1 SAMUEL 15:23 - Allah Wene Fano Wene Hupla Inane

²³ Nineisena Tuhan ane sagalogo fulak inom weim palek logolik hilingitarek mene andi re, hugurue nen afuni ekhe onggolek inoatarek andi hangge aro. Nen, inonggwaregen fogerakhagarek andi re, tugwi kembu fogeratarek hangge aro. Andi nen he, haren nineisena Tuhan Allah ane sagalogo hilingiten andi nen, Aren he, hat hebe kain raja logogin lek, iluk ikhe andi,” iluk yagatikhe.

1 SAMUEL 15:23 ပူးပေါင်းရင်းမြစ်များ

KEJADIAN 31:19

It a'nogo hilingitu kwelek, at Laban he o leimo anggo domba esi paligiluk lagaikhemo, at ebe lek kwelek, hele Rahel a'nogo nen eisena Laban anggembu e meneba wurigengge at Laban eisok erokwe ferinarek mene iluk fisogo welagaikhe mene a'nogo hinatikhe.

KEJADIAN 31:34

At a'nogo hilingitu kwelek aremnogo anggembu a'nogo at he Rahel en waganogo unta amboroba lageluk logolik, talogo hu'lari lagongge a'nogoba elelema kwelagaisogo hinakfesikhesik, he Rahel ebe no a'nogo sebelogo amboloba hurek welagaikhe. Hurek kwelek at Laban en olokwe mondogat heratikheba nen elokhoma agaikhe lek.

2 SAMUEL 12:9

Mene re, an nen, yi'nogo hilingi'no, ti'nogo hilingi'no, iluk yagaheti lagi mene andi, nane hendawimo seramet fegendik an neilhanem weak hilingiten andi nenahalok? Nenahalok haren weak mene andi hilingiten? At Uria a'nogo re aben weim ambisangma nen wasuageluk miminginafen. Haren he at agwe helikhi logolik he at ebere ap Amon mene nen wasuageluk herakfisegen andi!

2 SAMUEL 7:15

A'nogo meneat he, An nen, yi'nogo hilinghinafu logogin, iluk wene watheti andi hagat, at andi fanotfugu mondok logogin o. At faget wene watheti mene andi, at Saul menhobagagi raja were'ma An nen at futfuluk hat hebe raja logoinogoluk menfagagi andi hak hilingisigin mondok lego. We, nenggi ninghogo fisogo logogin o.

1 TAWARIKH 10:13

Saul ebe wa'lagaikhe andi re, aren Tuhan oba tiphogo hilingiti'lek, Nen Aren awene melalek yi'nogo hilingiti logoin o, ti'nogo hilingiti logoin o, iluk yagatikhe mene a'nogo hologo hilingiti lagaikhe lek andi nen. Nen, ekhe re at Saul en an ninggi'nogo hilingisigin iluk, At Tuhan nen yaganesuageluk, kino igi'legengge re, aren it ap wa'lagaukwa mene inaheimenggeba kino ilaga lagaikhe. Andiba re, at Tuhan nen wene oba fesikhesik he at raja mendek logolik welagaikhe ba obali'mo a'nogo re hun Isai amlogo Daud a'nogoba wogetikhe.

1 TAWARIKH 28:9

A'nogo yagaisasikhesik at Salomo ba Daud en ikhi logolik he yi'nogo yagatikhe, ”Namlogo e, Allah hat heisena nen fogerati lagi mene andi faget enek eberogo an neisena Allah iluk fageti logoino. At Allah re nit ninendawinggenma wenggelhi lago mene inom, ninamolo anggikhi lago mene inom mondogat elu hilingi'mo re, hat hendawinggen pikhithogo, hobabut sakhorek oba, At obaget enek hilingiti logoino. Nen, haren At ebe heratu halok he At ebe herakhagain, oba nen he haren At herakfuluk lagain halok he, Aren mondok-mondok faget hat nabit iluk oboget heagain.

AYUB 34:37

Aren kwanirogo hilingiri'lago mene a'nogo re aweak ekhe inom to'mot fugunem he, aren nit nineilhanem Allah a'nogo sebelogo fuluk he, At Allah ane sagalogo fou hak.

KELUARAN 22:18

It hemi nen ekhe inambolfamengge kanggorogo hilingitu halok he ebe pinggi wa'no.

