AMOS 5:16 - Allah Wene Fano Wene Hupla Inane

¹⁶ Tuhan Omame Mondok Hokho mene a'nogo nen mel ikhe: ”Ebekhe o kota lagaikharekwe laga logolik afuni nen inendawi ou en inendawinggen warilik laga logolik le yagaisogo inabel tagalhi logogun. Nen we it ap petani yabu wanharek meneba nen ogore, ap warek faget obaget ninom le asuogen iluk ap le faget onggo palinafu mene omonogo inom le aga logogun.

AMOS 5:16 ပူးပေါင်းရင်းမြစ်များ

2 TAWARIKH 35:25

At Yosia wa'lagaikhe mene andi faget he nabi Yeremia nen le wuni misik ekhe felalhikhe mo re, yogondak huli nen he wuni andi at Yosia wa'lagaikhe wuni a'nogo faget ebetu sambul he ap inom, hemi inom, it afuni Israel mene andoma wuni wulafarek inaben wuni andi wulafu mondok werek. Wuni andi re iren buku le wuni andogorogo palogo fesukwa mene a'nogoba kwelakfesukwama werek.

YESAYA 15:8

Yi kwe ti kwe o Moab inom huli hulimo andoma ap ngai-waiyenggetunem holhi logogun. Nen, le agunem he o Eglaim inom o Beer-Elim inomen holhi logogun.

YESAYA 22:12

O andi sambul he Tuhan Mondok Lego logolik Omame Mondok Hokho mene a'nogo nen he hit le yagaisogo logolik fong watik, hinesi hogologo palhik, pelagi su labetik hilingi'ni o, iluk yagahisagain.

YEREMIA 30:5

”An he ap inoak leigeti logolik heinet wari'lagwi mene andoma inane arat holhi o, ap inendawinggenma hambukhogo welagi'lek, inailorogo nek hilingiti logolik inane ngai waiyengge liabi'lagwi mene andoma arat holhi.

YEREMIA 4:31

An nesanggo holhugunemen he, he mene eak takhageluk heinet watunem hilingiterek hak hilingitunem holhi, he tugum mene nen omalik manggusa malik tasigiluk hilingiterek hak, Yerusalem he set hoporogo le ari'logo. Enggi langhogo heinet wati logolik, ”Eige, an mondogat alomat lasigiluk welagi o, an naselei mene nen noasuogeluk hilingiri'lagwi!” ili'logo.

YEREMIA 9:10

A'nogo ikhemo an Yeremia nen ikhi logolik, ”An he engga o leikwe inom, tomkwe andoma inom mondogat pukliok ikhe, nen afuni ogo andoma kwe lagaikharek legat, andem faget an he le agik, fong watik, hilingiti lagi o. Wam tatharek mene inom, nen ekhe amu mene inom he mondogat longgo agama, inareng tiring tereng ikhe andi faget he le aga lagi o.

YEREMIA 9:16

A'nogo wogisambik, inebe it afuni inunggulenu hunogoat mene, iren inom, inombalagen inom, inebe inonggot mene inenggiba fisagain o. An nen ap tentara mene karok waluk it muginarek loagaluk lakfisambik, elugun oba An nen it inebe mondok legetfisagain o,” iluk yaganete.

HOSEA 4:3

Andiba o kweang yiba re mondogat puk iringik weak mene asigin, nen yi mene ti mene kweang yiba eluk werek mene mondogat he wa'lasigin. Eluk-elugengge tulemkwe tari'lago mene inom, kweang oba welagarek mene inom, i laut elonggoma welagarek mene inom mondogat he legasigin o,” ikhe.

YOEL 1:11

Gandum inom, jelai inom, yabukwe yago mene enggen palu mene mondogat lek aga andi nen he, hit afuni yabu wanhi lagep mene inom, anggur yabukwe helengga wanhi lagep mene inom he le aga logoni o.

YOEL 1:14

Afuni mondogat yagaisaluk he inambe heang logouwageluk yagaisano, It afuni kaindek welagaikharek mene inom inogogwi inaluendek mene inom, it afuni Yehuda mene inebe mondogat inom, o Allah awi wuri'mo we'luk Aren lebethisoageluk ayonggo fikhi logoino o.

