Eberewu 1:14 - Mazu Otchena a Mulungu

¹⁴ Nnga kodi angelro bani? Angelro ti minemba. Ba anamalaba anno Mulugu unaaruma liye ira kadowe kaakamihedege atu anne anafuna watchela vulusiwa.

Eberewu 1:14 ပူးပေါင်းရင်းမြစ်များ

Jenesesi 32:24

Mbwenye liye ahanlege mundulri ekave. Evale liye agahanle, ohozaga mulombwana mmohi roma hindana kukutu kukutu na Jako fiyeda unde tcha.

1 Amwene 22:19

Eto mulombwana Mikaya ohowongagave eraga: <<Kavuruwana mazu a Yehova! Miyo dihimuona Yehova agagaratile mpando waye wa umwene eto nikuru natene na zulu nafwanyeya nagali vamohi na liye, amohiwa ikukuru ya muwononi odjana, amohiwa muwononi oromana.

Daniyeli 3:28

Evale mwene Nabukodonozore ohowongaga eraga: <<Atamaleliwe Mulugu wa Sadaraki, Mezaki na Abedenego wenno umurumile mungelro waye, aza aawombola anamalaba aye anno kamuroromenle liye. Tchoira kohofiyeda konda yenno yawongile mwene, aliwa fiyedaga vivelela maningo ewa, hiyaniha no tamalela mulugu mmohiwene ahali Mulugu wewa!

Daniyeli 6:22

Mulugu waga ohomuruma mungelro waye, liye za funga wanoni wa apodogoma. Aliwa kidiirele yabure ili yatene mwasiwa Mulugu kadifwannyena yabure vamentoni vaye. Eto nne vamentoni venyu, so mwene miyo kadisakanyile yabure ili yatene.>>

Daniyeli 7:10

Eto dohomuona muhindje wa munlo akumaga vampandoni vafwanyeya liye vale. Eto vohokala atu matchikwi na matchikwi kamulaba. Eto atu amohiwa matchikwi na matchikwi ohokala a masika kohoimela vamentoni vaye. Mwa enne liye ohogarati ira arome tonga eto malivuru kohuliwa.

Matewuji 1:20

Joze mwa ora yenno yaumbuwela liye zelru dedile, ohokalawo mungelro mmohi eni wa Nabwiya amutwanyuwenlege morohani, liye muwandela eraga: <<We Joze, nkuda Davi, kukukumuwe. Mariya vambani vinna liye jiireyile mwa kopolo da Munemba Otchena. Udowe wamutele, akale muhiyanawo.

Matewuji 13:41

Mwana wa Mutu unoza aarume angelro aye ira kaakumihemo muUmweneni mwaye anne anaategiha afwiwa vamohi na aliba tega.

Matewuji 18:10

<<Kaing'anani! Vari va ahima ang'onong'ono okala ha anna, kammulramwisevo nne mwana mmohi. Mwasiwa miyo nnouwandelani ira angelro ewa zulu ora datene anakala vamentoni va Baba wenno unafwanyeya zulu.

Matewuji 2:13

Andimuwa a toto ale kagadowile, mwa ora ya vang'onove, ohoza mungelro wa Nabwiya muwandela mulombwana Joze morohani eraga: <<Uvenye, umutukule mwanawo na mmayiwa, mutawele ilambo ya Ijipitu. Mwasiwa Erodi tchineneva unafuna anvende mwanawo ira ampe. Mudowe mwakale wewo fiyeda ora inafuna miyo duwandeleni ira muze uno.>>

Matewuji 24:31

Eto liye unoza aarume angelro aye no kuwa ulukulu wa palraza indimuwa. Aliwa kagarumiwe, anoza kaagumanihe atu atene osakulriwa pandi dannayi dene da ilambo, magomelo wa ilambo wu ante magomelo wa ilambo wu.

Matewuji 25:34

Mwa enne mwenole unoza awongege na atu anne anaze kafwanyeyege muwononi waye odjana erege: <Zani, nyo atu orelihiwa na Baba. Zani muwatchele umwene wenno usakanyediwe para nyo roma mapanduwelo a ilambo.