YESAYA 19:3

An nen it Mesir mene nen hilingisugun mene iluk eberek werek mene andoma sugitfisigik, it inagaiyek werek mene inagaiyek legetfigik, hilingisigin. A'nogo hilingfisamo iren he tugwi kembu werek meneba komo wene yaganisoageluk kino igik, hareise mene inoba inom, heinogengge mene inoba inom hilingisugun mene yaganisoageluk kino yagaisigik, ikhi logogun.

YESAYA 8:19

Oba nen afuni ekhe nen yi'nogo yagahisogoin, it heinogengge nen inambe lebetik, inane nguluk habuk igik agarek mene andoma inoba heinok woginabi lani. Ninebe nineluk welago mene faget heinogengge inoba laluk he ap warek mene heimenggeba inanema woginabi lamo higit nogo a,” iluk yagahisogoin o.

YEREMIA 16:12

Oba nen hiren he ekhe inom hinanini mondok weak hilingiti lagep. Hit he hinendawinggen mondok peterek logolik, kwanirek mene omanogo hinendawimo nen anggaluk enek hilingitu welagep. Hiren An nane hologo hilingiti lagep lek.

YEREMIA 28:16

Andiba re Tuhan ebe nen ikhi logolik, hat he o kweangma yoma nen Tuhan nen mondogat leget hobagagin o. Haren he it inunggulenu ari nen Tuhan ane sagalogo hilingisuageluk yagaisasiginmo re tahun yibaat hebe wa'lasigin o,” iluk ikhe yagati.

YEREMIA 29:32

hiren An nane sagal fouwageluk yagahisikhe. Ma re An nen at ebe inom at ambisangma mene inom unggum wogisagain o. It inaggele'ma mene andoma nen he ap misikhogo ekhe hit hinanggele'ma logolik An nen nagainafuri inobaget fanorogo hilingitu mene andoma hineilenggen hogoin lego, iluk An Tuhan nen nane mondogat igi o,” ikhe iluk lakfesigi.

HOSEA 13:11

Na'mageba An nen hit hinogogwi raja logouwageluk wokhisikhi lagi, andi nen hobuk An noba harorogoat it inebe nekhengge lisogo woginabigin aro,” ikhe.

HOSEA 3:4

A'nogo yagatigimo At Allah nen he, ”Andi hagat afuni Israel mene inenggi hokhorogoat inoe enupogot inom, inogogwi kaindek at enggi ebekwe mene inom, le'ma logolik, wam warogo An nolnetik, afuni inalik hilingik mene oba himbirik logouwogeluk menegeisogo figik, tugwi kembu fisogo welagik, hobuk hilinglasigin mene faget inelu asuageluk hilingitarek mene fisogo welagik, ikhi logogun lego.

IMAMAT 20:27

Aben ogo hemi nen ogo afuni wa'lagaikha mene inagaimengge inendawimo kuluk hilingitu halok he, it andi huk helep oba pinggi wa'no. Nen, at wa'lasigin andi re at onggwarek aweak oba, ikhe yagaisano iluk,” yagatikhe.

IMAMAT 20:6

Ap ekhe nen it heinogengge afuni wa'lagaikha mene inaheime inom sebeti logolik inane matu meneba komo wene yaganisoageluk inambit lagu halok he, An nen ap andi oba wene fembik at andi An nagainafuri mene werek anggagain lek.

BILANGAN 14:9

Niren it afuni andoma mene elok mabenet fisogoin andi nen he, hiren nineisena Tuhan hinom weim palek welagik, Afuni o andoma welagaikharek mene ninailo, iluk igik, u fugo. It ferinarek welagaikharek mene it herakfisaluk wulifa meneat he, nit nineisena Tuhan enek he, fetninarek ninom mondok werek andi nen he, hinailo agubo,” iluk yagaisasukwa.

KISAH PARA RASUL 13:22

Were'ma re, Allah nen at Saul sebelfuluk he, obali'mo at Daud kain logouwageluk, menfesikhesik wogisasikheat. Wogisasikhesik, wene at faget abok ikhi logolik he, Isai amlogo Daud yi re, an nendawinggen nen hundik mene, an nendawimo nen namolo anggigirek mene hilingisuageluk yagatunem he, mondogat elok hilingiti logogin higi andi nen he, wokhisigi o, iluk yagaisasikhe.

