HOSEA 2:7 - Allah Wene Fano Wene Hupla Inane

⁷ Anggwe a'nogo palogo foumo re, ap at inom nikharek mene andoma heraginabik lagain iluk hilingisigin oba nen he, inom ambi asugun lek. Nen aren it muginarek lagain oba nen he, it heraginabigin mondok legaro. Arigin lasumo, aren ikhi logolik, an attak he, fano welagiba nen, yogondak mondok weak welagi. Andi nen he, An nagun attak mene oba hobuk nambotkwe lagain o, iluk igin.

HOSEA 2:7 ပူးပေါင်းရင်းမြစ်များ

2 TAWARIKH 28:23

Aren anggikhi logolik he, ”O Siriaba kembu dewa werek mene andoma nen he it ap raja Siria mene ogo leberina fikhengge a'nogo re, an nen wam warogo wogosi lagain halok he, an ogo elok lebetneagain iluk anggasikhesik he it Siria inap at ebe mabenet fesukwa mene omanogo inanggembu dewa omanogo oba wam warogo fei laga lagaikheba re at onggwarek ebe inom, it afuni holhu mene omanogo inom alomat fisikhi lagaikhe.

MAZMUR 116:7

Neisena Tuhan nen an noba fanorogo hilingnaferek andi nen, an nendawinggen hambukhogo welagirek.

YESAYA 30:16

Hit he selei mene inenggimo nen hinangge kuda ba heise weak-weak longgo ugun mene a'nogo faget enek yi'nogo hilingisugun-ti'nogo hilingisugun iluk lenggalhu mondok welagep. Andi re fano! Eberogo nen hit hobuk uwaregat logoin! Hiren wenggel hikhi logolik he hit hinangge kuda andi re eisok a'ne weak lili'logo anggikhi lagep oba nen he, it ekhe nen mukhinarek logoin mene andi re ineisok a'ne mondok weak mene nen mukhinarek logoin o.

YEREMIA 14:22

Ap inunggulenu mene inanggembu dewa nen he meiso kweangma pelabi wesu lek hak, Nen, pogoren ogore at onggwarek omameba meiso pelabi wesu lek hagat. We Hat hamu nek he nit ninendawinggen hoba eberek welago mene welagenma re, Haren hilingitunem enek he andoma mondogat hilinglagarego.

YEREMIA 2:2

”Hat hebe afuni o Yerusalem welagaikharek mene inoba lambik he, wene mel yagaisano: Hit afuni Israel mene yi sani. Aben hemi ket iginapluk, inendawinggen hundik welagaikharek andi hak, hit hinebe oan oba nenat An noba lomborogo logolik hinendawinggen An noba hundik were'ma, o leikwe yi mene ti mene awi yago lekwe andoma nombo'ne mondok nikhi lagagip a'nogo hinoba ebeti o.

YEREMIA 2:28

Hiren hinandugwi kembu pugunhogo hilingisogo fikhi lagep mene andoma ebe koma weregen nogo? Iren hinebe elok telhinabu hak halok he, weak hinoba agunem, iren telhinabuageluk inayonggo feinore. Hit afuni Yehuda mene hinawi kota mondok hokhorogo werek andi hak, hinandugwi kembu a'nogoat hokhorogo werego.

YEREMIA 2:36

Hit he, afuni inunggulenu ekhe mene inandugwi kembu omanogo nen lebethisoageluk weak-weak laga lagep. Ma re, eberogo nen hit he afuni Asyur mene nen hinenggali warogo hinobagasukwa hak, it Mesir mene nen ogo hinenggali wasugunat andi o.

YEREMIA 3:1

Tuhan nen ikhi logolik, ”He ekhe agun nen herakfikhemo were'ma nen, he a'nogo ap amu mene helugu halok he, agun attak mene a'nogo nen he andi nekhengge helagain mondok lek, andi re it a'nogo hilingisugun andiba re o kweang yiba elokhe weagerogo fogoin hanogo. Hat Israel he hendawi hundik mene hinom mondok hokhorogo hilingiti logoligenat he, An nambit sugulogo wesigin iluk hilingiti lagen andiri!

