Eberewu 13:7 - Mazu Otchena a Mulungu

⁷ Kamudiwalege mawendelo a andimuwinyu anno kauwandenleni mazu a Mulugu. Inafwanela eto mwahadiwale makalelo anafuna atu gomela zela mawendelo ewa, na nyenne musazihe nroromelo ninna atu.

Eberewu 13:7 ပူးပေါင်းရင်းမြစ်များ

Matewuji 24:45

Yesu ohowongagave eraga: <<Kodi namalaba ororomeleya eto owendjela guvi? Gwenno unakwakwaneliheda mabasa uvahediwe liye na patarawu waye ira aaing'anelege anamalaba afwaye eto aavahege jodja jiwa ora yakwakwana.

Lukaji 12:42

Nabwiya ohowongagave eraga: <<Kodi musogolrelri ororomeleya eto owendjela guvi? Gwenno uni agavahediwe mabasa na patarawu waye ira aaing'anelege anamalaba afwaye eto ira aavahege jodja jiwa oriwa yakwakwana, airagana nnga mwarumiwe liye.

Lukaji 5:1

Siku nimohi Yesu ohodowaga imela wandamela ntiya na Galileya. Agali wewule anamwindji kohozaga kafinyanaga vali liye vale ira kavwe mazu a Mulugu.

Lukaji 8:11

Yofwalrafwaniha yawonga miyo, yotapulela iwa tchi ila. Mbewu nnazaliwa ba mazu a Mulugu.

Joira ja Anamarumiwa 13:46

Evale Pawulo na Barnabe kohowonga molimbiha murima kaawakulaga aJudewu ale keraga: <<Kavuruwanani. Yohofwanela nyo aJudewu mukale arandji vwa mazu a Mulugu ala. Mbwenye voira peno nyo munatukula mazu, nyo helaga vammambalo, nyo vionihedaga nnga atu ohofwanela kana ingumi yohomala, hiyo peno eni nnouhiyani ira nidowe naalaleyege atu ohokala aJudewu!

Joira ja Anamarumiwa 14:23

Mwatene mwavira atu, muwari mwa kada nikuru na atu omuroromela Yesu aPawulo koasakulra aansiyawu ira kasogolrelrege. Koalobelela eto kojejuwari kaavahedaga mmandani mwa Nabwiya wenno kamuroromela atu.

Joira ja Anamarumiwa 4:31

Kagamanle lobela, nimburo nagumanne atu nohotekenyeyaga, atwale zaleliwa Munemba Otchena. Kuma evale kodowave kalaleyaga mazu a Mulugu molimbiha murima.

Roma 10:17

Fwanyeya ira nroromelo nnakumela muwari movwa mazu. Mazuwa, ba mazu zela Kiristu.

1 Korinto 10:13

Xixiwa unaxixiwa nyo, na atu atene anaxixiwa na makalelo amohive. Mulugu mbwenye gororomeleya, liye kanauhiyani ira muxixiwe na makalelo ohowanda nyo vilela mbwenye muwari moxixiwa mule, Mulugu unerege uvahani makalelo anafuna nyo xolra xixiwa ule ira muwande vilela.

1 Korinto 11:1

So nnafuna mudisazihege miyo, nnga nnamusaziha miyo Kiristu. Mwilamboni mwa Korinto wanle mohokala iwendelo yalimo. Muhiyana ainga mpalra, awendaga aoneya ira gu puta. Mbwenye muhiyana apota murwaye, awendaga okana ionihedo yotonyiheda ira ukana mamunaye unanvwelela liye. Akala muhiyana wa mudiye, na liyene ohokana makalelo asakanyeda liye murwaye ira kamuona, kavayele iziwa ira gu mudiye. Ku wonga na makalelo asakanya muhiyana nsisi naye, nari makalelo apota liye murwaye, mutu ovayela iziwa ira muhiyanola goteliwa, owu hehi gu puta, owu hehi gu mudiye. Eto zela alombwana, mwilamboni mwa Korinto wanle, mulombwana akana nsisi nolapa, nsisi naye nne nomunyaswiha. Navwa mazu a 1 Korinto 11:2-16, inakala nnga muwari mwa ahiyana omuroromela Yesu kafwanyeya Korinto, amohiwa kaumbuwela ira hiyo nili muUmweneni mmohive na amamunihu. Hiyo atene nnamuhara Kiristu bahi. Jopota muru kajinna mabasa. Evale Pawulo ohokana mazu awonga liye muwari moakokomeza ahiyanale.

1 Korinto 4:16

Muwari mokala babinyu, miyo nnoukokomezani nyo anaga ira mudisazihege miyo vano babinyu.

