1 TIMOTIUS 2:8 - Allah Wene Fano Wene Hupla Inane

⁸ Nen, o yi awi ti awi samban ikhi logolik, it aben he, inenggi nen ekhe weak hilingiti'lek, ina'mage lagagi'lek, wene palhi'lek, tegelek mondok logolik, samban ikhi logouwageluk, yagaisagain iluk nendawimo namolo anggigirigen yagaheti andi.

1 TIMOTIUS 2:8 ပူးပေါင်းရင်းမြစ်များ

1RAJA-RAJA 3:11

A'nogo anggasikhesik, Salomo mel yagatikhe: ”Haren he, hebe umur uanhogo logogiluk inom, honggwarek faget hebe kain heilmo wulalhak logogiluk inom, haselei mene inebe inoati logogiluk inom, kino yaganeten lek meneat he, afuni fanorogo ferinarek logogiluk hendawinggen kagalek logogin mene kino yaganeten andi nen he,

AYUB 16:17

Oba nen he an nen nobabut kwanirogo ekhe hilingiti lek, andiba re Tuhan oba samban igi mene andi re nendawi fanoba igiri'mo re obabut enek ari'lago.

MAZMUR 134:2

Obalik mondok hore'ma andoma nen hinenggi liabek logolik, Tuhan fogerati logoni o!

MAZMUR 141:2

An nen samban ikhi lagi mene andi re amben fanongge dupa Hat hobaget wokhetu mene hakhogo wanino, nen nenggi earogo liabek welagi mene andi re hubanggo Hat hobaget warogo nolhu mene hakhogo hilingi'no.

MAZMUR 24:4

It inobabut hilingitarek oba inom, inendawinggen wenggelharek oba inom kwanirek mene hilingiti'legengge werek halok inom, it inaneba hesangge hombuk palogo agarek lek halok inom, it tugwi kembu fogeratarek lek mene halok inom enek he elok kugun.

MAZMUR 26:6

An weak hilingiti lagi lek iluk enegenggerogo re nebe horaluk, wuni Hat fogethafu awuni watik,

MAZMUR 28:2

An lebetnean iluk Hoba kinosi waga logolik nane kwetu halok ogo, nen Hat Hawi Mondok fano horek mene a'nogo wurik fikhit andoma nenggi liakfuluk werek halok ogo, Haren nane hesanggo holnabin o.

MAZMUR 35:13

Oba nen he it inoba ou were'ma, it inobaget an nendawinggen heiselhunem he namburu ninggi'lek welagi, nunggul somarek logolik samban inobaget ugu welagi.

MAZMUR 63:4

Ineluk welagaikharek mene andi re, endebat hangge, mene re, haren hendawit nafendek mene andi nek he, esin mondok hokho andi nen he, an nen hat fogethafi lagi o.

MAZMUR 66:18

An nen weak hilingitarek awene nek nagaiyek haluk nendawimo wenggelhi logoilema nen he, ibi-eberogo nen At Tuhan nen esanggo holilep lego.

AMSAL 15:8

Tuhan nen he, afuni ekhe inobabut fano hilingitarek mene nen samban ugunem inane esanggo holherek. A'nogo meneat he, it ekhe inobabut weak mene nen yi mene ti mene At faget fisugunem abit anggikherek.

AMSAL 21:27

Tuhan he afuni weak hilingitarek mene nen At obaget fagarek mene andi re apsiri inoba fikherek, ap andi endawimo nen weagasuak anggikhi logolik hilingisigin halok andi re ebenagaik.

YESAYA 1:15

Hiren samban ikhi logolik hinenggi liakfuluk yaganeti lagep mene andoma re An nen fut hinobagagu aple re nabit aro. Hiren afuni hokhorogo inoati lagep mene andoma inamep hinenggiba werek andi nen he samban hiren hokhorogo ikhi lagep meneat he An nen nesanggo holhu re nabit mondok welagirek andi.

MATIUS 21:21

at Yesus nen he, ”Wene eberogoat yagahisak. An nen e ara yi hilingiti hak, hiren a'nogo hilingisugunat mene re, andi nek hilingisugun fuk. Hinendawinggen menenei uan horok ebeti'lek, we hinendawinggen Allahba eberogoat himbiret fembik, hiren he, tom yi yoma nen sanokhogo i laut yenggele'ma a'lima pokhogo lan o, iluk yagatep halok he, hilinglasigin aro.

MATIUS 5:44

A'nogo meneat he, an nen wene ekhe yi yagahisak. At nineisena Allah pogoroba mene mo eisewerek logolik kweangma selekhogo afuni inobabut weak mene inom, fano mene inom, mondogat faget yaginafik, nen, meiso pelakfei wagarek andi re, it higit hilingiri'lagwi mene inom, weak hilingiri'lagwi mene inom, mondogat faget pelakfisa wagik, ikherek andi hak, hit hineisena Allah pogoroba mene againafuriat asubagaigeluk, afuni hinom weak mene andi hinendawirinafi logolik he, it weagethinabi'lagwi mene andi, Allah nen fanorinabuageluk it faget samban ikhi logoino.

MATIUS 6:12

Afuni nen nit weaget ninafa mene, niren sebelogo legetfisogo andi hak, nit weak hilingito mene haren sebelogo legetfisano o.

LUKAS 23:34

A'nogo menfisasukwama logolik, at Yesus nen mel yagatikhe: ”Neisena e! It yi inonggot logolik hilingnabi'lagwi yi re, wene inoba figi'lek sebelogo herakfisano o,” iluk yagatikhe. Nen, it ap tentara mene omanogo nen he, a'nogo menfisaluk, ”At Yesus asu andi sa hak asigin,” iluk he, oagengge lakfigik, wakfigik, isukwasik, oagengge inoba agaikhe mene halok sumburogo helasukwa.

