1 SAMUEL 12:17 - Allah Wene Fano Wene Hupla Inane

¹⁷ O yogondak hibi mondok meneat he, an nen samban oba nineisena Tuhan yagasigin mene onggo re, Aren unggunggu ane pakhogo lakfei wesimbik, meiso pelabi wesigin. A'nogo pelabi wagunem hineilenggen hambik, hiren he, Nit ninoe raja ekhe menfogoin ninamolo, iluk kino yagato a'nogo re weagat hilingitoma higi, iluk futfogoin o,” iluk yagaisasikhe.

1 SAMUEL 12:17 ပူးပေါင်းရင်းမြစ်များ

MAZMUR 99:6

At againafuri imam he Musa inom, Harun inom, nen at Samuel he Tuhan oba samban ikhi lagaikhe mene. It andem en he Tuhan enu hombuk palhunem, Aren ane onggo yagaisikhi lagaikhe.

KELUARAN 32:30

Ohealekwe re, at Musa nen it afuni Israel mene mel yagaisasikhe: ”Hiren weak hokho mene hilingitep meneat he, an neisena Tuhan were'ma tom oba lagagin aro. Lagaumo, Aren he, it weak hilingita mene andi An nendawimo fano agarik sagalogo legetfisigi, iluk yaganesigin a? Lega. A'nogo yaganete halok yagahisa pi wesigin o,” iluk yagaisasikhe.

AMSAL 26:1

O hibi werek kwelek meiso wagarek hak, nen o aganhan werek kwelek meiso sogenggen es mene pelaferek hak, andi higit ap kembu mene faget agaugwerinafarek andi re mondogat elo'lek.

YEREMIA 15:1

Tuhan nen an noba ikhi logolik, ”Musa inom Samuel inom ya mendek logolik afuni yi faget hendawirinabin iluk kino yaganesumo mene ogore it inunggulenu yi mene ari An nen nendawirinabu lek hago. An he it kwelagisa re mondok nabit nabi'lagonggere, unggulenu ari mene re hela loakhogo yagaisan o!

YOSUA 10:12

At nineisena Tuhan nen afuni Israel mene inomame asuageluk inomamerinafikhemo, afuni Amori mene inoatukwa andi sambul, at Yosua nen nineisena Tuhan oba ane isikhe, it ap Israel mene ineilhanem Yosua nen ikhi logolik he: ”Hat mo yi. Hebe afuni Gibeon mene inunggulmo higit kamo ino o. Nen, hat tugi re, o Ayalon tonggoma yoma nen lagun o,” iluk isikhe.

1 SAMUEL 12:13

Halok he, yogondak yethani, hiren hinoe raja wenagaisogo fakhegep a'nogo re, ebe yi. Nineisena Tuhan kino yagatepma re, Aren wokhisikhe andi.

1 SAMUEL 12:19

A'nogo inailo hokhorogo agaukwasik, Samuel mel yagatukwa: ”Neisena. Nit ninebe wa'lago hanogo iluk, heisena Tuhan Allahba ayonggo feino. Nit attak weak hilingitugu mene were'ma re, hobuk ninoe raja ekhe menfeinogoluk yagaheto mene andi inomat weak hilingitoma aro, iluk arat futfogo o, neisena,” iluk yagatukwa.

1 SAMUEL 2:10

Neisena Tuhan, hane pogoroba nen unggunggu aneba pak ugunem haselei mene inailo a'luk oak yaleik-taleik ugunem inebe mondok wolelenggen tagalogo inosigin o. Hat neisena Tuhan nen afuni kweangma mene mondogat wene inoba figik, kotik, igin mene, at ebe kain enupogot asuageluk wendeberogo menfesigin mene andi, omame wogetunem ungguloak uan asigin o,” iluk Allah fogeratikhe.

1 SAMUEL 7:5

A'nogo hilingitunem, at Samuel en he, mel yagaisasikhe: ”Hit hinunggulenu Israel mene mondogat o Mizpa andogosi we'no o. A'nogo andogosi wagunem, an nen hit faget nineisena Tuhan ayonggo fagain o,” iluk yagaisasikhe.

1 SAMUEL 8:6

A'nogo yagatukwa meneat he, iren kino isukwa mene andi, at Samuel endawimo weak agaikhemo, samban oba nineisena Tuhan yagatikhe.

1 SAMUEL 8:7

A'nogo yagatikhemo, Tuhan nen onggo yagati logolik he, ”Iren hat inoe raja logogin inabiren ili'lagwi fuk. We, Anat inoe raja logogin inabiren ili'lagwi o. Ma re, iren kino yagaheta mene andi mondogat inane hesanggo holino o.