AMOS 3:10 - Allah Wene Fano Wene Hupla Inane

¹⁰ Tuhan nen a'nogo ikhesik, ekhe mel ikheat: ”Afuni Samaria mene nen he, inawi fano mondok wuri'mo andoma yi mene ti mene weak hilinginafi logolik, telogo heligik, hugulengge wanhik, aga mene omanogoba mondok peterogo fakhaluk werego. A'nogo logolik, inobabut higithogo hilingitu aplere mondok inonggot werek.

AMOS 3:10 ပူးပေါင်းရင်းမြစ်များ

AYUB 20:21

Aren mondogat nunggu sambul he omanogo ekhe figi'lek mondogat ninggi laga. Ap inoba re enggi werek welaga mene a'nogo re aninurogo welagi'lek weak-weagat lek aga laga.

MAZMUR 14:4

Tuhan nen yagaisikhi logolik mel isikhe, ”Hit afuni weak hilingiti lagep mene yi, hinobabut hebelhi lagep lek yi nenahalok? Hiren he an nayonggo figi'lek logolik, sumburu haumhogo nenggarek andi hak an nagainafuri weagerinafu welagebo,” iluk wenagisasikhe.

AMSAL 1:13

Nit ninaiba it inangge telogoin mene andoma nen peterogo fakhouwogen he, it inangge onggo hokho mene andoma nit telouwogo.

AMSAL 11:16

He ekhe endawinggen fano mene re afuni nen legeisogo fagarek, oba nen he afuni sebelogo fisagarek mene andi re angge yi mene ti mene enggi werek mene hilinglasigin.

AMSAL 28:5

Ap Allah inonggot mene nen he ebe wene faget futfagarek mondok lek, oba nen ap Tuhan fogeratarek mene nen he ibi-eberogo nen fut fagarek.

PENGKHOTBAH 4:1

Andi nen o kweangma yoma higithogo hilingitarek lek mene andoma an nen ekhe inom futfugunem en he, afuni sebelogo fisagarek mene omanogo enggin hikhi logolik le agu were'ma re, afuni ekhe nen leberinafi lagaikha le'ma isigi. Ap inenggi omameba sebelinarek werek mene andoma nen he inomame hokho meneba a'nogo hilingfisugunem he, ap misigen iluk ogo ekhe leberisa re elo'lek welaga.

YEREMIA 4:22

Tuhan nen ikhi logolik, ”An nagainafuri andoma re mondogat kemburego, iren An fut nobagali'lagwi lek. It he omalik kembu mene hak hilingik logolik, wenggelhu mene endebat iluk ogo werek lek, inaniniba hilingisugun mene a'nogo faget enek he hibil-hebelhogo hilingiti logolik, fanorogo hilingisu mene omanogore mondogat nonghong sego,” iluk ikhe o, isikhe.

YEREMIA 5:4

Arigini'lagwi andiba re an nen anggikhi logolik, ”It andi re afuni yugunat mene yi'nogo ti'nogo hilingisu re mondogat inonggot. Iren he ineisena Tuhan Allah nen wene it inendawimo anggili'lagwi mene inom wene inoba werek mene inom An yaganesuak anggili'lago mene a'nogo futfili'lagwi lek andi nen he, it inobabut kemburogo hilingiri'lagwi andi o.

YEHEZKIEL 18:7

Aren he eranhogo wene igik, afuni inangge teligik, ikherek legat. Afuni inangge endawi lirengge fisogo logouwak hobuk onggo fagain iluk wogetu mene omanogo weak-weak ambotkwe wogisikherek. Afuni inamburu nele were'ma inamburu wogisigik, nen afuni inasu laberugu mene le'ma inasu wogisigik, ikherek.

YEHEZKIEL 22:29

Afuni inenggi werek welagaikharek mene nen he ineranhogo wene yagaisikhi logolik afuni inangge telhigik helagarek. Iren ap inenggi lek mene omanogo inendawimo nen anggaluk enek weak peakhogo hilingfisigik, nen ap pok mene inangge ekhe inom manggorogoat telogo heligik, agarek.

YEHEZKIEL 8:17

Tuhan nen an noba yaganeti logolik, ”Afuni wa'lagaikharek mene yi re, iren hilingiri'lagwi mene andi hikhi lagen a? Ap Yehuda mene yi it weak mondok ina'meilo mene hilingiti logolik afuni inoba inendawirinafarek lek mene andoma inoba re homot fisikherek lego. Iren andoma mondogat he An nawi wuri'mo yoma nen hilingiri'lagwi andiba re An na'mage kwelabi'lagwi. Iren mondok ina'meilo mene andoma hilingiti logolik An sebelogo nobagali'lagwingge andi fogesin!

