2 TIMOTIUS 3:11 - Allah Wene Fano Wene Hupla Inane

¹¹ Afuni nen yi enggin ti enggin hilingnafunem, noba enggin weak higirek a'nogo helu aro. Afuni o Antiokhia nen, Ikonium en, Listra nen, weagetnafu kwelegat were'ma, ninoe Enupogoren enggi ekhe kamo igi'lek telnafi lagaikhe andi.

2 TIMOTIUS 3:11 ပူးပေါင်းရင်းမြစ်များ

KEJADIAN 48:16

A'nogo wo'narek nikhi logolik, ebe malaikat higit a'lugen, an nebe weaget nabuhak were'ma telnafi lagaikhe andi. Ma re, Arenat yenggerugwi yi fanorinafi logouwago. Yenggerugwi yi inalisikhogo re, an nenu inom, Abraham enu inom, Ishak enu inom, ugu mondok logouwak. It inombalagen tagongge mene inebe kweangma o yi awi ti awi mondok hokhorogo sik-pik imbik logouwak,” iluk yagatikhe.

2 SAMUEL 22:1

At Daud ebe ap Saul en ogo, aselei mene nen ogo inebe mondogaren wasuogoluk ugunem, nineisena Tuhan nen telogo filik waga lagaikhe andi nen he, Allah fogerati logolik, wuni yi'nogo watikhe:

2 SAMUEL 22:49

Aren he an naselei mene ninom weim yaforek mene inenggiba nen, telogo nobagali'lago. Tuhan neisena, it naselei mene inenggimo nen Harenat an nalonget obagakhi lagen, funi inobabut inawulagam mondok weak mene inoba nen Haren ma'murogo fetnarek mondok welagen.

MAZMUR 34:19

Tuhan he, it ekhe inendawenggen eak a'luk, inendawimo mondok weakhogo welagaikharek mene andi, inera'lu we'luk inebe telinaferek.

MAZMUR 37:40

It afuni inobabut fano hilingitarek mene andi re, inebe Allah awe a'ma kuluk welagaikharek andi nen he, it afuni weak hilingitarek mene andi nen inoasuogoluk ugunem, At Allah nen leberisaluk telinaferego.

MAZMUR 91:14

Nineisena Tuhan nen ikhi logolik he, ”Ap ekhe an noba endawinggen himbirik logolik logogun mene re, hobuk An nen telinabigin o. Nen, ap ekhe ambeba nen Neisena Tuhan he At andi aro, iluk fakhogo ugun mene re, An nen nawe a'ma fisambik ferinarek logogin o.

YESAYA 41:10

An ninom logogun enggere, hailo asu fugo, Hat heisena Allah re An nebeat andi nen he hendawinggen fisu fugo. Hat he An nen wuriget hafik lebethiigik ikhi logogin. An nenggi omameba wokharek laga logogin.

YESAYA 41:14

Tuhan nen ikhi logolik, ”Israel ao, hat he hebe yenggerek logolik, homame lek welagen oba nen he, hailosu fugo. An heisena Tuhan nen hat lebethiikhi logogin o, Allah Israel mene ineisena Mondok Horek mene andi re, hat hagap telhafu mene werego.

YESAYA 43:2

An he hit afuni Israel mene hineisena Tuhan Allah tegelek mondok logolik, hinebe telhinafirek mene a'nogo nen hat hebe fetharek logogin andi nen he, hat hebe i obakhe tekhogo palhik, i som lagik, ugunem i nen wokhabigin legat. Nen, endu amulok anggelekwe lagain mene re, hebe endu nen nagain legat. Nen, yi wene ti wene enggin mene hoba asigin mene re, andi nen hebe weaget habigin legaro. Hat hebe hagap telogo re afuni Mesir mene fisigimo werek, nen afuni Sudan mene inom, Syeba mene inom he, hat hobali'mo inebe inoasuagaluk fisigimo werego.

DANIEL 6:27

”Hit afuni an nen fethinarek welagirek oba welagep mene mondogaren he, Daniel eisena Allah fogeraterek mene andiat hinailorogo welagik, fogeratik, ikhi logoino o. At andi re, hundik-hundik Allah eluk mondok welagarek mene, o wurep kobokhogo andoma afuni arenat ferinarek mondok logogin. Aren ferinarek welagarek mene andi re lek agi'lek, At enggiba mondok-mondok logogun.

KISAH PARA RASUL 13:14

Lagaikhemo nen, it omanogo o Perga andoma nen he, o Pisidia tonggwe kota Antiokhia andoma lagai wagaukwa. Lagai wagaukwasik he, inenggi Allah faget weat logolik, o afuni Yahudi mene samban ikhi lagaukwaba kwisukwasik, hu'lagaukwa.