Matewuji 4:11

Evale Diyabo ohovenyagavo. Agavenyilevo, mobaranya angelro kohoza, aliwa kala na Yesu kamukamihedaga.

Markuji 10:17

Yesu avenyihanaga ira adowege muulrendoni mwaye, ohokala mulombwana mmohi orayela atamangile za wa Yesu, liye mukokorela. Agamukokorenle, ohonfuka ira: <<Namafundjiha wapama, miyo ira dikayena ingumi yohomala, dire avi?>>

Lukaji 1:19

Mbwenye mungelrole ohomuwakulaga ira: <<Miyo dili Gabiriyeli, maliba kala vamentoni va Mulugu. Liye gudirumile ira dize duwandele Muselu Wapama wenno unauwandela miyo.

Lukaji 1:23

Evale mulombwana Zakariya malambwaye a mabasa kagamanle, ohovenyihana liye welela vande.

Lukaji 16:22

<<Noira enne, maliba simela Lazaro ule ohokwa. Agakwile, angelro kohomutukula, aliwa mudowana wewo wafwanyeya Abarahamu. Eto vagamanle malambo a vang'ono, mulombwana orayela ule na liyene ohokwa, liye koyiwa.

Lukaji 2:13

Evale mungelrole agawongile enne, kohozaga angelro amohiwa oindjiva, aliwa za gumanela na mungelro nfwiwole, kamutamalelaga Mulugu keraga:

Lukaji 2:9

Morurumutcha mungelro mmohi wa Nabwiya ohatwanyuwela eto moneya ulukulu wa Nabwiya woharungunuwaga anamakumbuza atene anne. Evale aliwa kohokana ova wohokala wa masika.

Joira ja Anamarumiwa 11:22

Mwa enne, nikuru na atu omuroromela Yesu a Jeruzalemu, kohovwa zela jejo jaireyile Antiyokiya ira atu ohokala aJudewu kohorumela mazu a Mulugu. Aliwa kagavwile enne, kohomuruma mulombwana Barnabe ira adowe Antiyokiya ule, aapande.

Joira ja Anamarumiwa 12:23

Aliwa kakuwaga enne, tempu imohive yenne Nabwiya ohomuruma mungelro waye za mporotcha Erodi mwasiwa liye kamutitimihile Mulugu. Evale mbani mwaye mohofiyeda djiwa anamingu, liye mariheya.

Joira ja Anamarumiwa 12:7

Peduru agonaga, morurumutcha ohozaga mungelro wa Nabwiya. Mwa enne mmba mule mohokala moneya. Mungelrole ohomusakwinyaga Peduru nikukuru, liye mururumutcha eraga: <<Kavenya mobaranya.>> Agairile eno, makurenti kaligi mmiwononi mwa mulombwana Peduru kohomoragamo.

Joira ja Anamarumiwa 13:2

Siku nimohi, aliwa kagagumanne, kamutamalelaga Nabwiya, kajejuwarigi, Munemba Otchena ohawandela, liye ira: <<Nnafuna munkumihevo mulombwana Barnabe na Sawulo, mwaarume ira kadowe kalabege mabasaga anno daafunnena miyo ira kalabege.>>

Joira ja Anamarumiwa 16:26

Morurumutcha yohoza indarandara yohokala ya masika fiyeda aliserisi wa kadeya roma inaina. Mobaranya mwene misuwo datene da kadeya dohomala huleya okave. Jomangana jaamangilena atu anyakadeya jile johomala moramo okave.

Joira ja Anamarumiwa 27:23

Tchoira mahiyu ohoza wa miyo mungelro wa Mulugu wenno uli Mbwiyaga unamutamalela miyo.

Joira ja Anamarumiwa 5:19

Mbwenye vari va mahiyu, ohoza mungelro wa Nabwiya, liye hula milango da kadeya, liye akumihamo anamarumiwa ale,

Roma 11:14

ira aJudewu kauonani, kausilrilregeni ira muwari mwa aliba silrilra, amohi katwaruwe ira kavulusiwe.

Roma 13:6

Na mwasa mmohive, inafwanela kada mutu avelelege misoko. Tchoira anamasogolrelra kalabaga mabasiwa analaba mabasa a Mulugu.

