2 Samuweli 23:5 - Mazu Otchena a Mulungu

⁵ Eto Mulugu unaza arelihe vande vaga na makalelo anno. Mwasiwa liye uhusakanya na miyo yopangana yohomala, yokwakwanela, yolimba. Dihikana ibaribari ira liye unodikamiheda eto unodivaha jatene jinafuna miyo!

2 Samuweli 23:5 ပူးပေါင်းရင်းမြစ်များ

Jenesesi 9:16

Muzirilimbo aoneya mmiramboni mule, miyo Mulugu damuona nnerege umbuwela yopangana yaga yohomala isakannye miyo na jatene ja ingumi jinafwanyeya ilambo ya vati.>>

2 Samuweli 12:10

Na mwasa oira weyo uhudilramwisa eto uhumuwaka Uriya nkuda Eti muhiyanaye ira akale muhiyanawo, nona kuma peno dowa sogolro supada nnakalegeve vande vawo.>

2 Samuweli 13:14

Mbwenye mulombwana Aminoni kafunileve vwa jejile. Voira liye ali wa kopolo mukwaranya murongoliye ule, ohomugonihaga momuhindela.

2 Samuweli 13:28

Evale Abisalawu ohawandelaga anamalabaye, liye ira: <<Nyo mwamuona mulombwana Aminoni aganna iyeziyezi, agali ohagalalene na vinyu, mwadivwa miyo duwandelani ira: <Kampeni!>, inafwanela mumpe. Kamuove, mwasiwa unaurumani gu miyo! Inafwanela mukale olimba kopolo ira muirena yenno inafuna miyo uwandelani.>>

2 Samuweli 18:14

Evale Jowabe ohowakulaga eraga: <<Miyo eto kadidibeliwege diwongaga na weyo eni!>> Evale ohotukulaga mwanango miraru, liye dowa nfwanya Abisalawu, liye mulatana mirimani agalive wa meswene zulu ule mmutengoni mwa karvaliyo mule.

2 Samuweli 7:12

<<Tchoira malambwawo kakwakwana ira udowe wavume na makolo awo, mundulri mwawo, muwari mwa ahimawo anafuna hala, miyo nnomuvenyiha mutu mmohi ira akale vamalroni vawo, eto miyo nnogarateyiha umwene waye.

2 Samuweli 7:18

Evale mwene Davi agavwile mazwale, ohovolowaga mMusasani mwa Yehova, liye garati vamentoni va Yehova, liye roma lobela eraga: <<Yehova Mulugu kodi miyo dili ani eto atu a vande vaga bani ira nyo mudifiyihe makalelo dinna miyo ala?!

1 Amwene 1:5

Evale Adoniya, mwana Davi wenno ambanle liye na Ajite, ohovitetelaga eraga: <<Miyo nnafuna dikale mwene.>> Evale ohovendaga aaterelado a kondo vamohi na aliba wendiha kavalo vamohi na alombwana 50 ira katamangege sogolro waye.

1 Amwene 11:38

Eto weyo wavwelela jatene jinaurumege miyo eto wakala mutu owenda mundilani mwaga eto wakala mutu oirana jofwanela vamentoni vaga, waharihaga mangano aga vamohi na malamulo aga nnga jairile namalaba waga Davi, miyo nnokala na weyo eto nnouvaha weyo na ahimawo ira mwaatongege aIzarayeli malambo a mukalakala.

1 Amwene 12:14

Liye ohara zelru yavahiwe liye na azombwe afwaye. Evale ohowongaga eraga: <<Babaga ohoukapatchihani mutolro onyemela. Mbwenye miyo nnafuna duwendjedeni nyemela wa mutolro wenyu. Babaga aububudetchani na iwaxuwaxu yopa vang'ono. Miyo mbwenye nnaububudegeni na iwaxuwaxu yokana minga.>>

Izaiya 11:1

Inoza ipwete yopwetela ya nigodo na Jese, ikala tambi inafuna pweta mmutchitchini mwaye.

Izaiya 27:6

Malambo anafuna za, Jako unoza apwetele mitchitchi. Izarayeli unoza apwetele eto akayena tondo. Eto ilambo yatene ya vati inoza izale na jovaha jaye.

Izaiya 4:2

Siku neno tambi ya Yehova inoza ikale yoriya, ya undimuwa. Jovaha jokumela teyani jinoza jikale hagalala no teteliwa wa atu ohala a Izarayeli.

Izaiya 54:10

Mwango aliwa podi susa, mikuma aliwa podi tonda mbwenye uzivelani waga kuza utchindjeya. Unokalave na weyo kala no kala. Yopangana yaga ya murendele kiza itchindjeya. Unawonga gu Yehova wenno unauwendelani tangaranga.>>

Izaiya 55:3

Mureye mabaru eto muze wa miyo. Mudivwe miyo vano ira mukayena ingumi. Miyo nnosakanya yopangana yohomala na nyo. Eto nnouonihani zivela waga wohotchindjeya nnga mwapanganne miyo na Davi.

Izaiya 61:8

Mwasiwa miyo Yehova, nnaziveliwa tonga wa ibaribari eto nnoida joba na jabure jatene. Muwari mororomeleya waga, nnoza daatambilrihe eto nnoza disakanye yopangana yohomala na aliwa.

Izaiya 7:14

Nona Nabwiya mwinnya unafuna auvaheni ionihedo. Kaing'anani, namwali ula ahagumanile na mulombwana unoza akayena vambani, ambale mwana wa mwanapongwe, anvahe nzina na Emanuwele.

Joira ja Anamarumiwa 13:34

<<Eto zela ibaribari ira Mulugu ohomuvenyiha Yesu mokwani eto ira liye kaza awelela kwa akoka, Mulugu ohowonga ira: <Miyo nnafuna duvaheni mareliho otchena, a ibaribari nnga damurelihile miyo Davi.>

Eberewu 13:20

Mulugu wa murendele unvenyihile mokwani Nabwiya wehu Yesu, Namakumbuza Mundimuwa wa mabila muwari mwa sangiri na yopangana yohomala auvaheni jatene japama jinafuneya ira nyo muwandege irana funa waye. Muwari mwa Yesu Kiristu, Mulugu anikamihedege irana jatene jili japama vamentoni vaye. Yesu Kiristu atamaleliwe kala no kala. Ame!

Eberewu 6:19

Yoing'anela yenno inna hiyo tchi yengo ya ibaribari inawanda hiyo hideda pama ira kalawo wehu ukale woimela wene mohokayikela. Tchoira yoing'anela yehu inodowa kwaranya kurtina ante volowa muwari mwa Nimburo Notchenetchetcha.

1 Samuweli 2:35

Eto nnomusakulra mutu mmohiwa ahali wa muibalini mwawo ira akale namakuta ororomeleya. Damusakulra, liye unerege irana jili mmirimani mwaga eto unerege irana jofuna jaga. Miyo eto nnoareliha ahimaye ira kalabege mabasaga a unamakuta vamentoni va mwene wenno unafuna miyo muhambiha kala no kala.

1 Samuweli 25:28

Nnouvepani ira mudikurumuwele yabure isakanyile miyo namalaba wenyu mwasiwa vasogolro Yehova unosakanya ira nyo mbwiyeni mukale mwene vamohi na ahima munaabalege nyo. Jatene ejo Yehova unoirana mwasiwa nyo mbwiyeni munowana mukondoni mwatene munaurumani Yehova. Kalawo wenyu watene, kamuza mufwanyeyana yabure ili yatene.