2 TAWARIKH 9:1 - Allah Wene Fano Wene Hupla Inane

¹ Afuni Syeba mene inagaisa he ratu a'nogo nen esanggo holhugunem en he, at Salomo abok fano laga lagaikhe mene a'nogo holhikhesik he, wene heinok u elo'lek mene Salomo obabut palogo heinok wokhagain iluk o Yerusalem wagaikhe. Waga logolik he, aren ap esa logalek inom, wam unta ba re yi mene ti mene amben-ambenenggeba ambenhogo isatu mene mondok peterogo liabek engge omanogo inom helep enu permata inom, emas hokhorogo inom, waluk wagaikhe. He a'nogo wagaikhesik at Salomo inom ambit agaukwasik wene yi wene ti wene hokhorogo at Salomo nen wenggelu higit mene heinok wanhikhe.

2 TAWARIKH 9:1 ပူးပေါင်းရင်းမြစ်များ

KEJADIAN 10:28

Ofir, Hawila inap inom, Yobab inap inom andoma, nen it mondogat andire at Yoktan ambisangmangge mene welagaukwa.

KEJADIAN 10:7

andoma, nen at Kush ambisangma nen ta'lagaikhe mene re o Seba, Hawila, Sabta, Raema, Sabtekha inap inom andoma. Nen at Raema ambisangma mene re it Syeba inap inom Dedan inap inom andoma.

KEJADIAN 25:3

At Yoksan andi re it Syeba inom he Bedan inom ineisena, nen at Bedan ambisangma menere Asyur inap inom, Letus inap inom, Leum inap inom andoma.

1RAJA-RAJA 4:31

At he hun Etan ap Ezrahi mene andi inom, Herman inom, Kalkol inom, Darda inom, hun Mahol againafuri andem inomen hebelek welagaukwa mene re sebelek kwelek he at Salomo nek he o kweang alekwe haningisogo welagaukwakwe andoma mondogaren at enunek lego welagaikhe.

2 TAWARIKH 1:1

Hun raja Daud amlogo Salomo a'nogo re, it kerajaan Israel oba omanogo raja mondok omame mene menlagaikhe. A'nogo menlagaikhemo re, eisena Tuhan Allah nen at ebeba fanot figik, at ebe mondok omame hokho mene logouwageluk hilingfigik isikhe.

2 TAWARIKH 1:12

Arigini'mo re, hendawinggen kagalek mene andi inom, wenggelek mene andi inom he, An nen wokhesigin. Andi nen fena amu mene re hat hangge mondok hoporogo logouwageluk hilinghobagagik, sik-pikhogo hilinghobagagik, henu werek hilinghobagagik, ap raja attak mendek welagaukwa mene inom, hobuk logogun mene inom, andoma inenu we sebelek hangge werek kwelek he, harenek he henu werek hilinghobagagik, igin o,” iluk yagatikhe.

2 TAWARIKH 9:2

A'nogo heinok wokhasikhemo re, wene heinok wokhasikhe mene omanogo at Salomo nen misik iluk ogo ekhe taganet figi'lek onggo mondok higithogo nek yagatikhe.

2 TAWARIKH 9:9

A'nogo yagatikhesik he, at he ratu awi Syeba mene a'nogo nen he, aren onggo amolongge wogosigin iluk waluk wagaikhe mene omanogo emas enggin he 4.000 kilo nen inom, helep permata hokho-pokhorogo inom, amben-ambenengge mene inom, omanogo mondogat Salomo wogetikhe. Amben-amben engge andoma re hun Salomo nen ariginik mene ekhe wanhi lagaikhe lek oba nen he, he ratu awi Syeba mene andi nen waluk wagaikhe mene andoma re mondok fano mondok mene nek wogosi wagaikhe.

MAZMUR 142:2

An nen nane mondok omamerogo Tuhan oba kweti lagi o, nane hafeba Aren lebetnabuageluk yagati lagi.

MAZMUR 49:4

An nendawimo kagalek logolik, wene nendawimo ebeti lagi mene re naneba fakhogo ikhi logogin o.

MAZMUR 72:10

It ap raja-raja o Darsis oba werek mene nen inom, nen it i alonggen kwe werek mene nen inom at obaget yi mene ti mene wogosuogeluk waluk waga logogun. Nen raja o Arab mene inom Etiopia mene inomen ogore at obaget waluk we'luk fei waga logogunat.

