2 TIMOTIUS 3:6 - Allah Wene Fano Wene Hupla Inane

^6-7 Hemi fena yi mene ti mene inendawimo nen inamolo anggaluk, weak hilingi'luk inendawinggen enggin logolik wene yanggulho mondok welagaikharek meneat he, ebe wene furogo wanhi'legat were'ma, it ap inobabut a'nogo hilingiri'lagwi mene andi nen, hemi andi inawilokwe ineranen yandalonhogo kuluk, inaneba lalinafi logolik he, inebe hele warogo hak fakfisili'lagwi andi.

2 TIMOTIUS 3:6 ပူးပေါင်းရင်းမြစ်များ

MAZMUR 38:4

Hat ha'mage an noba fugunem he an noba ou mondok weakhogo hugu welagi, an naweagen he nebeba mondogat selek ekhe werek lek.

YESAYA 1:4

Hit he weak mondok hokhorogo hilingitu welagep andiba re weak anggele'ma kwegepsik welagep andi, hinobabut he nonghongsek logolik hinobaharo mondogat weak. Hiren hineisena Allah Horek Mondok werek mene a'nogo oba fogeratu logou mene a'nogo re hinambot woge'luk hineisena Tuhan a'nogo ninabit iluk herakfisasigip andiba re alomat lakhouwogeluk welagebo.

MATIUS 11:28

Hit hinoba enggin-fenggin hikhi logolik set kwil-kwalhogo hilingiti lagep mene andi, an nen hinoba korogo hinobagagin enggere noba we'ni o.

MATIUS 23:13

A'nogo yagaisasikhesik, it Allah ane lisu palek eisewerek mene inom, Farisi mene inom, inom mel yagaisasikhe: ”Hit ap Allah ane lisu palek eisewerek mene yi inom, hit Farisi mene yi inom, hinagap oba nek fano hangge logolik hinendawinggen pire mene yi ri! Hit andi afuni Allah awe a'ma kwinogo iluk he, hirenat kwe yagati lagep yoma ri! Hit hinonggwarek kwigi'lek logolik he, it ekhe kuogeluk ugunem, hiren he, ”Kugun lego,” iluk wene palhi lagep yoma ri!

MATIUS 23:14

Hit ap Allah ane lisu palek eisewerek mene inom, Farisi mene inom, hinagap oba nek fano logolik hinendawinggen pire mene yi ri! Allah nen weagethinabigin o. Hit he, hemi sogwe mene inawi wurik inom, inagarek inom, sebelikhi logoligat he, afuni nen, inesanggo holiluk, it fano anggoageluk samban uan-awan lithilik laga lagep a'nogo hilingiti'lek logoilepma re, Allah nen wene endebat hinoba feilepsik logoilep. Mene re, a'nogo hilingiti lagep andi nen he, wene enggin mene hinoba fembik weagethinabigin o.

MATIUS 4:24

A'nogo higirinabik nugunem, abok o Siria andoma mondok sak isikhemo re, yi ou ti ou, yi hat ti hat inoba werek mene inom, munggwarengge obabut weak mene inendawimo kwisukwasik inebe lugulugwi palharek mene inom, wa'lagik ineluk agik agarek mene inom, inenggi ineisok wut warek mene inom, oba woginarek wagunem fano higirinafi lagaikhe.

MARKUS 4:19

inendawimo nen, ”Yogondak ya faget ninggi'nogo hilingisigin he,” iluk, menenei ebetik, ”Nagarek hokhorogo logoilebe,” iluk inendawimo ebeti logolik, inonggwaregen laligik, inendawimo nen yi mene ti mene ekhe inamolo anggigik, agarek andi nen he, wene andi inendawimo kanggil agaresik he, enggen iterek lek andi aro.

1 KORINTUS 12:2

Hit attak ninoe Enupogot hinonggot were'ma, obabut weak mene nen tugwi kembu ane lek mene oba himbirik logouwageluk, we, komakwe heat wokhinarek laluk he, nongethinafi lagaikhe andi hinelu.