Roma 15:16

ira diwande laba mabasa a Yesu Kiristu muwari mwa atu ohokala aJudewu. Miyo nnalaba muwari mwa atu ohokala aJudewu nnga namakuta ira aliwa katchenihiwe na Munemba Otchena ira kakale nnga yovelela yofwanela vamentoni va Mulugu.

Roma 15:27

Atu ohokala aJudewu ale kohoirana mofuna mwewa eto na ibaribari ihikala pama aliwa kaagawele aJudewu omuroromela Yesu ja ilambo ya vati janna atu mwasiwa afwiwale banno kaalaleyile mazu. Voira aliba laleya mazu kohowanda agawela afwiwa ja ilambo ya zulu, yofwanela ira na aliwene kaarelihe afwiwa kasimenle zela ja ilambo ya vati.

Roma 8:17

Muwari mokala ana Mulugu, hiyo nnoza nivahiwe upama unna Mulugu. Nnafuna nigane upama wenno Kiristu uvahiwe liye. Ira nivahiwe upama, unazela muwari mwa goyi nnaona hiyo, malringana nionihiwe goyi nnga goyi daonihiwe Yesu ira vasogolro nize nititimihiwe vamohi na liye.

1 Korinto 1:21

Tchoira Mulugu na zelru daye kafunne ira atu kaiziwe ibaribari mwa zelru dewa da ilambo ya vati. Evale Mulugu opiya zelru ira aavuluse atu anaroromela muselu unalaleya hiyo, muselu wenno atu a mwilamboni anaona atu nnga uzimora.

2 Korinto 9:12

Tchoira mabasala oakamiheda afwihu kinalaba ira atu otchenihiwa kakayena jinaahalela bahi. Analaba eto ira Mulugu atamaleliwege valukulu zela jinaira liye.

Galasiya 3:29

Muwari moira nyo muli a Kiristu aye, na nyenne muli ahima a Abarahamu. Na nyenne munoza mutambilre japama japanganne Mulugu.

Galasiya 3:7

Inafwanela muiziwe ira peno atu atene okana nroromelo banafwanyeya kagali ana Abarahamu.

Galasiya 3:9

Nona sawasawa nnga mulombwana wa nroromelo Abarahamu ohorelihiwa, na hiyene atu okana nroromelo nihirelihiwa.

Efezo 3:6

Yengo yokoyeya yali ira muwari morumela Muselu Wapama, atu ohokala aJudewu anokana yoing'anela imohive vamohi na aJudewu eto anokala jano ja maningo mamohive eto anowatchela nipangano nimohive neno nnafwanyeya muwari mwa Yesu Kiristu.

Filipo 2:17

Masiki ingumi yaga imale, ikutuliwe nnga yovelela ya jong'wa vazulu va mukuto unavelela nyo muwari mwa nroromelo nenyu, nnowanda ziveliwa eto nnowanda hagalala vamohi na nyo.

Filipo 2:25

Miyo eto dihionamo ira ili yofuneya muruma mbalaga Epaforoditu wenno mwamurumile nyo ira aze adikamihede makatamiho danna miyo. Liye eto unalaba mabasa amohive analaba miyo eto unawana kondo imohive inawana miyo.

Titu 3:7

Mulugu uhunikaliha pama vamentoni vaye muwari mwa sayi daye ira vasogolro niwande za tambilra ingumi yohomala yenno inaing'anela hiyo.

Eberewu 10:11

Muwari mwa Yopangana ya Wanle, malambo matene anamakuta anadowa imela vamabasani viwa, aliwa velelaga mikuto dimohive dedo dahanawanda maliha jotega.

Eberewu 2:3

Akala wenno alramwisa mazu kawonga angelro wanle ohofiyeda tongiwa, nnga nalramwisa mazu azilena Nabwiya Yesu tchineneva ozela makalelo apama onivulusa, nnafuna nivulumuwe avi? Kavinawandeya. Fwanyeya ira aromile laleya Muselu Wapama onivulusa ali Nabwiya Yesu. Ale kavwile na Nabwiya Yesu banilaleyile hiyo, aliwa nivaha ibaribari.