Filipo 3:17

Abalaga inafwanela nyo mwatene musazihege makalelo anna miyo. Inafwanela eto mwaaing'anege atu owenda na makalelo nnga anawendana hiyo ira mwaasazihege.

1 Tesalonika 1:6

Eto nyo mwaganionne, muhuwanda nisaziha hiyo eto muhuwanda musaziha Nabwiya Yesu. Tchoira muwari mwa makatamiho madjindji, nyo muhuwanda watchela mazu a Mulugu eto muwari mwa Munemba Otchena, muhuwanda hagalala zela mazu muvwile nyo.

1 Tesalonika 2:13

Eto muselu mmohiwa nnamutamaleletchana hiyo Mulugu tchoira nagawongile mazu a Mulugu na nyo, nyo mwagavwile, kamwalramwisile nnga mazu a mutu wa vaheno vene, nari. Nyo muhuonelramo ibaribari ira mazwala ba Mazu a Mulugu. Mazu a Mulugu anno banatchindja joumbuwela ja nyo atu omuroromela.

2 Tesalonika 3:7

Tchoira nyo muhumala iziwa ira tempu yawenda hiyo na nyo, nohokana makalelo ofwanela ira munisazihege, tchoira nagalive na nyo, kanere garati wene,

2 Tesalonika 3:9

Kahi ira hiyo kananna direitu yofuna vahiwa jodja, nari. Hiyo nohokana. So nagali na nyo, nohokana mabasa nalaba hiyo ira niwande gula jodja jehu ira nyo mwahala, muwande saziha makalelo ninna hiyo.

1 Timoteyo 3:5

Tchoira wamuona mutu ahanawanda sasanyeda vande vaye na ahimaye, uiziwe ira liye atukula nikuru na Mulugu, kanawanda wendiha pama.

Eberewu 13:17

Mwaavwelelege andimuwinyu eto murumelege tongiwa na aliwa. Tchoira aliwa banaing'anela minemba denyu nnga atu anafuna za tongiwa vamentoni va Mulugu zela mabasa kalabile atu. Musakanye ira aliwa kawande laba mabasiwa muwari mohagalala hiya muwari moona nyemela. Tchoira aliwa kaona nyemela, yenno mbwenye kinaupindulrani.

Eberewu 13:24

Nnoalondjela eto andimuwinyu atene na atu atene otchenihiwa kali wewo. Eto ale kakuma Italiya anoulondjelani.

Eberewu 6:12

Muwari mokana ibaribari zela yoing'anela inna hiyo, kamunakala atu oimwa mbwenye munaasazihege afwinyu anno anawanda vahiwa japama Mulugu apanganne liye mwasiwa aliwa kohokana nroromelo no vilela.

1 Peduru 4:11

Wenno uvahiwe ira alaleyege, inafwanela alaleyege nnga unalaleya Mazu okumela wa Mulugu. Wenno uvahiwe ira aakamihedege afwaye, aakamihedege muwari mwa kopolo Mulugu unavaha liye. Muiregena jatene jejo ira mwa jatene jinairegena nyo, Mulugu awandege tamaleliwa muwari mwa Yesu Kiristu, wenno unna undimuwa na utongi kala no kala. Ame!

Jowandeliwa 1:9

Miyo mbalinyu Juwawu eto nfwinyu wa mmakatamihoni munafwanyeya nyo, nfwinyu omuroromela Yesu, nfwinyu wa muUmweneni mwa Mulugu, dafwanyeya vasuwa vinaitaniwa Patimu na mwasa olaleya Mazu a Mulugu eto na mwasa omuhidedela Yesu umboni.

Jowandeliwa 20:4

Nomala enne, miyo dohoonaga mipando da umwene, mmipandoni mule mwagagaratile atu. Atwale kagaratile mmipandoni mule kohovahiwa utongi ira katonge. Nomala enne, miyo dohoonaga minemba da atu anno kagwadiwe makohi na mwasa owonga ibaribari zela Yesu vamohi no wonga mazu a Mulugu. Aliwa banno kahamutamalenle besta nne ikwamutu yosema yaye eto nne tchawatchenle sinale ya besta vakoveni nari mmandani mwiwa. Aliwa kohovenyihiwa mokwani, aliwa roma tonga na Kiristu fiyeda yaka 1.000.

Jowandeliwa 6:9

Nomala enne, mwana Nibila nne nohotwavo yofungihana yanetanu. Mwa enne miyo dohoonaga mukukusuni mwa ibuwa minemba da atu kapiwile na mwasa wa mazu a Mulugu na umboni wahidedela atu.