Daniyeli 11:45 - Mazu Otchena a Mulungu

⁴⁵ Kapamento yaye ya umwene unadowa akunge wu bara Mediteraniyo, wu mwango Otchena okana undimuwa, vari viwa. Mbwenye goma waye unoza unfiyele eto kanakalavo mutu unafuna za mukamiheda!>>

Daniyeli 11:45 ပူးပေါင်းရင်းမြစ်များ

Izaiya 10:12

Nabwiya agamanle aoniha goyi atene anakala Siyawu na Jeruzalemu, liye eto unoza amutonge mwene wa akuda Asiriya na mwasa wa jowonga jovitukulela jikumile mmirimani mwaye eto na mwasa oviulukuliha wairile liye na meso aye.

Izaiya 11:9

Kaviza vikala yengo yoporotcha owu yengo yomunonga mutu va mwango otchena watene wa Mulugu, mwasiwa atu atene a mwilamboni ya vati makalelo anafuna atu muiziwa Yehova anokala nnga makalelo mahindje anazala atu bara.

Izaiya 14:13

Weyo wawongetcha na mmirimani mwawo ira: <Nnafuna digwele zulu, dagarati mpando waga wa umwene vazulu va nyenyedi da Mulugu. Nnoza dikale vampandoni zulu. Nnoza digarati mwangoni unagumana anamwindji, pandi ya norti.

Izaiya 2:2

Malambo ogomiheda Mwango wa Nyumba ya Yehova unoza avenyihiwe ira akale otama kwaranya mwango datene eto unoza akale vazulu va mikuma datene. Malogo matene a atu anoza katamangele Mwangoni wa Yehova wewo.

Izaiya 27:13

Siku neno palraza ilukulu inoza iimbiwe, yaaitanaga aIzarayeli atene kadimenle mwilamboni mwa Asiriya eto katamangihiwe ilambo ya Ijipitu. Aliwa anoza kaze kamutamalele Yehova va mwango otchena unafwanyeya Jeruzalemu.

Izaiya 65:25

Mwanambwa wa mukokolani vamohi na mwana nibila anoza kadjege mpinda vamohi. Eto podogoma unoza adjege mpinda nnga ng'ombe. Eto tumbulru nnoza nikaleve yodja ya nyowa. Kalivo unafuna za irana yabure owu yotolotcha ili yatene muwari mwa mwango waga watene otchena. Unawonga miyo gu Yehova.>>

Izaiya 66:20

Eto anerege atukula abalinyu atene anafwanyeya vilambo datene kaazegena wa miyo nnga yovelela vamentoni vaga. Aliba laleya ale anerege agweliha abalinyu vakavaloni, muatereladoni, vasikasoni, vaakavaruni, vaakameloni, kaazegena mwango waga otchena, Jeruzalemu. Anerege avelela nnga jinaira Ana Izarayeli kazagana jovelela jiwa jili mujombweni jotchenihiwa ira kavelele Nyumba ya Yehova. Unawonga gu Yehova.

Daniyeli 11:16

Evale mwene wa norti unoairela akuda suli ale jejo jinaafunana liye. Mwasiwa kalivo unafuna za wanda muhiyiha. Liye unodowa ilambo yotitimihiwa ya Izarayeli ira abwanyulege na kopolo daye.

Daniyeli 11:41

Eto unoza avolowe ilambo yotitimihiwa ya Izarayeli, aapemo matchikwi na matchikwi a atu. Mbwenye anafuna za vuluwa ba akuda Edomu na akuda Mowabe vamohi na akuda Amoni oindjiva.

Daniyeli 11:44

Mbwenye mwene wa norti ule avwa jowonga jokumela ikukuru ya norti na makumelo wa nzuwa, unoza arendjeye. Mwa enne liye unoza avenye na anyakondo aye muwari mwa uwali wohokala wa masika ira kadowe kaatolotchege atu adjindji.

Daniyeli 2:35

Eto noira enne, nlandaniho natene nenne nohobwanyuwaga roma momba ule, na ulongo ule, mukuwa, parata, vamohi na oru. Jatene jejo johotchileyaga nnga makata a mamburo obubudavo jalo tempu ya ilimwe, mutu avetaga tirigu. Mwa enne nipevo nohotukulaga jatene, aliwa dowagana fiyeda hahalavo yengo. Mbwenye nibwe nabubudile nlandaniho nne nohoulukulaga, aliwa fiyeda kala mwango mulukulu, aliwa fiyeda zala ilambo yatene ya vati agali ulukula.

Daniyeli 7:26

<<Mbwenye era eno, anamatonga anogarati vampandoni ira katonge eto anomuwaka utongi watene wanna liye ira utongi waye utolotchiwe ufiyede dimela mudimelelo.

Daniyeli 8:25

Muwari mwa joxangaxanga jaye, jonyenga jaye jinerege muwendela pama, jidowegeve musogolro. Liye vamentoni vaye unavionege nnga mutu ohokala wa masika. Unoatolotcha atu oindjiva morurumutcha mwene. Eto unovenya ira awane na Musogolrelri wa Asogolrelri Atene. Mbwenye unoza akotoliwe. Eto kotoliwa waye unafuna mukotola kanakala mutu.

Daniyeli 9:16

<<Nabwiya, voira nyo munairetcha jatene japama, nnouvepani mukwihe takaleliwa wenyu na uwali wenyu munna nyo zela sidadi yenyu ya Jeruzalemu, yenno inafwanyeya yagali mwango wenyu otchena. So Nabwiya, atu a vilambo dowandamelana anopeta sidadi ya Jeruzalemu eto anapeta mulogo wenyu na mwasa wa jotega jehu na jotega jasakanyile makolo ehu a wanle.

Daniyeli 9:20

<<Miyo diwongagave, dagali vari volobela, dilrapaga jotega jaga na jotega ja mulogo waga wa Izarayeli eto dinvepaga Yehova Mulugu waga ira avenyihede mwango waye otchena,

2 Tesalonika 2:4

Mulombwana wenno unoza awane eto unovitukulela nnga mutu oakwaranya amilugu atene anaahara atu nari jatene jinatamalela atu. Eto liye unoza agarati Nyumba ya Yehova, awongege ira: <<Miyo vano dili Mulugu.>>

2 Tesalonika 2:8

pa evale vanafuna oneyihiwa mulombwana wabure ule. Liye agazile, unolaba mabasaye ante vanafuna za Nabwiya Yesu mpa mulombwana wabure ule mowonga bahi eto unoza amutolotche muwari moza waye wotikiniha.

Jowandeliwa 13:10

Ule usakulriwe ira ahindiwe, unohindiwa. Ule usakulriwe ira apiwe na supada, unopiwa na supada. Jafiya eno, inafwanela atu otchenihiwa kakale ovilela eto kakale olimba mwa nroromelo.

Jowandeliwa 20:2

Vevale liye ohomuhinda daragawu, wenno unaitaniwa nyowa ya wanle nari Diyabo, nari Satana, liye mmanga ira akale omangiwene yaka 1.000.

Jowandeliwa 20:9

Aliwa kagamanle gumana muwari moira kawane kondo, anoza kakume ilambo yotandeleya ya ilambo ya vati ira karindje nimburo neno nnafuna kala atu otchenihiwa a Mulugu, sidadi yoziveliwiwa. Mbwenye aliwa kahanairena yengo ili yatene, zulu unoza ukume munlo, aze aatolotche atene.