Daniyeli 9:26 - Mazu Otchena a Mulungu

²⁶ <<Magomelo wa sumana 62 dile, wenno usakulriwe na Mulugu ule unopiwa, agomeleve eno. Era eno ukalawo mwene unafuna za vamohi na nikuru naye na anyakondo, aze abwanyule sidadi yatene vamohi na Nyumba ya Yehova. Mbwenye goma waye unoza umuzele nnga za wa mahindje madjindji. Inoza ivenye kondo vamohi na jobwanyula jatene Mulugu amanle liye balra ira azena mwilamboni, fiyeda makutulo.

Daniyeli 9:26 ပူးပေါင်းရင်းမြစ်များ

2 Samuweli 21:5

Evale aliwa kohowakulaga keraga: <<So mbwenye nnafuna mwaatukule alombwana atanu na ambinli muwari mwa ahima a mulombwana Sawuli wenno avendetcha jonitolotcha ira nahawande fwanyeya mwilamboni mwa aIzarayeli, ira hiyo nidowe naamangelele, aliwa kakwe vamentoni va Yehova Jibeya wewo wakala Sawuli, wenno asakulriwe na Yehova!>> Evale mwene Davi ohowakulaga eraga: <<Kavali makani, miyo nnouvahedani!>>

Izaiya 28:2

Kaing'anani, Nabwiya umukana mutu waye olimba eto wa kopolo. Mutu wenno uli nnga za wa maralaza eto nnga nipevo nononga jengo, eto nnga za wa mahindje madjindji obwanyula jengo. Unoza aagwihede aliwa vati na ndanda naye.

Izaiya 28:22

Nona nyo kamupetege mazu anna. Tchoira mwapeta, makurenti enyu oumangani anoza kalimbihiwe mokwaranya. Tchoira miyo dihivwa tonga wa Nabwiya Yehova wa Makuru Matene atongaga ira ilambo yatene itolotchiwe.

Izaiya 53:8

Kohomuhinda mwa uwali, kammangaga mulandu ira apiwe. Mbwenye muwari mwa atu afwaye, kalivo ambalra. Liye ohokumihiwa mwilamboni mwa atu okalawo, ohoonihiwa goyi na mwasa wa jotega ja atwaga.

Izaiya 8:7

Na mwasa wenno Nabwiya unoazeliheda mwene wa Asiriya. Liye unoza aze na anyakondwaye, kaze kawane na aJuda. Liye unoza nnga xeya, nnga muhindje Eufarati, kaze kagumule ilambo wu ante wu.

Daniyeli 11:10

Mbwenye ahima a mwene wa norti anoza kakozeye ira kadowe kawane kondo. Anoza kagumanihe nikuru na anyakondo ohokala a masika. Evale anyakondo ale anodowa kavire ilambo ya suli. Eto kagadowile wewule anobwanyula jatene nnga jinaireya na mahindje kabwanyulaga, kavire fiyeda nimburo nolimba notawelamo na mwene wa suli.

Daniyeli 11:17

Eto mwene wa norti unokana yofuna ira aze aaimelihe anyakondo atene a umwene waye ira kawane na akuda suli. Evale unosakanya yopangana na mwene wa suli, anvahe mwanaye ira amutele muwari mofuna gondjiha umwene wewa. Mbwenye yopangana ile kinadibeliwa eto kinamulabela yengo.

Daniyeli 11:22

Liye agatukunle umwene, unerege atamangiha vamohi no agondjiha makuru a anyakondo anno anafwanyeya kagali amwidanaye eto unomugondjiha musogolrelri wa yopangana.

Daniyeli 11:36

<<Mwene wa norti ule unoza airena yenno inafunege liye. Liye unerege wonga movitukulela ira: <Eni miyo dili vazulu va amilugu atene.> Eto unerege wonga mazu abure zela Mulugu wa amilugu atene. Jatene jaye jinerege muwendela pama fiyeda Mulugu amutonge na uwali waye. Tchoira yenno ibalrile Mulugu inoireya.

Daniyeli 9:27

Mwene muxole agazile, unosakanya yopangana yaye yolimba na atu adjindji fiyeda sumana imohi. Mbwenye vamala metadi ya sumana ile, liye unomaliha mikuto na jovelela ira atu kahavelelege Nyumba ya Yehova! Eto unotukula yengo yabure yohokala ya masika, yengo yotakaliha Nyumba ya Yehova, aimetche muNyumbani mule. Yengo yotakaliha ile inokalave eno fiyeda Mulugu amutonge mwene ule na uwali waye nnga mwamanle liye balra wanle.> >>

Matewuji 22:2

<<Umwene wa zulu unafwalrafwana na mwene mmohi asakanyile pwando ya matelo para mwanaye wa mwanapongwe.

