1 TESALONIKA 1:3 - Allah Wene Fano Wene Hupla Inane

³ Nineisena Allah eilhanem samban a'nogo ikhi logolik he, hit hinendawinggen Allahba himbirik logolik hinobabut hilingiti lagep mene inom, afuni ekhe hinendawirogo logolik hinomamerogo leberisikhi lagep mene inom, hinendawimo nen: ”Ninoe Enupogot Yesus Kristus nen fano hilingninabigin,” iluk hinafe morogo welagep mene inom, niren hit hilingiti lagep mene andi faget hinoba kamo igi'lek eberek mondogat welago.

1 TESALONIKA 1:3 ပူးပေါင်းရင်းမြစ်များ

KEJADIAN 29:20

A'nogo yagatikhemo, at Yakub hele Rahel amolo nen yabu 7 tahun hilingitikhe meneat he, endawimo nen he, ”Nenggi we endebat hilingisu hak hilingiti,” anggasikhe.

PENGKHOTBAH 2:26

Allah nen he ap At endawimo fano mene hilingiterek mene a'nogo hebelagaikharek mene inom, elu agarek mene inom, inagaiyek agarek mene inom, wogisikherek. Oba nen he ap weak hilingitarek mene re ineabu wokfuluk inangge ambisangma nen kabokhogo re ap Allah endawimo fano aple hilingitarek mene inoba wogisoageluk hilingfisikherek. Arigini'mo re mondogat andoma re we alomarogo sogoi murok lagaikharek hak hilingik.

KIDUNG AGUNG 8:7

Inendawinggen ninggerek mene andi re I hokhorogo meneba nen ogore nagulumo re elo'lek, Ap ekhe nen endawinggen ninggerek mene andi onggo palagain iluk at mene angge wogosigin meneba nen ogore we inabiret fisaluk weaget fisagarek mene onggo hela hak.

YOHANES 14:15

At Yesus nen wene a'nogo warisasikhesik he, wene ekhe mel yagaisasikhe: ”Hit an hinendawinggen hundik halok he, an nen hit yi'nogo hilingiti logoino, ti'nogo hilingiti logoino, iluk yagahisikhi lagi mene andi hilingiti logogun o.

YOHANES 15:10

Nen, an neisena nen, yi'nogo hilingi'no ti'nogo hilingi'no iluk yaganetikhe mene andi, an nen at ane hologo hilingitunem, aren an endawinggen hundik welagarek hak, hit a'nogoat an nen yi'nogo hilingi'no ti'nogo hilingi'no iluk yagahisikhi lagi mene andi, hiren an nane hologo hilingiti logogun halok he, an nen hit nendawinggen hundik logogin o.

KISAH PARA RASUL 10:31

Menlasi pi wagasik he, Kornelius. Hat samban ikhi lagen andi, Allah arat esanggo holhemo. Nen, afuni inenggi lek inelagaik mene leberisikhi lagen andi, Allah nen hoba eberek weregaro.

KISAH PARA RASUL 3:19

Andi nen he, hit weak hilingiti lagep mene andi, nineisena Tuhan Allah nen sebelogo legetfisaluk, hinendawinggen faget hineilenggen fanorogo hilinghinabi wagik, aren he, Kristus hinebe telhinaferek mene hinoba lakfei wesigin, iluk wene warisasikhe a'nogo ebe Yesus andiat hinoba hobuk lakfei wagik, uagen he, hinobabut hebelasimbik hinelokhe Allah wogo'no o.

ROMA 12:12

Hiren he, ”Hobuk at Allah nen fano hilingisigin werego,” iluk, hinendawimo hinagaiyekhogo yi enggin ti enggin hikhi logolik he, hinafe morogo samban kamo igi'lek ugu mondok logoino o.