YEREMIA 31:18

Hobuk an nesanggo holhunemen he afuni Israel mene re inendawimo heiselogo, inane ikhi logolik he, ”Tuhan nineisena, nit he wam maro eil oan wati'lek mene hangge hilingik welagagu o, oba nen he niren futfuluk hilingisuageluk he Haren yaganisasigin, nen yogondak he nit sugulogo Hat hoba wesuogeluk hilingiti lago, nineisena. Ma re, Tuhan Allah nineisena, Haren nit nekhengge wo'ninabin o.

YEREMIA 31:32

Oba nen wene An nen inombawi inoba o Mesir en woginarek wulibi waga logolik warisasigi mene andi higit he fuk. Iren An faget he hemi inaguni hakhogo hilingik welagagi, oba nen he An ninom wene watugu mene a'nogo iren taganhogo hilingiti lagaukwa.

YEREMIA 44:17

Niren wene wato mene andoma re ekhe inom hilingiti logogun aro. Niren he ninagaisa Ratu Surga andi obaget wam warogo figik, nen o kota Yehuda ba oma nen inom, o Yerusalem kwe bene omanogo nen inom, nit ninombawi nen ogo, raja-raja lagen ogo, ap pemerintah ba yabu legoma hilingitarek inaben ogo, nit ninonggwaregen ogo ninetokhogo ninagaisa andiba anggur agai hilingisogo obaget fikhi lagagu hagat, hilingiti logogun o. A'nogo hilingiti lagagu sambul andem he, nit he yi mene ti mene ninenggim sikhogo nek logolik ninamburu werekhogo nek mondok welagagu, nen niren enggen mene ekhe hikhi lagagu lek.

YEHEZKIEL 16:18

Haren he kembu alik waganek omanogo bene su ugu An nen wokheti mene omanogo labet fisikhi lagen. Haren he zaitun amusu inom, amben fano mene dupa inom An nen wokhetigi mene omanogo kembu obaget fisaluk wogeti lagen.

YEHEZKIEL 20:32

Hit he, it ap o kweang amukwe mene inom, inunggulenu andoma mene inomen e inom, helep inom fogeratarek mene omanogo inobabut wanhigipsik higithogo hilingiti lagep. Oba nen he, hit hinendawimo anggikhi lagep mene andoma re higit asigin lego,” iluk ikhe yagaisano.

YEHEZKIEL 23:12

At Oholiba nen ogo re ap Asyur mene andoma inoba amolo mondok agama re, ap kuda amboloba lagaluk lagaikharek meneba nen alage ebendek mene andoma inoba inom, ap inunggulenu inap inom, it ineabu legoma hilingitarek inap inom, it tentara inasu eil mep mene nek laberek inap andoma inoba inom, endawinggen ningge.

YEHEZKIEL 23:22

Tuhan Lego Mondok welagarek mene a'nogo nen yi'nogo ikhe, ”Oholiba yi sa, hat hendawi hundik hilinginafi lagen mene omanogo hinom he homame mondogat ilimit kwiarogo hilinglagen hea, oba nen he iren hat hoba ina'mage figik, hukhogo kwelakhafik, uageluk An nen it inendawimo ina'mage kwelabigiluk welagi.

YEHEZKIEL 23:4

Helime andem manggusa mene enu re Ohola, andi Samaria faget ilirenggerogo. Agot he enu Oholiba, at andi re Yerusalem faget ilirenggerogo. It inebe pirenet he An nen woginafirik inebe lombok inagainafuri helime mene inom alage mene inom taginafa.

DANIEL 4:17

Nit malaikat Allah onggwarek faget tegelek logolik, kagalek welago mene nen wene arat tekhogo ogo mene re andi. Nit a'nogo ogo andi re, it afuni o kweangma yi awi ti awi werek mene nen he, Allah Enupogot yi mene ti mene enggiba welagarek mene andi nen he, ap inenupogot logolik ferinarek logouwageluk wogisikheresik, hobuk waganogo ap ekhe inebe yenggerugwi elo'lek meneat he, inenupogot logouwagaluk wogisikheregat higi, iluk inelu asuageluk a'nogo ogo andi, iluk ugunem yethigi o.

