1 SAMUEL 8:11 - Allah Wene Fano Wene Hupla Inane

¹¹ ”Hobuk hinoe raja andi menfoumo yi'nogo hilinghinafi logogin. Aren he, hit hinagainafuri tentara asuagaluk ane ning-nanghogo yagahisikhi logogin. It andi esa ekhe kereta waluk nikhi logogun mene menfisigik, esa ekhe wam kuda ambol oba hurek nikhi logogun mene menfisigik, nen at enupogot andi ebe angge kereta ba lagu kwelek, it esa ekhe ineisok oba humusek attak-attak laga logogun mene menfisigik, ikhi logogin andi.

1 SAMUEL 8:11 ပူးပေါင်းရင်းမြစ်များ

2 SAMUEL 15:1

A'nogo wanhikhemo, at Absalom onggwarek faget kereta weim yafarek mene a'nogo misik ekhe inom, nen wam kuda inom andogorogo fesikhesik, ap inebe 50 nen inom nikhi logogun mene inayonggo fesikhe.

1RAJA-RAJA 1:5

At Daud amlogo Absalom a'nogo ebe arat watukwama nen he, agot ombo'ne mene Andonia a'nogo re ebe arat ap manggusa tago higit agaikhe. At agaisa enu re, Hagit. Nen Andonia andi ebere mondok pugun-pagansek agun welagaikhe. Nen aren weak hilingitunem ogore, eisena nen wenageti'lek alelogo hebisikhi lagaikhe. Andi nen he, at Andonia onggwaregen, ”Raja an logogin,” iluk anggasikhesik, kereta weim yafarek mene hokhorogo tegelogo fakhigik, agoromi tentara kuda oba laluk weim yafi logogun mene tegelogo fisigik, ebe waluk nikhi logogun mene ap ekhe inebe 50 nen tegelogo fisigik, isikhe.

1RAJA-RAJA 10:26

At Salomo nen, kereta weim yafarek mene 1.400 nen andogorogo figik, nen ap kuda ambot oba lagaluk weim yafarek mene inebe 12.000 nen woginafik, isikhe. A'nogo woginafikhesik, it fenakwe o Yerusalem logouwageluk fisigik, fenakwe inebe hokhorogo re, o kota ekhema-ekhema ekhe logouwagaluk fisilik lagik, isikhe.

1RAJA-RAJA 12:10

A'nogo yagaisasikhemo, iren he, ”It afuni nen, heisena nen yabu enggin mene ninoba fikhi lagaikhe andi hak figi'lek, haren se mene ninoba fikhi logoino, iluk yagaheta mene andi wene onggo mel yagaisano: An neisena omame endebat lek, elo'lek hangge meneat he, an enek he nomame mondok hokho o.

1RAJA-RAJA 12:4

”Hat heisena Salomo obabut ningsek logolik nit yabu enggin hokho mene ninoba fesikhemo hilingitu welagorek andi nen he, yogondak ninoe haren enggin ninoba mene andi endebat setfuluk, yi enggin ti enggin hikhi lago mene andi endebat legetfagain halok, nit hat hamingmingengge logogun o,” iluk yagatukwa.

1RAJA-RAJA 14:27

A'nogo telasukwama re obali'mo iluk raja Rehabeam en weim ma'mungge perunggu meneba wutikhesik, it ap sikhe fisogo mene inogogwi perwira at raja awi silimo kwi lagaikharek oba ebekhalem kagalek welagaikharek mene omanogo nen halhi logouwageluk inoba lombot fesikhe.

1RAJA-RAJA 18:46

Andi sambul he, at Elia nineisena Tuhan nen omame wogotikhemo re, asu sogoi su oba sirogo obakheba liakfesikhesik, ban oba ninghogo pugetfesikhesik he, humusek mondok at Ahab hobuget fuluk attagat o kota Yizreel leget pa'leget ambe palek oba wagaikhe.

1 SAMUEL 10:25

A'nogo elokhe wanhukwama, at Samuel en Saul eise logolik hilingiti logogin mene afuni omanogo yagaisasikhesik he, lisu palogo o Allah onggwarek awi wuri'mo obalik hore'ma a'nogo fesikhe. A'nogo arat hilingi'luk he, afuni omanogo mondogat inawilokwe lombok inambotkwe loageluk lakfisasikhe.

1 SAMUEL 14:52

At Saul ebe eluk logolik, ap Filistin mene inom weim mondok aniniweak yafi lagaikhe. A'nogo yafi lagaikhe andi nen, ap ekhe ailo lek omame hokho logolik weim yafu halok he, at Saul en eil fene-fene at agoromi tentara mene asuageluk weak-weak woginafi lagaikhe.

1 SAMUEL 22:7

aren at agoromi sikhe fisogo mene inogogwi perwira omanogo inoba ikhi logolik he, ”Hit afuni Benyamin mene yoma hinesanggo holini! At Daud ikhi lagep mene a'nogo nen he, hit hineabu inom, anggur yabu inom wokhisagain a? Aren he at agoromi tentara faget hit hinebe abirengge kaindek perwira nek logouwageluk menhinobagagik, igin a?

1 SAMUEL 8:9

A'nogo hilingiri'lagwi andi nen he, iren kino yagaheta mene andi inane hesanggo holino o. A'nogo meneat he, haren mel yagaisano: Hobuk ap ekhe hinoe raja menfogoin meneat he, yi'nogo hilinghinafi logogin, iluk inelurogo yagaisano o,” iluk yagatikhe.