FILIPI 3:10 - Allah Wene Fano Wene Hupla Inane

^10-11 At Kristus yi enggin ti enggin hilik-hilik wa'lagaikhe hak, nemberek higithogoat, an a'nogoat enggin hilik-hilik, wa'lasiginat anggikhi lagi. Mene re, at wa'lagaikhemo, Allah omameba eluget fesikhe hak, an a'nogoat wa'lasumo, neluget nabigin iluk, oba eberegat welagi.

FILIPI 3:10 ပူးပေါင်းရင်းမြစ်များ

YEREMIA 9:23

A'nogo yagaisigimo Tuhan nen mel ikhe: ”Ap ekhe endawinggen kagalek andi nen fogerakhigik, it ekhe inomame hokho andi nen fogerakhigik, it ekhe inangge yi mene ti mene mondok hokhorogo werek andi nen fogerakhigik, ugun mondok lego.

MATIUS 20:23

A'nogo yagatukwama, at Yesus nen he, ”An yi enggin ti enggin hilingnabugun andi hak, hit a'nogoat hilinghinabugun meneat he, hat ekhe an nenggi ebekwe, nen ekhe nenggi harekwe ninom kain logouwogeluk, andi nek he, an nen menhinobagagin elo'lego. We, an neisena nen endamaren logouwageluk wenagaisogo fisasikhe meneat inobagagin o,” iluk yagaisasikhe.

YOHANES 10:18

An nen wa'lasigin anggigi le'maat, it afuni ekhe nen obakheba noasumo elo'lego. We, An nonggwarek nendawimo nenat, nebe wa'lasigin anggagain obaat wa'lasigin o. Wa'lasumo, hobuk nambotkwe neluk asigin andi nonggwarek nendawimo nen anggagain oba aro. A'nogo hilingisuageluk neisena nen laknobagai wagaikhe meneat hilingisigin o, iluk eberogoat yagahisigi,” iluk yagaisasikhe.

YOHANES 17:3

It afuni nen he, Allah ami amuat eberogo fogerasu mene werek iluk, hebe inelu agik, nen an Yesus Kristus laknobagai wagenma wagi mene yi nebe inelu agik, ili'lagwi andi re, ineluk mondok welagaikharek ero andi aro.

ROMA 8:17

Nit ninebe Allah againafuri halok he, at Kristus yi enggin ti enggin hasikhe hak, hogoin halok, Allah nen nit Kristus ninomat fogetninabigin andi nen he, Allah nen yi mene ti mene at againafuri wogisageluk abok yagaisasikhe mene andi, at Kristus ninomat wo'nisamo, eise logogun o.

ROMA 8:29

Attagat, at Allah nen nit ninebe elu logolik, at amlogo higit asuageluk wenagaisogo ninobagasikhe. At Yesus ebe manggusa mene, agoromi hokhorogoat at inom logouwageluk wena'ninafikhe andi.

ROMA 8:36

Wene andi higithogo Allah aneba lisu palhi logolik, mel isukwa: ”Hat fagerat he, afuni nen linggene hundik, hubanggo hundik, ninoasuogeluk hilingninafu mondogat werego. Afuni nen domba wam wasuogeluk abok palharek andi hak, ninabok palhuat werego.” iluk lisu palogo fesukwama werek.

2 KORINTUS 1:10

Nit ninebe mondogat ninoasugun iluk anggasugusi'mo nen, at Allah nenat telninafikhesik he hobuk telninabigin aro. Nit faget hit ninomat samban ikhi lago a'nogoba, hobuk telninafo logogin aro, iluk he ninendawinggen at oba himbiret fuluk welago. Hiren, nit faget samban ugu mondok logogun andiba, at Allah obabut fano nen nit telninafunem he, it afuni ekhe hokhorogoaren ineilenggen nisambik Allah hai wasugun aro.

2 KORINTUS 1:5

At Kristus yi enggin ti enggin hasikhesik hobuk ekhe inom hokhorogoat hasikhe andi hak, nit a'nogoat hikhi lago aro. A'nogo hugunem at Kristus nen nit ninendawimo fano asuageluk hobugalep ninendawinggen sebelhu mondok welagarego.

2 KORINTUS 13:4

At Kristus ebe lebelek were'ma eba menfuluk watukwa meneat he, at Allah omameba eluget fesikhemo elugat welagarek. Andi hagat he, nit at ni nom hundik logolik lebelek welago meneat he, at Kristus ninom hundik nineluk logolik he, Allah omameba hit faget hilingisi wesugun o.

