DANIEL 7:7 - Allah Wene Fano Wene Hupla Inane

⁷ A'nogo higirik, neilenggen kumutu were'ma nen he, enggaminogo mene ekhe weinam aga, At andi omame mondok hokho mene re, inailo a'luk youk hokho la mene higi. At aik he, hokhondek mene re, posiemanggen haroweak andi hak hilingik welaga, aren senggelhungge omanogo warogo sebel fakhaluk misigam pilisikhi laga higi. Nen abu'nengge omanogo eisogen aldandam isikhi laga. It attak-attak weinam agaikha mene aremnogo re hunogoat hilingik kwelek, at andi nek he amurogoat hilingi'mo higi. At andi andimuk ungguloak oba 10 nen wilibik welaga.

DANIEL 7:7 ပူးပေါင်းရင်းမြစ်များ

2 SAMUEL 22:43

An nen he, it inebe wulil tagalogo inoatunem kweang aling hakhogo hesangge-pesangge hilinglagaikharego. Nen it inebe fesi ebekhe kwe andi hakhogo felelenghogo lakfisigirego.

AYUB 41:14

At ambisang mondok uan awan, omame hokho, aik mondok ngili ngelerek, hilingi'mo re, inailo lek sa nen, ambele kwialu hak anggegep?

YEHEZKIEL 40:2

An nabikanggo ekhe wokhugunemen he Allah nen an wo'narek kweang Israel meneba lagasik punu uan meneba nobagai laga. Ma re an nelokhe fikhiren kwelakhugunemen he o wurik ekhe kabokhogo wuri'mo obabut he kota higit halogo were'ma higi.

DANIEL 2:19

A'nogo yagaisasikhesik hubanggo nogo ugunem en he Allah nen raja abi hinago mene hasikhe mene a'nogo Daniel abikanggoba yagatikhe. A'nogo yagatikhemo, at Daniel en Allah pogoroba mene fogeratikhe.

DANIEL 7:13

O hubanggo andi sambul nabikanggo a'nogo yethigirik, neilenggen oba mondok were'ma nen At ekhe abat ta'lagaikhe mene ohena oba huli'liphogo re, At eluk mondok welagarek mene a'nogo oba higit lagasik he, era'lu horokhogo lagasik hai wat-wat ugunem yethigi.

DANIEL 8:10

Andimuk a'nogo ebe ekhe inom hokho aga logolik omame werek agasik he, aren tentara pogoroba mene ebe hesagalenggen omanogo inom weim yafi logolik, it omanogo inanggele'ma nen fenakwe re o kweangma hugisa pi wagasik, eisogen tandamhogo liliban isikhi laga higi.

DANIEL 8:22

Andimuk attak mene somborogo pugu kwelek andimuk ekhe ket mene weinam agunem hegen andem he, kerajaan Yunani andiba minggil-manggal aga logolik he kerajaan ebe minggilogo enggaminogo hilinglasigin mene faget hegen, oba nen he it enggaminogo andemen he kerajaan attak mene omamerek logogin andi hakhogo ekhe inomamerek logogun lek.

ZAKHARIA 2:1

Nabikanggo ekhe hobuk meneba hasigi re ap misik ekhe hele ilirengge enggim fisogo were'ma higi.

WAHYU 12:3

A'nogo heinet watu kwelek, afuni nen futfouwageluk pogoroba elalinat hilingisu lek mene hokhorogo hilingitunem ekhe yethigiat. Kisu agap mep mene ebe hokho mene were'ma unggul he, 7 nen hilingik welaga, ungguloa'ma andimuk 10 nen wilibi'mo, nen, kware-kware ap kaindek ikfisagarek andi mene 7 nenat inunggulkwe inebe lombok ugu welagaikha.

WAHYU 13:1

A'nogo yethigiri'mo nen, ombo'ne re, mene olomene hangge hokho mene ekhe andimuk unggul oba ebe 10 nen wulibik welaga, nen unggul he, 7 nen hilingi'mo, i laut yenggele'ma nen wulibi wagunem yethigi. Andimuk 10 nen andi, ebe lombok oba re, kware-kware ap kaindek ikfisagarek andi hak ugu were'ma, nen unggul 7 nen andiba, ebe lombok oba re Allah enu wiik-weakhogo hilingitarek mene lisu palek welaga yethigi.

WAHYU 17:12

Nen, andimuk unggul oba 10 nen wulibik hegen andi ebe re, ap inebe 10 nen kain asugun mene oan werek mene hegen meneat he, it kain menfisamo, at mene olomene hangge a'nogo inom, we, satu jam faget enek kain logolik afuni ferinarek logogun mene hegen o.

WAHYU 17:7

A'nogo fogerati lagimo, malaikat a'nogo nen mel yaganete: ”Nenahalok fogerati lagen? An nen, he andi ebe inom, mene olomene hangge unggul 7 nen were'ma, andimuk unggul oba 10 nen wulibik mene, amboroba at he andi hurek were'ma waluk nikherek mene andi inom, emberek faget wene hinago werek mene fakhogo pilingisogo yagahesigo.

WAHYU 17:8

Mene olomene hangge hegen andi attak welagaikhe meneat he, yogondak elokhe lek hegen andi re, kweang a'ma nen lagai wesigin o. Lagai waga halok, Allah nen alomat fagain o. Nen, Allah nen kweang pogot oan elalhi'lek logolik, suesingga it afuni ineluk mondok logouwageluk fanorinabigin mene halok inenu lisu palek andiba, it ekhe inenu lisu palek lek mene nen, mene olomene hangge andi ineilenggen hasukwasik, iren he, mene olomene hangge yi, attak welagaikhesigen, elokhe lek agaikhe meneat he, hobuk weinam aga yi, nailo e, iluk fogerasugun o.