LUKAS 24:50

At Yesus nen wene a'nogo warisasikhesik, it agoromi omanogo o sili hokhoma nen woginarek wulifikhesik he, o Betania andoma lagaikhe. Lagaikhesik, enggi liakfesikhesik he, ”Allah nen kwelakhinarek logolik fanothinafi logouwago,” iluk hai warinafikhe.

YOHANES 4:21

at Yesus nen he, mel yagatikhe ”He yi nerei e. Wene yagahesigin yi eberogoat anggano. O tom yiba inom, o Yerusalem inom, andoma nek Allah fogerati logogun fuk. Hit Allah fogerasugun higit oba, o hobuk ekhe wei igin mene werego.

KISAH PARA RASUL 10:2

At Allah ailorogo logolik againafuri inomen fogerati lagaukwa. Fogerati logolik he, it afuni Yahudi mene omanogo ekhe inenggi lek inelagaik mene hokhorogo leberisikhi logolik, samban kamo igi'lek ugu mondok welagaikhe.

KISAH PARA RASUL 10:31

Menlasi pi wagasik he, Kornelius. Hat samban ikhi lagen andi, Allah arat esanggo holhemo. Nen, afuni inenggi lek inelagaik mene leberisikhi lagen andi, Allah nen hoba eberek weregaro.

KISAH PARA RASUL 10:4

Yagatikhemo, at Kornelius eilenggen at oba lurogo fikhi logolik, ailo agaikhesik he, ”I, noe. Nenahalok,” iluk isikhemo, aren he, ”Hat samban igik, afuni inenggi lek inelagaik mene leberisigik, ikhi lagen andi re, Allah elu agasik hoba eberek werego.

KISAH PARA RASUL 21:5

Ninom welagagusigen he, logoin oba arat horok agaikhemo re, it inebe mondogat, inagagwi inom, inagainafuri inom, inomen, lakninobagauwogeluk, o kota andoma herakfisaluk wulifugu. Wulifugusik he, i aik oba andoma lagagusik ninebe mondogat nineindep awi yakfuluk, samban isugu.

KISAH PARA RASUL 7:60

A'nogo ikhi logolik, eindep awi yagaisogo hu'lagaikhe. Hu'lagaikhesik, ane hokhorogoat he, mel isikhe: ”Noe. Ap an weagetnafa mene yoma, wene inoba fugun o,” iluk yagatikhesik ebe arat wa'lagaikhe.

1 KORINTUS 7:7

Afuni mondogat he, an hemi lek weat welagirek hak logoumo re, fano, iluk anggigirek meneat he, at Allah nen he, ninobabut lombok, at ekhe obabut hunogoat, at ekhe obabut hunogoat, wo'nisasikhe andi nenat he, a'nogo elo'lego.

2 KORINTUS 2:14

A'nogo meneat he, at Kristus omame agaikhe andiba elokhe wanhu kwelek nugunem, nit at ninom hundik mene Allah nen Kristus ombo'ne wo'ninarek nikherek, iluk fogerasuogo. A'nogo wo'ninarek nikhi logolik, amben fano mene sang-panghogo lagarek hak, at Kristus hilingitikhe wene a'nogo niren wialogo o yi awi ti awi waluk loageluk wo'ninarek nikherek.

FILIPI 1:12

Nerugwi nagaila'lak. Wene yi hinelurogo yagahisak. An yi'nogo hilingnafa yiba re, fano wene lek agi'lek hokhorogoat wialarik lili'logo.

1 TIMOTIUS 5:14

Halok he, it hemi sogwe ekhe Iblis ombo'ne kwanirogo hela lagaikha andi nen, it ekhe nit Allah againafuri ninom weim palek hangge mene nen ninabok weak palinogo iluk, it hemi sogwe tugum mene andi, inaguni lombok woginapluk he, ineagwi tagaisogo fanorogo tegelogo ferinarek logouwageluk igi andi.

TITUS 3:8

igi andi eberogo aro. Haren it ekhe inendawinggen Allah oba himbirik werek mene nen, afuni ekhe faget fanorogo leberisagarek andi mene esinet fuluk anggilukhogo hilingiti logoumo, afuni mondogat faget fano mondok, iluk, a'nogo hilingiti logouwageluk, ninghogo komorinafi logoinogeluk, an nendawimo anggigi mene yagaheti andi.

IBRANI 10:22

At ebe andoma were'ma, nit ninendawimo nen he, ”Nit weak hilingito,” iluk ninendawimo menenei ebetorek mene fano hotninafik, ninagap ebene i elokhonggen fano meneba sobalninafik, isikhe andi nen he, ninendawinggen misigat at oba himbiret fuluk ninailo lekhogo, at oba horokhogo kwikhi logouwogo.

YAKOBUS 4:8

Hit Allah oba lomborogo lagep halok he, at ogo re, hinoba lomborogo wesigin aro. Hit weak hilingiti lagep mene andi, hinenggibene horogo hebisikhi logoino o. Hinendawinggen pire aksek mene andi, hinendawinggenma weak mene horogo lakfisikhi logoino o.

1 PETRUS 3:7

Nen, hit ap ogo re, Allah obabut fano nen hinagagwi hinom higithogoat hineluk mondok logouwageluk eisewerek hinobagaikhemo welagep andi nen, hit samban ugunem Allah nen hinane esanggo holhi'lek kamo inogo iluk, hinagagwi hinom fano logolik, hinendawimo nen he, ”Hemi inomame lek,” iluk futfuluk, hinane agaukhogo yagaisigik, hinendawirinafik, ikhi logoino o.”