Eberewu 11:7 - Mazu Otchena a Mulungu

⁷ Mwa nroromelo mulombwana Nowe agawandeliwe zela jengo jafuna za ireya, jejo ora yenno jali jahanaoneye, liye muwari momutitimiha no muova Mulugu, ohosema mwadeya ira liye na atu a vande vaye kavuluwe. Muwari moirana eno, Nowe ohagwihana mulandu atu atene kafwanyeya mwilamboni ya vati eto liye kala mutu oing'anela watchela upama wenno unazela muwari mwa nroromelo.

Eberewu 11:7 ပူးပေါင်းရင်းမြစ်များ

Jenesesi 19:14

Lroti ohovenya, dowa awandela akamwenaye anno kafuna atela ahimaye, ira: <<Muvenyemo musidadi mu mwasiwa Yehova tchineneva unoigudjula.>> Mbwenye aliwa kaonne nnga Lroti awonga ipale.

Jenesesi 6:13

Evale Mulugu ohomuwandela Nowe eraga: <<Miyo nnafuna daatolotche atu atene mwasiwa ilambo imala zala irelana ubure. Nona nnafuna daatolotche atu atene vamohi na ilambo ya vati yatene.

Jenesesi 6:22

Evale Nowe ohoirana jatene nnga mwamurumele Mulugu. Jatene jene oharihamo.

Jenesesi 6:9

Ula gu muselu wa mulombwana Nowe. Nowe bahi gwali mutu wapama eto owongowa muwari mwa atu atene a tempu yaye. Liye awendetcha na Mulugu.

Jenesesi 7:23

Vingumi datene da mwilamboni Mulugu ohotimiha roma atu, vinyama, jomburunuwa vamohi na mbalrame dovava zulu. Jatene johotimihiwa mwilamboni ya vati. Nowe ekave gwavuluwile na ale kali na liye mmwadeyani mule.

Jenesesi 7:5

Mulombwana Nowe ohoirana jatene jene nnga mwemo Yehova mwamurumele liye.

Jenesesi 8:16

<<Weyo podi kumamo mmwadeyani vamohi na muhiyanawo, ahimawo vamohi na ahiyaniwene.

2 Amwene 4:5

Evale muhiyanole ohovenyaga vamentoni va Elizewu vale, liye dowa boliha jombwe. Nomala enne, ohozaga, liye volowa mmba mule vamohi na ahimaye, aliwa funga musuwo. Evale ahimaye ale kozana jombwe, liye zalihaga na azeti.

Matewuji 2:12

Mbwenye kahanavenyihane ira kawelele mundulri, kohowandeliwa morohani ira kahawelele wa Erodi. Novwa mazwale, kohogundeya, kaharaga ndila imohiwa, aliwa dowaga waniwa.

Matewuji 24:15

Yesu ohowongagave eraga: <<Nyo mwaza muona yengo yabure yohokala ya masika, yengo yotakaliha Nyumba ya Yehova, yenno yawongile namafiyiheda Daniyeli, yagaimetchiwe Nimburo Notchena, (ule unaileri mazwala, aumbuwele pama tapulela uwa),

Matewuji 24:25

Nona miyo divayelaga uwandelani jengo jiwa jahanaireye.

Matewuji 24:38

Mwasiwa tempu ya Nowe atu kodja, kong'wa, alombwana na ahiyana kotelana, fiyeda siku Nowe avolowile liye mmwadeyani.

Matewuji 3:7

Mwa ora yenno, kohokalawo andimuwa oasogolrelra aJudewu zela ja Mulugu. Amohiwa kali nikuru na aFarizewu, amohiwa kali nikuru na aSadusewu. Mwa enne Juwawu vaaonnege liye adjindji kazaga, kafunaga jobatiziwa na liye, ohovayela asumulula eraga: <<Nyo mulogo wa jivili nyo! Kodi uuwandenleni bani ira mutawe uwali wa Mulugu unafuna za utolotchani?

Lukaji 17:26

<<Jinafuna ireya Mwana wa Mutu ahanaze jinakala nnga jaireyile tempu ya Nowe.

Roma 1:17

Muselu Wapama gunawanda oneyiha makalelo okala wapama vamentoni va Mulugu. Makaleluwa ti nroromelo bahi, maromelo ante magomelo. Kalaga nnga ilrembiwe mMazuni ira: <<Ule uli wapama unokana ingumi mowenda na nroromelo.>>

Roma 10:6

Mbwenye kala wapama muwari mwa nroromelo kunazela moharihamo malamulo. Tchoira Mozeji oholremba ira: <<Kuumbuwele mmirimani mwawo ira: <Unafuna gwela zulu bani?> >> Ku wonga kalivo mutu unafuna mudowela Kiristu zulu.

