1 PETRUS 3:4 - Allah Wene Fano Wene Hupla Inane

⁴ Athe, hinoba fanorogo re, hinendawinggen faget hinago mene andi wanhi logoino. Andi re, hinobabut mondok logogin mene enago welagik, lioksek welagik, ikhi logoino o. Hinobabut Allah eilhanem a'nogo hilingitunem, at endawimo nen fano mondok anggikherek he andi aro.

1 PETRUS 3:4 ပူးပေါင်းရင်းမြစ်များ

MAZMUR 131:2

An nendawinggen mondok hambuksek logolik alokhogo welagi. Omalik fou mene eilak naluk afe pulakhogo agaisa agoba wenggik welagarek andi hak hilingik welagi.

MAZMUR 147:6

Afuni sebelogo fisagarek mene re Aren legeisogo fisikherek, oba nen he afuni inobabut weak mene re sebelogo kweangma pelaginaferek.

MAZMUR 149:4

At Tuhan nen he againafuri faget endawimo agaiyek anggili'lago, Aren he afuni inendawinggen sebelfakhagarek mene inoba re inenu werek mene hilingfisikherek.

MAZMUR 25:9

It afuni inendawinggen sebel fakhaluk hilingitarek mene re Tuhan nen halogo woginarek nikherek, nen iren he At endawimo anggikherek mene hilingiti logouwageluk yagaisikherek.

MAZMUR 45:13

It afuni o Tirus mene nen he, hat hobaget yi mene ti mene waluk kabogesi waga logolik, it inenggi werek inaben he hat hendawinggen wanugun iluk hilingisugun o.

MAZMUR 51:6

Hat hane sagalogo weak hilingiti o, Hane sagalogo figirik Hat helokhoma weak hilingiti o. Hat hendawimo weak anggikhi lagen meneat, heilhanem weak hilingitimo aro. Haren wene noba fegen andi re, fou higit obaat noba fegen o.

YESAYA 11:4

Ap inenggi lek mene re inawene heirogo palinafik, afuni inamu nen hilingisu elo'lek mene inebikhit a'luk leberisigik, ikhi logogin. Ap weak hilingitu mene re At ane miming oba unggum wogisigik, Nen ap inobaharoba nek hilingitarek mene re inebe inoatik, ikhi logogin.

YESAYA 29:19

Ap inenggi lek mene inom, li'norinafarek mene inom he Israel mene ineisena Mondok Horek mene a'nogo nen inagaiyek hoageluk wogisikherek mene a'nogo hogoin.

YESAYA 57:15

Andi re At Allah Lego Mondok logolik Amu Horek were'ma, mondok-mondok faget Enu legeisogo fagarek mene a'nogo nen yi'nogo ikhe, ”An nebe re obalik mondok legoma hore'ma po'lima welagi o, oba nen he, ap inendawinggen sebelfakhaluk hilingitarek mene inom, inaweak faget inendawi warili'lagwi mene inom, inagaiyek lek were'ma ambotkwe inagaiyeget figik, inobakhe palek were'ma inelugerinafik igirego.

YESAYA 61:1

Tuhan Lego Mondok welagarek mene a'nogo omame re an noba werek. Aren an wenagaisogo nobagaikhesik la'nobagai waga andi re afuni inelagaik mene inoba wene fano wene yagaisigik, afuni inendawimo warugu welagaikharek mene andi fanorinafik, afuni hele warek welagaikharek mene inoba re weak-weagat hele fikhalogo telhinabigin o, iluk yagaisigik, nen afuni ekhe o hele warek fisagare'ma andoma welagaikharek mene inoba re, hobuk fikhalogo hinobagagin o, iluk yagaisigik, uagaluk laknobagai waga o.

YEREMIA 51:59

Raja Zedekia a'nogo onggwarek ebe faget kagalek nugu mene iluk he at Seraya hun Neria amlogo hun Mahseya omba a'nogo welagaikhe. At Zedekia raja Yehudaba werek kwelek enek tahun enggaminogonek mene were'ma re at Seraya a'nogo Zedekia inom o Babel lagaukwa. Ma re an nen at oba yabu hilingisigin mene iluk ekhe wogoti.