YOEL 1:15

O Tuhan awi mondok inali'liphogo hilingisigin oba a'nogo horogasi waga, At Omame Mondok Hokho mene a'nogo nen legetfisagain oba horogat asi waga.

YOEL 1:8

Andi nen he, hele tugum mene nen agun helagain iluk endawinggen hundik logolik wenago mene wa'lagunem endawimo weak a'luk, le yagaisogo werek hak, le aga logoni o.

AMOS 3:13

Nineisena Tuhan Omame Mondok Hokho mene logolik, Lego Mondok welagarek mene a'nogo nen, a'nogo ikhesik ekhe mel yaganeteat: ”An nen wene hoba fagain mene yi, haren fanorogo futfembik he, afuni ap Yakub en tagongge mene andi inoba fakhogo yagaisano o.

AMOS 5:27

Andi re, An nen hit o kweang ekhe o Damsyik en yatma andoma lakhinobagaumo logoin o. An Tuhan Nomame Mondok Hokho mene hineisena Allah a'nogo nen nane arat igi o,” iluk ikhe isikhe.

AMOS 8:10

An nen hit hinebe misi'mo andoget fuluk, pesta hilingiti lagep mene andi afuni ware'ma fong watarek andi hak wasubagaik iluk hilinghinafik, wuni wati lagep mene andi le asubagaigen iluk hilinghinafik, hinendawimo weak a'luk welagep mene andi enegat asuagaluk hilinghinafik, hinesi hogologo palubagaigeluk hilinghinafik, hinasu karung mene labesubagaigeluk hilinghinafik, igin o. A'nogo hilinghinabumo, hit hinebe ap ekhe agwe emberek omalik manggusa takhogoin mene wa'lagunem le agaikharek andi hak le hokhorogo asugun o. Andi sambul fano mene ekhe higi'lek weak mondok hikhi logogun,” iluk ikhe.

AMOS 8:3

O andi sambul he, wuni o hun raja awi silimo andoma nen ugu mene re agamhogo le wuni nek ikhi logogun. Ekhema-ekhema andoma ap warek enek kabok ugunem, inane le'legat hambokhogo hugisa wilifi logogun,” ikhe isikhe.

MIKHA 1:8

A'nogo hilinglasigin ikhe andi nen he, an Mikha nendawimo mondok weak agarik le aga lagi o. Afuni Samaria mene inom, Yehuda mene inom inoumo mondok weak mene inoba agasik, afuni kota kuogeluk pa'leget ambe palekwe nen kwagarek andi hak, weak mene andi afuni an werekwe mene o Yerusalem welagaikharek mene inoba asigiluk wagasik werek andi, An hobuk nendawimo weak aga andi enegat asuageluk su laberek legat nen neisok sepatu kwelabek legat, kwe nikhi logolik, mene ane kouwaterek andi hak inom, sue hugubi ane ikherek andi hak inom ilik nikhi logogin o, iluk igi.

MIKHA 2:4

Andem sambul afuni nen li'norinafi logolik kelem wuni yagaisagarek hak, wuni fong warogo logolik agarek awuni yi'nogo ikhi logogun: Tuhan nen he, nit ninawi eroma yinogo ogo re wanhesik, Aren ap nit sebelninabi wagaikha mene inoba wogisikhe. Andiba re, nit ninebe mondogat wolelenggenhogo ninobagaikhe o,” iluk ikhi logogun, ikhe.

WAHYU 18:10

Obaget le a'nogo aga logolik, ”At weagetfikhemo heinet wari'logo andi, nit ninom weagetninafunem heinet wathanogo,” iluk inailo nen inebe yatma mendek logolik, le yi'nogo aga lagaikha: ”At Allah nen, hit afuni o Babel mene hinomame hokho a'nogo re, we, misigam fagerat wene hinoba fuluk weagethinafe andi, eige, hweing,” iluk le aga lagaikha isigi.