ROMA 15:13

”Hobuk fano asigin,” iluk ninendawimo ninagaiyek hogorek andi, ero at Allah nenat hilingninaferek. Hit a'nogo hinendawimo agaiyek hokhorogo hikhi logouwageluk Allah Areagun omameba hilinghinabuak. A'nogo hilinghinabuagen he, hinendawinggen at oba himbiret fesigip andiba himbiret fuluk were'ma, aren hinendawimo agaiyek hokhorogo hikhi logouwageluk hilinghinafik, hinendawinggen hambugethinafik, uago.

ROMA 15:4

Allah ane lisu palek andiba re, ninafe morogo welagik, ninendawimo fano agik, ogorek andi nen he: ”Fano asigin,” iluk Allah oba eberek logouwageluk, nirat komorogo Allah aneba fageat lisu palogo fesukwa andi.

ROMA 16:26

Andi re, it ap at ane yagaisikhi lagaukwa mene omanogo nen lisu palogo re, sele'matfesukwama were'ma an nen yagahisasigi andi. Yi afuni ti afuni inunggulenu lombok mondogat wene andi inesanggo holiluk inendawinggen Yesus oba himbiret fuluk ane hologo hilingiti logouwageluk, at Allah etok mondok welagarek mene a'nogo nenat: ”Wene yi afuni inelu asuago,” iluk isikhe.

ROMA 16:6

He Maria hit faget seget hokho hilingiti lagaikhe a'nogo, ”Aren hai wathafe,” iluk yaga'no aro.

ROMA 2:7

At Allah nen he, it afuni fena nen inebe fogerinafarek mene inom, agaugwerinafarek mene inom, fili agarek lek mene inom, eise asuogeluk inafe morogo logolik inobabut higit hilingitarek mene halok, inebe ineluk mondok logouwageluk hilinginabigin.

1 KORINTUS 13:13

Mondok logogin he, ninendawinggen Allahba eberogoat himbirik welagorek andi inom, fano asigin iluk ninendawimo agaiyek agarek andi inom, afuni inebe ninendawirogo welagorek andi inom, wene ebe henagan andemat logogin. Meneat he, ebe esin hangge re, afuni inebe ninendawirogo logogun andi aro.

1 KORINTUS 15:58

Andi nenat, nerugwi nagaila'lak. Hinebe nendawi e. Hinendawinggen en wurikhogo, hambukhogo logoino. Ninoe Enupogot ninom hundik logolik he, at faget yi mene ti mene hilingitunem alomat lasigin lego, iluk, hundik-handik ninghogo hilingitu mondok logoino o.

2 KORINTUS 2:17

It afuni ekhe inebe hokhorogoaren he, yi mene ti mene onggo ha awarik lagaikharek hak, Allah ane a'nogoat waluk lagaikharek. Meneat he, nit enek he, a'nogo lek. We, Allah nen, at ane waluk loageluk ninayonggo fesikhe andi nen, at eilhanemat ninendawinggen misigat Kristus ninom hundigat logolik, yagaisilik laga lago o.

GALATIA 1:4

Nit weak hilingitorek andi nen nineisena Allah endawimo nen he, ”Yi'nogo hilingisuak,” iluk endawimo anggasikheba, at Yesus Kristus nen nit afuni kweangma mene telninabigeluk, endawimo nenat nit ninobabut weak mondok hilingitorek mene andi wene at onggwaregen oba fakhaluk wa'lagaikhe andi.

GALATIA 5:13

Nerugwi nagaila'lak. Hit hinale'ma logouwageluk Allah nen hinayonggo fesikhemo welagep. A'nogo meneat he, hinendawimo nen he, ”An nale'ma welagi,” iluk, afuni inobabut inetogat logolik hilingitarek mene inobabut waganogo hesanggeat hilingiti logogup. Athe, wene Allah nen komotninafikhe wene a'nogo mondogat lambukhogo wene misigat yi nek esin hangge isikhe andi: ”Hit hinonggwarek hinebe hinendawinggen hundik welagep andi hak, it afuni ekhe hinom welagep mene hinendawinggen hundik logoino o,” iluk isikhemo lisu palogo fesukwa andi nen he, afuni ekhe inebe hinendawirogo logolik hit-hit lebet-lebet ikhi logoino o.

