1 TAWARIKH 24:1 - Allah Wene Fano Wene Hupla Inane1-3 Hun Harun he amlogomi inebe enggaminogo mene taginafikhe; Inenu re, Nadab inom, Abihu inom, Eliazer inom Itamar inom andem. It Nadab inom Abihu inom he ineisena eluk werek kwelek he inagainafuri ekhe taginafi legengge it tak wa'lagaukwa. Andiba re it inagaila'lak Itamar inom, Eleazar inom he imam agaukwa. At Daud en he it Harun ambisangma mene a'nogo re it ineabu hilingik aplerogo sumburinabik lagaikhe. A'nogo sumbuthigik fisugunem a'nogo re, at Eleazar ambisangma mene re hun Zadok, nen hun Itamar ambisangma mene re hun Ahimelekh, inomen Daud lebethasukwa. အခန်းကိုကြည့်ပါ။ |
1 TAWARIKH 24:1
16 ပူးပေါင်းရင်းမြစ်များ
Ekhe re it imam a'nogo inom, it Lewi inap inom, tegelogo fisagain mene faget wenggelhikhe mene a'nogo inom, iren yabu o Tuhan Awi wuri'mo hilingiti logogun mene faget wenggelhikhe mene a'nogo inom, Tuhan obaget wene kabogeti logolik hilingiti logogun mene faget wenggelhikhe mene a'nogo inom, wogetikheat.
A'nogo isukwasik he it ap Lewi inap inom, it afuni Yehuda mene a'nogo inomen he at Yoyada nen yagaisasikhe mene a'nogo higithogo nek hilingitukwa. It ap inenggi Sabat sambul yabu hilingiti legengge welagaukwa mene omanogo ogore hinaiba logoin lek iluk yagaisikhi lagaukwa. Andiba re it ap perwira omanogo nen he ap yabu mondok hilingitu werek meneet, it ket yabu hilingisugun iluk wagu mene omanogoet, inoba re yi'nogo hilingi'ni iluk yagaisikhi lagaukwa.
At Raja Hizkia nen he it ap imam inom, nen Lewi inap inom ineabu kurik werek higit-higit fisilik lagaikhe. It yabu sumburisilik lagaikhe mene andi re ebe yi: Iren wam Tuhan endawimo agaiyek hoageluk warogo nolhik, wam At Tuhan nen fanot ninobagauwageluk kino yagati logolik warogo nolhik, o Tuhan Awi wuri'mo omanogo wene kabogetuba yabu hilingitik, o Tuhan Awi elonggokwe omanogo nen Tuhan foget fikhi logolik hai watik, hilingiti logouwageluk sumburogo wogisasikhe.
Iren a'nogo hilingitukwasik he, it imam mondogat andoma welagaukwa mene omanogo kabogesugun nen iluk inebe fik-fouk etukwa. Nen, it inunggulenu Lewi meneba nen, wuni wulafik, pinggong watik, hilingiti lagaukwa mene, hun Asaf, Heman, Yedutun inom, it ineisok erokwe mondogat inom he inasu eil sakorek meneba ugu mene labetukwa. A'nogo labetukwasik he, it Lewi inap andi re nolhungge obalik mezbah were'ma nen abel timur fikhit aremnogo pinggong simbal inom kecapi inom, senegeisogo mendek welagaukwa. It a'nogo mendek welagaukwa mene andi inom he, it imam a'nogo inebe 120 nen, trompet futi lagaukwa inap inom mendek welagaukwa. It mendek logolik he, wuni inane lambulogo wulafik, pinggong trompet inom, simbal inom, pinggong amu mene inom, watunem he mondok misik seberek welagaikhe. Nen, iren Tuhan fogerati logolik wuni inaneba wulafi lagaukwa mene re yi'nogo: ”Tuhan andi re mondok fano. Aren endawi hundik hilinginaferek mene andi re, mondok-mondok faget hilingi'mo re, Tuhan enek fogeratu mondok logogun,” iluk ikhi lagaukwa. It a'nogo ugu kwelek it imam omanogo Tuhan Awi wuri'mo nen wulibi wagunem en he ferekhogo aremnogoat O a'nogo Tuhan ombakbagen enekhogo isikhemo re, it wene kabogeti lagaukwa mene a'nogo ekhe inom hilingirik la elo'lek hogo hilinglagaikhe.
A'nogo hilingitikhesik he at eisena Daud en wene melalek yagatikhe mene higithogo re it ap imam omanogo nen yabu linggene hundik-hundik hilingitu mene faget inom, it ap Lewi inaben wuniba Tuhan enu fogeratik, it imam en wene kabogeti logolik hilingitunem omanogo leberisigik, hilingiti logouwageluk wenagaisogo fisasikhe. Nen, andi nen he at Daud Allah amingmingengge a'nogo nen wene yi'nogo ti'nogo iluk isikhe mene higithogo re it ap o Tuhan Awi wurik mene a'nogoba kagalek werek mene iluk welagaukwa mene a'nogo re o ebekwe kwi lagukwe aremnogo higit-higit wenagaisogo fisilik lagaikhe.
A'nogo menfisasukwaba nen Nadab inom, Abihu inom he o Sinai leimo nen iren Tuhan obaget hilingiti logolik omanogo endu fano mene nolhukwa le'ma wa'lagaukwa. It inebe pirenet he inagainafuri tago lek welagaukwa. Ma re, at Harun eluk welagaikhe andem oba re it Itamar inom Eleazar inom he inebe imam logolik hilingiti lagaukwa.
ကြော်ငြာတွေ