1 TIMOTIUS 3:2 - Allah Wene Fano Wene Hupla Inane

² Andi nen, ap Allah againafuri kwelaginarek logouwageluk halok inobabut he, yiginik mene menfisogoin. Afuni ekhe nen, ”At weak,” iluk wene oba figi'lek mene halok, agwe misigat mene halok, weak hilingisuageluk endawimo kagalhunem elok sebelhaluk werek mene halok, endawinggen uan ebeterek mene halok, hilingisu mene higithogo hilingiterek mene halok, ap pok inonggot mene wagunem woginaferek mene halok, wene furogo yagaisikherek mene halok,

1 TIMOTIUS 3:2 ပူးပေါင်းရင်းမြစ်များ

YESAYA 56:10

Tuhan nen ikhi logolik, ”An nunggulenu mene inogogwi kaindek ferinarek mene andoma re, ap ineilenggen humunik mene werek! It he, yi'nogo ti'nogo mondogat inonggot. Iren he mene ane hobul warek mene nen helaik eti'legengge nogoba nek hilingiti logolik abi wokhugu welagarek a'nogo hangge werek. It he nogo nek ikhi logolik werek mene andi nek inagaiyek mondok werek.

LUKAS 1:6

At agwe emberek andi re, nineisena Tuhan nen he, ”Yi'nogo hilingi'no, ti'nogo hilingi'no,” iluk, yaganisigik, komotninafik, isikhe mene a'nogo, mondok higithogoat hilingiti lagaukwama re, at Allah nen he, ”It andi inobabut fano mondok,” iluk, enegat eilenggen isikhi lagaikhe.

LUKAS 2:36

Nen, o andoma he ekhe enu Hana. Ap Fanuel unggulenu Asyer mene a'logo, Allah ane yagaisikherek mene welagaikhe. At agun wanhikhesik oba nen 7 tahun emberek welagaukwasik,

ROMA 12:13

Allah againafuri mene ekhe yi mene ti mene le'ma werek halok sumburisigik, ap pok inebe hinonggot mene wagunem hinaiba fanorogo woginafik, ikhi logoino o.

1 TIMOTIUS 3:12

It ap Allah againafuri ekhe leberisugu mene logogun andi re, inagagwi misigat waganek logolik, inagainafuri inom, inagoromi inom, fanorogo tegelogo ferinarek welagaikharek mene halok menfisogoino.

1 TIMOTIUS 3:8

Andi hagat he, Allah againafuri mene leberisikhi logouwageluk, inobabut yiginik mene menfisogoin. Inoba haro mene halok, inameli pire akhogo agarek lek mene halok, anggur enggen amusu nenggarek lek mene halok, uang, yi mene ti mene fano mene, ”An enek noba logoilep,” anggagarek lek mene halok, menfisogoin o.

1 TIMOTIUS 4:3

Iren wene ikhi logolik he, Hemi woginabugun mondok lek, igik, Yi mene ti mene nenggarek mene andi, ekhe yi mene wesa. Ninggi logogun lek, igik, ikhi logogun,” iluk, Allah Areagun nen yaganisasikhe higithogo ili'lagwi andi. Meneat he, nenggarek mene andi, Allah nen nit ninendawinggen at oba himbirik logolik, ebe wene andi futfogo halok he, hai warogo ninggi logouwageluk elalhikhe mene faget ili'lagwi andi.

1 TIMOTIUS 5:10

It afuni ekhe nen it hemi sogwe mene andi inabok ikhi logolik, ”It inobabut fano hilingiri'lagwi,” iluk agarek mene halok, inenu lisu palugun. Fano hilingitarek andi re, inonggwarek ineagwi fanorogo kulinafik, ap pok wagunem inebe fanorogo woginafik, Allah againafuri ekhe ineisok ebene sobalinafik, it ekhe weak were'ma leberisigik, inenggi ekhe kamo igi'lek yi mene ti mene faget leberisikho mondok welagik, agarek mene halok inenu lisu paluguno.

1 TIMOTIUS 5:22

Afuni ekhe Allah faget hilingiti logouwageluk, inunggul weak-weak sebelinafi logou fuk. Nen, it ekhe weak hilingitunem hinom hilingiti'lek heil lomborogo logoino.

1 TIMOTIUS 5:9

It hemi sogwe mene Allah againafuri nen leberisikhi logouwageluk inenu lisu palugun halok he, inebe ta'lagaukwasik oba nen umur 60 tahun oan hilinglagi'lek mene inenu palugun lego. We, umur 60 tahun hilinglaga mene halok inenu palugun. Mene re, inaguni misigat mondok waganek were'ma sogwe fisaga mene halok inenu palugun.

2 TIMOTIUS 2:24

At sa nen ninoe Enupogot faget hilingiti logolik, a'nogo hilingisugun lek. We, afuni mondogat obabut liokhogo inom logogun o. Afe morogo logolik, afuni wene fanorogo yagaisikhi logogin.

TITUS 2:2

It ap inaluendek mene andi, weak hilingisuageluk inendawimo kagali wagunem, tok wokhagarek hak wokhigik, inobabut he, inoba haro welagik, inendawimo menenei uanhogo ebetik, inendawinggen wurikhogo Allah oba himbiret fuluk, afuni ekhe inendawirogo welagik, yi mene ti mene faget inoba enggin hikhi logolik, inafe morogo welagik, ikhi logouwageluk komorinafi logoino.

IBRANI 13:2

It afuni ekhe nen he, malaikat inebe ap pok hangge inobakhe nigik woginafukwasik inahenengge wanhukwa andi nen he, ap pok hinoba wagu halok he, hinobakhe nene herakfisigi'lek woginafi logoino o.

IBRANI 3:14

A'nogo ikhi logolik, omanggum ninendawinggen at oba himbiret fesugu mene andiat ninenggi pukhogo huli wurep oba fisogo logogun halok he, nit Kristus erugwi agaila'lak agosik welago o.

1 PETRUS 4:7

Yi mene ti mene mondogat wurep oba hilinglasigin mene horogat asi waga iluk, samban ikhi logouwogeluk, hinendawinggen sebelek logolik, hinobabut hebelogo logoino.

1 PETRUS 4:9

Hinerugwi hinagaila'lak hinom, hit ekhe nen it ekhe inaiba lagik, iren hit hinaiba wagik, ikhi logolik, inebe woginabik he, hinendawimo nen, ”Nabire,” iluk anggigi'lek woginafi logoino.

1 PETRUS 5:8

At Iblis, hinom weak mene a'nogo nen, mene singa aik anini mene nen yi mene ti mene haumhogo nageluk ane kwe agan herarik nikherek andi hak, ”Sa hak weagetfagain,” iluk herakhinabik nikho andi, hinebe hebelogo hineilenggen fanorogo logoino o.