1 TAWARIKH 11:3 - Allah Wene Fano Wene Hupla Inane

³ A'nogo yagasi lagaukwama at Daud a'nogo it afuni Israel mene inogogwi omanogo inom o Hebron nen Tuhan elokhoma ane hombuk palhikhemo re, Tuhan nen hun Samuel ebe nen, ”At Daud a'nogo asigin,” iluk abok isikhe higithogo re, iren at Daud ungguloba amusu warogo afuni Israel mene inobaget inoe raja logouwageluk menfesukwa.

1 TAWARIKH 11:3 ပူးပေါင်းရင်းမြစ်များ

2 SAMUEL 2:4

A'nogo wagaukwasik were'ma, afuni Yehuda mene o Hebron wagaukwasik, at Daud ebe it inoe raja logouwagaluk menfesukwa. A'nogo menfesukwama afuni nen he, ”At Saul ebe warek a'nogo re afuni Yabesh mene o Gilead werek mene omanogo nen kweangma salha,” iluk isukwama esanggo holhikhesik he,

2 SAMUEL 5:3

A'nogo yagatukwama, at Daud en he, afuni Israel mene inogogwi omanogo inom wene wat-wat isukwasik, iren at Daud it afuni Israel mene inoe raja logouwagaluk, menfesukwa.

2 SAMUEL 5:5

Nen, at o Hebron logolik afuni Yehuda mene ferinarek 7 setengah tahun welagaikhe. Hobuk, at ebe Yerusalem wagaikhesik logolik, afuni Israel mene inom, Yehuda mene inom, ferinarek 33 tahun welagaikheat.

2 RAJA-RAJA 11:17

A'nogo hilingitukwasik he at imam Yoyada nen it afuni holhu mene omanogo inom, at raja Yoas a'nogo inom, inoba yagaisikhi logolik he, ”Nit Tuhan againafuri asugun,” iluk hombuk palini o. Nen, aren ogo re, at raja ebe inom afuni holhu mene nen inomen inane hombuk paluageluk yagatikheat.

1 TAWARIKH 11:10

At Daud agoromi a'ma mene Daud obaget hilingitu hobalhu welagaukwa inap a'nogo inenu re yi: It andi re afuni Israel mene inom he at Daud raja menlasuak iluk Tuhan nen, a'nogo asigin, iluk abok isikhe higithogo obaget hilingiti lagaukwa inap. Nen, it andi re at Daud raja menlagaikhemo nen ogore obaget hilingiti logolik mondok welagaukwa inap a'nogo.

2 TAWARIKH 23:3

It a'nogo wagaukwasik he o Tuhan Awi wuri'mo omanogo kabogetukwasik, at Yoyada nen it fenakwe omanogo inoba yagaisikhi logolik he,” Tuhan nen hun Daud oba wene wareti logolik, Hat hambisangma mene re, mondok-mondok andoma raja logolik melalinafi logogun,” iluk wene waretikhe hilingi'mo re, hun raja Ahazia wa'laga mene a'nogo amlogo Yoas ebe yiat menfogoin o. Nen yogondak yaat hat hebe hurek oba takhta ariba hu'lasi lagain o, iluk hun raja amlogo Yoas a'nogo inom wene isukwa.

HAKIM–HAKIM 11:11

Andi isukwama at Yefta a'nogo ap Gilead inap melalinafu mene omanogo inom lagaukwa. Lagaukwama re, it inebe afuni Gilead mene nen he awe a'ma fetninarek logolik melalninafi logouwak iluk menfesukwa. A'nogo menfesukwama o Mizpa andoma nen Tuhan eilhanem at Yefta nen he afuni Gilead mene inoba re yi'nogo ti'nogo hilingnobagakhi logogun iluk wene inoba fesikhe.

1 SAMUEL 11:15

A'nogo yagaisasikhemo, it mondogat o Gilgal wagaukwasik, o Allah fogeratarek oba andoma nen Allah nen lambulinabuagaluk at faget wam warogo noleti logolik, ”Saul nit ninoe raja arat logouwak,” iluk it afuni Israel mene inebe mondogat Saul inomen wene andi faget seni isatukwa.

1 SAMUEL 15:28

A'nogo tilibisikhemo re, at Samuel en Saul mel yagatikhe: ”O yogondak yiat, At nineisena Tuhan nen afuni inunggulenu Israel mene haren ferinarek welagen mene a'nogo nasu lit hegenma tilibikhe andi hak, lisogo wanhesik, hobuk ap ekhe hat hobabut weak andi hangge re lek, athe obabut mondok fano mene arat wogetemo o.

1 SAMUEL 16:1

At Samuel enggi ekhe inom endawimo a'nogo weak were'ma, nineisena Tuhan nen mel yagatikhe: ”Hat Saul faget henggi miren oba hendawimo a'nogo weak logogin nogo? An nen he, at Saul afuni Israel mene inoe raja logogin mondok lek, iluk arat igi lek nogo? Andi nen he, hat yogondak zaitun amusu ekhe wanimbik he, o Betlehem lan o. Lambik, ap enu Isai amlogo ekhe raja logouwageluk arat wenagaisogo figimo werek andi nen he, lan o,” iluk yagatikhe.

1 SAMUEL 16:3

Yagaisegen halok he, at Isai wam warogo Allah noletunem andi wesuageluk ayonggo feino. An nen hat hilingisigin mene yagahesigin o. An nen, ap ebe yi, iluk yagahesigin mene andiat, at ebe raja logouwagaluk amusu unggul oba warogo menfeino o,” iluk yagatikhe.

1 SAMUEL 23:18

A'nogo hilingitukwasik he at Yonatan inom, Daud inom, ninom hundik logolik nagailak-hagailakhogo logogun iluk Tuhan eilhanem wene sikhiphogo isukwa. A'nogo hilingitukwasik he at Yonatan a'nogo aiba lagu kwelek, at Daud enek he o Hores welagaikhe.

1 SAMUEL 28:17

At Tuhan nen an yaganetikhemo, hat yagahetigi hagat, haren afuni Israel mene ferinarek welagen mene andi waganogo re, at Daud wogotemo o.