Eberewu 5:9

Agamanle onihiwa goyi dile, liye okala mutu okwakwanela, wenno unawanda avulusa kala no kala atu anno ananvwelela.

Eberewu 6:12

Muwari mokana ibaribari zela yoing'anela inna hiyo, kamunakala atu oimwa mbwenye munaasazihege afwinyu anno anawanda vahiwa japama Mulugu apanganne liye mwasiwa aliwa kohokana nroromelo no vilela.

Eberewu 6:17

Nona Mulugu na liyene ira awande aoniha ale kafuna watchela nipangano naye ira mwa ibaribari jofuna jaye kajinatchindjeya, agawongile nipangano naye, liye eto ohowendjeda yolumbela yaye.

Eberewu 8:6

Eto fwanyeya ira Kiristu mabasa uvahiwe liye bokwaranya mabasa kalaba anamakuta a wanle, sawasawa nnga yopangana ikungile Kiristu vari va Mulugu na atu tchapama kwaranya Yopangana ya Wanle. Tchoira yopangana inalabana Kiristu isakanyiwe na mapangano apama kwaranya mapangano a Yopangana ya Wanle.

Eberewu 9:28

Kiristu ukwile fendo imohi bahi ira awatchele jotega ja atu oindjiva. Liye unoza aze akoka. Mbwenye za waye wanembinli kahi ira unazela awatchele jotega. Azaga fendo yanembinli unazela ira aavuluse atene anno anamudediha mohagalala.

Tiyagu 2:5

Abalaga anaaziveliwa miyo kavuruwanani. Mulugu ohasakulra atu osimela a mwilamboni ira kakale orayela zela kana nroromelo eto ira kakale ofuna watchela Umwene wa Mulugu wenno alumbenle liye avaha anno anamuziveliwa.

1 Peduru 1:12

Evale Mulugu ohowanda aoniha anamafiyiheda ale ira: <<Jejo jafiyiheda nyo kajinalaba tempu yenyu mbwenye jinafuna jize jaafwanye atu amohiwa sogolro.>> Atu a sogolro kawongiwa gu nyenne. Tchoira muwari mwa kopolo da Munemba Otchena wenno ukumenle zulu, kohokalawo kazile ulaleyani ibaribari zela japama jawongiwa wanle, aliwa ulaleyani Muselu Wapama, jejo jinavenda angelro ira kaiziwe.

1 Peduru 1:4

Liye ohonibala akoka ira nize niwatchele mareliho ohowanda vunda, ohowanda takalihiwa, ohoduwa anno Mulugu uukoyenleni liye ilambo ya zulu.

1 Peduru 3:7

Eto na nyenne alombwana mutenle, inafwanela mukalege vamohi na ahiyaninyu mmavande mwinyu mwa zelru. Tchoira aliwa makalelo kanna atu ba makalelo ovuta kwaranya makalelo munna nyo. Nona inafwanela mwarihedege ahiyaninyu mwasiwa na aliwene anafuna kawatchele ingumi yohomala mwa sayi vamohi na nyo. Inafwanela muiregena jatene eji ira jolobela jenyu jiwandege vweya.

Judaji 1:14

Zela aliwa, mulombwana Inoki mutu wanetanu na mbinli okumela wa Adawu ohofiyiheda ja Mulugu awongaga zela tongiwa wa atu anno eraga: <<Kaing'anani. Nabwiya unoza vamohi na atwaye otchena matchikwi na matchikwi

Jowandeliwa 5:6

Vevale miyo dagaing'anne, dohoonaga mwana Nibila nagali vari va mpando wa umwene vale, vevo vawereweriwe na vinyama nnayi da ingumi vamohi na andimuwa 24 ale. Mwana Nibila nne naoneya nnga mwana nibila napiwe amala nivenya mokwani. Mwana Nibila nne nohokana manyanga matanu na menli vamohi na meso matanu na menli anno anafwanyeya kagali Minemba mitanu na minli da Mulugu, dedo Mulugu urumile liye mwilamboni mwatene ya vati.