GALATIA 2:20

Nen, yogondak nebe neluk welagi yi re, nonggwarek nomameba neluk welagi fuk. We, at Kristus at nendawimo logolik eluk welagarego. At ebe Allah amlogoat logolik, nebe endawi nen an fagerat, ”Noasuak,” iluk anggasikheba ebe watukwa andi. Nen, an nendawinggen at oba himbirik were'ma re, at ebe nendawimo were'ma, neluk welagirek andi.

GALATIA 6:17

Hobuk he, an Yesus amingmingengge iluk, nebene nagambut enegat werek andi nen he, it ekhe nen an nendawimo wiik-weakhogo hilingnabugun lego. Mondok nabit.

EFESUS 4:13

A'nogo hilingiti logombik, ninendawinggen at oba eberogoat himbirik logolik he, ninebe misigat mene hangge hilinglagik, Allah amlogo andi ebe furogo ninelu agik, at Kristus yi mene ti mene faget endawinggen katokhogo wurik mondok welagarek hak, nit ninendawinggen a'nogoat wurik agik, ugun andi.

FILIPI 3:8

A'nogo futfikhi lagi andi nek fuk. Noe Enupogot Yesus Kristus nelu agagi andi fano mondogaro. Yi mene ti mene hunogo mene hilingiti lagi andi, nong asigin mene hilingiti lagagimo iluk, futfikhi lagi aro. At ebe helambik he, ninom hundik mondok logouwogeluk, yabu alengge palogo wulak fisagarek hak, yi mene ti mene attak hilingiti lagagi mene andi: ”We meneat,” iluk herakfisasigi andi. Wene Allah nen komotninafikhe wene andiba, nonggwaregen higit hilingiti lagi fuk. It afuni ekhe inendawinggen Kristus oba himbiret fugunem, wene inoba mene korogo wokhaluk hobuk Allah inom hunogo fisikherek hak, an a'nogoat nendawinggen at oba himbiret fesigimo, wene noba welagaikhe mene korogo wokhasikhe andi.

KOLOSE 1:24

An yogondak ya re, at Kristus nen he: ”Allah againafuri mondogat an nebe aro,” iluk nit faget yi enggin ti enggin hilik-hilik wa'lagaikhe andi, ekhe higi'lek mene obali'mo an nebe hit faget yi enggin ti enggin hilingnabi'lagwi andi nen nendawimo nagaiyegeti lagi.

KOLOSE 2:13

Hit attak he, hinagap endakwe faget hinenggalimo mene a'nogo palek lek, weak hilingitu mondok logolik he, hinebe warek hangge were'ma, at Allah nen nit weak hilingiti lagagu mene sebelogo legetfisasikhesik he, Kristus hinom hundigat were'ma hineluget hinafikhe andi.

KOLOSE 3:1

At Allah nen he, Kristus eluget fikhi logolik, hit hinomat hineluget hinafikhemo welagep andi nen, yi mene ti mene Kristus ebe pogoroba Allah era'lu enggi ebekwe kainat welagarek oba andoma mene hela louwogeluk, hinomamerogo hilingiti logoino o.

1 PETRUS 1:3

Ninoe Enupogot Yesus Kristus eisena Allah a'nogoat fogerati logouwok. At Allah ninebe endawi mondogen, Yesus Kristus wa'lagaikhemo nen eluget fesikhe andiba nit ninebe hobuk ninambotkwe ket ta'ninafikhe andi. Ninelugetninafikhemo logolik he, ninendawimo nen, ”Aren, hobuk fanothinabigin, isikhe andi lek asigin lek,” iluk ninendawimo ninagaiyek hikhi lago.

2 PETRUS 1:13

At ninoe Enupogot Yesus Kristus nen yaganetikhe hagat, an nebe nagap mene elama faget welagi yi re, herakfisaluk weak-weak lagain higit welagi, iluk an nelu welagi andi nen he, yogondak nebe neluk welagi yaba re, wene andi faget hinendawimo eberogo yagahisugu mondok logigin anggikhi lagi o.

1 YOHANES 2:3

Wene Allah nen komotninaferek wene andi, hologo higithogo hilingiti lago halok he, at ebe nineluo, iluk andiba nen ninendawinggen wenggelogo futfikhi lago.

1 YOHANES 2:5

A'nogo meneat he, ap sa nen Allah ane hologo higithogo hilingiterek halok he, at andi katokhogo nenat Allah mondok endawirogo welagarego. Nen, nit a'nogoat welago halok, nit Allah ninom hundik welago, iluk andibaat ninendawinggen wenggelogo futfikhi lago.

WAHYU 1:18

neluk mondok welagirek he, an aro. An nebe arat wa'lagagi meneat he, yethan! Neluk agagisik, neluk mondogat logogin o. Wa'lagaikharek andi inom, wa'la'luk lagaikhare'ma andi inom, kwe hutarek mene an nenggiba werego.