Matewuji 22:7

Mwenole agavwile makalelo anne, ohotakaleliwaga, liye aruma anyakondwaye ira: <Mudowe, mwaape apanga anno kaapile anamalabaga.> Kagamanle apa atwale, kohotumeya sidadiwele.

Matewuji 23:38

Mwa eno, nyumba yenyu inoza ikale vadebe.

Matewuji 24:2

Yesu mbwenye ohawandelaga eraga: <<Kodi nyo peno va kamunaona jatene jeji eni? Mbwenye na ibaribari nnouwandelani ira vasogolro veva kavali nibwe nnafuna za kala vazulu va nibwe nfwaye. Jatene eji jinomala bwanyuliwavo, kavinahalave yengo.>>

Markuji 13:2

Evale Yesu ohomuwandelaga ira: <<Akala weyo unaona nyumba dapama di peno va, vasogolro veva kavali nibwe nnafuna za kala vazulu va nibwe nfwaye. Jatene eji jinomala bwanyuliwavo.>>

Markuji 13:7

Eto mwavwa ja kondo, na ja fe fe fe ja kondo, kamukukumuwe, mwasiwa ili yofuneya ira ejo jiireye. Mbwenye mwaona ejo jiireyaga kahi ira ku magomelo nari.

Markuji 9:12

Liye ohorumela ira: <<Na ibaribari murandji za unakala Eliya ira asakanyede jatene. Nnga mwasiwa gwa nni Mazu kawongaga ira: <Mwana wa Mutu unoona goyi yohokala ya masika eto unolramwisiwa.>?

Lukaji 21:24

Atu adjindji anoza kapiwege na masupada eto amohiwa anoza kahindiwe, katukuleliwege vilambo datene dene. Eto atu a unde anoza kamunyingalelege Jeruzalemu fiyeda tempu yewa imale.

Lukaji 21:6

<<Anoza kafiye malambo ira jatene jinaona nyo ji jibwanyuliwevo. Kavali nibwe nnafuna za kala vazulu va nibwe nfwaye.>>

Lukaji 24:26

Kodi nyo kamunonile ira yali yofuneya ira Namatikeliwa aonihiwe goyi dedo, amala avolowe muwari mwa undimuwa waye?>>

Lukaji 24:46

Ohawandelaga, liye ira: <<MMazuni muhulrembiwa ira Namatikeliwa unoonihiwa goyi eto siku naneraru unovenyihiwa mokwani.

Juwawu 14:30

<<Miyo tchineneva kannakana tempu ira diwongegeve jidjindji na nyo mwasiwa mwene wa ilambo ya vati unaza. Liye mbwenye kanna utongi ozela miyo.

2 Korinto 5:21

Ira nikale pama, Mulugu amukalihile wenno ahaiziwile yotega ira akale mutu otega ira muwari mwa liye, hiyo niwande kana upama wa Mulugu.

Galasiya 3:13

Kiristu uwandile niwombola ira nahatembelrelreye zela hakwakwaneliheda wehu malamulo. Liye ohoniwombola muwari motembelrelreya vamalroni vehu. Kalaga nnga ilrembiwe mMazuni ira: <<Otembelrelreya gu mutu wenno unatomeyiwa vaimirini.>>

1 Peduru 2:21

Mwasiwa nyo muitaniwele ira muze muonihiwe goyi dedo. Tchoira Kiristu na liyene ohoonihiwa goyi dohokala da masika na mwasa wa hiyo vano. Airaga eno, anihiyeda yofwalrafwaniha ira niwandege hara manyalo aye.

1 Peduru 2:24

Liye mwinnya atomeyiwaga vaimirini, ohotukula jotega jihu mmaningoni mwaye. Airaga eno, airela ira nikale okwene zela jotega mbwenye ingumi yehu ikale para niiregena upama. Nyo muhuvulumutchiwa na mwasa wa vilonda daye.

1 Peduru 3:18

Tchoira Kiristu na liyene ukwile fendo imohive ira atimihe jotega jihu jatene. Masiki liye alive mutu wapama ahategile, ohoonihiwa goyi zela jotega ja atu abure ira awande nizana wa Mulugu. Liye akwile mwa maningo, mbwenye ohovenyihiwa mwa Munemba.