1 TAWARIKH 27:1 - Allah Wene Fano Wene Hupla Inane

^1-15 O kerajaan Israel oba andoma yi wene ti wene pemerintah inoba afe halhu mene faget he it ap ineisok erokwe higit-higit inogogwi welagaukwa mene omanogo inom, it inunggulenu lombok faget melalinafu mene omanogo inom, it sikhe fisogo mene inogogwi lego mene perwira omanogo inomen, halhi lagaukwa. Tahun hundik-hundik tugi misik inukhogo ap logalek misik ekhe inoe kepala melalinafu mene misik ekhe nen woginarek hobugalep yabu hilingiti lagaukwa. Esa logalek andoma hundomok he ap inebe 24.000 nen higik welagaukwa. It esa logalek andoma tugi hundik-hundik fololhunem yabu hilingitu mondok welagaukwa mene a'nogo inogogwi kepala inenu re yi: Tugi misik oba re: Yasobam hun Zabdiel amlogo (At ebere it inunggulenu Yehuda meneba re hun Pere unggulenu a'nogoba nen) melalinafi lagaikhe. Tugi pire meneba re: Dodai, hun Ahohi ambisangmangge a'nogo. Nen at a'ma owakil hakhogore Miklot welagaikhe. Tugi henaganek meneba re: Benaya amlogo a'nogo; at he it ’Esa 30’, ikhi lagaukwa mene andi melalinafu mene welagaikhe. Nen, at a'ma owakil he at amlogo Amizabad a'nogo welagaikhe. Tugi enggaminogonek meneba re: Asael hun Yoab agailak a'nogo. (Nen, at obali'mo re at amlogo Zebaja a'nogo welagaikhe.) Tugi fuabenggeba re: Samhut hun Yizrah ambisangma mene a'nogo welagaikhe. Tugi falfalik enggeba re: Ira hun Ikes amlogo o kota Tekoa mene a'nogo welagaikhe. Tugi sabit enggeba re: Heles, hun Efraim ambisangma mene o kota Penoli mene a'nogo welagaikhe. Tugi sirek meneba re: Sibkhai awi kota o Husa mene a'nogo, (at ebere it inunggulenu Yehuda meneba nen he unggulenu Zerah mene) welagaikhe. Tugi sogo meneba re: Abiezer, o kota Anatot wilayah it inunggulenu Benyamin meneba omanogo mene welagaikhe. Tugi nomolo meneba re: Maharai, hun Serah ambisangma mene o kota Netofa mene andi welagaikhe. Tugi nalonggop meneba re: Benaya, o kota Piraton it wilayah Efraim oba mene andi welagaikhe. Tugi nesanggo meneba re: Heldai, hun Otniel ambisangma Mene o kota Netofa mene andi welagaikhe.

1 TAWARIKH 27:1 ပူးပေါင်းရင်းမြစ်များ

2 SAMUEL 23:8

At Daud agoromi kaindek weim tok inenggi pukweak welagaukwa mene andoma inenu re yi: Attak mene re Ishbaal o Hakhmoni agun andi it, ’Esa Henagan Triwira’ ikhi lagaukwa mene andi inoe melalinafu mene welagaikhe. At andi nen he enggi misik sambul ap inebe 800 nen mene inom weim yafikhe mene re, aren arige kabelek oba afuni andi inebe mondok felelenghogo inoatikhe.

1RAJA-RAJA 4:27

A'nogo were'ma re tugi hundik-hundik omanogoba re, it ap bupati omanogo nen inebe hobugalep higik at raja inom it ap hun raja awi silimo nen nunggu mene wogisikhi lagaukwa mene omanogo inom faget nunggungge waluk wagunem he, iren yi mene ti mene werekhogo nek welagaukwa.

1RAJA-RAJA 4:7

At Salomo nen he o it afuni Israel mene were'ma kweang o wilayah andomaba mene faget ap bupati inebe 12 nen menfisilik lagaikhe. Menfisilik lagaikhe mo re, it ineabu re: O wilayah kweang it werekwe omanogo tomogen nunggungge at raja faget inom nen at awi elonggoma yabu hilingitu mene faget inom kabogeti lagaukwa. Kabogeti la'luk he, bupati omanogo inebe lombogen he tahun misik oba, tugi hundik-hundik, fei waga lagaukwa.

1RAJA-RAJA 5:14

A'nogo inayonggo fesikhesik hun Adoniram en melalinafi logouwageluk menfesikhe. Menfesikhesik he, inebe esa henagan nen logalfesukwasik esa aremnogo tomok he ap inebe 10.000 nen higik fisilik lagaikhe. A'nogo fisilik lagaikhemo it a'nogo re tugi ekheba re o Libanon welagik, nen tugi ekhe pirenek meneba re inaiba welagik hilingiti lagaukwa.

1 TAWARIKH 11:10

At Daud agoromi a'ma mene Daud obaget hilingitu hobalhu welagaukwa inap a'nogo inenu re yi: It andi re afuni Israel mene inom he at Daud raja menlasuak iluk Tuhan nen, a'nogo asigin, iluk abok isikhe higithogo obaget hilingiti lagaukwa inap. Nen, it andi re at Daud raja menlagaikhemo nen ogore obaget hilingiti logolik mondok welagaukwa inap a'nogo.