KISAH PARA RASUL 13:45

Andogotukwama, it ap Yahudi mene omanogo afuni hokhorogoat ineilenggen isasukwasik wene palogo re, ”Wene Paulus nen ili'logo andi hinesanggo holugun lego,” iluk wene palhik, Paulus lak wenagisigik, isukwa.

KISAH PARA RASUL 14:8

O Listra andoma ap ekhe agaisa alabutmo nen ta'laga logolik eisok wut warek ta'lagaikhesik eisok endawi legen kwe lagi'lek hurek mondogat welagaikhe.

KISAH PARA RASUL 20:19

It afuni Yahudi mene nen nebe noasuogeluk nabok palhi logolik weak hilingnafu kwelek, nonggwaregen nendawinggen sebelogo fogerakhigi'legat, le hokhorogo aga logolik he, Tuhan Allah awe a'ma logolik at faget hilingiti lagi hineluaro.

KISAH PARA RASUL 23:10

inane hokhoat sagalhi logolik, Paulus ebe fena nen litigik, fena nen litigik, wasinogo iluk, it ap tentara esa folhi lagaukwa mene inoe kain a'nogo nen, agoromi it ap omanogo inoba pisikhesik, Paulus ebe inanggele'ma nen telogo o tentara inawi hale'ma a'nogo waluk kuageluk yagaisasikhe.

KISAH PARA RASUL 26:17

Afuni Yahudi mene inom, it endakwe mene inom, hoasuogeluk ugunem, an nen telhafi logogin o. It endakwe mene ineilenggen mum werek andi fenggenogo selegerinafik, inebe o mum oba werek andi inelokhe hebelogo selek oba fisa wagik, Iblis enggiba werek andi, Allah enggiba fisa wagik, inogen iluk inoba lakhobagagin o. Lakhobagaumo, it inendawinggen an noba himbiret foumo re, it weak hilingiri'lagwi mene andi, at Allah nen sebelogo legetfisigik, An nagainafuri iluk, inebe woginafik, igin o, iluk yaganetikhe,” iluk yagatikhe.

KISAH PARA RASUL 26:22

Noasuogeluk isukwa meneat he, Allah nen fetnarek mondok were'ma, an yogondak yoma mendek logolik hit ap kaindek inom, hinagoromi inom, wene an nen yagahisikhi lagi yi. Wene yi re, attagaren, it ap Allah ane yagaisikhi lagaukwa mene nen inom, at Musa nen inom, hobuk yi'nogo hilinglasigin, iluk isukwa meneat yagahisikhi lagi o.

KISAH PARA RASUL 9:16

A'nogo ayonggo figiri'mo re, aren nenu a'nogo yagaisilik nugunem, at yi enggin ti enggin hikhi logogin obaat hikhi logogin mene, an nen yagasigin werego,” iluk yagatikhe.

ROMA 15:31

It afuni o Yudea mene inendawinggen Yesus oba himbiret figi'lek mene nen nebe inenggi faknobagainogo iluk, ninom Allah nen telnabuageluk inom, nen, afuni Allah againafuri o Yerusalem mene faget andogorogo fisaga mene andi, waluk leberisa lagunem he, fano wanuageluk inom, samban fanorogo ikhi logoino o.

2 KORINTUS 1:5

At Kristus yi enggin ti enggin hasikhesik hobuk ekhe inom hokhorogoat hasikhe andi hak, nit a'nogoat hikhi lago aro. A'nogo hugunem at Kristus nen nit ninendawimo fano asuageluk hobugalep ninendawinggen sebelhu mondok welagarego.

2 KORINTUS 1:7

Yi enggin ti enggin ninom higirat hogorek andi hak, ninendawimo fano asuageluk Allah nen ninom higirat ninendawinggen sebeligino, iluk nelu andi nen, hit fano asugun iluk ninendawinggen hombunhogo welago.

2 KORINTUS 12:10

Andi nen he, an Kristus faget, nebe lebelek agi halok inom, afuni nen nabok weak palhu halok inom, wiik-weakhogo hilingnafu halok inom, yi enggin ti enggin hilingnafu halok inom, weim yafi logolik inoasuogeluk hoberisagarek hak hilingnafu halok inom, an lebelegat were'ma, andiba nen nomame agirek iluk, nendawimo nagaiyek anggigirego.

2 TIMOTIUS 4:7

Sa awewerek-sa awewerek lagaikharek hak, an nendawinggen eberogo nenat Allah oba himbirik mondok logolik, at faget nomamerogoat fano hilingirik waga lagarik he, huliba arat asi wagi o.

2 PETRUS 2:9

A'nogo meneat he, afuni ekhe Allah amolo mene hilingitunem inendawimo kagaligeluk wagunem, nineisena Allah Enupogoren telinafik, nen it ekhe weak hilingiri'lagwi mene halok, wene hobuk inoba feigeluk ferinarek welagik, a'nogo hilingisigin elu logoligat elok hilingisigin o.