1 Samuweli 2:18 - Mazu Otchena a Mulungu

¹⁸ Mbwenye muzombwe Samuweli akaletchave wewule, alabaga mabasa a Yehova. Ora yenno liye owaretcha kuleti ya unamakuta yosakanyiwa na nguwo yapama.

1 Samuweli 2:18 ပူးပေါင်းရင်းမြစ်များ

2 Samuweli 6:14

Evale mwene Davi agamanle velela mukuto wa Yehova, ohoromaga ina na kopolo daye datene vamentoni va Yehova momutamalela. Eto mwa tempu yenne ali agawarile kuleti ya unamakuta yosakanyiwa na usalru wapama.

1 Koronika 15:27

Davi awarilege bata yosakanyiwa na usalru wapama wa yomela inaitaniwa linyu nnga bata dedo dawarile aLevi anno katukunle Kaxa ya Yopangana na anamaimba vamohi na mulombwana Kenaniya. Kenaniya ule ali musogolrelri wa atu katukunle Kaxa ya Yopangana eto ali musogolrelri wa anamaimba. Davi eto ohowara kuleti ya unamakuta yosakanyiwa na usalru wapama wa yomela inaitaniwa linyu.

Ezodu 28:4

Jowara jinafuna atu sakanya ti ji: yowara ya vamirimani, kuleti ya unamakuta, kapa, bata yokana jolremba ja usalru, tchapowa wa unamakuta vamohi na sintu nomangelela mmwinini. Amesilri ale kasakanye jowara jotchena jeji ira mbalawo Arawu vamohi na ahimaye kawarege kalabaga mabasaga a unamakuta.

1 Samuweli 14:3

Muwari mwa atu kafwanyeya na liye ale, mmohi ali namakuta wenno awaretcha kuleti ya unamakuta. Nzina naye ali Ayiya. Ayiya ali mwana Ayitube. Ayitube wenno afwanyeya agali Ikabu mbalaye eto ali mwana Fineyasi. Fineyasi eto ali mwana Eli, wenno ali namakuta wa Yehova ilambo ya Silo. Eto atu atene a Sawuli tchaiziwile ira Jonata ohovenyavo.

1 Samuweli 2:11

Noira eno, mulombwana Elikana na muhiyanaye Ana kohovenyihanaga, aliwa dowa waniwa ilambo ya Rama. Mbwenye mwanole Samuweli komuhiya Silo wewule, liye roma labaga mabasa a Yehova vamentoni va namakuta Eli.

1 Samuweli 2:28

Dohomusakulra liye muwari mwa malogo matene a Izarayeli ira akale namakuta waga, alabege vaibuwani, atumeyege jonukela eto ira awarege kuleti ya unamakuta alabaga mabasaga. Eto dohonvaha babawo Arawu ira liye na ahimaye kadjege johala jatene ja mikuto dotumeya vaibuwani, jejo jinavelela Ana Izarayeli.

1 Samuweli 22:18

Agwarda ale vakondilege atu apa anamakuta ale, Sawuli ohomuwandelaga mulombwana Dowege nkuda Edomu ule, liye ira: <<Kavenya weyo, waape anamakuta ala!>> Evale mulombwana Dowege ohovenya dowa apa anamakuta atenene anne kafwanyeya evale, romela mulombwana Aimeleki na abalaye atene. Mwa enne siku nenne kohopiwaga anamakuta 85, atene owara kuleti ya unamakuta.

1 Samuweli 3:1

Tempu yenne muzombwe Samuweli alabetcha mabasa a Yehova muwari mosogolrelriwa na namakuta Eli. Mwa tempu yenne Yehova kawongetcha na atu burebure eto kaaonihetcha jengo burebure atu mmuruni mwiwa.