2 TAWARIKH 26:16 - Allah Wene Fano Wene Hupla Inane

¹⁶ At raja Uzia a'nogo ebe omame aga logolik he endawimo leget fakhikhi lagaikhe. Aren he Allah Wene melalek werek mene a'nogo sagalogo fuluk he, o Tuhan Awi wuri'mo mezbah a'nogoba amben fanongge no dupa nolhi lagaikhe mene a'nogoba noligin iluk kwi lagaikhe. Andiba re at ebe mondok weaget fakhasikhe.

2 TAWARIKH 26:16 ပူးပေါင်းရင်းမြစ်များ

1RAJA-RAJA 13:1

A'nogo hilingitikhemo re andem sambul ap nabi ekhe it Yehuda mene inoba andoma welagaikhe. Were'ma re Tuhan nen o Betel andoma loageluk mimingitikhemo lagunemen he Yerobeam a'nogo re, mezbah elokhoma aremnogo yi mene ti mene warogo noligin iluk mendek welagaikhe.

2 RAJA-RAJA 14:10

Nen, hat Amazia re, ap Edom mene inomame leget fisegen andi nen he foget fakhikhi lagen. Homame agu aple re mondok agagin leksigen hilingiti lagen a? Nenahalok halok hat ebe inom hat hagainafuri melalinafi lagen mene andoma inom alomat lakhouwogeluk wene ero herati lagen? Hat he haiba andoma alokhogo logoin o!” iluk yonggo lakfisasikhe.

2 RAJA-RAJA 15:5

A'nogo hilingitunem he Tuhan nen at ebe agap oba ou mondok weak mene fesikhemo weakhogo werek kwelek enek ebe wa'lagaikhe. Andi nen at ebe eluk logolik he ou weak hikhi logolik yabu hilingiti'legengge logouwageluk o ale'ma wurogo fesukwama werek kwelek he at amlogo Yotam a'nogo at a'ma hakhogo logolik afuni melalinafu welagaikhe.

2 TAWARIKH 12:1

At Rehabeam Raja menlagaikhesik a'nogo re ebe mendek werek oba o kerajaan a'nogo omamerati logolik he, at inom it afuni Israel mene mondogat inomen he Tuhan awene melalek omanogo sagalogo fikhi logolik he,

2 TAWARIKH 25:19

Amazia agwi hat he it Edom inap andi inoatirik iluk wonoget fakhikhi lagen a? Hat honggwarek hebe inom it hagainafuri holhu mene inom hinebe alomat fakha hak he, wonoget fakhikhi lagep andi, we hat he hailoba yamukhogo logoino o,” iluk lakfei wagaikhe.

2 TAWARIKH 26:15

It agoromi sikhe wutu inelu mene nen he o Yerusalem oba andoma o wurogo liabek mene andoma faget inom, o kota unggutkwe andoma faget inom, togengge andoma faget inom, weim yafu mene faget tok inom, helep hokhondek mene inom, lakfei lagunem inoatu mene elalhi lagaukwa. A'nogo At Allah nen lebethugunem he at omame agun aga logolik he, at Uzia abok yi kwe ti kwe sagarek mondok welagaikhe.

2 TAWARIKH 27:2

At Yotam ebere at eisena nen hilingiti lagaikhe hakhogore, Tuhan endawimo anggikherek mene nek hilingiti lagaikhe. We at eisena nen amben fanongge Tuhan Aiba nolhi lagaikhe omanogo higit he nolhi lagaikhe lek. A'nogo hilingiti lagaikheba nen he it afuni holhu mene omanogo re weak enek hilingiti lagaukwa.

2 TAWARIKH 32:25

At oba ou a'nogo Tuhan nen fano hilingfesikheba nen he at wonoget fakhikhi logolik he, Tuhan oba hai wati'lek hilingitikhe. Andiba re At Tuhan nen it afuni Yehuda mene inom, Yerusalem mene inom, inoba a'mage fesikhe.

AMSAL 16:18

Wonoget fakhagarek oba re ambisangma al perelinaferek, nen foget fakhagarek oba re ambisangma re talorogo pagarek.

DANIEL 11:12

A'nogo hilingisogo fisambik, at onggwaregen he an naselei mene hokhorogo inoatirik, mabenet fisigi iluk awonok asigin, oba nen at ebe omame werek andi hakhogo nek logogin lek.

DANIEL 8:8

Kambing ai mene a'nogo re ebe hokho aga laga. Oba nen he at ebe omame werek mene asi lagagunem andem oba re at andimuk hokho mene a'nogo sombologo lagunem higi. Andi nen obalikwe a'nogo re andimuk enggaminogo mene ngasimnurogo wulibi waga laga. Wulifunem he andimuk andem ebe lombok he efe hebelhigik amu-amu hilingik welaga.

HABAKUK 2:4

Ebereogo nen he, it weak hilingiri'lagwi mene andi fano asugun lek. Oba nen he, it ekhe Allah endawimo anggikherek mene andi higithogo hilingiri'lagwi mene nek he, inendawinggen Allah oba himbiret fuluk logogun andiba, ineluk mondok logogun o,” iluk yaganete.

BILANGAN 16:1

Korah hun Yizhar amlogo Kehat mene, unggulenu Lewi mene a'nogo nen Musa eilhanem wene palhikhe. Aren ugunem anelonggon legetukwa mene re it ap inebe henagan mene inunggulenu Ruben inap, hun Eliap amlogomi inenu re Datan inom Abiram inom he, hun Pelet amlogo On inom, it afuni melalinafi lagaukwa mene inebe 250 nen afuni holhu mene nen wenagaisogo fisasukwa mene inomen lebethasukwa.

BILANGAN 16:18

A'nogo isikhemo re, iren inagandu hunduk omanogo inebe lombok helasukwasik iren endu enggen inom, amben engge dupa inom wanhukwasik he, Tuhan Awi Sabu solombonma andoma Musa inom Harun inom were'ma mendek welagaukwa.

BILANGAN 16:35

A'nogo hilingitukwasik it ap inebe 250 nen a'nogo amben engge dupa nolhi lagaukwa mene omanogo Tuhan nen endu lakfei wagaikhemo endu nen nasikhe.

BILANGAN 17:5

Ap An nen wenagaisogo figi mene andi arige tomuk enek he asimit wulibigin. Andi hilingisigin oba nek he it afuni nen hundik-handik hat hoba inane mul-mul yagaheri'lagwi mene andoma lek palfogoin o.” iluk isikhe.

ULANGAN 8:14

hinonggwaregen fogerakhigik, At nineisena Tuhan nen hit hinebe afuni Mesir mene nen inamingmingengge higit fetninarek were'ma telogo wokhinarek wulibi wagaikhe mene a'nogo oba hinonggoragik, inogo nen he, hinafe hebelogo hilingiti logoino o.

ULANGAN 8:17

Andi nen he, hiren he, nit ninonggwarek ninomameba nen heragaisogo ninebe kain nineilmo wulalhak hilingirikhi lago, iluk hinendawimo anggagubo.

KOLOSE 2:18

Nen, it ekhe nen he, inobabut inetogat logolik tulemat fogerakhikhi logoligat he, mel agarek andi: ”Nit afuni ninebe kembu. We kaindek he, malaikat Allah nen yonggo pelak fisa wagarek mene andiat. Halok he, inawe a'ma logolik fogerinafi logogun, iluk an nabikanggo higirek mene nen yagahisikhi lagi andi,” iluk ineranhogoat Kristus hinom hundik mene wulak hinobagauwogeluk yagahisili'lagwi andi re, ”Eberogoat,” iluk hinendawimo anggagubo.