DANIEL 4:25

Noe hat hebe afuni inoba nen mugusogo lakhobagaumo re, yi wam ti wam hinom o leimo andoma logogun. Andoma 7 tahun logolik he, wam sapi nen engga ninggerek andi hak ninggik, enda'ma leimo nogo igik, ugunem, hebene meiso henanggikil hoati logogin. A'nogo nugunem 7 tahun arat logombik enek he, noe haren, Ap inenupogot logolik, afuni ferinarek welagaikharek andi re, At Allah Lego Mondok welagarek mene enggiba welagare'ma higi. A'nogo enggiba logolik Aren, at andi hak enupogot logouwak, iluk anggikherek higithogoat inenupogot logouwageluk menfisikhere'ma, higi o, iluk hambeba nen fakhogo igin o.

DANIEL 4:32

Andi nen he, hat hebe afuni inoba nen mugusogo lakhobagaumo, yi wam ti wam hinom o leimo andoma logogun. Andoma 7 tahun logolik, engga wam sapi nen ninggerek hak ninggi logogin. A'nogo 7 tahun arat logombik haren he, Ap inebe raja logolik afuni ferinarek welagaikharek andi re, At Allah Enupogot enggiba welagarek higi. A'nogo enggiba logolik, Aren, At andi hak ebe raja logouwak, iluk anggikherek higithogoat inebe raja logouwagaluk menfisikhere'ma, higi o, iluk hambeba nen fakhogo igin o,” iluk yaganete.

DANIEL 5:21

At ebe afuni inoba nen mugusogo wulakfisasukwama, obabut wam obabut hangge hilinglagaikhe. At ebe wam keledai maro mene inom enggama andoma welagik, sapi nen engga ninggerek hak ninggik, hilingiti logolik, enda'ma nogo ugu mondok were'ma henanggaluk pogoroba nen ebene sali pi waga lagaikhe. A'nogo welagaikhesigen, aren ikhi logolik, Ap inenupogot logolik afuni ferinarek welagaikharek andi re, at Allah Lego Mondok welagarek mene enggiba welagaikhare'ma higi. A'nogo enggiba logolik Aren, At andi hak ebe raja logouwak, iluk anggikherek higithogoat ebe kain inoe raja logouwageluk menfisikhere'ma higi o, iluk ambeba nen fakhogo isikhe.

HOSEA 1:2

At Tuhan nen an Hosea nayonggo fikhesik wene afuni Israel mene yagaisoageluk attak-attak yi'nogo yaganete: ”An nagainafuri o yoma re An noba lombokhogo welagi'lek hera'nobagaluk wulibi'lagwi o. Andi higithogo re haren he yanani nilik nikherek mene andi waganogo hagainafuri at obabut hanggeat taginabino o,” iluk yaganete.

HOSEA 13:6

A'nogo meneat he, hit hinebe o fanoma kwi wagagipsik logolik, yi mene ti mene hinalabut ninghogo ninggi logolik he, hinoba homot lagunem foget fakhikhi logolik, An noba hinonggot a'luk welagep andi.

HOSEA 14:1

”Samaria re An noba eilnafesik nane sagalogo hilingitu nen he, unggum hela higit obaat helagain o. Afuni holhu mene aren mene andoma re weim elema nen wa'lasugun. Inomalik ketago mene re wulil tagalogo legerinafik, hemi omalik ina'ma mene re inalabut pelangetik, ugun o,” iluk ikhe.

HOSEA 2:16

A'nogo wo'nabimbik, aren an yaganeti logolik, Baal, iluk yaganeti logogin lego. We, Nagun e, iluk yaganeti logogin.

HOSEA 5:13

Hit afuni hinunggulenu Israel mene inom, Yehuda mene inom, weak welagep andi futfembik he, hit Israel mene nen afuni Asyur mene inoe raja lego welagarek mene ekhe nen telhinabuagaluk ayonggo lagep meneat he, aren telhinafik, hinebe fano logobagaigeluk hiligisogo hinobagagik, u re, elo'legat aga andi.

HOSEA 5:15

Nane sagalogo weak hilingiti lagep andi nen, yi enggin ti enggin hokhorogo hikhi logobagaigeluk hinebe herakhinobagagin o. A'nogo herakhinobagaumo, hiren, Nit weak hilingito, iluk futfembik, yi enggin ti enggin a'nogo hikhi logolik enek he, hinendawinggen oba nenat hera'nabik wesugun he a,” iluk yagaisasikhe.