MATIUS 11:29

An nasungge kwalek su a'le sakhore'ma re, fano kwalogo wokhisamo se weagat hogoin andi nen he, hinomoloba waluk, an nobabut enago logolik inawe a'ma hak welagirek a'nogo furogo yagaisilik nikhi logoino o. A'nogo nikhi logogun halok, hinendawinggen hambuk igin o,” iluk yagaisasikhe.

MATIUS 21:5

”Afuni o Sion mene yagaisikhi logolik he, Hinoe Enupogot hinoba weri'logo o. Obabut enago logolik, wam keledai amboroba hu'lagasik, keledai eak mene nen waluk weri'logo, iluk yagaisan o,” iluk isikhe andi emberek higithogo hilinglasuageluk, at Yesus nen a'nogo lakfisasikhe andi.

MATIUS 23:26

Hit ap Farisi mene hineilenggen mondok mum mene yi ri! Hinagaiwak andi elonggoma tak fanorogo sobalinio. A'nogo hilingitep halok he, endakwe elok sobalasigin aro. Hit weak hilingiti lagep mene andi Allah nen weaget hinabigin o.”

MATIUS 5:5

Nen, afuni inobabut enago mene andi, Allah nen o abok yaganisasikhe mene andi irat eise asugun andi nen he, inendawimo inagaiyek hikhi logouwak.

LUKAS 11:40

Eige! Hit andi hinebe kembu hilingiti lagep. Ninagap endakwe hilingisogo ninobagasikhe mene nenat, ninendawimo hilingisogo ninobagasikhe lek nogo? At Allah nenat hilingisogo ninobagasikhe anggigi.

LUKAS 16:15

A'nogo isukwama re, at Yesus nen it yagaisikhi logolik he: ”An higit hilingiti lagi, iluk afuni ineilhanem hinobabut higit mene hangge hilingiti lagep. Meneat he, Allah nen hinendawinggen mondok elu o. Yi mene ti mene it afuni nen fano iluk esinet fisagarek mene andi re, at Allah mondok abiro.”

ROMA 1:23

Inendawinggen mum agaikhesik he, Allah ebe fili agarek lek mene, fogerasu mene andi herakfisaluk he, obali'mo re, fili agarek mene inenggi nen afuni-afuni hilingisogo figik, sue-sue hilingisogo figik, wam-wam, paik-paik, mene-mene hilingisogo figik, kisu-kisu hilingisogo figik, iluk he, fogeratarek andi.

ROMA 2:29

Afuni Yahudi eberogoat mene re, ”An nebe Yahudi mene nagap nenggalimo mene palek welagi,” iluk suesinggaba lisu palogo fagarek andi faget fuk. Lego. We, inagap palek ebe mene re, inagap inenggalimo mene palu hak, Allah Areagun en inendawinggenma mene horogo wulaferek andi aro. Afuni inendawinggen a'nogo horek werek halok he, afuni ekhe nen fogerinafarek lek. We, at Allah nenat fogerinaferego.

ROMA 6:6

Nit ninobabut ninetogat logolik weak hilingiti lagagu mene andi herakfisoageluk he, Yesus eba menfuluk ninomat ninoatukwa andi nen, nit ninobabut attak mene andi amingmingengge logogun lego, iluk ninelu.

ROMA 7:22

An nendawimo nen he, ”Wene Allah nen komotninafikhe wene andi fano,” iluk anggigirek meneat he,

2 KORINTUS 10:1

An Paulus Kristus obabut fano enago a'nogo obabut waganogo, nonggwaregen wene ekhe komothinabik. It ekhe nen he, ”At ebe horokhogo ninom logolik he, obabut liokhogo wene yaganisikherek. Meneat he, ebe yatma logolik he, obabut ailo lek ninghogo yaganisikherek,” iluk agarek mene a'nogo hobuk hinoba wesimbik nailo legat nane ninghogo yagahisigi hanogo iluk, futfobagaigen nane liokhogo yagahisigi. It andi nen he: ”Paulus lak andi re, afuni inobabut inetogat logolik hilingitarek mene andi inobabut waganogo hilingiri'lagwi,” iluk ninabok weak pali'lagwi mene andi, nobabut nailo lek nane ninghogo wenagisa wesigin iluk menenei ebeti lagi.