Roma 3:22

Makaleluwa boira mutu unakala wapama vamentoni va Mulugu muwari momuroromela Yesu. Mutu uli watene unamuroromela Yesu Kiristu, gunakala wapama vamentoni vaye. Tchoira kavali hiyana mwa atu.

Roma 4:11

Mulugu amuwandelaga joineliwa, liye afwanyeya agalive wapama vamentoni vaye. Ineliwa ali ionihedo zela upama wanna liye momuroromela Mulugu. Liye ohoroma muroromela Mulugu ahanaineliwe.

Roma 4:13

Mulugu omuwandela mulombwana Abarahamu na ahimaye a musogolro nipangano naye ira jatene jene jinafwanyeya mwilamboni ya vati jinafuna jikale jewa. Nipangano nne, Mulugu kanvahile na mwasa oira Abarahamu okwakwaneliheda malamulo mbwenye anvahile moira liye okalihiwa wapama momuroromela Mulugu.

Roma 9:30

Nagavwile mazwala, jatene eji jinatapulela avi? Ku wonga atu ohokala aJudewu anne kahavendile kala apama banne kagomenle kala atu apama. Upama wewa uzenle mwa nroromelo.

Galasiya 5:5

Hiyo mbwenye muwari mwa Munemba Otchena, muwari mwa nroromelo, nihikana yodediheda ira Mulugu unoza anifwanye nagali atu apama vamentoni vaye.

Filipo 3:9

eto dikale muwari mwa liye. Ku wonga kadinna upama ozela harihamo malamulo. Upama unafwayeyana miyo peno unazela muwari momuroromela Kiristu. Upama wenno unakumela wa Mulugu eto unawatcheliwa muwari mwa nroromelo.

Eberewu 11:1

Nroromelo ku hawanganyeda jengo jinadediha hiyo vamohi no kana ibaribari zela jengo jejo jahanaona hiyo na meso.

Eberewu 12:25

Polre polre tawiha ira munoza mmukonde wenno unawonga. Tchoira wanle atu anno kamukonda wenne aawendjeliha mwilamboni ya vati tchawandile wombowa. Ki eto nankonda mutu wa ilambo ya zulu unaniwendjeliha, nnafuna niwombowe avi?

Eberewu 5:7

Muwari mwa malambo Yesu awarile liye maningo, olobela no kuwa ulukulu na misodi anvepaga wenno awanda muwombola mokwani. Jalobela liye jovweya mwasiwa liye ohorumela irana jofuna ja Mulugu.

Eberewu 8:5

Anamakuta a mwilamboni ya vati muno jinalaba atu jinakala nnga yofwalrafwaniha, jinakala nnga nfulri wa musasa wa ibaribari unafwanyeya ilambo ya zulu. Tchoira Mozeji afunaga imetcha Musasa wa Yehova, liye owandeliwa na Mulugu ira: <<Uing'ane pama ira uwande sakanya jatene molingana na makalelo duonihile miyo mwangoni uno.>>

1 Peduru 3:20

Minemba dalaleyile liye dile dali dedo dahanvwelela Mulugu tempu ya mulombwana Nowe asakanyaga mwadeya. Ora yenno Mulugu adediheda movilela ira katwaruwe. Atu a vang'ono kafwanyeya mmwadeyani mule atanu na araru bawandile vulumuwa muwari mwa mahindje madjindji kazile.

2 Peduru 1:1

Unalremba gu miyo Simawu Peduru, muzari wa Yesu Kiristu eto namarumiwa waye. Nnoulrembelani nyo mwatene muvahiwe ira mukayena nroromelo nnga hiyo muwari mo wongowa wa Mulugu wehu na Nvulusi Yesu Kiristu.

2 Peduru 2:5

Wanle eto ilambo yohozala atu omutegela Mulugu. Mbwenye Mulugu agaonne makalelo anno, kaakurumuwenle. Ohoruma mahindje madjindji ira aatolotche atu a ilambo ya wanle ale. Mbwenye Mulugu ohowanda mukoya namalaleya wa upama unafwanyeya agali Nowe vamohi na atu amohiwa atanu na ambinli.

2 Peduru 3:6

Vagavirile yaka didjindji, ilambo ya vati ya wanle yaliwo yohomala bwinihiwa na mahindje amohive anne fiyeda tolowa.