HOSEA 7:1

A'nogo isikhesik Tuhan nen ikhi logolik, ”Hundik-handik An nen nagainafuri Israel mene inebe fano hilinginafik, inambotkwe pugunhogo fisigik, hilingisigin iluk hilingitu sambul aremnogo isikhi lagimo re, weak hilingisugun mene inom, inaniniba hilingisugun mene inom enek hilingiri'lagwi. Iren he, ineranhogo wene lalalengge hilingitik, afuni inaiba yogot hinasi kwigik, ebekhe kwe nen telogo heligik, hilingiri'lagwi andi.

AMOS 4:1

A'nogo isikhesik ekhe mel isikhe: ”Hit hemi Samaria hemi hinebe wam sapi o Basan mene asei hokhorogo welagarek andi hak hinasei hokho asuageluk hilingiti lagep mene yoma re hinesanggo holini o! Hiren he afuni inomame lek mene enggin-fenggin inoba figik, inangge lek inelagaik mene sebelogo fisigik, hinaguni yagaisikhi logolik, Nagai nagain mene faget anggur amusu lugu-lugwi palharek mene keralogo nobagakhi logoin o, iluk hinane ninghogo mondok yagaisugu welagep andi.

AMOS 5:7

Hiren wene higithogo hilingitu awene a'nogo agam fagam isigik, eberogo mene kweangma hugisaluk hineisogen sebelisigik, ikhi lagep mene oma re alomat lasugun o.

AMOS 6:12

Wam kuda tom unggulkwe uarek lagarek nogo? Afuni ekhe i laut yenggelekwe nen, wam sapi nen lisogo waluk yabu wani kwagarek nogo? A'nogo meneat he, hiren hilingisu elo'lek meneba nen tiphogo hilingitu aple omanogo agaumhogo re inendawimo ale palerogo afuni inoatarek mene hilingfikhi lagep, nen, eberogo mene a'nogo agaumhogo re weak mene hilingfikhi lagep.

AMOS 6:3

Hit hinendawimo nen he, Mondok weak mene ninoba fagain oba re oan yatmaat werek, iluk anggikhi lagep meneat he, hit hinobabut weak mondok hilingiti lagep andiba, afuni wolisagarek andi hak horok asi wesuageluk woleti lagebo.

AMOS 6:8

At nineisena Tuhan Omame Mondok Hokho mene logolik, Lego Mondok welagarek mene a'nogo nen ane omamerogo ineluet fikhi logolik he mel ikhe, ”It afuni Israel mene inonggwaregen foget fakhagarek andi re An he nabit mondok welagi o. Nen, inogogwi kaindek inaiba mondok fanorogo wurogo welagaikharek mene andoma re An nen nendawimo nagaiyek anggikhi lagi mondok lego. It inawi kota hokho mene andoma inom, yi mene ti mene o kota welagarek mene andoma inom mondogat he it inaselei mene inenggiba fagain o,” iluk ikhe.

MIKHA 6:10

Ap inanini mondok weak mene inaiba andoma re inangge yi mene ti mene inane nen lalhigik helagarek mene werek. Iren yi mene ti mene enggin walhikhi logolik, ilirengge ebe mene werek kwelek taganhogo walhagarek mene andoma re, An nen nabit anggigirek mene hilingiri'lagwi andi nen he nonggorasigin lego, Ap a'nogo hilingiri'lagwi mene andoma re An nen unggum inoba fagain.

ZEFANYA 1:9

Nen afuni An inonggot mene nen hilingitarek hakhogo An nobaget a'nogo hilingitarek mene inom, nen it inogogwi inailoba andoma yi mene ti mene hugul wanharek mene omanogoba hoporasugun iluk inangge hinatik, inebe inoatik, hilingitarek mene andoma re An nen unggum inoba fagain enego,” iluk ikhe.

2 PETRUS 3:5

A'nogo ikhi logolik, wene yi inonggorari'lagwi. Omanggum Allah anebaat pogot walhasikhesik he, kweang inom, i inom misikwe were'ma, i ponggwe-manggwe lakfesikhe andiba kweang walhasikhe, iluk wene andi inelu logoligat he, inonggot mene nen agarek ili'lagwi andi.