuk nane ekhe inomat yagahisagain aro.

KOLOSE 3:16

Afuni inangge hokhorogo were'ma inalong welagaikharek hak, hit he, Kristus ane andiat hinendawinggenma ninghogo fakhaluk logolik he, hinendawimo kagalogoat, hit-hit wene komo-komo aga logolik, wene hiren yagaisigik, iren yagahisigik, ikhi logoino o. Yagaisikhi logolik he, Allah faget wuni Mazmur endawi watik, Allah fogeratarek awuni watik, Allah Areagun en hinendawimo kagalhunem, wuni felalogo watik, ikhi logolik he, hinendawinggenma nen Allah hai wati logoino o.

IBRANI 10:32

Nerugwi nagaila'lak. Hit attak Allah nen hinebe seleget hinafikhemo were'ma yi enggin ti enggin wiik-weakhogo hilinghinafu kwelek, hinafe morogo ninghogo welagagip andi hinendawimo ebe'no o.

IBRANI 5:11

Wene andi faget he, niren hit yagahisogoin mene hokhorogoat werek meneat he, hit hinobabut, wene weak-weak futfou elo'lek andi nen, niren furogo yagahisogoin elo'lego.

IBRANI 5:13

Yenggerugwi inagaisalak ineilak enek nenggarek andi re, inebe yenggerugwi atma, wene yi fano, yi weak, iluk penesu inonggot welagaikharek andi nen aro.

IBRANI 6:1

Andi nen he, Kristus agoromi a'luk hilingiti logogun mene wene attak yagaisagarek andi mene yagaisasugu andi werek kwelek, inalue asimbik hilingiti logogun mene yagaisikhi logouwogo. O tik fano watfuluk inenggi endenharek lek andi hak, nit attak weak hilingiti lagagu mene fakhogo herakfisaluk ninobabut hebelhugusik ninendawinggen Allah oba himbiret fesugu mene andi hobuk hebelugun lego.

1 PETRUS 2:2

Yi mene ti mene enduk mikhaluk, fano agarek andi hak, ninoe Enupogot obabut fano hikhi lagep andi nen he, omalik ket tago mene eilak nele nen nunggu mondok welagaikharek andi hak, wene fano wene hinendawinggen andiba wurik asumo fanothinabuagaluk, wene andiat wanhu mondok logoino o.

1 PETRUS 4:11

A'nogo ikhi logolik, Yesus Kristus hinom hundik logolik hilingitunem, it afuni ekhe nen Allah fogerati logouwageluk, hit ekhe nen wene yagaisikhi logolik, Allah aneat yagaisigik, hit ekhe nen it ekhe leberisikhi logolik, Allah omame wo'nisikherek andibaat leberisigik, ikhi logoino. A'nogo hilingiti logolik, Yesus omame hokho etok mondok welagarek mene a'nogo fogeratu logouwogeluk, ”Amin,” igi andi.