1 TIMOTIUS 5:6

Mene re, it hemi sogwe mene ekhe it inamolo mene hesanggeat hilingiri'lagwi mene andi re inebe ineluk werek meneat he, warek hangge werego.

1 TIMOTIUS 6:9

A'nogo meneat he, afuni nen he, ”Esin uang andiat,” iluk inendawinggen tulemet fuluk he, o wurep oba yi weak ti weak hilingiri'lagwi andi, ero andi aro. It ekhe nen uang andi mene herasuogeluk, inendawinggen Allah oba himbirik welagaikharesigenat he, herakfisaluk hobuk eba salukhogo waragarek hak, it inonggwarek inendawimo wiik-weakhogo hilingiri'lagwi andi. Andi nen he, afuni ekhe nen, ”Yi mene ti mene hokhorogo helaluk ninebe kain logoilo e,” iluk anggili'lagwi andi re, paik hele fugunem ke'nokhogo wa'lagarek hak, Iblis nen inendawimo kagalhunem, yi mene ti mene inamolo anggogoin lek meneat he, weagerinabigin mene inamolo iluk anggili'lagwi andi nen he, inebe weaget fakhigik, nonget fakhigik, agarek andi.

TITUS 1:11

A'nogo lalinafi logolik, yi mene ti mene inonggwaregen hunirogoin lek mene hunirouwogeluk yagaisogoin lek meneat yagaisikhi logolik, afuni hokhorogoat inagainafuri inomat lalinabi'lagwi andi, it inane andi sebelogo legetfisano.

TITUS 3:3

It a'nogo hilingiti logogun andi re, nit attak ninendawinggen lek ninobabut kembu hak, komore'legat nong-honghogo hilingiti logolik he, afuni inogogwi kaindek inawe a'ma welagaikharek hak, inoba aigage lagagik, inendawimo nen yi mene ti mene ninamolo anggigik, agarek andi mene awe a'ma hak welagagu. A'nogo logolik, it ekhe weagerinafik, wene palhik, it ekhe nit inabiretninobagagik, niren it ninabiret fisigik, ikhi lagagu.

2 PETRUS 2:18

Afuni ekhe inerugwi inagaila'lak weagat hilingitu kwelek he, herakfisaluk wulibi wesuogeluk ugunem, inendawinggen en nunggunem hobuk weak hilingisuageluk, it ap andi inonggwarek fogerakhikhi logolik we ineranen tulemat inendawimo kagalhi logogun.

2 PETRUS 3:17

Nerugwi nagaila'lak. Hinebe nendawi e. Wene andi oan hilinglagi'lek werek kwelek he, hinelurogo logobagaigeluk furogo yagahisigi andi. Hinelu logolik, hinonggwarek hinendawinggen wurikhogoat logoino. It afuni ekhe komore'lek hilingitarek mene andi nen, wene weak wene yagahisikhi logolik, hiren he, ”Eberogoat” anggaluk hinendawinggen wurik welagep mene andi kobokhogo herakfugunem hinebe nongasinogo iluk, hinobabut hebelogo logoino o.

YUDAS 1:16

It andi afuni inabok weak palhik, wenagisigik, ugu mondogat welagaikharek mene. Yi mene ti mene inendawinggen en nunggunem, ”Namolo.” anggikhi logolik he, andi meneat hilingitik, inonggwaregen fogerakhikhi logolik, yi mene ti mene saburogo heluogeluk, it ekhe inane agaukhogo fogerinafik, agarek mene.

YUDAS 1:18

Iren he, wene mel iluk yagahisasukwa andi: ”O wurep kobokhogo logolik he, it afuni ekhe Allah ebe inabit logolik inendawimo nen, yi mene ti mene inendawinggen en nunggunem, namolo, iluk andi meneat weak mondok hilingiti logolik, inane asegen wokhisa wesugun o,” iluk yagahisasukwa andi.