2 KORINTUS 6:16

At Allah awi wurik andi inom, tugwi kembu awi wurik inom, inom misi'mo lambuget fogoin nogo? At Allah eluk mondok welagarek mene awi wurik he, nit ninebe yiaro. Aren he, mel isikhe: ”It inendawimo an nawi wurogo logogin o. An nen it ninom logogin. It ineisena Allah anat logogin o. Nen, an nagainafuri irat logogun o,” iluk isikhe andi nen he,

GALATIA 5:20

tugwi kembuba himbirik logolik hilingitik, afuni ekhe inebe weak asuageluk wesarogo hilingitik, afuni ekhe inom weim palek welagik, heksek welagik, wene palhik, ina'mage horogat welagik, inonggwarek faget enek esinet fakhigik, afuni inebe misigat mene inom huli-huli hilingitik, hek-hek hilingitik,

ULANGAN 9:24

O attagaren an hit hinobabut nelu agaikhe huli nen enggere, hit he nineisena Tuhan ane sagalogo hilingitu mondok welagebo.

ULANGAN 9:7

Hiren o Mesir herakfuluk o leimo afuni inebe lekwe waga lagepsik, pikhit o yoma wagep huli nen, nineisena Tuhan Allah a'mage lagauwageluk hinom weim higit hilingirik wagep a'nogo hinendawimo ebe'ni o.

YOSUA 22:15

A'nogo lagaukwasik he it a'nogo inunggulenu Ruben, Gad, Manasye o Gilead werek mene inom were'ma omanogo asi lagaukwa.

WAHYU 21:8

A'nogo meneat he, it afuni ekhe inailo werek mene inom, Allah ane wanharesigen herakfisagarek mene inom, Allah abit mene hilingitarek mene inom, afuni inoatarek mene inom, pailak fakfisigik, fakfisoageluk hilingitik, agarek mene inom, wesagun anggwelek inoatarek mene inom, tugwi kembu oba himbirik logolik, fogeratarek mene inom, ineranen agarek mene mondogat inom, i laut endu mene yenggelek were'ma, hendali al hangge amben weak mene enu belerang inom amulok nunggu mondok welagare'ma andoma lakfisagain o. Lakfisagain andi re, inebe attak elama faget wa'lasimbigen hobuk wa'lasugun andi aro,” iluk yaganete.

WAHYU 22:15

A'nogo meneat he, it afuni ekhe weak inabit mene hilingitarek mene inom, it wesagun anggwelek inoatarek mene inom, it pailak hilingitik, fakfisoageluk hilingitik, agarek mene inom, it afuni inoatarek mene inom, it inendawinggen tugwi kembu oba himbirik logolik fogeratarek mene inom, it inambeba nen lalinafik, yi mene ti mene hilingiti logolik, lalinafik, agarek mene inebe lombok inom, mondogat o kota andi abel endakwe logogun o,” iluk yaganete.

1 SAMUEL 13:14

Meneat he, At nineisena Tuhan nen yagaheti'lek mene hilingiten andi nen he, hat hebe raja logolik afuni ferinarek logogin mondok lego. We At nineisena Tuhan endawimo nen he, ap hunogo mene ekhe an nagainafuri inoe raja logouwageluk anggikhe mene arat wenagaisogo fikhemo werego,” iluk yagatikhe.

1 SAMUEL 16:1

At Samuel enggi ekhe inom endawimo a'nogo weak were'ma, nineisena Tuhan nen mel yagatikhe: ”Hat Saul faget henggi miren oba hendawimo a'nogo weak logogin nogo? An nen he, at Saul afuni Israel mene inoe raja logogin mondok lek, iluk arat igi lek nogo? Andi nen he, hat yogondak zaitun amusu ekhe wanimbik he, o Betlehem lan o. Lambik, ap enu Isai amlogo ekhe raja logouwageluk arat wenagaisogo figimo werek andi nen he, lan o,” iluk yagatikhe.

1 SAMUEL 2:30

An hit afuni Israel hineisena Tuhan Allah nen attagat wene wathisikhi logolik: Hit hinagainafuri inom, iren tagomangge mene inom, inebe An eisewerek a'luk mondok logogun o, iluk wene warisasigi andi. A'nogo meneat he, afuni An agaugwetnabugun mene halok An nen it agaugwerinafirek, nen inendawimo seramet nobagagu mene halok An nen seramet fisigiregat, andi nen he yogondak An nen wene warisasigi mene andi herakfisagain o.

1 SAMUEL 28:3

At Saul en afuni heinogengge inoba lagaikharek mene inom, wesagun, ”Hobuk yi'nogo hilinglasigin,” iluk agarek mene inom, mondogat afuni Israel mene were'ma logogun lek, iluk mugusogo wulakfisasikhesik oba nen, at Samuel ebe a'nogo wa'lagaikhemo, afuni Israel mene mondogaren fong warogo ebe warek at onggwarek aiba Rama andoma salhukwa andi.