2 KORINTUS 4:16

Andi nenat, ninendawimo puk a'luk herakfisigi'lek ninghogo hilingiti lago. Ninagap endakwe yi re, weagagu kwelegat he, ninendawinggenma re, hundik-handik ket hilingninafu mondok werego.

GALATIA 5:23

inendawinggen sebelek welagik, inonggwaregen komorogo welagik, agarek andi aro. Inobabut a'nogo hilingitunem, wene ekhe inoba fagarek nogo? Mondok lego.

EFESUS 4:2

Hit-hit nendawi-hendawirogo leberisigik, hundik-handik hinendawinggen sebel fakhaluk welagik, hinobabut enago welagik, hinafe morogo welagik, ikhi logoino o.

KOLOSE 3:12

Hit hinebe Allah nen wenagaisogo onggwarek faget fakhasikhesik he: ”An nonggwarek nagainafuri o,” iluk endawirogo welagarek andi. Halok he su ket mene labetarek hak, hinobabut yi mene wanino. Inebe inendawirinafarek mene andi inom, inobabut enago welagaikharek mene andi inom, inonggwaregen fogerakhigi'lek inendawinggen seberogo welagaikharek mene andi inom, inobabut liokhogo hilingitarek mene andi inom, inafe morogo welagaikharek mene andi inom, hinobabut andi mene wanino.

1 TESALONIKA 4:11

Niren attak yagahisasugu hagat, hinafe morogo logolik hinonggwarek hinenggi nen helikhi lagep mene andiat esinet fikhi logoino.

2 TESALONIKA 3:12

Niren he, afuni hit mene inobabut a'nogo hilingiri'lagwi mene andi, ineil lomborogo logolik, inonggwarek inenggi nenat yabu waganogo inamburu meneat ninggi logouwageluk ninoe Enupogot Yesus Kristus ninom hundik logolik, aren ikherek mene inendawimo kagalogo komorinafo andi.

2 TIMOTIUS 2:25

A'nogo yagaisugunem, it afuni ekhe nen at ane sebeluogeluk ugunem, aren ane liokhogoat komorinafi logogin. A'nogo komorinafunem, it weak hilingitarek mene herakfisaluk, ebe wene andi wanuageluk, Allah nen inendawimo kagaluago, iluk komorinafi logogin.

TITUS 3:2

It Allah againafuri andi nen he, afuni ekhe inabok weak palhi'legat, inane puk weak wenagisigi'legat, it ekhe nen inobabut enegat futfisoageluk afuni mondogat faget inobabut enago liokhogoat hilingiti logouwageluk komorinafi logoinoaro.

YAKOBUS 1:21

Andi nenat, yi weak ti weak inenggali lek hilingirik nikhi lagep mene andi herakfisigik, weak hokhorogoat hilingirik nikhi lagep mene andi herakfisigik, ikhi logoino o. Wene fano wene Allah nen hinendawimo awi yagaisogo fikhe mene andiba elok telhinabigin andi nen he, at awe a'ma kuluk, aren wene hinendawinggenma kagali'logo mene andiat wanhi logoino o.

1 PETRUS 1:23

Allah nen hobuk takhinafikhe andi, afuni wa'lagaikharek mene nen taginafarek andi hak takhinafikhe fuk. We, Allah eluk mondok logolik ane lek agi'lek logogin meneba takhinafikhe o.

1 PETRUS 3:15

Hiren he, Kristus agaugwerati logolik, ”Ninoe Enupogot aro,” iluk hinendawinggen oba nen fogerati logoino. Fogeratunem, it ekhe nen heinok hinoba wokhisikhi logolik he, ”Fano asigin, iluk oba eberek welagep andi nenahalok,” iluk yagahisugunem he, onggo wene furogo yagaisogoin mene hinendawimo eberek mondok logolik,

1 SAMUEL 16:7

A'nogo anggasikhe meneat he, At nineisena Tuhan nen Samuel mel yagatikhe: ”At ari ebe An nen wenati mene re lego, andi nen he hat hendawimo nen ebe fano, oakhuse uan andi nen ebe yiat higi, iluk anggagun o. Afuni re, inagap endakwe nek isagarek meneat he, An he, inendawinggenma isigirego,” iluk yagatikhe.