1 TAWARIKH 13:1

At raja Daud a'nogo nen it ap sikhe fisogo mene inogogwi kaindek perwira ap inebe esa 1.000 nen melalinafu mene inom, nen esa 100 nen melalinafu mene inom, wene inane seberogo matukwa.

1 TAWARIKH 26:32

Nen it afuni Israel inap i Yordan esanggo mo wulibi wagarek fikhit o wilayah it inunggulenu Ruben meneba andoma inom, Gad meneba andoma inom, Menasye meneba fena omanogo inom inawene re: Allah wene faget inom, pemerintah inawene faget inom palhu mene re, hun Yeria eisok erokwe mene inebe 2.700 nen omanogo inoba wogisasukwa. Ap inebe mondok he ap hokho inap enek at raja Daud en tegelinafikhe mene welagaukwa.

1 TAWARIKH 28:1

Raja Daud nen wene ayo palogo wulafi logolik he, it afuni inogogwi kaindek o Yerusalem oba andoma mondogat kabogesi wesuageluk yagaisasikhe. A'nogo yagaisasikhemo re, it ap kepala suku inom, ap yabu pemerintah ba hilingitarek inap omanogo inom, it inunggulenu lombok omanogo faget kepala welagaukwa inap omanogo inom, it hun raja angge onggwarek mene inom, anggo inom, at againafuri inom, faget kagalek welagaukwa mene omanogo inom, katukhogo re at raja ebe were'ma ap hokho-hokho inap welagaukwa mene omanogo inom, it inasikhe werek inap tentara inogogwi perwira omanogo inom, ap inogogwi lego inap kaindek-kaindek omanogo inom, abirengge o Yerusalem kabogetukwa.

1 TAWARIKH 29:6

A'nogo yagaisasikhemo re ap ineisok erokwe faget kepala welagaukwa inap omanogo inom, it tentara inogogwi perwira omanogo inom, it at raja angge onggwarek mene faget halharek mene omanogo inom nen ikhi logolik he, niren ogo kabogesugun iluk ninendawimo anggogo o, iluk isukwa.

2 TAWARIKH 1:2

It afuni Israel mene nen esa inebe 1.000 nen higik, 100 nen higik, faget inogogwi kepala inom, it pemerintah ba yabu hilingiti logolik ap kain mene mendek werek inap inom, it ineisok erokwe faget kepala werek mene faget inom he, at raja Salomo a'nogo nen,

KELUARAN 18:25

it afuni Israel mene inanggelekwe omanogo nen ap inobabut hebelek mene nek heragaisogo fisilik lagaikhe. A'nogo hilingitikhesik he afuni inebe 1.000 mene faget inom, 100 mene faget inom, 50 mene faget inom, 10 mene faget inom, lenggalinafi logouwageluk yagaisilik lagaikhe.

MIKHA 5:2

Tuhan nen hobuk a'nogo hilinginabigin iluk, yogondak we elama ya it ninaselei mene nen fetninarek logolik yaganisikhi logouwageluk ninobagaikhemo logogun andi. A'nogo fetninarek logolik werek kwelek at raja andi agaisa nen tasigin iluk Allah nen anggasikhe higithogo ta'lagu halok, afuni at unggulenu mene hele warogo woginarek lagaukwa mene andoma re hobuk it inunggulenu Israel mene inom sebesi wesugun.

ULANGAN 1:15

Andi oba nen hiren hinogogwi yagahisikhi logouwageluk ap inebe miren mene hakhogo inobabut hebelek mene inom, inendawinggen wenggelogo hilingisu hak mene inom, aremnogo re, it inebe 1.000 nen mene inom, it ekhe 100 nen mene inom, it ekhe 50 nen mene inom, ekhe 10 nen mene inomat inunggulenu lombok faget inogogwi logolik ferinarek logouwageluk menfisasigi. Nen, an nen ogo re, it fena inogogwi kaindek ferinarek logogun mene hinunggulenu mondogat faget menfisasigiat.

YOSUA 23:1

Lingge aninurogo omanogo Tuhan afuni Israel mene ineisena a'nogo nen fano liokhogo ferinarek were'ma re, inaselei mene nen ekhe weagerinafi'legengge werek kwelek enek welagaukwa. Andem sambul he Yosua ebe arat yaman agaikhe.

1 SAMUEL 8:12

It ekhe tentara inebe 1.000 mene inogogwi logouwagaluk menfisigik, it ekhe tentara 50 mene inogogwi logouwagaluk menfisigik, ikhi logogun. A'nogo hilingiti logolik, hinagainafuri ekhe at eabu wokfisikhi logouwagaluk yagaisigik, it ekhe awi yago mene ebe tatik, palhik, ikhi logouwagaluk yagaisigik, it ekhe sige sikhe wutik, kabelhik, ikhi logouwagaluk yagaisigik, it ekhe yi mene ti mene kereta weim yafarek mene faget hilingiti logouwagaluk yagaisigik, ane ning-nanghogo yagaisikhi logogin aro.