2 TAWARIKH 9:11 - Allah Wene Fano Wene Hupla Inane

¹¹ E andoma re o afuni Yehuda mene were'ma andoma ekhe welagaikhe lek. E andiba re at Salomo nen o Tuhan Aiba a'nogo kwe pela lagagukwe faget inom, at onggwarek aiba a'nogo kwe pela lagagukwe faget inom wutikhesik he, ekhe re it wuni watu mene faget pinggong kecapi inom gambus inom hilingitikhe.)

2 TAWARIKH 9:11 ပူးပေါင်းရင်းမြစ်များ

1RAJA-RAJA 10:12

A'nogo wogosi wagunem, at Salomo nen e andi meneba re Tuhan awi a'nogo inom, onggwarek awi istana a'nogo inom, inenggi fakfugunggwe wutik, afuni wuni watu inelu mene faget, pinggong anethugungge hokho mene inom, endep-endebengge mene inom, hilingitik, isikhe. E andi mene re, mondok fano agayo, it afuni Israel mene inaiba andoma waluk waga lagaukwa meneat. Nen e fano agayo andi inom hobuk ekhe inom higit mene hagarek legat.)

1 TAWARIKH 23:5

Nen it inebe 4.000 nen he yaga werek mene faget fisasikhe, nen 4.000 ekhe re wuniba Tuhan fogerasuogeluk pinggong fouksegenggeba anethugu mene faget fisasikhe.

1 TAWARIKH 25:1

Afuni nen Tuhan obaget hilingisuogeluk wene kabogeti logolik melalinafu mene faget he, at raja Daud a'nogo inom, it Lewi inap inomen he it inunggulenu Lewi inap a'nogo mene nek penogo fisasukwa mene re yi: Asaf, Heman, Yedutun inom it andi penogo fisasukwa. It andi re Allah nen ugu mene a'nogo afuni yagaisikhi logolik wuni wulakfuluk inambinggong kecapi, gambus, simbal inom andoma wati logolik yagaisikhi lagaukwa. It wene Tuhan faget kabogetu sambul a'nogo kabogetu aple lombok melalinafu mene faget wenagaisogo kaboget fisilik lagaukwa mene re yi:

2 TAWARIKH 2:8

Noe hat welagen oba andoma ap e mutu mene faget mondok inelu hilingi'mo re noe haren o Libanon oba andoma e laik inom e sendana inom hokho-pokhorogo hilingi'mo re andoma mene ekhe lak fei we'no o. O Tuhan Awi an nen wusigin mene andi re mondok hokho awi hunikhogo wusigin hilingi'mo re,

2 TAWARIKH 9:10

(Hun raja Hiram agoromi inom, raja Salomo agoromi inomen he, emas inom, helep permata inom, e cendana inom, o Ofir en he hun Salomo faget waluk wagaukwa.

2 TAWARIKH 9:12

A'nogo wogosi wagaukwama re, at Salomo nen a'nogo wogosi wagu halok aren it aren onggo wogisikhi lagaikhe mene omanogo at he ratu awi Syeba mene a'nogo wogetikhesigen he, he andi nen kinotikhe mene a'nogo mondogat wogetikhemo re, he ratu a'nogo agoromi eiso'marogo wagaukwa mene omanogo inom inaiba lagaukwa.

WAHYU 5:8

A'nogo enggimo wanhunem he, it Allah nen elalinafikhemo ineluk welagaikharek mene ekhe inebe 4 en omanogo inom, ap inaluendek inebe 24 en omanogo inom, Domba Eak a'nogo awe a'ma kuluk ineindep awi yagaisogo fogerati lagaikha. A'nogo fogerati logolik, it ap inaluendek omanogo inebe lombok gitar hangge mene inom, kemenyan amusu iwak emas mene hilingik meneba hinago mene inom, inenggimo fisogo logolik endawi wati lagaikha. Kemenyan andi ebe re, Allah againafuri samban agarek andi aro.