GALATIA 5:6

Andi nen he, nit Kristus Yesus ninom hundik logolik, ninagap ninenggalimo mene palek mene inom, it ekhe palek lek mene inom, ninom higit welago. Halok, andi faget penesugun lek. We, esin he, ninendawinggen Kristus oba himbirik logolik, afuni ekhe ninendawirinaforek andiba enegat ari'logo.

GALATIA 6:9

Halok he, ninomame lek agi'legat fano mene hilingiti logogun halok he, yi mene ti mene yakfuluk higit asi lagunem, ebe palharek hak, hobuk wurep oba ebe fano mene helogoin andi nen he, ninaberali agi'legat hilingiti logouwogo.

1 TESALONIKA 3:6

Nen, at Timotius hinoba lakfei wagimo wagasik a'naga, yogondak ambotkwe ninoba wagasik he, hit hinendawinggen Kristus oba himbirik logolik, afuni ekhe hinendawirogo hilingiti lagep mene andi yaganisigik, niren: ”It hinelokhonggen nineilenggen iselo e,” iluk ninamolo anggikhi lago hak, hiren a'nogoat ninoba eberek mondok logolik: ”It inobabut fano a'nogo nineilenggen iselo e,” iluk, anggikhi lagep mene andi, yaganisa wagama re, ninendawimo ninagaiyek anggikhi lago o.

2 TESALONIKA 1:11

At Allah nen he: ”Hit a'nogo hilingiti logoino o,” iluk, hinayonggo fesikhe hagat higithogo hilingiti logobagaigeluk, niren hit faget samban ugu mondok welago. Hit hinendawimo nen he: ”Nit fano hilingiti logoilo e,” iluk, anggikhi lagep mene andi, Allah nen a'nogo hilinghinafik, nen, hinendawinggen at oba himbiret fuluk logolik hilingiti lagep mene andi, arenat hinendawinggen wurigethinafik, at omame andiba hilinghinafi logouwago.

2 TESALONIKA 1:3

Nerugwi nagaila'lak. Hit hinendawinggen Kristus oba himbirik welagep mene andi, ekhe inom hokhorogo himbiret figik, hit-hit hinebe lombok nendawi-hendawirogo hilingiti lagep mene andi, ekhe inom hokhorogoat hinendawirinafik, ikhi lagep andi nen, niren hit faget Allah fogerati lago meneat fogeratu mondok welago.

1 TIMOTIUS 1:14

Andi re, at ninoe Enupogot Kristus Yesus obabut fano nen hokhorogo endawitnafikhesik, nobabut he, at inom hundik logolik hilingitarek hagat, nendawinggen at oba himbiret figik, afuni ekhe nendawirinafik, hokhorogoat ikhi logouwageluk, nebe wo'nafikhe andi.

1 TIMOTIUS 2:3

At Allah telninaferek mene a'nogo endawimo anggikhi logolik he, ”Yi afuni ti afuni mondogat telinafik, ebe wene furogo inelu asuageluk yagaisigik, agarek mene,” At endawimo amolo anggikherek andi nen he, hit a'nogo ikhi logogun halok he, fano.

IBRANI 10:36

Hiren Allah endawimo amolo anggikherek mene hilingitunem, aren, ”Hit wokhisagain,” iluk abok yagahisasikhe mene andi wanubagaigen he, hinafe morogo hilingiti logoino.

IBRANI 11:17

Attagat Allah nen Abraham yagati logolik, ”Haren tagongge mene wialasugun iluk yagahetigi a'nogo ebe re, hamlogo Ishak yi nen tagongge mene nen wialasugun mene faget yagahetigi o,” iluk, yagatikhe meneat he, hobuk obabut paligeluk, ”Hamlogo ebe yi an faget wa'nom,” iluk yagatikhe. A'nogo yagatikhemo, at Abraham endawinggen Allah oba eberogoat himbiret fuluk welagaikhe andiba, ”Ishak wa'lasumo Allah nen hobuk elok elugerasigin,” iluk ebe warogo Allah wogosigeluk isikhe andi nen he, inane lagokhogo re, Ishak warek mene eluk agama Abraham wanhe iluk ikhi logogun o.