MAZMUR 72:15

Hat raja re, Heluk mondok logoino o, iluk yagati logouwak. Ma re, at were'ma re emas o Arab mene andoma fisaluk wogosi waga logouwak. At obaget he linggene hundik-handik samban iginafu mondok welagik, fanoabet fisikho welagik, ikhi logouwak.

MAZMUR 78:2

An nen he henarogo wene inom, walhigik wene inom igik, nen suetninung o eroma andoma hilinglagaikhe mene it ninambu-ninombalagen ugunem, nit ninesanggo holfuluk wanhugu mene ebe yi'nogo iluk yagahisigik, igin o.

AMSAL 1:6

A'nogo yanggulugun halok he, iren wene elonggoma hinago werek mene omanogo ebe yi'nogo faget iluk inelu agik, nen it afuni inendawinggen kagalek mene nen agarek mene omanogo inelu agik, wene onggo yaganisoageluk heinok wanhunem elok yagaisigik, ikhi logogun.

YESAYA 60:6

No unta o Median inom Efa inom omanogo mene nen he o haren ferinarek welagen kwe andoma huli'lipsek logogun. O Syeba nen he afuni nen no emas inom, kemenyan inom waluk waga logolik, Tuhan nen hilingiri'lago mene omanogo faget fogerasi wesugun.

MATIUS 12:34

Hit hinebe kisu nen tagongge mene yoma sani! Afuni nen yi wene ti wene inambeba nen agarek andi re, inendawimo peterek logolik kagalogo lagai wagunem agarek andi nen he, hit he, hinobabut weagat logolik wene fano mene ikhi logogun nogo? Elo'lego.

MATIUS 12:42

Andi hak, at he kain mene awi o i ambutmo higit o pogot erokwe yatma andoma nen at ap Salomo andi endawimo mondok kagalek logolik hilingiti lagaikhe wene andi esanggo holigeluk wagaikhe. Mene re, at Salomo andi elo'lek hak. Meneat he, an yoma welagi yi nek he, mondok esin andi nen he, hobuk o wurep oba Allah nen afuni wene inoba figik, kotik, igin andi sambul, at he kain andi ebe menlasimbik he, hit o yogondak welagep mene yi mel yagahisagain: ”Hit weak, hinenggali, iluk yagahisagain o,” iluk yagaisasikhe.

MATIUS 13:11

at Yesus nen he, ”Allah nen awe a'ma fisikherek wene andi, at endawimo hinago welagaikhe mene, hit enek he, hinelu asubagaigeluk, fakhogo yagahisagain anggasikhe meneat he, it afuni ekhe andi nek he, fakhogo yagaisagain lek, anggasikhe.

MATIUS 13:35

A'nogo hilingiti lagaikhe andi re, ap ekhe Allah ane yagaisikhi lagaikhe mene nen ikhi logolik: ”An wene yagaisikhi logolik he, oba lirogo nek yagaisikhi logogin o. Allah nen kweang yi elalhikhe huli nen wene hinago mondok welagaikhe mene fakhogo yagaisagain o,” iluk isikhe andi higit asuageluk, Yesus nen a'nogo yagaisikhi lagaikhe.

MATIUS 2:11

Inendawimo nen inagaiyek hokhorogo agaukwasik oloba kwisukwa re, omalik a'nogo agaisa Maria agoba were'ma ineilenggen hasukwasik, ineindep awi yagaisogo fogeratukwa. Fogerati logolik he, onggo hokho fano mene emas inom, kemenyan kami amben hangge mene inom, e mur amusu inom, heiselogo wogetukwa.

LUKAS 11:31

Attagat, he ekhe kain mene awi o i ambutmo higit pogot eroma yatma andoma nen ap Salomo andi endawimo mondok kagalek logolik hilingiti lagaikhe mene esanggo holigeluk wagaikhe. Mene re, at Salomo andi elo'lek hak. Meneat he, an yoma welagi yi nek he, esin andi nen he, o wurep oba Allah nen afuni wene inoba figik, kotik, igin andi salim, at he kain andi menlasimbik he, hit afuni o yogondak welagep mene yi mel yagahisagain: Hit weak, hinenggali, iluk yagahisagain o.

1 SAMUEL 1:15

A'nogo yagatikhe meneat he, at Hana nen mel yagatikhe, ”Neisena. An anggur amusu ninggi'legat. Nen, lugulugwi paluogeluk nenggarek mene ekhe ninggi'legaro. We, an nendawimo mondok weak logolik, nendawinggen warikhi lagi mene andi mondogat pilingisogo nineisena Tuhan yagati lagi o, neisena.