IBRANI 13:21

Hit Allah endawimo amolo anggikherek mene nek fano hilingisubagaigen he, yi mene ti mene fano mene mondogat wokhisoak. A'nogo wokhisugunem, nit ninom mondogaren Allah endawimo fanorogo hilingiti logouwageluk, ninobabut aren wo'nisagain andi ebe re, Yesus Kristus nen wo'nisoago. At Kristus andiat fogeratu mondok logouwogo. Ebe asuak u hak, ”Amin,” igi andi.

IBRANI 4:11

It attak Allah ane hologo higithogo hilingiti'legen, set waligi'lek andi hak, nit ekhe it inobali'mo set walogo lek hanogoluk, ninomamerogo hilingiti logouwogo.

IBRANI 6:15

A'nogo yagatikhemo, Abraham endawimo puk agi'lek nenangorogo welagaikhe andiba, wene abok yagatikhe mene andi, arat ebe agaikhe andi.

1 PETRUS 3:4

Athe, hinoba fanorogo re, hinendawinggen faget hinago mene andi wanhi logoino. Andi re, hinobabut mondok logogin mene enago welagik, lioksek welagik, ikhi logoino o. Hinobabut Allah eilhanem a'nogo hilingitunem, at endawimo nen fano mondok anggikherek he andi aro.

1 YOHANES 3:18

Halok he, nagainafuri e. Niren afuni ekhe ninendawirinafi'lek logoligat he, ninaneba nek he, ”Ninendawirinafi logouwogo,” iluk ikhi logogun elo'lego. Athe, inebe ninendawirinafik, ninenggiba nen eberogoat leberisikhi logouwogo.

1 YOHANES 3:21

Halok he, nerugwi nagaila'lak. Hinebe nendawi e. Nit ninendawimo nen, ”An weak ekhe hilingiti,” iluk menenei ebeti'lek, ninendawimo serogo welago halok he, at elokhoma ninailo lekhogo logolik,

1 YOHANES 3:3

Nit ninendawimo nen, ”A'nogo hilinglasugun,” iluk, oba eberek welagorek mene ninebe lombogen, at onggwarek ebe tegelek welagarek andi hak, nit a'nogoat tegelikhi logoguno.

1 YOHANES 5:3

Nit Allah nen ta'ninafe mene halok ninebe lombogen he, ”Allah ane andi eberogoat,” iluk ninendawinggen at oba himbiret fogorek andiba, it afuni kweangma mene inobabut inetogat logolik weak hilingitarek mene andi mabenetfisaluk ninomame agorek andi. A'nogo mabenetfisaluk ninomame agorek andi nen, wene Allah nen komotninafikhe wene andi enggin fuk, serego. Andi nen he, niren, ”Allah ebe ninendawi welago,” iluk u hak he, aren wene komotninafikhe wene andi hologo higithogo hilingiti logouwogo.

WAHYU 2:19

Hit hinobabut hilingiti lagep mene andi an nelu o. It afuni ekhe hinendawirogo welagep andi inom, hinaberali agi'lek hinobabut humbunhogo welagep andi inom, it ekhe leberisikhi lagep andi inom, it ekhe nen yi enggin ti enggin hinoba fugu kwelek, hinafe morogo welagep andi inom, mondogat an nelu o. Nen, attak endebat hak hilingiti lagagip meneat he, yogondak mondok hokhorogo hilingiti lagep andi, an nelu aro.

WAHYU 3:10

A'nogo fisa wesigin andi re, an nen, hinafe morogo logoino o, iluk yagahisasigi mene andi, nane hologo higithogo hilingiti lagep andi nen, o hobuk Allah nen afuni kweangma yoma welagaikharek mene mondogat yi enggin ti enggin inoba fagain sambul andi fugu kwelek, hit enek he, an nen nawe a'ma fano fethinarek logogin o.